‘Komwos Nukomang Nu Sumwos Sifwana Fwokpap ku Inse Pusisel’

MET sa se el tuku liki sie siti su pengpeng. El engankin oiya mwomwo su sikyak nu sel ke el isusla oana sie citizen lun an Rom a eteyuk el la el tuku ke sie sou su pengpeng a eteyuk. Mokul se inge pa Soul, a el eis me lutlut mwomwo a yok emeet su oasr in century se meet C.E. El kaskaskin kas luo a el wi ke sie u su pengpeng a eteyuk ke alu lun met Ju, ke u lun met Farisi.

Saap Soul el lotela in kaskaskin kas kou nu sin met sekasrup a pusisel a el inse fulatkin oiyen sumwosmwos lal sifwana. (Luk 18:11, 12; Orekma 26:5) Met Farisi puspus su welul Soul elos lulalfongi mu elos fulat liki met puspus a elos lungse oiyen pengpeng a elos lungse in oasr mwal su elos nunku mu oru elos in arulana yok sripe. (Mattu 23:6, 7; Luk 11:43) Asrouki lal nu sin kain in met nukewa inge oru Soul elan inse fulat. Kut lotela la el lungse yok in kalyai met Kristian. Yea puspus tok, ke pal se el ekla tari in pangpang met sap Poul, el fwak mu el “sie met kaskaskou meet, a sie met su kalyai met, a sie met silolel.”​—1 Timote 1:13.

Aok, Soul el ekla sie met Kristian, su pangpang met sap Poul, a oiya lal ekla ke inkanek nukewa. Oana sie met sap, el arulana pusisel in akkalemye la el “srik liki el su srik sin met mwo nukewa.” (Efesus 3:8) El sie met fwakak peng mwo su sumat in orekmakin inkanek mwomwo ka, tusruktu el tia eis kutena me akfulat ka. A, el sang me akfulat a mwolena nukewa nu sin God. (1 Korint 3:5-9; 2 Korint 11:7) Poul el akkeye met Kristian nukewa wiyel ke el akkalemye kas inge: “Komwos nukomang . . . mutal a kulu, inse pakoten, kulang, fwokpap, fulpap, mongfusesr.”​—Kolosse 3:12.

Ya ma inge fwal pa nu ke pal lasr inge? Ya oasr ma lane ka in akkalemye oiyen fwokpap ku inse pusisel? Ya oiyen fwokpap ku inse pusisel el sie me akul na paye ke ku?

Ya Met Orala Ma Nukewa el Inse Pusisel?

Kutena me akuteye ke inse pusisel enenu in fwal nu ke nunak lun God. Efu? Meyen el pa Leum fulatlanu lasr a Met Orekutla. Ke sripen kut tia oana sie nu sin God, paenang kut enenu in akilen la oasr me munas puspus lasr. Kut ku in oru a akpayeye ma puspus ke kasru lal mukena. “Fono ke el su Ku liki Ku, kut koflana etal mwo; el arulanu mwo in ku,” Eleu sie met lalmetmet in pal meeta el fwak. (Job 37:23) Aok, kut fwin nunku ke sralupan kosrao a fwalu pa inge sie inkanek nu sesr sifwana in akpusiselye kut ka! “Srukak mutomwos nu lung, a liye,” met palu Isaia el siyuk. “Su orala ma inge? Su wisla u lalos ke piselos, el pangnolos nu kemwa ke elos. Ke ku lulap lal, a tu el yok in peng, wangin sie wanginla.”​—Isaia 40:26.

Sayen el God su Ku liki Ku, Jeova God el pusisel. Togusra Devid el pre nu sel: “Kom ouyepa ase nu sik me loeyuk lun lango lom; a kulang [“inse pusisel,” New World Translation] lom oreyu in yok.” (2 Samuel 22:36) Kut ku in fwak la God el inse pusisel meyen el nunku ke met pusisel nukewa su kafweang in akinsemwomwoyel, a el akkalemye pakoten nu selos. Ke kas in pupulyuk, liki in kosrao Jeova el akpusiselyel sifwana, in akkalemye kulang nu sin met nukewa su akkalemye sangeng lalos nu sel.​—Sam 113:5-7.

