Kas lun Jeova el Moul
Kas Fulat su Tuku ke Leta lal Jon a lal Jud
LETA tolu lal met sap Jon su simusyukla fwin an Efesus, in yea 98 C.E., oasr ke buk puspus safla in Baibel. Ke leta luo meet lal el sang me akkeye nu sin met Kristian elos in kafweang in fwasr ke kalem a in lain me luti kikiap. Ke leta aktolu, Jon el akkeye met Kristian in fwasr ke ma paye a el akkeyelos pa in akesrui sie sin sie.
Ke leta lal su simusyukla in an Palestine, saap in yea 65 C.E., tumulel lal Jisus su pangpang Jud el sang kas in sensen nu sin met Kristian nukewa ke met koluk puspus su ilyuk nu ke congregation, a el sang kas in kasru la fuka in lain me akkoluk puspus inge. Kut fwin loang akmwoye nu ke kas in kasru ke leta tolu lal Jon inge a ke ma simusla lal Jud su kut ku in eis me kasru ka in tu ku ke lulalfongi lasr fwinne oasr me lain puspus sikyak.—Hibru 4:12.
KAFAWEANG IN FWASR KE KALEM A KE LUNGSE A KE LULALFONGI
Jon el simusla leta se meet lal nu sin met lili nukewa ke congregation, a el sang kas in kasru mwomwo in akkeye met Kristian elos in tu ku in lain me luti kikiap a elos in tu ku ke ma paye a ke ma sumwosmwos. El akkalemye yok ke ma enenu nu ke kafweang in fwasr ke kalem a ke lungse a ke lulalfongi.
“A kut fwin fwufwasryesr in kalem, oana El [God] in kalem, kut aengune yurin sie sin sie,” Jon el simusla. A ke sripen God pa Sropon lungse, met sap se inge el fwak: “Lela kut in lungse sie sin sie.” Aok “lungse lun God” akkeye kut in “liaung masap lal,” a kut kutangla fwalu ke inkanek lun “lulalfongi lasr” nu sin Jeova God, ke Kas lal, a ke Mwen nutal.—1 Jon 1:7; 4:7; 5:3, 4.
Kusensiyuk Puspus Ke Ma Simusla Eis Top Ka:
1 Jon 2:2; 4:10—Ke inkanek fuka Jisus el “sie me iumwe”? Kalmeyen orekma se inge in me iumwe pa in “akmisyela” ku “oru sie met in tia mulat.” Jisus el sang moul lal oana sie me kise a me iumwe meyen ke el oru ma inge, el akfwalye ma eneneyuk nu ke nununku sumwosmwos. Ke sripen me kise se inge, God el ku in akkalemye pakoten, a el ku in sang nunak munas nu selos nukewa su filiye lulalfongi lalos nu sin Jisus.—Jon 3:16; Rom 6:23.
1 Jon 2:7, 8—Masap fuka Jon el sramsramkin oana “masap matu” a “masap sasu”? Jon el sramsramkin masap ke lungse lun met lili nukewa su lungse in kisekin moul lalos. (Jon 13:34) El akkalemye la ma inge el “matu” meyen Jisus el sapkin tari ma inge ke yea 60 meet liki Jon el simusla leta se meet lal. Ke ma inge, masap inge el oasr tari yurin met lulalfongi nukewa ke “mutamweyen” moul lalos oana met Kristian. Masap inge el “sasu” pa meyen sie met Kristian el enenu in ‘lungse met lili wiyel oana el sifwana’ a ke kain in lungse inge oasr ma eneneyuk nu ka in kisekin moul.—Livitikus 19:18; Jon 15:12, 13.
1 Jon 3:2—Ma fuka “soenna fwakyuk” nu sin met Kristian akmusrala, a elos fwa liye “oana el sifwana”? Ma su soenna fwakyuk nu selos pa ke oiya su fwa sikyak nu selos ke pal se elos akmoulyeyukyak nu in kosrao su manolos tila oan in ikwe a in ngun. (Filippai 3:20, 21) Tusruktu, ma elos etu ka pa “ke pal se su [God] el akkalemyeyuk [elos] fwa ekla oana el, meyen [elos] fwa liyel oana ke mwolanu lal,” kalme pa, “ke Ngun.”—2 Korint 3:17, 18, New World Translation.
