Ya God El Wulela Nu Sum Ke Me Kasrup?

‘God el lungse kom in kasrup​—in oasr sitosa okum, a sie business na mwomwo. Kom enenu na in lulalfongi nu sel, ikasla wallet lom, a sang mani nukewa su kom ku in sang nu sel.’

PA INGE kas in akkeye su orekmakin sin alu puspus in an Brazil, in oana ke ma akkalemyeyuk ke sie newspaper fwin an se inge. Met puspus elos lulalfongi a orekmakin kas inge. Oasr sie magasin su pangpang Time akkalemye ke sie akwuk in survey ke met puspus su fwak mu elos met Kristian orek in an Merika, akkalemye kas inge: “Oasr percent 61 sin met su lulalfongi mu God el lungse metu in kasrup. A oasr percent 31 . . . elos insese la kom fwin sang mani lom nu sin God, God el fwa akinsemwomwoye kom ke mani pukanten.”

Kain in lulalfongi inge lun met puspus su pangpang me luti ke alu in kapkapek ke moul, oru na paye met puspus in lulalfongi ka yokna fwin an Latin-America, oana an Brazil. A metu elos lungse na paye in wi ke alu su wulela nu sin metu la God el fwa akinsemwomwoyelos ke mani pukanten fwin elos oru ma inge. Tusruktu ya God el wulela na paye me kasrup nu selos su kulansapul? Ya met kulansap nukewa lun God in pal meeta elos met kasrup?

Paye la in ma Simusla, kut ku in ridi la God el akinsemwomwoye met puspus lal ke me karup puspus. Ke sie me pupulyuk, kut ku in rid kas inge in Duteronomi 8:18: “Kom fwa esam Jeova God lom, tu el fwa sot nu sum ku in eis me kasrup.” Kas inge akkeye met Israel la fwin elos akos God, el fwa oralos oana sie mutanfwal kasrup.

Na fuka nu sin kais sie met kulansap lun God? Job sie met kulansap oaru lun God el arlana kasrup, a tokin Setan el eisla lukel me kasrup nukewa lal, Jeova el sifwilpa folokonak me kasrup lal Job “pal luo ma on yurol meeta.” (Job 1:3; 42:10) Ebream el met kasrup pa. Genesis 13:2 el akkalemye la “el arlana kasrup ke kosro muna, ke silfer, a ke gold.” Ke pal se oasr togusra akosr tukeni nu sie elos sruokilye Lot, Ebream el “kol un met meun lal, su isusla in loom sel, met tolfoko sengoul oalkosr.” (Genesis 14:14) Arlana kalem la sou lal Ebream el sou na lulap a pukanten met, meyen oasr pa met meun 318 lal ‘su sumat in orekmakin me meun.’ Ke sripen el ku in sang ma enenu lun met nukewa inge ke sou lal, ma inge akkalemye la el sie met su arlana kasrup, su oasr un kosro puspus.

Aok, met kulansap puspus lun God in pal meeta, oana Ebream, Isaak, Jekob, Devid, Solomon, a kutupa elos kasrup. Tusruktu, ya ma inge el kalmekin la God el fwa akkasrupye met nukewa su kulansap nu sel? Ke oiya saye, fwin sie met el sekasrup, ya ma inge me akpayeye la God el tia akinsemwomwoyel? Me lutlut toko fwa akkalemye me top nu ke kusensiyuk nukewa inge.