Sayen ma inge, Jeova el aksaokye inse pusisel lun met kulansap nukewa lal. Met sap Piter el simusla: “God el sinukin met su fulang, a El sang lungkulang nu sin met fulpap.” (1 Piter 5:5) Ke nunak lun God nu ke fulang, oasr sie met sim lun Baibel el simusla: “Met e nukewa su fulang insie me srungeyuk nu sin Jeova.” (Soakas 16:5) Na fuka oiyen pusisel el sie me akul lun ku?

Mea Inse Pusisel el Tia Kalme Nu Ka

Fwokpap ku inse pusisel el tia oana sie nu ke nunak in mwekin. Ke kutu an, sie met pusisel el sie met kulansap​—akosten ke sripen sangeng sin leum lal, tia engan, met munas su metu pakomuta. Ke luma su tia oana sie, Baibel el akkalemye yok la nunak ku inse pusisel el kol nu ke akfulat ku sunak. Ke sie me pupulyuk, oasr sie met lalmetmet el simusla: “Molin fwokpap a sangeng sin Jeova, me kasrup, a sunak, a moul.” (Soakas 22:4) A in Sam 138:6, kut ku in rid: “Jeova el fwinne fulat, a el liye met inse pusisel; a met fulang el etu yen loesla me.”

In akkalemye inse pusisel el tia kalmekin la sie met el wangin oiya mwomwo lal ku wangin ma el ku in aksafyela ku orala. Ke sie me pupulyuk, Jisus Kraist el tia fwak ke kutena pal la el tia Mwen Sefwanna nutin Jeova, a el tia akkalemye la orekma in luti lal fwin fwalu el tia yok sripe. (Mark 14:61, 62; Jon 6:51) Ne oinge, Jisus el akkalemye inse pusisel ke el sang me akfulat nu ke orekma nukewa lal nu sin Papa tumal a ke el orekmakin ku lal in kulansap a sang kasru met puspus a el tia kutongelosi ku akkolukyelos.

Sie Me Akul nu ke Ku

Aok, Jisus Kraist el eteyuk sin met puspus in len lal “ke orekma ku” puspus lal. (Orekma 2:22) Tusruktu, ye mutun kutu met, el “met su arulana pusisel.” (Daniel 4:17) El tia moulkin oiyen fwokpap mukena a el luti ke pal puspus ke saokiyen inse pusisel. (Luk 9:48; Jon 13:2-16) Tusruktu, oiyen inse pusisel lal tia oral in munas. Wangin sangeng lal ke el akfulatye inen Papa tumal a akpayeye orekma in luti lal. (Filippai 2:6-8) In Baibel, Jisus el akkalemyeyuk oana sie laion pulaik. (Fwakyuk 5:5) Me srikasrak lun Jisus el akkalemye la inse pusisel el fwal nu ke kuiyen ella a oiya lun sie met.

Ke kut kafweang in akkeye inse pusisel paye, kut etu la kafweang paye eneneyuk in orekmakin inse a nunak pusisel oana inkanek in moul lasr. Ma eneneyuk nu ka pa in oru ma lungse lun God a tia in orekmakin na inkanek in moul su fusrasr emeet ku in fuleak ke me munas lun ikwe. Orekma in akkeye oiyen fwokpap ku inse pusisel enenu in oasr kuiyen ella ku oiya lun moul nasnas, meyen kut enenu in kafweang in oru ma lungse lasr sifwana oana ma se akluo na nu ke moul lasr tu kut in kulansap nu sin Jeova a in sang kasru nu sin met puspus.

