Kutangla Ma Upa Nukewa Su Sikyak Ke Orekma In Luti Peng Mwo Ke Sie Loom Nu Ke Sie Loom
“Kut akpulaikye kut ke kasru lun God lasr in fwakak nu sumwos mwosasu lun God wi kafweang yok.”—1 TESSALONIKA 2:2.
1. Kain in ma upa puspus fuka Jeremaia el sun, a fuka el ku in kutangla ma upa nukewa inge?
JEREMAIA el sie met su oasr kain in pulakin inge yurol in oana pulakin lasr. Ke pal se Jeova el akkalemye nu sel ke kunokon lal el an orekma oana “sie met palu nu sin mutanfwalu,” el wowoyuk ma lulap: “We, Leum Jeova! Liye, nga tia etu fuka in kaskas, tu nga tulik.” Fwinne oinge, ke sripen el lulalfongi Jeova, paenang el eis kunokon yok sripe se inge. (Jeremaia 1:4-10) Ke lusen pal se su pus liki yea 40, Jeremaia el sun met puspus su srunga in long, elos pulesrel, kaskaskou nu sel, a oasr met puspus su unel a oru ma koluk nu sel. (Jeremaia 20:1, 2) Oasr kutu pal el lungse in fuleak a tui tia oru kunokon lal. Tusruktu, el mongfusesr a kafweang in akkalemye nu sin met puspus kas lun God su elos srunga na paye in long ke kas inge. Ke kasru su tuku ke ku lun God, Jeremaia el akpayeye orekma se su el tia ku in aksafyela fwinne ke ku lal sifwana.—Ridi Jeremaia 20:7-9.
2, 3. Ke inkanek fuka met kulansap lun God ke pal inge elos sun kain in ma upa puspus su oana ke Jeremaia el sun?
2 Met kulansap puspus lun God ke pal inge elos ku in pula pa kain in pulakin lal Jeremaia. Ke pal se elos nunku in oru orekma in luti peng mwo ke sie loom nu ke sie loom, oasr kutu sesr nunku mu, ‘Nga tia ku in oru kain in orekma se inge.’ Tusruktu, ke pal se kut insese ka la ma lungse lun Jeova pa kut in fwakak peng mwo, kut kutangla ke kain in nunak inge a kut kafweang in orekmakin pal yok lasr in sulkakin peng mwo. Fwinne oinge, pus in masrlosr sun kain in oiya puspus ke moul lasr su oru in upa in tafwela orekma in sulkakin peng mwo kutu pal. Paye la upa in sramtauk orekma in sulkakin peng mwo ke sie loom nu ke sie loom a in oru ma inge pal nukewa nu ke safla.—Mattu 24:13.
3 Fuka fwin kom lutlutkin Baibel yurin Met Lo lun Jeova a kom wi ke meeting puspus lun congregation tusruktu kom alolo in mutamwauk in wi ke orekma in sulkakin peng mwo ke sie loom nu ke sie loom? Fuka fwin kom sie sin Met Lo su baptais tari tusruktu srakna upa nu sum in wi ke orekma in fwakak peng mwo sie loom nu ke sie loom, fwinne kom ku in oru ma inge? Kom ku in lulalfongi la oasr met lili puspus su tuku ke kain in sruf a oiya puspus su elos pulakin tari kain in oiya puspus inge a elos kutangla ma upa puspus ke orekma in fwakak peng mwo ke sie loom nu ke sie loom. Ke kasru lun Jeova, kom ku in oru pa orekma se inge.
