Me Kasrup Su Tuku Sin God Me

KOM fwin oaru nu sin God, ya el fwa akinsemwomwoye kom ke me kasrup? Kut ku in fwak mu el ku, tusruktu el fwa akinsemwomwoye kom saap tia ke me kasrup su kom nunku ka. Srike nunku kel Mary, nine kiyen Jisus. Lipufan se inge Gabriel el sikyak ye mutal a fwak nu sel la el “arulana akinsemwomwoyeyuk” sin God a el fwa oswela Mwen nutin God. (Luk 1:28, 30-32) Tusruktu, el tia kasrup. Ke pal se Mary el kisekin me kise tokin Jisus el isusla, el sang “luo mwule fwusr, ku turtledoves,” su pa inge ma met sekasrup elos kisekin pal nukewa nu sin Jeova.​—Luk 2:24; Livitikus 12:8.

Ke sripen Mary el sekasrup, ya ma inge kalmekin la God el tia akinsemwomwoyel? Mo tia ouinge, meyen ke pal se el som nu yurol Elisabet, sou lal, “Elisabet el tingtinginu ke ngun mutal a el kaskas ke pusra lulap, a fwak: ‘Insemwomwo kom [Mary] in masrlon mutan u, a insemwomwo fwokin insiom!’” (Luk 1:41, 42) Aok Mary el akinsemwomwoyeyuk ke sripen el pa nine kiyen Mwen kulo nutin God fwin fwalu.

Jisus el tia pa sie met kasrup. Jisus el isusla sin papa a nine su sekasrup a el matula ke sie an su met su muta we tia pa kasrup, a el sifwana el sekasrup pa ke lusen moul lal nufon. Oasr sie pal el fwak nu sin sie met su lungse in met tuma lutlut lal: “Oasr luf lun kosro foks, a oasr ang lun mwon yen engyengu, a Mwen nutin met wangin an sifwel on we.” (Luk 9:57, 58) Ne ouinge, ma Jisus Kraist el oru ke el tuku na fwalu el ku in kasru met tuma lutlut nukewa lal in eis kain in me kasrup yok. Met sap Poul el simusla: “El ekla sekasrup keyumwos, tu komwos fwa kasrup ke sekasrup lal.” (2 Korint 8:9) Kain in me kasrup fuka Jisus el sang nu sin met tuma lutlut lal? A kain in me kasrup fuka oasr yurosr ke pal inge?

Kain in Me Kasrup Fuka?

Me kasrup ke mani a ma saok puspus el ku in kutongye sie met in akkeye lulalfongi lal, meyen sie met kasrup el ku in lulalfongi ke mani lal a tia nu sin God. Jisus el fwak: “Fuka upayen nu sin met kasrup tu elos in ilyuk nu in togusrai lun God!” (Mark 10:23) Ke ma inge, kalem la, me kasrup su Jisus el lungse in sang nu sin met tuma lutlut nukewa lal tia ma saok puspus lun fwalu.

Aok, pus sin met Kristian in pal meeta elos sekasrup. Ke pal se oasr sie met ngusr el siyuk mani sel Piter, el fwak nu sel: “Wangin silfer a gold yuruk, a ma oasr yuruk nga sot nu sum: In en Jisus Kraist lun Nasaret, kom tuyuk a fwasr!”​—Orekma 3:6.

Kas lun met tuma lutlut Jemes el akkalemye pa la met puspus su wi ke congregation in pal meeta elos sekasrup. El simula: “Komwos porongo, met lili kulo luk. Ya God el tia sulelosla su sekasrup in ma lun fwal se inge, tu elos in kasrup in lulalfongi a met usru lun togusrai, su el mwuleung nu selos su lungse el?” (Jemes 2:5) Sayen ma inge, met sap Poul el fwak pa la tia met puspus su “lalmetmet fwal nu ke ikwe” ku “met puspus su ku” ku “met puspus su leum” pangonyuk in wi ke congregation lun met Kristian.​—1 Korint 1:26.

