‘Kaskaskin Kas lun God ke Pulaik’
“Elos . . . tingtinginu ke ngun mutal, a elos pulaik in fwak kas lun God.”—OREKMA 4:31.
1, 2. Efu ku kut enenu in kafweang in orekmakin inkanek mwo nu ke orekma in luti peng mwo?
LEN tolu meet liki el mise, Jisus el fwak nu sin met tuma lutlut puspus lal: “A mwosasu inge lun togusrai fwa sulkakinelik fwin fwalu nufon tu in ma lo nu sin mutanfwal nu kemwa; a na safla a fwa tuku.” Meet liki el somwak nu in kosrao, Jisus su akmoulyeyukyak tari el sapkin met tuma lutlut nukewa lal in ‘oru met in mutunfwal nukewa in met tuma lutlut, a luti nu selos in liaung ma nukewa su el sapkin nu selos.’ El mwulela nu selos la el fwa welulos ‘pal e nukewa nu ke saflaiyen akwuk nukewa lun fwalu.’—Mattu 24:14; 26:1, 2; 28:19, 20.
2 Oana Met Lo lun Jeova, kut lungse in wi pal nukewa ke orekma se inge su sramtauk in century se meet. Orekma in luti peng mwo lun Togusrai a in oru met tuma lutlut su ku in molela moul lun met puspus pa orekma su yok sripe emeet su oasr fwin fwalu. Ke ma inge, arlana yok sripe kut in etu orekmakin inkanek mwo ke orekma in luti lasru! Ke me lutlut se inge, kut fwa eis etauk la fuka kolyuk lun ngun mutal el kasre kut in kaskas ke pulaik pal nukewa ke kut wi fwakak peng mwo. Me lutlut luo toko fwa akkalemye la fuka ngunin Jeova ku in kol kut in luti ke inkanek mwo a in sulkakin peng mwo pal nukewa.
Kut Enenu in Pulaik
3. Efu ku kut enenu oiyen pulaik in oru orekma in luti peng mwo lun Togusrai?
3 Orekma lasr in sulkakin peng mwo lun Togusrai su God el sapkin nu sesr el arlana yok sripe a wangin ma oana. Tusruktu, kutu pal tia fusrasr in oru. Aok, kutu met ke pal inge elos lungse in long ke peng mwo ke Togusrai lun God, tusruktu met puspus elos oana met in pal lal Noa. Elos ‘tia loang akmwoye nu ke pal se sronot tuku a wiselosla nukewa,’ Jisus el fwak. (Mattu 24:38, 39) Oayepa oasr met puspus su kaskaskou ku lain kut. (2 Piter 3:3) Me lain ku in tuku sin met kol lun anu, sin tulik lutlut ku met su wi kut orekma, ku sin met in sou lasr. Sayen ma inge, oasr pa me munas lasr sifwana, oana oiyen mwekin a sangeng sin met la elos fwa pulesre kut. Aok oasr oiya puspus su ku in oru in upa nu sesr in kaskaskin kas lun God ke “pulaik.” (Efesus 6:19, 20) Mongfusrasr a kafweang in kaskaskin kas lun God enenu oiyen pulaik. Mea ku in kasre kut in oru ma inge?
4. (a) Mea se inge oiyen pulaik? (b) Met sap Poul el akkeye pulaik lal fuka in kaskas nu sin met Tessalonika?
4 Kas Grik su lungasla nu ke “pulaik” el kalmekin “pulaik in kaskas, paye in sramsram.” Kas se inge el kalmekin nu ke “pulaik, lulalfongi yok, . . . a wangin sangeng.” Tusruktu oiyen pulaik el tia kalmekin nu ke oiya koluk su wangin sunak. (Kolosse 4:6) Fwinne kut pulaik, kut lungse pa in orek misla nu sin met nukewa. (Rom 12:18) Sayen ma inge, ke kut sulkakin peng mwo ke Togusrai lun God, kut enenu in orekmakin oiyen pulaik wi inkanek mwo in sramsram tu kut in tia aktukulkulye met. Aok, kut fwin lungse in akkeye oiyen pulaik lasr, kut enenu pa in kafweang in akkeye oiya mwomwo puspus saye. Tusruktu in akkeye kain in oiyen pulaik inge, kut tia ku in fungla nu ke ku lasr sifwana. Tokin met sap Poul a met puspus su welul elos ‘sun me kalyai upa fwin an Filippai,’ fuka elos ‘akkeye pulaik’ in kaskas nu selos su oasr in Tessalonika? ‘Ke kasru lun God lasr,’ Poul el akkalemye. (Ridi 1 Tessalonika 2:2.) Jeova God el ku in akwanginyela sangeng lasr a el ku in akpulaikye kut pa.