Akpulaikye Kut Ke Kasru lun God
4. Mea sang kasrel Poul su met sap in fwakak peng mwo ke inkanek pulaik?
4 Paye la kom akilen la orekma in luti su orek fwin fwalu nufon el akpayeyuk, tia ke sripen ku a lalmetmet lun met, a ke ngun mutal lun God. (Zekaraia 4:6) Oiya se inge el paye pa nu ke orekma in fwakak peng mwo lun kais sie met Kristian. (2 Korint 4:7) Nunku kel Poul met sap. Kut ku in esam la ke pal se el a missionary su welul ke orekma elos kalyaiyuk sin met lain puspus, el simusla: “Ke kut keok a akkolukyeyuk tari in Filippai . . . kut akpulaikye kut ke kasru lun God lasr in fwakak nu sumwos mwosasu lun God wi kafweang yok.” (1 Tessalonika 2:1, 2, NW; Orekma 16:22-24) Saap kut tia nunku mu sie met orekma su moniyuk oana Poul fwa oasr pal upa nu sel in fwakak peng mwo paenang el enenu kafweang yok in oru ma inge. Fwinne oinge, oana kut nukewa, Poul el enenu in lulalfongi kel Jeova in kasrel in fwakak peng mwo ke inkanek pulaik. (Ridi Efesus 6:18-20.) Fuka kut ku in etawi me srikasrak lal Poul?
5. Mea sie inkanek su ku in akpulaikye kut ka in sulkakin peng mwo?
5 Sie inkanek su ku in akpulaikye kut pa ke inkanek lun pre. Oasr sie sister su oru orekma lun pioneer el fwak: “Nga pre siyuk ngan ku in sramsram, nga pre siyuk in kasre yu nga in ku in sramsram sun insien metu, a nga pre siyuk ngan ku in pulakin insemwomwo ke orekma luk in luti peng mwo. Aok, orekma se inge el ma lun Jeova, a tia ma lasr, ke ma inge wangin ma kut ku in oru ka fwin wangin kasru lal.” (1 Tessalonika 5:17) Kut nukewa enenu in pre pal nukewa in siyuk ke kasru sin God in ase ngun mutal lal in akpulaikye kut in sulkakin peng mwo.—Luk 11:9-13.
6, 7. (a) Aruruma fuka Ezikiel el liye, a mea kalmen ma inge? (b) Kain in me lutlut mwomwo fuka tuku ke aruruma se lal Ezikiel nu sin met kulansap nukewa lun God ke pal inge?
6 Buk lal Ezikiel el akkalemye pa sie ma su ku in kasre kut in kaskas ke inkanek pulaik. Ke sie aruruma, Jeova el sang nu sel Ezikiel sie buk limlim su oasr ma simusyukla ka “eoksra a memelil, tung in asor yok” a fwak nu sel in kangla ma inge, a fwak: “Mwen nutin met, oru insiom in kang, a nekla kainfokom ke limlim se inge su Nga sot nu sum.” Mea kalmen aruruma se inge? Ezikiel el enenu in etu na paye ke kas lun God su el enenu in fwakak nu sin metu ka. Ma inge enenu in on ke nunak a insiel, su sang kasru nu ke pulakin lal. Met palu se inge el akkalemye pa: “Na nga kangla, a oana unni in oalik ke emem.” Orekma in fwakak kas lun God nu sin met puspus el sie me akengan nu sel Ezikiel—oana ke sie met el kang unni su oru el an insemwomwo ka. El pulakin la sie kunokon na mwomwo pa in aol Jeova a in akpayeye orekma se inge su God el sapkin nu sel in oru, fwinne el enenu in fwakak kas in nununku upa nu sin met puspus su srunga in long.—Ridi Ezikiel 2:8–3:4, 7-9.
7 Oasr me lutlut yok sripe ke aruruma se inge nu sin met kulansap nukewa lun God ke pal inge. Oasr pa kas in sensen upa su kut enenu in akkalemye nu sin met puspus su tia aksaokye pal nukewa ke yok sripaiyen orekma lasr inge. Kut enenu in rid a lutlutkin kas lun God pal nukewa in kasre kut in oasr nunak mwomwo lasr pal nukewa nu ke orekma in luti lasr la orekma se inge el ma tuku sin God me. Fwin kut lutlut ke kais kutupal na a tia pal nukewa ma inge tia ku in kasre kut in eis ma lane yok ke Kas lun God. Ya kom ku in akmwoye akwuk lom sifwana in rid a lutlutkin Baibel? Ya kom ku in nunku yok pal nukewa ke ma kom rid ka?—Sam 1:2, 3.