Fwin me kasrup su Jisus el sang nu sin met tuma lutlut lal el tia me kasrup paye lun fwalu, na kain in me kasrup fuka el sang nu selos? Ke sie leta su Jisus el supwela nu ke congregation lun an Smurna, el fwak: “Nga etu asor lom, a sekasrup lom, tusruktu kom kasrup.” (Fwakyuk 2:8, 9) Met Kristian fwin an Smurna fwinne elos sekasrup, tusruktu oasr yurolos sie me kasrup su yok liki silfer a gold. Elos kasrup ke sripen lulalfongi lalos a oaru lalos nu sin God. Lulalfongi el arlana saok meyen “tia met nukewa lulalfongi.” (2 Tessalonika 3:2) Nu selos su wangin lulalfongi elos sekasrup ye mutun God.​—Fwakyuk 3:17, 18.

Me Kasrup Su Tuku Ke Lulalfongi

Tusruktu, ke inkanek puspus fuka lulalfongi el arlana saok? Met nukewa su lulalfongi nu sin God elos eis me insemwomwo ke “gaspen kulang lal a mongfusrasr lal a muteng lal.” (Rom 2:4) Elos insemwomwo pa meyen oasr ‘nunak munas lun ma koluk lalos’ ke sripen lulalfongi lalos ke me kise lun lango lun Jisus. (Efesus 1:7) Sayen ma inge, oasr etauk lalos la “kas lun Kraist” itukyang nu selos nukewa su oasr lulalfongi. (Kolosse 3:16) Ke elos pre nu sin God wi lulalfongi, “misla lun God” fwa liaung insielos a nunak lalos a oru elos in insemwomwo yok.​—Filippai 4:7.

In wekunang nu ke me insemwomwo nukewa inge, met nukewa su filiye lulalfongi lalos nu sin God ke inkanek lun Jisus Kraist, oasr fwinsrak mwomwo lalos in moul ma patpat. Arlana eteyuk sin met puspus kas inge lun Jisus Kraist: “Tu God el lungsel fwalu ouinge, tu el ase Mwen siefwanna isusla natul, tu el su lulalfongel fwa tia tula, a el fwa eis moul ma patpat.” (Jon 3:16) Fwinsrak mwomwo inge eis me akkeye yok fwin sie met el eis etauk sumwos ke Papa a ke Mwen, meyen Jisus el fwak pa la: “A pa inge moul ma patpat, tu elos fwa ete kom God paye mukefwanna, a Jisus Kraist su kom supalma.”​—Jon 17:3.

Aok me insemwomwo puspus lun God el me akkeye yok nu ke fototo lasr nu sel, oasr pa me insemwomwo lasr nu sesr in akkeye nunak a pulakin lasr, oasr pa ma lane nu ke manosr. Ke sie me pupulyuk, nunku ke me insemwomwo su pulakinyuk sin Dalídio su muta fwin an Brazil. Meet liki el lotela ke etauk sumwos ke akwuk lun God, oasr oiya koluk lal meyen el lungse in numla wain alukela ma fwal pal nukewa. Oiya koluk lal inge akkolukye fototo lun met nukewa ke sou lal. Sayen ma inge, el arlana keok ke mani. El mutawauk in lutlut Baibel yurin Met Lo lun Jeova a el ekulla na paye inkanek in moul lal.

Ma nukewa su Dalídio el lotela ke Baibel el kasrel in sisla oiya koluk lal. El kapkapek na paye in moulkin moul fwal nu ke akwuk sumwosmwos lun Baibel paenang el fwak, “Meet nga lungse in som nu ke bar nu ke bar; ingena nga som nu ke loom nu ke loom.” El sroang pa nu ke orekma lun pioneer in luti met ke Kas lun God. Ke sripen el ekulla moul lal paenang ma inge akkeye manol in fokoko pal nukewa a el tila keok ke mani. Dalídio el fwak la, “Mani su nga orekmakin in pal somla in moli me nimnim, nga orekmakin ingena in kasru met enenu puspus, a in moli ma puspus su nga enenu.” El koneak pa met kawuk puspus ke el asrouki yurin met puspus su oasr pa yurolos nunak lun God ke ma puspus. Ke pal inge Dalídio el engankin misla ke nunak a el insemwomwo yok meet liki el eis etauk ke God.