5. Fuka Jeova el sang pulaik nu sel Piter, Jon, a met tuma lutlut saye?
5 Ke pal se “met leum [lun metu] a met matou a met sim,” elos lain orekma lun met sap, Piter a Jon elos fwak: “Fwin fwal ye mutun God in poronge komwos yok liki God, komwos nununku. Tu ketal koflanu tia fwak ma ketal liye a long.” Elos tia pre nu sin God in tulokinye me kalyai nu selos, tusruktu elos a met lili puspus elos pre a siyuk: “Leum, kom liye me aksangeng lalos, a sang nu sin met kulansap lom in fwak kas lom ke pulaik nu kemwa.” (Orekma 4:5, 19, 20, 29) Mea Jeova God el oru ke siyuk lalos? (Ridi Orekma 4:31.) Jeova el kasrelos in akkeye pulaik lalos ke inkanek lun ngun mutal. Ku lun God ku in oru pa ma inge nu sesr. Ke ma inge, kut ku in eis fuka ngun lun God a kasre kut nu ke orekma in luti lasr?
Fuka in Akkeye Oiyen Pulaik
6, 7. Mea inkanek sumwos in eis ngun mutal lun God? Sang me pupulyuk.
6 Inkanek mwo se meet in eis ngun mutal lun God pa in siyuk ke ma inge. Jisus el fwak nu sin met puspus su longol: “Na komwos met koluk fwin etu fuka in sang me sang mwo nu sin tulik nutumwos, fuka yokeyen Papa tumomwos su in kosrao el fwa sang ngun mutal nu selos su siyuk sel!” (Luk 11:13) Aok, kut enenu in pre a siyuk pal nukewa ke ngun mutal. Fwin kutu oiya ke orekma in luti el oru kut in tufwal a sangeng, oana ke orek ma lo ke inkanek u, ku in sang ma lo nu sin met yen nukewa elos oasr we, na kut ku in pre nu sin Jeova ke ngun mutal a siyuk sel in kasre kut in ase nu sesr pulaik su kut enenu.—1 Tessalonika 5:17.
7 Pa inge ma sie mutan Kristian su pangpang Rosa el oru.a Sie len ke pal se Rosa el oasr ke niyen orekma lal, sie met luti su welul orekma el rid sie report lun loom lutlut saye ke orekma koluk nu sin tulik puspus. Met luti se inge el arlana asor ke ma el rid ka paenang el tung, a el siyuk “Mea sikyak ke fwalu inge?” Rosa el lungse na paye in orekmakin pal mwomwo inge paenang el sang ma lo nu sel. Mea el oru in eis pulaik elan ku in kaskas? “Nga pre nu sin Jeova a siyuk sel in ase nu sik ku lal in kasre yu,” Rosa el fwak. Ke sripe inge, el ku in sang ma lo mwomwo a el orala akwuk elos in sifwilpa sramsram ke siepa pal ke me lutlut se inge. Nunku pa kel Milane, sie tulik mutan srisrik su yea limekosr matwe, a muta fwin an New York City. Milane el fwak: “Meet liki nga som nu ke loom lutlut, nine kiyuk a nga pre pal nukewa nu sin Jeova.” Mea elos pre ka? Elos pre in akpulaikyel Milane in tu na ku a kaskas ke God lal! “Ma inge kasrel Milane in akuteye la efu ku el tia wi akfulatye birthday a me akfulat puspus lun fwalu a el tia pa wi fwin elos akfulatye me akfulat inge nukewa,” nine kiyel el fwak. Ya me pupulyuk inge tia akkalemye la kut fwin enenu in akkeye oiyen pulaik lasr, pre el ku in kasru?
