Kusensiyuk Su Tuku Sin Met Rid
Ke sripen met Ju elos sapkinyuk in tia orekmakin kutena “ma pulolak” ke Kufwen Alukela, efu ku Jisus el orekmakin wain, su wain el tuku ke akwuk lun fermentation, ke pal se el oakiye Me Esmakin ke mise lal?—Exodus 12:20; Luk 22:7, 8, 14-20.
Me akfulatye lun Kufwen Alukela, su me esmakin nu ke pal se met Israel elos som liki an Ijipt, el orekla ke pal se meet in yea 1513 B.C.E. Ke pal se Jeova el sang masap ke me akfulatye ma inge, el fwak: “Nik komwos mongo kutena ma pulolak. In loom nu kemwa sumwos komwos fwa mongo bred tia pulolak.” (Exodus 12:11, 20) Masap inge lun God el orekmakinyuk mukena nu ke kain in bread su elos fwa mongo ka ke pal in orek Kufwen Alukela. Wangin masap ke wain.
Sripe yok ke masap nu ke me pulolak pa meyen met Israel elos silaklak in som liki an Ijipt. Exodus 12:34 el akkalemye la “met inge elos eis bred lalos meet liki pulolak, nien orek bred lalos limlimla ke nuknuk lalos fwin piselos.” Oiya inge ke wangin orekmakinyen me pulolak ke me akfulat tok a ke Kufwen Alukela el me akesmakinye fwil ku tulik natulos ke ma sikyak inge su arulana yok sripe.
Ke kutu pal tok, metu elos liye a nunku ke me pulolak oana me akul nu ke ma koluk ku ma kulawi. Ke sie me pupulyuk, ke pal se met sap Poul el sramsramkin ke sie met su wi ke congregation lun met Kristian su oru orekma lun kosro, el siyuk: “Ya komwos tia etu tu me pulol srisrik pulolak srukwal na fon se?” Tokin ma inge el fwak: “Komwos in aknasnasye komwos liki me pulol matu, tu komwos in sie srukwal sasu, aok, oana wangin me pulol lomwos. Tu ouyepa alukela lasr kisekinyuk tari, aok, Kraist. Ke ma inge, lela kut in liaung kofwo, tia ke me pulol matu, ku me pulol lun sok a ma koluk, a ke bred tia pulol, bred lun mutal a paye.” (1 Korint 5:6-8) Bread su wangin me pulol ka el ku in orekmakinyuk in oana me akul nu ke monin Kraist su wangin ma koluk ka.—Hibru 7:26.
Orekmakinyen wain ke me akfulat lun Kufwen Alukela el wangin in pal meeta a tok met Ju elos mutamwauk in orekmakin. Saap, ma inge weang tokin elos folokla liki an Babulon oana met sruo. Wangin kutena ma simusla in Baibel su lain akwuk sasu inge su weang nu ka, ke ma inge Jisus el ku in orekmakin wain nu ke mongo su orek in akfulatye Kufwen Alukela. Aok, in pal meeta akwuk in orala sranon grepu nu ke wain ku fermentation el tia oana sie ke akwuk in sang me pulol nu ke bread. Ke akwuk lun flour in pulolak oasr ma eneneyuk in sang yeast ku me pulol nu ka. Wain su orekla ke grep tia enenu kutena kain in ma in toeni inge. Oasr tari ke grepu ma nukewa su eneneyuk nu ke akwuk lun fermentation. Sranon grepu sasu su soena ekla nu ke wain el soenna oasr in pal se su Kufwen Alukela akfulatyeyuk ke pulanpal lun spring ku ke malem lun March ku April, meyen pal in kosrani grepu orek ke pulanpal lun fall su oasr ke malem lun August a September.
Ke ma inge, ke pal se Jisus el orekmakin wain oana me akul nu ke Me Esmakin ke mise lal el tia lain masap ke Kufwen Alukela in tia orekmakin me pulol. Kutena wain srusra su wangin sugar toeni nu ka, wain su wangin kutena herbs a spices toeni nu ka, el fwal in orekmakinyuk oana me akul nu ke “sra saok” lun Kraist.—1 Piter 1:19.