Ya Kom Aksaokye Ma Jeova God El Orala in Molikomla?
“Insemwomwo [Jeova] Leum God lun Israel, tu el tuku a molela met sral.”—LUK 1:68.
1, 2. Ma upa su kut pulakin ke pal se inge el ku in pupulyukkinyuk nu ke mea? A kusensiyuk puspus fuka kut fwa akuteye?
SRIKE lumala ke nunak lom la kom oan ke sie bed ke loom onoa. Kom oasr ke sie infwokil nenela ke met puspus su keok ke mas sefwanna, sie mas upa su wangin ono su ku in unwela mas se inge. Ke pal se kom etauk la oasr sie taktu su kafweang yok in suk ke akwuk in ono su ku in orekmakinyuk in sang unwela mas se inge, paye la ma inge akkeye fwinsrak lom. Kom lungse na paye in etu ke fwako mwomwo lun orekma lun taktu se in koneak ono ka. Sie len, kom long la taktu se inge el koneak tari ono! Taktu se inge su koneak ono el orekmakin ku lal a pal yok lal in koneak ono su ku in unwela mas upa lun met puspus inge. Oiya fuka kom fwa akkalemye ka? Paye la kom akkalemye sunak a kulo wi kaksak lom nu sin mokul se inge su orala inkanek in molikomla a met mas puspus liki mise.
2 Kain in me pupulyuk se inge saap kut nunku mu alukela ma fwal, tusruktu kut nukewa pula na paye ma upa inge. Kais sie sesr oasr ke sie oiya su upa liki ma akkalemyeyuk ke me pupulyuk inge. Kut enenu na paye sie met molela. (Ridi Rom 7:24.) Jeova el kisekin ma se su arlana yok sripe in molikutla. Mwen nutal el kisekin pa ma puspus in kasre kut. Ke ma inge, lela kut in lutlutkin kusensiyuk akosr su yok sripe. Efu ku kut enenu me molela? Mea Jisus el orala in molikutla? Mea Jeova el orala in molikutla? A kut ku in akkalemye fuka la kut aksaokye me molela sin God?
Efu ku Kut Enenu Me Molela?
3. Fuka ma koluk el pupulyukkin nu ke sie mas upa?
3 In fwal nu ke sie akwuk in oeoe su tufwana orek, oasr sie mas upa su sikyak nu sin met ke mutanfwal puspus su uniye million puspus sin met in yea 1918. Oasr kain in mas saye su oru met in arlana sa in mise. Met pu na masak ka, tusruktu apkuran met nukewa su eis mas inge ku in mise.a Na fuka kut fwin srike ma koluk nu ke sie mas upa su oasr yen nukewa? Esam ke kas su simusyukla in Rom 5:12: “Ke ma inge, oana ke sie met ma koluk ilyuk nu fwalu, a mise ke ma koluk, a ouinge mise tuku nu fwin met nukemwa, meyen elos nukewa oru ma koluk.” Met nukewa elos masak ku eis ma koluk, meyen met sesumwos nukewa oru ma koluk. (Ridi Rom 3:23.) A met ekasr mise ke sripen ma koluk? Poul el simusla la ma koluk oru “met nukewa” in mise.
4. Mea nunak lun Jeova ke lusen moul lasr? A fuka nunak lal ka el tia oana sie ke nunak lun met puspus ka ke pal inge?
4 Met puspus ke pal inge elos nunku mu ma koluk a mise sikyak na pal nukewa a tia sie ma upa. Elos fosrnga yok ke mise su sa sikyak a tia ke pal se ma elos nunku mu e sikyak, tusruktu elos tia insese la mise lun metu ke sripen oiyen matou el “fwal in sikyak” pal nukewa. Metu elos arlana sa in mulkunla nunak lun God. Aok moul lasr ke pal inge arlana fototo liki ma God el lungse. Paye la, wangin kutena met su moul fwinne ke lusen “sie len” ke liye lun Jeova. (2 Piter 3:8) Kas lun God el akkalemye la moul lasr el arlana fototo oana maa su kapek a sa in masla, ku oana sie ok su sikyuk on ke kitin pal a na sarla. (1 Piter 1:24; Jemes 4:14) Kut enenu in nunku ka pal nukewa. Efu? Kut fwin kalem ke upaiyen “mas” su akkolukye kut, kut ku in akilen ke saokiyen me molela su oana “ono” se su ku in unwela mas lasr.
