Mea Akwuk a Sripen Moul?

EFU KU YOK SRIPEN ME TOP INGE? Oasr kutu oiya ma arulana upa su sang me aktoasr yok nu ke moul lun metu a sie ke ma puspus inge pa in nunku ka mu wangin na kalmeyen moul, a wangin sripe. Ke luma saye, sie met su oasr kalem yok ke akwuk ku sripen moul el ku in tu ku ke ma upa puspus su sikyak. Victor E. Frankl, el sie neurologist, a el wi pa eis sukosokla lal liki Holocaust, su kalmeyen kas se inge pa orekma lun met kol koluk lun sie an in uniye met puspus yea puspus somla, el simusla: “Nga ku in fwak mu wangin sie ma fwin fwalu, mu arlana mwo in kasru sie met in eis moul insemwomwo fwinne oasr kain in oiya koluk a upalanu, sayen etauk lun sie met la oasr sripe a akwuk mwomwo ke moul lun sie met.”

Tusruktu, oasr kain in nunak puspus su lain sie sin sie ke me lutlut se inge. Met puspus elos pulakin mu kais sie met fwa sifwana sulela la mea kalmeyen moul nu sel sifwana. Ke luma saye, oana elos su lulalfongi ke evolution elos fwak a luti mu wangin sripe yok nu ke moul.

Tusruktu, paye la inkanek se ma mwo a lalmetmet emeet ma kut ku in orekmakin pa in suk a eis etauk sin el su Met Sang Moul, Jeova God. Nunku ka la mea kas lal fwa akkalemye ke ma inge.

Mea Baibel el Fwak

Baibel el luti a akkalemye arulana kalem la oasr akwuk mwomwo lun Jeova nu sin mokul a mutan ke pal se el oralosla tari. Jeova el sang masap inge nu sin papa a nine matou kiyesr ke mutamwauk.

Genesis 1:28. “Komwos in kapak, a yokelik, a nekla fwalu, a kutangla, a leum fwin ik in mwea, a fwin mwon yen engyengu, a fwin ma moul nu kemwa, su mukuikui fwin fwalu.”

God el oakiye tari tu Adam, If a tulik natultal in orala fwalu nufon nu ke sie paredais. El tia oakiya ku lungse metu in matou a mise; a el tia pa lungse metu in kunausla ma nukewa su on fwin fwalu. Tusruktu ke sripen sulela koluk su papa a nine matou kiyesr elos orala, paenang kut usrui ma koluk a mise. (Genesis 3:2-6; Rom 5:12) Ne oinge, akwuk lun Jeova tia na ekla. Tia pat fwalu efwa ekla nu ke sie paredais.​—Isaia 55:10, 11.

Jeova el orekutla in oasr ku lun manosr a wikin pa lalmetmet lasr tu kut fwa ku in akpayeye akwuk lal. El tia orekutla kut in srikutla lukel. Liye la fuka akwuk lun God nu sesr el akuteyuki ke fus puspus in Baibel inge.

Ekklisiastis 12:13. “Pa inge saflaiyen mao, longyuk tari ma nu kemwa: Sangeng sin God a liaung masap lal. Tu pa inge orekma mwo kemwa lun met.”

Maika 6:8. “A mea Jeova El suk sum, a in oru ma sumwos, a in lungse kulang, a in fwasr wi inse fwokpap yurin God lom?”

Mattu 22:37-39. “‘Kom fwa lungsum Jeova God Lom ke insiom kemwa, a ke ngunum kemwa, a ke nunkom kemwa.’ Pa inge masap se yok a masap se meet. A ma se akluo oana inge, ‘Kom fwa lungsum met tulan lom oanu kom sifwana.’”