Inkanek Mwo in Mutamwauk ke Me Sramsram lun Baibel
8. Kain in inkanek fuka kasru kutu met su sulkakin peng mwo lun Togusrai elos in mutamwauk in oru me sramsram lalos nu sin met puspus ke Baibel ke sie loom nu ke sie loom?
8 Nu sin met orekma puspus, oasr oiya upa nu ke orekma in fwakak peng mwo ke sie loom nu ke sie loom ke pal se meet elos oru sramsram lalos nu sin met in loomu. Aok, ke kutu an paye la sie ma upa nu sin met lili puspus elos in mutamwauk ke sie me sramsram. Kutu sin met orekma elos pulakin mu mwo a fusrasr in sramsram nu sin met ke srungul lalos fwin elos orekmakin kas mwomwo ke mutamweyen sramsram lalos a tokin ma inge elos sang tract nu sin met in loomu, oana ma akkalemyeyuk ke pok se ke me lutlut se inge. Sifwen me sramsram lun me rid ku petsa su oasr ka a tun mwomwo su oasr ka fwa ku in oru sie met in loomu in loang akmwoye nu ka, pasis ma inge ku in orala pal mwomwo lasr in akkalemye la efu kut tuku nu yurolos ke kas fototo a kut in ku in siyuk sie kusensiyuk. Siepa inkanek su ku in orekmakinyuk pa in akkalemye nu sin met in loomu ke kain in tract tolu ku akosr a siyuk selos in sulela la piya ka ma elos lungse. Aok, niyen sun lasr pa in tia filiye mukena tract ke loom nukewa, a kut enenu in mutamwauk in oru me sramsram lasr nu selos ke Baibel su ku in kol nu ke sie lutlut lun Baibel.
9. Efu ku akola mwomwo el yok sripe?
9 Ke kutena inkanek su kom orekmakin, akola mwomwo lom nu ka fwa kasre kom in tia tufwal a ku in akinsemwomwoye orekma lom in sulkakin peng mwo ke sie loom nu ke sie loom. Oasr sie brother su oru orekma lun pioneer el fwak: “Nga pulakin insemwomwo yok fwin Nga akola na paye. Ma inge kasre yu ngan arulana lungse in fwakak me sramsram se su nga akola.” Siepa pioneer el fwak, “Fwin nga etu na paye koanon me rid puspus su nga fwa kitela nu sin met, ma inge oreyu ngan lungse na paye in orekmakin me rid inge ke me sramsram luk.” Aok oasr kutu ma lane yok nu sum kom fwin kalweni ke inkanek misla ma kom e fwa fwak, tusruktu met lili puspus elos koneak la oasr me kasru yok fwin elos akpa in fwakak me sramsram lalos ke pusra lulap. Oiya se inge kasrelos in sang ma mwolana yok lalos nu sin Jeova.—Kolosse 3:23; 2 Timote 2:15.
10. Mea ku in orek in oru tukeni nu ke orekma lun forfor in oasr me kasru yok a mwo nu ka?
10 Tukeni meet liki orekma lun forfor el sang me kasru yok nu ke inkanek mwomwo a ke me insemwomwo lasr nu ke orekma in luti ke sie loom nu ke sie loom. Fwin daily text el kupasr nu ke orekma in sulkakin peng mwo, ma inge ku in ridiyuk a akuteyuki. Tusruktu, brother se su karungin akwuk nu ke orekma in forfor el enenu in orekmakin pal fwal in akuteye a akkalemye sie me lumala fusrasr su fwal nu ke territory san ku in sramsramkin kutupa me lutlut mwomwo su ku in orekmakinyuk ke orekma in sulkakin peng mwo in len san. Kain in tukeni oinge ku in sang kutupa me kasru nu selos nukewa su wi ka elos in ku in orekmakin sie ma lo mwomwo. Ke inkanek in akola mwomwo ke pal sa, met elder a kutupa met lili su kol kain in tukeni inge elos ku in akpayeye ma inge a elos ku in aksafyela tukeni inge ke pal fwal.—Rom 12:8.