8. Mea kut ku in lotela kel Jeremaia ke inkanek su el eis pulaik ka?
8 Nunku pa ke ma su kasrel Jeremaia in akpulaikyel sifwana. Ke pal se Jeova el srusrngilye oana sie met palu nu sin mutunfwal puspus, Jeremaia el fwak: “Liye, nga tia etu fuka in kaskas, tu nga tulik.” (Jeremaia 1:4-6) Tusruktu, tokin kutu pal, Jeremaia el ekla pulaik a fokoko ke orekma lal in fwakak kas lun God su met puspus elos nunku mu el oana sie met su kaskaskin na me ongoiye puspus su fwa sikyak. (Jeremaia 38:4) Ke lusen pal su pus liki yea 65, el pulaik in fwakak nununku lun Jeova. El eteyuk in an Israel ke oiyen pulaik lal in fwakak kas lun God. Paenang tokin yea 600 kutu somla ke pal se Jisus el arlana pulaik in kaskas, kutu sin met elos lulalfongi la el pa Jeremaia su sifwil moulyuk. (Mattu 16:13, 14) Ke inkanek fuka met palu Jeremaia su arlana mwekin ke mutawauk el ekla arlana pulaik? El fwak: “Na oasr insiuk [kas lun God] oana sie e furur kaliye in srik; a nga totola in muteng, a nga koflanu misla.” (Jeremaia 20:9) Aok, kas lun Jeova el akpulaikyel Jeremaia a akkeyel in kaskas.
9. Efu ku kas lun God ku in kasre kut oana ke ma el oru nu sel Jeremaia?
9 Ke leta lal nu sin met Hibru, met sap Poul el simusla: “Kas lun God moul a ku a kosra liki kutlas su oasr luo muta, a fwakisye nu ke srela lun inse a ngun, a lun kupasr a marro, a sa in akilen nunak a papu lun inse.” (Hibru 4:12) Kas lun God ku in kasre kut oana ke ma el oru nu sel Jeremaia. Esam la fwinne met puspus pa orekmakinyuk sin God in simusla Baibel, tusruktu tia nunak lun met lalmetmet pa simusyukla ka, meyen God el kasrelos in simusla ma inge. In 2 Piter 1:21, kut ku in rid: “Tu wangin kas in palye tuku ke ku lun met, a met elos fwak sin God me ke ngun mutal akkaskasyelos.” Pal nukewa kut orekmakin pal in oru lutlut lasr sifwana ke Baibel, nunak lasr fwa nenela ke kas mwomwo su tuku ke ngun mutal lun God. (Ridi 1 Korint 2:10.) Kas inge ku in akpayeyuk in “oana sie e furrur” oan ke insiesr, a kut tia ku in sruokye ma inge nu sesr sifwana, a ma inge fwa akkeye kut in fwakak ma inge nu sin met puspus.
10, 11. (a) Inkanek mwo fuka in lutlutkin Baibel kut enenu in oru in kasre kut in kaskas ke pulaik? (b) Akkalemye sie akwuk mwo kom lungse in oru in akmwoye oiyen lutlut lom sifwana.
10 Kut fwin lungse in oasr me kasru yok su tuku ke lutlut lasr sifwana ke Baibel, kut enenu in oru ma inge ke inkanek mwo su me lutlut mwo ke Baibel ku in sun insiesr, in akkeye nunak a insiesr. Ke sie me pupulyuk, met palu Ezikiel el liye sie aruruma a sapkinyuk nu sel in kang buk in limlim sa su oasr ka nununku upa su enenu in fwakak nu sin met puspus su srunga in porongo. Ezikiel el enenu in eis etauk a lulalfongi na paye ke kas inge. Kafweang lal in oru ma inge fwa kasrel in engunkin orekma in sulkakin kas in nununku inge, su oana eman honey.—Ridi Ezikiel 2:8–3:4, 7-9.