Fuka Me Top Lun Baibel El Ase Inse Misla Paye

Fwin kut lungse sie ip ke engine natusr in orekma mwo, ma inge enenu in orekmakinyuk fwal nu ke akwuk a inkanek mwo lun met su orala ma inge. Oapana nu sesr, fwin kut liyekutyang liki kutena ma su ku in kunauskutla​—kalme pa in kunausla fototo lasr nu sin God, nunak lasr, pulakin lasr, a manosr—​a kut enenu in orekmakin moul lasr fwal nu ke inkanek su Met Orekutla el oakiye tari. Nunku ke etauk lasr nu ke akwuk ku ma lungse lun God fwa ku in ase nu sesr inse misla paye nu ke oiya puspus ke moul lasr.

Ke pal se metu elos oru sulela lalos ke ma elos nunku mu ma yok sripe emeet ke moul lalos, met puspus misenge elos sang pal yok lalos in akyokyelik a akpusyelik me kasrup lalos. Tusruktu, Baibel el akkalemye kas in sensen inge, “a elos su lungse tu elos in kasrup, elos putatyung nu in me sruf a me kaisrip a lung in ikwe puspus su lalfon a me fosrnga.”​—1 Timote 6:9, 10.

Ke oiya a luma saye, elos su lutiyuk in lungse God a tia mani elos koneak ma lukma puspus ma ku in ase insemwomwo paye. (1 Timote 6:7, 8) Elos kalem ke saokiyen orekma yok wi moniyuk nu ka a elos etu pa la ma kunelos in oru orekma in sang kasru me enenu lun mano lalos sifwana. (Efesus 4:28) Tusruktu, elos porongo pa kas in sensen lun Jisus: “Wangin met ku in kulansap nu sin leum luo; tu el fwa srunga sie, a lungse el ngia, ku el fwa sruokye sie, a pilesru el se ngia. Komwos koflanu kulansap nu sin God a Mammon [“me kasrup,” New World Translation].”​—Mattu 6:24.

Ke ma inge, elos tia lela orekma in suk mani ku orekma in suk me kasrup in pa ma yok sripe se meet in moul lalos, a elos suk in oru ma lungse lun God pa ma oa se emeet in moul lalos. Elos etu la elos fwin oru ma lungse lun God in moul lalos, Jeova God el fwa liyelosyang. Aok, Jeova el etu la el enenu na in oru ma inge.​—Mattu 6:25-33.

Ke pal se elos orek akwuk nu sin met puspus, oasr met puspus lungse in oru elos in pa emeet. Ke pal inge, wangin misla fwin fwalu, meyen metu “sifwana lungselos, . . . tia lungse met in sou lalos sifwana.” (2 Timote 3:2, 3) Ke pal se met se el aktoasryeyuk kutu met ku tia insese nu ke nunak lalos, elos ku in foloyuk akkalemye “silung, a mulat, a wowon, a wenteis a ouyepa sulallel.” (Efesus 4:31) Kain in oiya inge su wangin nunak in muteng ku sifwana karunganang ku in “purakak akukuin.”​—Soakas 15:18.

Tusruktu, nu selos su akos ma sap lun God elos enenu in lungse met atulani lalos oana nu selos sifwana elos “kulang nu sin sie sin sie, ke mwo insielos, nunak munas nu sin sie sin sie.” (Efesus 4:32; Kolosse 3:13) Fwinne metu tia oru mwo ku kulang nu selos, elos kafweang in etawi Jisus, ke kas kouyuk “el tia sifwil kas kou.” (1 Piter 2:23) In oana Jisus, elos insemwomwokin na paye, ke elos oru ma mwo nu sin metu, mensis metu fwinne tia sang kulo nu ke ma mwomwo su orek nu selos. (Mattu 20:25-28; Jon 13:14, 15; Orekma 20:35) Jeova God el sang ngun mutal lal nu selos su etawi Mwen natul, a ngun mutal lal sang misla paye nu ke moul lalos.​—Galetia 5:22.

Tusruktu, fuka ma kom motko ku nunku ke pal fwasru ku in sang kasru nu ke inse misla lom?

[Blurb on page 4]

Sie met el enenu akwuk na mwomwo ke moul lal

[Picture on page 5]

Jisus el luti kut ke inkanek mwo in pulakin inse misla