Mea Kut Lotela Kel Jisus

Ke Oiya Su Kut Akkalemye Nu Sin Met Puspus Saye

Efu ku enenu in akkalemye kulang?

Ya kom akkalemye kulang fwinne ke pal se metu elos sekulang nu sum? Kut fwin lungse in etawel Jisus, kut enenu in akkalemye kulang fwinne nu sin met su srungekut. Jisus el fwak: “A komwos fwin lungsumwos elos su lungselos komwos, mea me mol lomwos? Tu met koluk elos ouyepa lungselos su lungse elos . . . A komwos in lungsumwos met lokwalok lomwos . . . , a komwos fwa mwen nutin el su Fulat Liki Nukewa, tu el kulang nu selos su tia kulo a su koluk.”​—Luk 6:32-36; 10:25-37.

Efu ku in sang nunak munas?

Kut fwin oru ma koluk, kut lungse God in nunak munas nu sesr. Jisus el luti la arulana mwo a fwal nu sesr in pre siyuk ke nunak munas lun God. (Mattu 6:12) Tusruktu, Jisus el fwak pa la God el fwa nunak munas nu sesr mukena fwin kut inse mulala in sang nunak munas nu sin met puspus saye. El fwak: “Komwos fwin nunak munas nu sin met ke ma koluk lalos, Papa tumomwos su in kosrao el fwa ouyepa nunak munas nu sumwos; a komwos fwin tia nunak munas nu sin met ke ma koluk lalos, Papa tumomwos el fwa tia nunak munas nu sumwos ke ma koluk lomwos.”​—Mattu 6:14, 15.

Fuka sou puspus ku in insemwomwo?

Fwinne Jisus el tia payuk ke kutena pal, kut ku in lutlut yok kel in oana ke ma el oru nu ke moul in sou in insemwomwo. Ke kas lal a ke orekma lal el oakiye me srikasrak mwomwo nu sesr in etawi. Loang akmwoye nu ke me lutlut tolu toku:

1. Sie mokul payuk el enenu in lungse mutan kiyel oana manol sifwana. Jisus el oakiye me srikasrak nu sin mokul payuk nukewa. El fwak nu sin met tuma lutlut lal: “Sie masap sasu Nga sot nu sumwos, tu komwos in lungsumwos sie sin sie; aok oana Nga lungsik komwos.” (Jon 13:34) In orekmakin akwuk inge nu sin mokul payuk nukewa, Baibel el fwak: “Mokul tuma, komwos in lungse mutan kiomwos, oana Kraist el ouyepa lungse surs [“congregation,” NW], a sifwana esalang ka . . . Oinge mwo tu mokul tuma elos in lungse pa mutan kiyelos sifwana oana manolos sifwana. El su lungse mutan kiyel sifwana el sifwana lungse el, tu wangin met srunga ikwel sifwana; a el oakoakel a saokel, oana Kraist el oru ouyepa ke surs.”​—Efesus 5:25, 28, 29.

2. Mokul a mutan su payuk elos enenu in oaru nu sin sie sin sie. Orekma in osun ke mano lun mokul a mutan su tia payuk el sie ma koluk lain God a kunausla moul in sou. Jisus el fwak: “Ya komwos sumwena rid . . . ‘Ke ma inge sie met el fwa fwasr liki papa a nine, a fwa fulyung nu sin mutan kiel, a eltal inge fwa ekla ikwe siefwanna’? A ou inge eltal tia sifwel luo, a ikwe siefwanna. Ke ma inge ma God el fwalseni, lela met in tia eselik. . . . A nga fwak nu sumwos, el su fwa sisla mutan kiel, fwin tia ke kosro, a fwa mari siena, el orek kosro, a el su mari mutan sa ke el sisila, el orek kosro.”​—Mattu 19:4-9.

3. Tulik nukewa elos enenu in akos papa a nine kiyelos. Fwinne Jisus el sumwosmwos a papa a nine kiyel elos sesumwos, oana sie tulik el aksoltal. Baibel el fwak ke Jisus el yea 12 matwe: “A el oelultal [papa a nine kiyel] tufuki, a tuku nu Nasaret; a el aksoltal.”​—Luk 2:51; Efesus 6:1-3.

Efu ku mwo in orekmakin akwuk nukewa inge?

In fwal nu ke me lutlut puspus su el luti nu sin met tuma lutlut lal, Jisus el fwak: “Komwos fwin etu ma inge, komwos insemwomwo komwos fwin oru ma inge.” (Jon 13:17) In ekla sie met Kristian paye, kut enenu in orekmakin kas in kasru su Jisus el ase nu sesr ke oiya se su kut akkalemye nu sin met puspus saye. El fwak: “Ke ma se inge met e nu kemwa fwa etu tu komwos met tumuk lutlut, komwos fwin lungsumwos sie sin sie.”​—Jon 13:35.

Ke kutupa me akuteye, srike liye sapta 14 lun buk inge What Does the Bible Really Teach? (Mea Baibel el Luti Na Paye?)a

[Footnote]

[Picture on page 16, 17]

Me pupulyuk lal Jisus nu sin tulik sinuntei sa el me luti nu sesr ke yok sripeyen kulang a in akkalemye nunak munas.—Luk 15:11-32

[Picture on page 17]

Mokul a mutan su payuk elos enenu in oaru nu sin sie sin sie