1 Jon 5:8—Fuka kof, sra, a ngun sang ma lo ke ma paye la “Jisus pa Mwen nutin God”? Kof el sang ma lo meyen ke pal se Jisus el eis baptais lal in kof, Jeova el akkalemye insemwomwo Lal kel oana Mwen Natul. (Mattu 3:17) Sran Jisus, ku moul lal, itukyang oana “me mol ke met e nukewa,” a ma inge akkalemye pa la Jisus el Mwen nutin God. (1 Timote 2:5, 6) A ngun mutal el sang me akpayeye la Jisus pa Mwen nutin God ke pal se ma inge putati nu fwel ke pal in baptais lal, in kasrel “fwufwasryesr in orek ma mwo, a in akkeyelosla nukewa su kemkatu ke Devil.”—Jon 1:29-34; Orekma 10:38.
Me Lutlut Nu Sesr:
1 Jon 2:9-11; 3:15. Fwin sie met Kristian el lela kutena ma ku kutena met in kunausla lungse lal nu sin met lili, el fwufwasryesr in losr, a el tia etu an se su el som nu we.
KAFWEANG IN “FWASR KE MA PAYE”
Jon el sramtauk leta akluo lal ke el fwak: “Met elder nu sin mutan sulosula sa a tulik natul.” El akkalemye engan lal ke el etu la “kutu sin tulik [natul] elos fwufwasryesr ke ma paye.”—2 Jon 1, 4.
Tokin el akkalemye kas mwomwo in akkeye lungse, Jon el simusla: “Pa inge lungse, tu kut in fwasr tokin masap lal.” Jon el sang pa kas in sensen ke “met kutasrik a met lain Kraist.”—2 Jon 5-7.
Kusensiyuk Puspus Ke Ma Simusla Eis Top Ka:
2 Jon 1, 13—Su “mutan sulosula”? Jon el ku in sramsramkin sie mutan su el pangon Kyria, su pa inge kas Grik nu ke “mutan.” Ku el orekmakin kas in pupulyuk in simusla nu sin sie congregation in akfosye met koluk su orek me kalyai nu selos. Fwin paye ma se akluo inge, tulik nutin mutan inge pa met nukewa su wi ke congregation a “tulik nutin mutan wiyel” pa met su wi ke congregation saye.
2 Jon 7—Jon el sramsramkin ke oiya fuka ke “tuku” lun Jisus ke fus se inge, a fuka met kutasrik elos “tia fwakak” ma inge? “Tuku” se inge el tia sramsramkin nu ke tuku lun Jisus ke pal fwasru su tia liyeyuk sin metu. A, ma inge pa tuku lal ke ikwe a ke pal se el akmosrala oana Kraist. (1 Jon 4:2) Met kutasrik elos tia lulalfongi ke tuku se lal in ikwe inge. Saap ke sripen elos fwak mu Jisus el tia moul fwin fwalu ku elos tia lulalfongi la el akmosrala ke ngun mutal.
Me Lutlut Nu Sesr:
2 Jon 2, 4. Etauk lasr ke “ma paye,” sang kalem nu ke me luti paye nukewa nu sin met Kristian su oasr in Baibel, el yok sripe nu sesr a ke kafweang lasr in orekmakin ma inge el yok sripe nu ke molela lasr.—3 Jon 3, 4.
2 Jon 8-11. Kut fwin srunga in tula “lungkulang, pakoten a misla su on yurosr sin God Papa a sin Jisus Kraist,” a ke asrouki mwomwo lasr yurin met lili nukewa, kut enenu in “liyekutyang” in mutana ke me luti lun Kraist a kut in tia paing a tia asrouki nu sin met nukewa su “tia mutana in me luti lun Kraist.”—2 Jon 3.
“KUT IN MET OREKMA YUROLOS KE MA PAYE”
Jon el simusla leta aktolu lal nu sin sie met kawuk lal su pangpang Gaius. El simusla: “Wangin engun luk yok liki engun se inge, in long tu tulik nutik elos fwufwasryesr in ma paye.”—3 Jon 4.
Jon el kaksakunul Gaius meyen el “oaru in kutena orekma” in kasru met lili puspus. Met sap se inge el fwak: “Fwal nu sesr in esalos su oinge, tu kut in met orekma yurolos ke ma paye.”—3 Jon 5-8.
Kusensiyuk Puspus Ke Ma Simusla Eis Top Ka:
3 Jon 11—Efu ku oasr kutu met elos akkalemye ella koluk? Ke sripen elos tia aksaokye me luti paye lun met Kristian, paenang met oinge elos tia liye God ke mutun insielos. Ke sripen elos tia ku in liye God ke mutalos, paenang elos orekma a nunku mu God el tia liye orekma koluk lalos.—Ezikiel 9:9.