5. Mea kut tia insemwomwokin ke pal inge ke sripen ma koluk?
5 Kut enenu in kafweang in etu a kalem ka la mea ma koluk el oru nu sesr, tu kut in kalem ke fwako koluk upa lun ma inge. Ke sripen ma koluk kut tia engankin ma papa a nine kiyesr in pal meeta elos insemwomwokin tari. Aok Adam a If elos engankin moul sumwosmwos ke mutawauk. Ke sripen oasr nunak a mano sumwosmwos lalos, paenang elos ku in sruokye nunak, pulakin a orekma lalos. Ke ma inge elos ku in akkeye oiya mwomwo pal nukewa oana met kulansap lun Jeova God. Tusruktu elos tia oru ouinge, a elos pulesru me sang mwomwo inge ke moul ma patpat. Ke sripen elos oru sulela lalos in lain Jeova, pa paenang moul mwomwo su Jeova el lungse elos in moulkin tula lukelos a liki tulik nukewa natulos. (Genesis 3:16-19) Ke pal sepana, elos eis nu selos sifwana a nu sesr “mas” upa su kut sramsramkin inge. Ke sripe se inge, Jeova el selngawi elos. Tusruktu nu sesr, God el akkalemye nu sesr fwinsrak ke molela.—Sam 103:10.
Mea Jisus el Orala in Molikutla
6, 7. (a) Fuka Jeova el akkalemye meet la oasr ma enenu in kisekin ma yok sripe in molikutla? (b) Mea kut ku in lotela ke me kise su kisekinyuk sel Ebel a sin met oaru puspus su moul meet liki pal se su oasr tari Masap?
6 Jeova el etu la el enenu in kisekin ma se ma arlana yok sripe in molela tulik nukewa natul Adam a If. Ke kas palu su simusyukla in Genesis 3:15, kut lotela la mea eneneyuk in molela met nukewa. Jeova el orala akwuk in oasr sie “fute,” aok sie met molela, su ke pal fwasru el fwa kunausella Setan. Tusruktu, met molela se inge fwa sun me keok upa, meyen kapin niyel fwa kunausyukla. Oiya se inge el arlana ngal a ku in akmunasyel, tusruktu mea kalme paye lun kas inge? Mea Met Sulela Se lun Jeova el fwa muteng ka?
7 In molela metu liki ma koluk, met molela se el enenu in orala akwuk in iumwela metu, sie inkanek in sifwilpa akmwoye fototo lun metu nu sin God ke inkanek in akwanginyela fwako nukewa lun ma koluk. Mea eneneyuk nu ka? Oasr me akkalemye nu ka la sie me kise eneneyuk. Ke pal se Ebel, su met se meet su oaru nu sin God, el kisekin me kise ke kosro nu sin Jeova, Ebel el eis me insemwomwo lun God. Tok, met su sangeng sin God in pal meeta oana Noa, Ebream, Jekob, a Job elos kisekin pa me kise ke kosro, su akinsemwomwoye God. (Genesis 4:4; 8:20, 21; 22:13; 31:54; Job 1:5) Tokin century puspus, ke Masap su God el sang nu sel Moses, metu elos eis etauk yok la oasr ma eneneyuk in kisekin me kise lun kosro.
8. Mea met tol fulat el oru ke Len in Iumwe su orek yea nukewa?
8 Me kise su yok sripe emeet su sapkinyuk ke Masap pa me kise su kisekinyuk ke Len in Orek Iumwe yea nukewa. In len se inge, met tol fulat el orala orekma puspus su lumeyuk nu ke ma yok sripe puspus. El kisekin me kise puspus nu sin Jeova in akkalemye me iumwe nu ke ma koluk. Ma se meet in iumwela met tol nukewa, a tokin ma inge in iumwela pa met Israel nukewa su tia met tol. Met tol fulat el ilyuk nu ke infwokil Mutal na Mutal lun tempel, su ke len se inge mukena el ku in ilyuk nu luen infwokil se inge. In an se inge, el aksroksrokye sran kosro nu fwin tuptup in mwuleang. Kutupal oasr pukunyeng su saromrom a arlana kalem fwin tuptup se inge, su pukunyeng se inge akkalemye la Jeova God el oasr we.—Exodus 25:22; Livitikus 16:1-30.