Me Insemwomwo Puspus su tuku ke Inse Pusisel

Inse pusisel el wangin kutena kain in oiya fulang ku inse fulat. Ma simusla el orekmakin kas se inge “fwokpap” ku pusisel in nunak in akkalemye ma inge. (Efesus 4:2) Nunak pusisel el tuku ke orekma lasr in tuni kut sifwana​—ke ku lasr a me munas lasr, ke kutangla lasr a ke ma puspus su kut tia ku in oru. Poul el sang kas in kasru mwomwo nu ka ke el simusla: “Tu nga fwak . . . nu sin met nu kemwa in masrlomwos, tu lan tia nunku ke el sifwana fulat liki ma fwal lan nunku; a tu lan nunak fwal nu ke etauk.” (Rom 12:3) Kutena met su akos kas in kasru inge el akkalemye inse pusisel.

Oiyen inse pusisel el akkalemyeyuk pa ke kut nunku ke ma mwo nu sin met puspus liki na in nunku ke ma lasr sifwana. Poul el kaifwe met Kristian nukewa: “A tia oru kutena ma ke akukuin ku ke konkun lusrongten, a ke inse pusisel lela kais sie in nunku tu elos ngia mwo liki kom.” (Filippai 2:3) Kas in kasru inge el fwal nu ke masap lun Jisus nu sin met tuma lutlut nukewa lal: “A el su fulat liki nukewa in masrlomwos fwa met kulansap lomwos. A el su sifwana akfulatyel fwa akpusiselyeyuk, a el su sifwana akpusiselyel fwa akfulatyeyuk.”​—Mattu 23:11, 12.

Aok, God el arulana aksaokye met nukewa su akkalemye nunak pusisel. Met tuma lutlut Jemes el akkalemye ma inge ke el simusla: “Komwos in akfulpapye komwos ye mutun leum, a el fwa akfulatye komwos.” (Jemes 4:10) Su tia lungse in akfulatyeyuk sin God?

Oiya su tia akkalemye inse pusisel el oru me fos a me alein in masrlon u puspus lun met a in masrlon met se met se. Ke luma saye, akkalemyeyen inse pusisel el orala fwako mwomwo puspus. Kut ku in engankin mwoiyen insemwomwo lun God. (Maika 6:8) Kut ku in engankin misla ke nunak meyen sie met fwokpap a inse pusisel el ku in engankin moul lal a el akfwalye ma oasr yurol liki na ke sie met fulang. (Sam 101:5) Fototo lasr nu sin sou lasr, met kawuk lasr, met su wi kut ke niyen orekma, a nu sin met puspus e fwa mwo a oasr engan ka. Met pusisel puspus elos tia akkalemye oiya su srunga in insese nu ke ma puspus a el tia sapsap, sensenkin ella puspus su ku in purakak sie met in kasrkusrak, ku sok, akukuin, a aktoasr.​—Jemes 3:14-16.

Aok, orekma in akkeye inse pusisel el sie inkanek mwo in karungin fototo mwomwo nu sin met puspus. Ma inge ku in kasre kut in muteng nu ke ma upa puspus, wekunang pa nunak in nakanten, a alein yok su orek ke fwal se inge. Ke kasru lun God, met sap Poul el ekulla ella koluk lal meet oana ke inse fulat a fulang. Ke inkanek oinge nukewa, kut enenu in kafweang in sisla kutena kain in oiya lun inse fulat ku kain in nunak in nunku mu kut fulat ku mwo liki met saye. “Fulang fwasr meet liki kunausten, a sie inse fulat meet liki putatla.” (Soakas 16:18) Orekmakinyen me srikasrak a kas in kasru lal Poul, ku in kasre kut in akilen mwoiyen orekma lasr in ‘nukomang fwokpap’ a inse pusisel.​—Kolosse 3:12.

[Picture on page 3]

Poul el ku in kutangla oiya lun inse fulat a fulang

[Picture Credit Line on page 4]

Anglo-Australian Observatory/​David Malin Images