3 Jon 14—Su “met kawuk” su sramsramkinyuk ke fus se inge? Kas se inge “met kawuk” el orekmakinyuk pa nu selos su engankin fototo mwomwo lalos nu sin sie sin sie. Jon el orekmakin ma inge nu sin met lili nukewa.
Me Lutlut Nu Sesr:
3 Jon 4. Met lili su fukoko ke lulalfongi ke congregation elos pulakin me insemwomwo yok ke elos liye la met fwusr su wi ka elos “fwufwasryesr ke ma paye.” A paye la papa a nine elos ku in pulakin pa me insemwomwo su wangin ma oana ke elos eis kutangla ke kasru lalos nu sin tulik nukewa nutulos in oana met kulansap lun Jeova!
3 Jon 5-8. Met lili puspus su orekma upa in kasru met lili wiyelos ke sripen lungse yok lalos nu selos a nu sin Jeova pa met elder su muteta nu ke congregation puspus, missionary puspus, met lili su orekma ke Bethel ofus, a nu selos su wi ke orekma lun pioneer. Arulana fwal in etawi lulalfongi lalos, a fwal kut in akkeyelos a kasrelos.
3 Jon 9-12. Kut enenu in etawi me srikasrak lun met lili oaru se inge su pangpang Demetrius, a tia mokul seoaru se inge Diotrefis su lungse in torkaskas, a sie met su lungse in kaskas ma kikiap ke met lili puspus.
“KARUNGINKOMWOSYUNG KE LUNGSE LUN GOD”
(Jud 1-25)
Jud el akkalemyelos su akkolukye congregation oana “met torkaskas a met sufwan, fwufwasryesr ke lungse koluk lalos.” “Oalulos fwak kas sramlap, a elos sayai met ke mol.”—Jud 4, 16.
Fuka met Kristian elos ku in lain me akkoluk puspus? Jud el simusla: “Met kulu, komwos esam kas su met sap lun Leum lasr Jisus Kraist.” El akkalemye pa: “Karunginkomwosyang in lungse lun God.”—Jud 17-21.
Kusensiyuk Puspus Ke Ma Simusla Eis Top Ka:
Jud 3, 4—Efu ku Jud el kaifwe met Kristian elos in “srukye ku lulalfongi”? Meyen ‘oasr kutu met koluk su tia kulansap nu sin God elos ilyuk nu ke congregation.’ Mokul inge elos ‘ekulla kulang lun God nu ke lung lun ikwe.’
Jud 20, 21—Fuka kut ku in “karunginkutyang in lungse lun God”? Kut ku in oru ma inge ke inkanek tolu: (1) ke kut musai kut sifwana fwin “lulalfongi” ke inkanek in moniyuk in lutlutkin Kas lun God a in moniyuk in wi ke orekma in sulkakin peng mwo; (2) ke inkanek in pre siyuk ke “ngun mutal,” a akfwalye moul lasr nu ka; a (3) ke inkanek in akkalemye lulalfongi ke me kise lun lango lun Kraist, su ku in kasre kut in eis moul ma patpat.—Jon 3:16, 36.
Me Lutlut Nu Sesr:
Jud 5-7. Ya met koluk elos ku in kaengla liki nununku lun Jeova? In fwal nu ke me srikasrak tolu su sikyak in pal meeta su Jud el simusla, elos tia ku in kaengla liki ma inge.
Jud 8-10. Kut enenu in etawi me srikasrak lal Maikael leum lun lipufan a lela kut in akkalemye sunak nu sin met nukewa su Jeova el srusrngiye.
Jud 12. Met luti kikiap nukewa su orek luma mu oasr lungse lalos elos me sensen yok nu ke lulalfongi lasr, a elos oana eot in tukulkul ye kofu a el me sensen nu sin oaku a met kofkof. Met luti kikiap elos akkalemye mu elos kulang, tusruktu elos oana pukunyeng su wangin koanon kof ka, meyen elos munas na paye ke lulalfongi. Kain in met inge elos oana sak masla ke pal in fwol su wangin fwako ka. Elos enenu in kunausyukla, a in fufyak okalos. Arulana mwo kut in srunga a fwasr liki met luti kikiap nukewa.
Jud 22, 23. Met Kristian paye elos srunga ma koluk. Met elder ke congregation elos enenu in kafweang in molela kutu met lili su “alolo” ke e in kunausla ma patpat. A met liaung inge elos enenu in kasrelos in sifwilpa akkeye lulalfongi lalos.
[Pictures on page 12]
Kof, ngun, a sra sang ma lo aa me akpayeye la “Jisus pa Mwen nutin God”