Mea Kut Ku In Akpayeye Kut Fwin Loang Mwo
11, 12. Fuka loang in long metu ku in kasre kut in sun met puspus ke peng mwo? Akkalemye ke me pupulyuk.
11 Sayen akola mwomwo su ku in kasre kut in oru sie me sramsram ke Baibel nu sin met a in sun insiyelos kut enenu in akkalemye engan a insemwomwo paye lasr nu selos. Sie inkanek su ku in akkalemye insemwomwo paye lasr pa kut fwin loang akmwoye nu selos. Oasr sie traveling overseer el fwak: “Fwin oasr akkalemyeyen mongfusesr a in oasr engan a insemwomwo in loang nu sin met puspus fwa ku in oru elos in loang akmwoye nu ke peng mwo, a pa inge sie inkanek mwo in akkalemye engan a insemwomwo yok lasr nu sin met puspus.” Kut fwin loang in long a kut akkalemye la kut pula pa ma elos pula ke ma elos fwak fwa ku in oru elos in akkalemye lungse lalos in sramsram nu sesr ke Baibel, oana ke ma experience toko akkalemye.
12 Ke sie leta su akkalemyeyuk ke sie newspaper su pangpang Le Progrès, in an Saint-Étienne, France, oasr sie mutan su akkalemye ke tuku lun met luo su tongtong ke srungul lal a ma se inge sikyak arlana fwal nu ke me asor yok lal su el pulakin ke pal fototo somla ke sripen tulik mutan se natul su malem tolu matwe el mise. “Nga sa na in akilen la elos Met Lo lun Jeova,” el simusla. “Nga akola tari in fwak nu selos in som ke inkanek kulang, tusruktu Nga liyeak buk srisrik se su elos lungse in sang nu sin metu. Buk srisrik se inge el sramsramkin la efu ku God el lela me keok in sikyak. Ke ma inge Nga fwak nu selos in utyak nu in loomu meyen nga lungse in akkalemye la ma elos fwak el tia sumwos. . . . Paenang met Lo inge elos muta ke lusen ao se kutu. Elos loang mwo nu ke ma nga fwak a elos akkalemye pakomuta lalos nu sik, a ke pal se elos som, Nga pulakin la nga eis me akkeye ka paenang nga insese nu selos in sifwilpa foloku muteta yuruk.” (Rom 12:15) Tia pat mutan se inge el insese in oasr lutlut lun Baibel orek nu sel. Kut ku in lotela ma mwomwo ka la ma el esam ke muteta se meet inge pa, tia ke ma met lo luo elos fwak, a ke inkanek mwomwo su elos long.
13. Fuka kut ku in akfwalye me sramsram lasr ke peng mwo nu sin met puspus su kut osun nu se?
13 Kut fwin loang in long a akkalemye la kut pakomutalos, paye la kut oru inkanek tu elos fwa ku in fwak nu sesr la efu ku kut enenu Togusrai lun God. Ma inge oru kut in eis pal mwomwo lasr in akkalemye peng mwo nu selos. Kom ku in liye la met su fwakak mwo ke peng mwo pal nukewa pa elos su lungse in loang nu sin metu. (Soakas 20:5) Elos akkalemye insemwomwo yok nu sin met nukewa su elos sun ke orekma in luti lalos. Elos suk in simusla inelos a address lalos a elos simusla pa ma puspus su elos insemwomwo ka a ke me lutlut su enenu in akkalemyeyuk nu selos. Fwin oasr sie met su siyuk kusensiyuk ke sie me lutlut, elos oru research a sa in folokla nu yurulos in akkalemye ke ma elos lotela ka. In oana met sap Poul, elos akfwalye kas in mutamwauk lalos ke peng mwo lun Togusrai nu sin met puspus su elos osun nu se. (Ridi 1 Korint 9:19-23.) Kain in nunak paye inge oru met puspus in loang akmwoye nu ke peng mwo a elos etawi ke inkanek mwomwo “pakoten lulap lun God lasr.”—Luk 1:78.