11 Kut liye pa oiya su oana sie ke ma sikyak nu sel Ezikiel. Ke pal inge, oasr met puspus su srunga in long ma Baibel el akkalemye. Kut fwin mongfusrasr in kaskaskin kas lun God, arlana yok sripe kut in lutlutkin ma Simusla ke inkanek mwo su kasre kut in kalem a lulalfongi na paye ke kas su akkalemyeyuk ka. Kut enenu in lutlutkin kas lun God pal nukewa, a tia kutu pal na. Kut enenu pa in akkalemye nunak lun met sim lun sam su akkalemye kas inge: “Lela kas in oalik a nunak insiuk in mwo ye mutom, O Jeova, Eot ku luk a met Lango luk.” (Sam 19:14) Arlana yok sripe kut in orekmakin pal in sifwilpa nunku yok ke ma kut ridi, tu ma paye lun Baibel fwa sun insiesr! Aok, kut enenu in kafweang in akmwoye oiyen lutlut lasr sifwana.b
12. Efu ku meeting nukewa lun congregation kasre kut in eis kolyuk lun ngun mutal?
12 Siepa inkanek in eis me kasru ke ngun mutal lun Jeova pa in “nunku ke sie sin sie in akkeye kut nu ke lungse a orekma mwo, a in tia likiye tukeni nu sie lasr in alu.” (Hibru 10:24, 25) Oiya mwomwo lasr in kafweang in wi pal nukewa ke meeting lun congregation, loang akmwoye pal nukewa, a in orekmakin ma kut lotela ka pa inkanek mwo nukewa kut in eis kasru lun ngun mutal. Aok, ngun mutal lun Jeova el akkalemye kas in kasru ke inkanek lun congregation.—Ridi Fwakyuk 3:6.
Ma Lane Puspus su Tuku ke Kafweang lasr in Pulaik
13. Mea kut ku in lotela ke met Kristian in century se meet ke elos akpayeye orekma in sulkakin peng mwo?
13 Ngun mutal pa ku su fokoko emeet in kosrao a fwalu, a ma inge ku in akkeye metu in oru ma lungse lun Jeova. Ke kasru lun ngun mutal, met Kristian in century se meet elos akpayeye orekma in sulkakin peng mwo ke inkanek yok. Elos fwakak peng mwo “nu sin met nukewa ye kosrao.” (Kolosse 1:23) Arlana kalem la oasr ku su arlana fokoko su akkeyelos, meyen apkuran elos nukewa “tia lutlut a silalkung.”—Orekma 4:13.
14. Mea ku in kasre kut in “moniyuk in ngun”?
14 Kut fwin moulkin moul fwal nu ke kolyuk lun ngun mutal, kut ku in eis me akkeye yok pa in akpayeye orekma in luti lasr ke pulaik. Orekma lasr in pre pal nukewa siyuk ke ngun mutal, moniyuk in oru lutlut lasr sifwana, sifwilpa nunku ke ma kut lutlutkin tari, a in wi pal nukewa ke meeting lun congregation, ku in kasre kut in “moniyuk in ngun.” (Rom. 12:11) Baibel el akkalemye ke “sie met Ju su e Apolus, sie met Alexandria, su lalmetmet in kas a pulaik in ma Simusla, el tuku nu Efesus. . . . A meyen el moniyuk in ngun el kaskas a luti sumwos ma ke Jisus.” (Orekma 18:24, 25) Ke kut “moniyuk in ngun” a lungse na paye in sramsramkin ma paye, kut ku in akkalemye pulaik yok in oru orekma in luti sie loom nu ke sie loom a kut fwin sang ma lo nu sin met puspus ke inkanek lun informal.—Rom 12:11.