9. (a) Ke len in Orek Iumwe, met tol fulat el petsaela su? A me kise su kisekinyuk el lumeyuk nu ke mea? (b) Orekma lun met tol fulat in ilyuk nu ke an Mutal na Mutal el lumeyuk nu ke mea?
9 Met sap Poul el eis kasru sin God in akkalemye kalmen orekma nukewa inge. El akkalemye la met tol fulat el lumeyuk nu sin Jisus Kraist su Messaia, a me kise nukewa el akkalemye ke me kise a mise lun Kraist. (Hibru 9:11-14) Me kise sumwosmwos se inge el orekmakinyuk in iumwela u luo sin metu, u lun met lili wiyen Kraist su piselos oasr ke 144,000 su fwa orekma oana met tol a “sip ngie.” (Jon 10:16) Ke pal se met tol fulat el ilyuk nu in an Mutal na Mutal, el petsaela Jisus su ilyuk nu in kosrao in akkalemye nu sin Jeova God saokiyen me kise lun lango.—Hibru 9:24, 25.
10. Kas palu lun Baibel el akkalemye la Messaia e fwa sun kain in ma upa fuka?
10 Kalem la, oasr me kise su arlana yok sripe el eneneyuk nu ke molela lun tulik nukewa natul Adam a If. Aok, Messaia el enenu in kisekin moul lal! Met palu puspus su akkalemyeyuk in Baibel elos simusla ma puspus ka. Ke sie me pupulyuk, met palu Daniel el simusla la “Messaia su Leum” fwa “sisila” ku anwuki, in “orek iumwe ke ma koluk.” (Daniel 9:24-26) Isaia el palye la Messaia fwa akkeokyeyuk, kantayuki, itungyuki, ku sringsring, in wisla ma koluk lun met nukewa su sesumwos.—Isaia 53:4, 5, 7.
11. Ke inkanek fuka puspus Mwen nutin Jeova el akkalemye la el lungse in kisekinul sifwana in akpayeye molela lasr?
11 Meet liki el tuku nu fwalu, Mwen sefwanna nutin God el etu la mea eneneyuk nu sel in oru in molikutla. El enenu in sun me keok puspus a enenu pa elan anwuki. Ke pal se papa tumal el luti nu sel ma paye nukewa inge, ya el srungela in akos ku el lainul? Mo el tia oru ma inge, a el akpusiselyel sifwana in akos masap lun Papa tumal. (Isaia 50:4-6) Oayepa, ke pal se el oasr fwin fwalu, Jisus el akos in akpayeye ma lungse lun Papa tumal. Efu? El akkalemye me top ke kas inge: “Nga lungse Papa.” El akkalemye pa me top saye ke kas inge: “Wangin lungse yurin met yok liki lungse se inge, tu sie met fwa filiye moul lal ke met kawuk lal.” (Jon 14:31; 15:13) Ke ma inge oasr molela lasr ke sripen lungse yok lun Mwen nutin Jeova. Fwinne el enenu in sang moul sumwosmwos lal, el insemwomwo in oru ma inge in akpayeye molela lasr.
Mea Jeova el Orala in Molikutla
12. Me kise lun lango el me akkalemyeyen lungse lun su? A efu ku el orala akwuk ke me lango?
12 Tia Jisus pa oru sulela lal ku orala akwuk in kisekin me kise lun lango. A, inkanek inge in molela metu pa ma yok sripe ke ma lungse lun Jeova. Met sap Poul el akkalemye la loang ke temple, an se ma me kise nukewa kisekinyuk we, el lumala ma lungse lun Jeova. (Hibru 10:10) Ke ma inge molela su kut eis ke inkanek lun me kise lun Kraist el ma se su kut sowemol meet sin Jeova. (Luk 1:68) Ma inge el me akkalemyeyen ma lungse lal a lungse yok lal nu sin metu.—Ridi Jon 3:16.