Akkalemye Nunak Mwomwo Pal Nukewa
14. Ke kut akpayeye orekma lasr in sulkakin peng mwo, fuka kut ku in etawi oiya mwomwo lun Jeova?
14 Jeova el akkalemye la el aksaokye kut oana met se met se ke el ase nu sesr sukosok in oru sulela lasr sifwana. Fwinne el sie God Ku liki Ku, el tia patok kutena met in kulansap nu sel a el akkeye metu fwal nu ke lungse, a el akinsemwomwoye met puspus su akkalemye kulo a insemwomwo lalos nu ke akwuk mwomwo nukewa lal. (Rom 2:4) Oana met kulansap lal, kut enenu in akola pal nukewa in akkalemye peng mwo ke inkanek su mwo a fwal ye mutun God lasr su pakoten ke pal nukewa kut sang ma lo nu sin metu. (2 Korint 5:20, 21; 6:3-6) Ke ma inge, kut enenu in akkalemye nunak a oiya mwomwo pal nukewa nu sin met nukewa ke territory lasr. Mea ku in kasre kut in akpayeye ma inge?
15. (a) Mea Jisus el sapkin nu sin met sap nukewa lal elos in oru fwin metu elos pilesru peng mwo? (b) Mea ku in kasre kut in nunku yok ke orekma in koneak met puspus su mwo a fwal?
15 Jisus el sapkin met tuma lutlut lal elos in tia nunku yok fwin oasr kutu met su tia long peng mwo tusruktu elos enenu in nunku yok in suk met nukewa su fwal a mwo. (Ridi Mattu 10:11-15.) Kut fwin oakiye akwuk mwomwo fwinne ke ma srisrik fwa ku in kasre kut in akpayeye ma inge. Oasr sie brother el pupulyukkunul sifwana nu sin sie met su sukok oil, gold, ku kutupa eot saok saye. El fwak la pal nukewa, “Nga fwinsrakkin mu nga ku in koneak gold ke pal inge.” Oasr siepa brother su niyen sun lal pa “in sun sie met mwo su fwa akkalemye insemwomwo lal nu ke muteta se meet su el oru ke kais sie wik a in sifwil foloko nu yurol in akkeye insemwomwo lal tokin kutu len.” Kutu sin met orekma elos kafweang in ridi fwinne sie fus in Baibel nu sin kais sie met in loomu fwin ku. Kain in niyen sun mwo fuka kom ku in oru nu sum sifwana?
16. Sripe puspus fuka oasr yurosr in tafwela in sulkakin peng mwo pal nukewa?
16 Fwako mwomwo nu ke orekma in luti peng mwo ke sie loom nu ke sie loom el tuku ke oiya mwomwo su akkalemyeyuk nu sin met puspus, a sayen ma inge oasr pa kutu sripe. Aok, orekma in sulkakin peng mwo el sang kasru yok nu ke molela lun met puspus su mwo insielos, tusruktu ma inge el orekmakinyuk pa nu ke sripe saye su arulana yok. Orekma lun met Kristian in sulkakin peng mwo el kasre kut in oasr pal mwomwo nu sesr in akkalemye lungse lasr nu sin Jeova. (1 Jon 5:3) Orekma inge el kasre kut in aknasnasye kut liki sran met nukewa. (Orekma 20:26, 27) Ma inge el sang me sensen nu sin met puspus su tia sangeng sin God la “aur in nununku lun [God] el summu tari.” (Fwakyuk 14:6, 7) Yok liki nukewa, ke inkanek lun orekma in luti peng mwo, inen Jeova el kaksakinyuk fwin fwalu nufon. (Sam 113:3) Ke ma inge, fwin metu elos long ku tia, kut enenu in akkalemye pal nukewa peng mwo lun Togusrai. Paye la, orekma nukewa lasr in sulkakin peng mwo el sie ma saok a katolana ye mutun Jeova.—Rom 10:13-15.