Sie pa me pupulyuk mwomwo pa Renato, el eis me insemwomwo yok ke el akkeye lulalfongi lal nu sin God. Fwin kom liyel ke pal inge engan a israsr pal nukewa, arlana upa in lulalfongi la el sun ma upa a keok sin kutu met in pal meeta. Ke pal se el tufwana isusla, nine kiyel el som lukel. Filiyuki el ke sie bag ye sie siya, a oasr kinet puspus lal a fut lal srakna oan kel. Oasr mutan luo su fwasryak we elos liye bag se inge on mukuikui ye siya se. Elos nunku mu oasr met filiye luen bag sa soko kisrik ngao a likiye we. Ke pal se elos liye ma mukuikui se inge tu nu tulik srisrik se, na elos usella nu in loom ono su oan apkuran in unwella.

Sie sin mutan luo inge el Met Lo lun Jeova, a el fwak nu sin sie mutan su pangpang Rita, siepa Met Lo, ke awowo se inge. Rita el oswela tari tulik puspus su mise, a oasr tulik mutan sefwanna natul su moul. Ke sripe se inge, el lungse na paye in oasr tulik mokul natul, ke ma inge el nutela Renato.

Rita el fwak nu sel Renato ke el srakna tulik srisrik la tia el pa nine na paye kiyel. Tusruktu el karunginul na paye a akkalemye lungse nu sel a el kafweang yok in lotel ke akwuk mwomwo lun Baibel. Ke el matula kutu, el mutawauk in eis etauk yok ke Baibel. Kulo lal yokyokelik ke inkanek mwomwo su el moliyukla liki ma upa ke el tulik srisrik. El tung pal nukewa ke el ridi kas lal Devid inge: “Ke papa tumuk a nine kiuk elos fwasr liki yu, na Jeova El a fwa srukyuyuk.”​—Sam 27:10.

El lungse in akkalemye kulo lal ke ma nukewa su Jeova el oru nu sel, paenang Renato el mwulela moul lal a baptaisla in yea 2002 a el sroang nu ke orekma lun pioneer ke yea toko. Ne ke pal inge el soenna etu la su papa a nine kiyel na paye a saap el tia ku in etu ma inge. Tusruktu, Renato el pula la me sang saok se meet su el eis pa ke el etu a in oasr lulalfongi nu sin Jeova oana Papa tumal su kulang a nunku kel.

Saap kom lungse in oasr fototo mwomwo nu sin God, su ku in akinsemwomwoye moul lom ke inkanek yok. Aok, oasr pal mwomwo lun met nukewa, met kasrup a sekasrup in oasr fototo mwomwo nu sin Jeova God a Jisus Kraist. Fototo mwomwo inge nu sin God el tia oru kut in eis me kasrup yok, tusruktu ma inge ku in oru in oasr inse misla a insemwomwo yok ke moul lasr su mani nukewa fwin fwalu tia ku in moli. Kas inge in Soakas 10:22 el arlana paye: “Insemwomwo lun Jeova me akgasrupye met, a el tia esani toasr nu ka.”

Jeova God el arlana insemwomwo ke met nukewa su tuku a kalukyang nu sel: “O ke kom in nu porongo masap luk! Na misla lom oana sie infwal, a sumwosmwos lom oana noa in mwea.” (Isaia 48:18) A el mwulela la elos nukewa su tuku nu sel ke inse a oiya sumwos fwa akinsemwomwoyeyuk ke inkanek yok: “Molin fwokpap a sangeng sin Jeova, me kasrup, a sunak, a moul.”​—Soakas 22:4.

[Picture on page 5]

Fwinne elos sekasrup, sou lal Jisus fwin fwalu akinsemwomwoyeyuk sin God ke inkanek yok