13, 14. Fuka me srikasrak lal Ebream el kasre kut in aksaokye ma Jeova el orala kesr?
13 Mea Jeova el kisekin in akkalemye lungse lal nu sesr ke oiya se inge? Arlana upa nu sesr in kalem ka. Tusruktu, oasr ma simusla in Baibel su ku in kasre kut in eis kalem ka ke inkanek yok. Jeova el siyuk a sapkin Ebream in oru ma se su arlana upa in oru, pa in kisekin mwen natul inge Isaak oana sie me kise. Aok, Ebream el sie papa su arlana kulang. Jeova el fwak nu sel kas inge kel Isaak: “Mwen sifwanna natum su kom lungse.” (Genesis 22:2) Ne ouinge, Ebream el kalem ka la in oru ma lungse lun Jeova el yok sripe liki lungse lal nu sel Isaak. Ebream el som a aksol. Tusruktu, Jeova el tia lela Ebream in oru ma se ma El fwa oru sie len. God el supwela sie lipufan in tulokinyel Ebream ke pal se meet liki el kisekin mwen nutal. Ebream el orala tari sulela lal in akos God fwinne arlana upa in oru, a el lulalfongi yok la inkanek sefwanna su el ku in sifwil liye tulik mokul fwusr se inge pa ke sifwil moulyuk. Tusruktu oasr lulalfongi yok lal la God el fwa akmoulyeak mwen natul. Aok, Poul el fwak la Ebream el sifwilpa eisel Isaak ke inkanek lun sifwil moulyuk “in sie me pupulyuk.”—Hibru 11:19.
14 Upa nu sesr in kalem ka inse ngal su Ebream el pulakin ke el akola in kisekin mwen nutul. Ke sie oiya, ma sikyak inge nu sel Ebream el sang kasru in lumala pulakin lun Jeova ke el kisekin mwen sefwanna natul su el pangon “Mwen kulo nutik.” (Mattu 3:17) Tusruktu, esam la ngal su Jeova el pula el upa liki inse ngal lal Ebream. El a Mwen nutul engankin asrouki a fototo mwomwo ke lusen million ku billion yea puspus. Mwen el insemwomwo in orekma yurin Papa oana “met orekma usrnguk” lal a oana met kaskas lal, paenang el pangpang “Kas.” (Soakas 8:22, 30, 31; Jon 1:1) Kut tia etu na paye ke pulakin lun Jeova ke el muteng in liye Mwen natul akkeokyeyuk, metu kaskas koluk nu sel, a ke saflaiye anwuki el oana sie met su orala ma koluk. Aok Jeova el muteng a mongfusrasr yok a kisekin ma yok sripe in orala akwuk nu ke molela lasr! Ke ma inge fuka kut ku in akkalemye la kut aksaokye me molela su God el orala?
Kom Ku In Akkalemye Fuka La Kom Aksaokye Me Molela?
15. Fuka Jisus el aksafyela orekma in iumwela metu? A mea fwako mwomwo lun orekma lal inge?
15 Jisus el akpayeye orekma yok sripe lal in iumwela metu tokin el akmoulyeyukyak a som nu in kosrao. Ke el sifwilpa oasr yurin Papa tumal, el akkalemye nu Sel saokiyen me kise lal. Ke ma inge oasr me insemwomwo puspus toko. Oasr nunak munas lun ma koluk, ma se meet nu ke ma koluk lun met akmusrala wiyen Kraist, a “fwalu nufon.” Ke sripen me kise inge, met nukewa su auliyuk na paye ke ma koluk lalos a fwasr tokin Jisus ku in engankin sie fototo mwomwo nu sin Jeova God. (1 Jon 2:2) Ma inge ku in orekma fuka nu sum?