17. Ke pal na fototo fwasru mea metu elos fwa ku in akilen na paye?
17 Fwinne oasr met puspus ke pal inge su pilesru orekma lasr in sulkakin peng mwo, tia pat elos fwa akkalemye nunak su tia oana sie nu ke nunak lalos in pal meeta nu ka. (Mattu 24:37-39) Jeova el akkalemye nu sel Ezikiel la ke pal se nununku lal nukewa su el fwakak el akpayeyuk tari, met Israel nukewa su seakos elos fwa “etu tu oasr sie met palu in maslolosr.” (Ezikiel 2:5) Ke inkanek oinge, ke pal se Jeova el oru nununku lal nu ke akwuk nukewa ke pal inge, metu fwa akilen la kas a peng mwo nukewa su Met Lo lun Jeova elos fwakak ka nu sin met puspus yen nukewa a ke sie loom nu ke sie loom el tuku sin God paye mukefwanna, Jeova, a Met Lo nukewa elos met kulansap paye nu sel oana met tutafpo lal. Sie kunokon na mwomwo pa inge kut in us inel a fwakak kas lal ke pal yok sripe se inge! Ke kasru lal, lela kut in sruokye ku a tafwela in eis kutangla ke ma upa nukewa su sikyak nu ke orekma in luti peng mwo ke sie loom nu ke sie loom.
Kom E Topuk Fuka?
• Fuka kut ku in akpulaikye kut in sulkakin peng mwo?
• Mea ku in kasre kut in sramteak sie me sramsram ke Baibel ke orekma in luti peng mwo ke sie loom nu ke sie loom?
• Fuka kut ku in akkalemye nunak a insemwomwo paye nu sin met puspus?
• Mea ku in kasre kut in sruokye sie nunak mwomwo nu sin met nukewa ke territory lasr?
[Box/Picture on page 15]
Sie Inkanek in Sramteak Me Sramsram Lun Baibel Yurin Metu
Inkanek mwo in sramteak:
◼ Tokin kom paing met in loom san, kom ku in sang sie tract nu sel a fwak, “Sripen tuku luk misengeu pa in akkalemye nu sum ke sie kas mwo su oasr me akkeye ka su tuku ke me lutlut yok sripe se inge.”
◼ Ku kom ku in sang sie tract a fwak, “Nga tuku in muteta ke kitin pal meyen nga lungse in etu la mea kom nunku ke sifwe ku me lutlut se inge.”
Fwin met el eis tract:
◼ Tokin kom tui ke kitin pal, siyuk sie kusensiyuk la mea met in loom san el nunku ke sifwen tract se inge.
◼ Loang akmwoye, a suk inkanek in koneak la mea na paye oasr ke nunak lun met in loom san. Akkalemye kas in sang kulo nu ke me top lal a srike in sramsramkin ma inge ke pal in lutlut toku.
Inkanek mwo in tafwela me sramsram nu sin metu:
◼ Ridi a akuteye sie ma simusla ku kutupa ma simusla, a akfwalye me sramsram lom an in fwal nu ke ma met se el nunku a insemwomwo ka.
◼ Fwin met se el akkalemye insemwomwo lal nu ke me lutlut, sang sie me rid ku buk nu sel a akkalemye sie akwuk nu ke lutlut lun Baibel fwin ku. Orala akwuk in sifwil folok.