15. Fuka kafweang lasr in kaskas ke pulaik yok el kasre kut?
15 Pulaik yok nu ke orekma in luti oasr kasru yok nu sesr. Ella lasr a oiyesr akmwoyeyuk meyen kut kalem na paye ke yok sripaiyen orekma lasr a ke me insemwomwo su tuku ka. Engun lasr el yokelik meyen kut insemwomwo yok kut fwin ku in orekmakin inkanek mwo nu ke orekma in luti lasr. A moniyuk lasr el akkeyeyuk meyen oasr etauk yok lasr ke oiyen salkeyuk lun orekma lasr in sulkakin peng mwo.
16. Mea kut enenu in oru fwin moniyuk lasr nu ke orekma in luti el munasla?
16 Na fuka fwin moniyuk lasr ke orekma in luti lasru tula, ku moniyuk lasr el tia oana ma kut akkalemye in pal somla? Ke ma inge oasr ma eneneyuk in tuni kut sifwana. Poul el simusla: “Komwos in sifwana srike komwos, komwos fwin muta in lalalfongi, akpayeye komwos sifwana.” (2 Korint 13:5) Siyuk sum sifwana: ‘Ya nga srakna moniyuk in ngun? Ya nga pre nu sin Jeova ke ngun mutal lal? Ya pre luk akkalemye la nga lulalfongi nu sel in oru ma lungse lal? Ya pre luk akkalemye la nga aksaokye orekma in luti su God el ase nu sesr? Fuka oiya luk nu ke lutlut luk sifwana? Ya nga orekmakin pal yok in sifwilpa nunku ke ma nga rid a long? Ya nga wi a sang me top pal nukewa ke meeting lun congregation?’ Kom fwin nunku yok ke kain in kusensiyuk nukewa inge ku in kasre kom in akilen ke me munas lom su kom ku in akmwoye a in kasre kom in oru me aksumwos nu ka.
Lela Ku lun God in Akpulaikye Kom
17, 18. (a) Ke oiya fuka orekma in sulkakin peng mwo orek ke pal inge? (b) Fuka kut ku in akkalemye “pulaik nukewa” in sramsram ke kut fwakak peng mwo ke Togusrai lun God?
17 Jisus Kraist su God el akmoulyeyukyak el fwak nu sin met tuma lutlut lal: “A komwos fwa eis ku, ke ngun mutal el tuku nu fwomwos, a komwos fwa met orek lo keik in Jerusalem, a in fwal Juda na fon a an Samaria, a nu ke yen loesilanu fwalu.” (Orekma 1:8) Orekma se inge su mutawauk in orek in pal san srakna orek nu ke pal inge ke inkanek yok. Met Lo lun Jeova su piselos oasr ke million itkosr kutu elos fwakak peng mwo lun Togusrai in an 230 kutu, elos orekmakin 1.5 billion ao ke kais sie yea in luti peng mwo. Arlana mwo in wi pal nukewa ke orekma se inge meyen e fwa tia sifwil orek!
18 Oana in century se meet, orekma in luti fwin fwalu nufon ke pal inge orek ke kolyuk lun ngun lun God. Kut fwin akos kolyuk lun ngun mutal, kut fwa pulakin oiyen “pulaik nukewa” in sramsram ke orekma in luti lasr. (Orekma 28:31) Ke ma inge, lela kut in porongo kolyuk lun ngun mutal ke kut fwakak peng mwo ke Togusrai lun God!
[Footnote]
a Inen met ikulyukla.
b In eis ma lane yok ke orekma lom in ridi Baibel a lutlut lom sifwana, liye buk se inge Benefit From Theocratic Ministry School, ke sapta se inge “Kafweang in Rid” a “Oasr Me Insemwomwo Puspus ke Lutlut,” sra 21-32.
Mea Kom Lotela?
• Efu ku kut enenu in pulaik in kaskaskin kas lun God?
• Mea kasru met tuma lutlut in century se meet in kaskas ke pulaik?
• Fuka kut ku in eis kasru in akpulaikye kut?
• Fuka kafweang lasr in akkalemye pulaik ku in kasre kut?
[Siasing el ngar er a page 13]
Fuka papa a nine elos ku in kasru tulik natulos in eis pulaik?
[Siasing el ngar er a page 14]
Sie pre fototo ku in kasre kom in eis kasru in akpulaikye kom in oru orekma in luti peng mwo