16. Me pupulyuk fuka kut ku in orekmakin la efu kut enenu in aksaokye me molela su Jeova el orala nu sesr?
16 Lela kut in folokla nu ke me pupulyuk ke mutaweyen me lutlut se inge. Fwin taktu se su koneak ono nu ke mas upa el sramsram nu sin met mas nukewa ke infwokil sum a akkalemye nu selos kas inge: Kutena met mas su eis akwuk ke ono inge a oaru in orekmakin ono inge paye elos fwa akkeyela liki mas upa se inge. Tusruktu mea fwa sikyak fwin met mas puspus su wi kom elos srunga in orekmakin ma taktu se inge el fwak, meyen arlana upa in numla ono se ku in akpayeye akwuk nukewa ka? Ya kom fwa tia pa akos ma taktu el fwak, fwinne kom liye tari me akpayeye la ono se inge el orekma mwo? Mo kom tia oru ma elos oru! Paye la kom fwa akkalemye kas in kulo lom ke akwuk in ono se inge a akos akwuk nukewa lun taktu, a saap kom fwa fwak pa nu sin met puspus ke sulela su kom oru. Ke inkanek oapana inge, kais sie sesr enenu in akkalemye nu sin Jeova la kut aksaokye na paye me molela su el orala ke inkanek lun me kise lun lango lun Mwen nutul.—Ridi Rom 6:17, 18.
17. Ke inkanek fuka puspus kom ku in akkalemye kulo a kaksak lom nu ke ma nukewa su Jeova el orala in molikomla?
17 Kut fwin aksaokye ma Jeova a Mwen natul elos orala tari in molikutla liki ma koluk a mise, kut fwa akkalemye ma inge. (1 Jon 5:3) Kut fwa kafweang in lain kena koluk lasr in oru ma koluk. Kut fwa tia lela kena koluk lasr in oru kut in fuleak nu ke ma koluk a in tia moulkin moul luo su tuku ka. Kain in oiya inge el oana sie kut fwin fwak mu kut tia aksaokye me kise lun lango. A, kut fwa akkalemye kulo wi kaksak lasr ke kut kafweang yok in nasnas ye mutun God. (2 Piter 3:14) Kut fwa akkalemye ma inge ke kut fwakak nu sin met puspus ke fwinsrak mwomwo lasr ke me molela. Ke ma inge elos ku in moulkin moul nasnas ye mutun Jeova a e fwa oasr fwinsrak lalos ke moul ma patpat. (1 Timote 4:16) Paye la arlana fwal kut in orekmakin pal kewa a ku kewa lasr in kaksakin Jeova a Mwen nutul! (Mark 12:28-30) Nunku ke ma inge! Kut fwa ku in ngetla nu ke pal fwasru su kut fwa akkeyela ke inkanek nukewa liki ma koluk. Kut fwa ku in moulkin moul su God el lungse kut in engankin. Aok, moul sumwomswos ma patpat, ke sripen ma nukewa su Jeova el orala in molikutla!—Rom 8:21.
[Footnote]
a Mas se inge Spanish influenza el akkalemyeyuk mu pulakinyuk sin met puspus su oasr percent 20 nu ke 50 ke pisen met nukewa fwin fwalu in pal san. Mas se inge el uniye met puspus su oasr ke percent 1 nu ke 10 lun met nukewa su eis mas se inge. Ke oiya saye, mas se inge Ebola el tia sikyak pal nukewa, tusruktu ke pal se metu masak ka, ma inge uniye apkuran met nukewa su eis mas inge.
Kom E Topuk Fuka?
• Efu kom enenu na paye me molela ke pal inge?
• Fuka oiya lun Jisus su lungse in kisekunul sifwana el kasre kom?
• Mea pulakin lom ke me sang lun Jeova ke me kise lun lango?
• Mea kom lungse na paye in oru in akkalemye kulo lom ke akwuk lun Jeova ke me molela?
[Picture on page 29]
Ke Len in Orek Iumwe, met tol fulat lun met Israel el lumala ke orekma saok lun Messaia
[Picture on page 30]
Orekma lal Ebream su lungse in kisekin mwen nutal el luti kut ke me kise lun Jeova su yok sripe liki