Efu Ku Ma Koluk Srakna Oasr Ne Ke Pal Inge
“JEOVA [GOD] el sumwosmwos in oiyel na fon,” Baibel el akkalemye. (Sam 145:17; Fwakyuk 15:3) Moses el akkalemye kas inge ke God: “Orekma lal sumwosna, tu inkanek lal nukewa nununku sumwos. Sie God oaru a wangin ma koluk lal; el sumwos a mwo.” (Duteronomi 32:4) ‘Jeova el pakomuta a pakoten,’ Jemes 5:11 el akkalemye. God el tia sropon ma koluk.
Met tuma lutlut Jemes el simusla: “Lela tu wangin met in fwak fwin srifweyuk el: ‘God el srifweyu.’ Tu God el tia srifweyuk ke ma koluk a oayepa el tia srifwe kutena met.” (Jemes 1:13) Jeova el tia srifwe kutena met ke ma koluk ku srike in parkelosyak in oru orekma fokfok. Ke ma inge, su oru in oasr ma koluk a me keok su tuku ka?
Su Sropon Ma Koluk?
Jemes, sie met sim lun Baibel el simusla la oasr pa ip lun metu ke ma koluk su sikyak. El fwak: “Tu met nu kemwa elos srifweyuk, ke kena lalos kolang insielos nu ke lungse koluk lalos a elos tafongla. Na lungse koluk ke kapak, oswela orekma koluk; a ma koluk ke matula, oswela mise.” (Jemes 1:14, 15) Metu elos ku in oru ma su fwal nu ke kena koluk lalos. Nunku pa ke ma koluk su metu elos usrui. Me purakak lun ma koluk ku in akyokye kena koluk lun sie met a ku in orala fwako koluk puspus. (Rom 7:21-23) Aok, ma koluk su metu usrui el “leumi” nu sin met nukewa, oru in oana met sruo ke orekma koluk puspus su oru me keok puspus. (Rom 5:21) Sayen ma inge, met koluk elos ku in kufusla met puspus saye in oru pa orekma koluk.—Soakas 1:10-16.
Tusruktu Setan su pangpang pa Devil pa sropon ma koluk. El orala ma koluk se meet fwin fwalu. Jisus Kraist el pangon Setan ‘met koluk se’ a “leum lun fwalu,” su lumeyuk nu ke u lun met srunga oru ma sumwos. Met puspus elos akos Setan ke elos porongo me kaifwe lal in pulesru inkanek mwomwo nukewa lun Jeova God. (Mattu 6:13; Jon 14:30; 1 Jon 2:15-17) “Fwalu nufon on ye ku lun el su koluklana,” Baibel el akkalemye. (1 Jon 5:19, NKV) Aok, Setan a lipufan nukewa lal elos “kiapela fwalu nufon,” su orala kain in “we” ku me keok puspus. (Fwakyuk 12:9, 12) Ke ma inge, arlana kalem la Setan su Devil pa sropon ma koluk puspus su sikyak.
Siepa sripen me keok a asor yok el akkalemyeyuk in Ekklisiastis 9:11, su akkalemye kas inge: “Pal a ma sikyuk tuku nu selos nu kemwa.” Jisus Kraist el sramsramkin ke sie ongoiye su sikyak nu sin met 18 su mise ke pal se ma sie loom lulap raki. (Luk 13:4) Elos sun ongoiye ke sripen elos oasr ke sie an, ke pal se oasr ma koluk sikyak. Kain in oiya inge sikyak pa ke pal inge. Ke sie me pupulyuk, fwin sie hollow block el putatla liki paun sie met kamtu su orekma ke sie loom lulap a sun sie met su fwasr ten. Ya God pa oru ma inge? Mo. Ma inge sie luma su tia nunkeyuk mu e sikyak. Kain in oiya inge paye pa fwin oasr mas upa su sun met nukewa ke sie sou ku fwin sifwen sou el mise paenang mutan el katinmasla a tulik arlana asor ka.
Ke ma inge, kalem la, God el tia sropon ma koluk; a el tia oru kutena me keok. Aok el tia oru ma inge, payeiye pa akwuk lun Jeova in akwanginyela ma koluk a met nukewa su oru ma inge. (Soakas 2:22) Aok, oasr pa ma saye puspus su el fwa oru sayen ma inge. Ma Simusla el akkalemye la akwuk lun God ke inkanek lun Kraist pa in “kunausla orekma lun Devil.” (1 Jon 3:8) Akwuk nukewa ke pal inge, su fwal nu ke rapku, srunga, a ke kain in orekma koluk nukewa, e fwa wanginla. God el fwa “ela sroninmutalos nu kemwa,” a el fwa akwanginyela me keok nukewa. (Fwakyuk 21:4) Tusruktu kom ku in siyuk: ‘Efu ku God el soenna oru ma inge? Efu ku el lela ma koluk a me keok in oasr ne ke pal lasr inge?’ Sie inkanek mwo in eis me top ka oasr ke me sramsram lun Baibel kel Adam a If.
Setan el Akkalemye Kusensiyuk Yok Sripe
Oasr ma sikyak ke mutaweyen me sramsram lun metu in pal meeta a pa inge sripe paenang God el lela ma koluk nu ke pal inge. Ma sikyak in pal sa orala kusensiyuk ke sripen God su orala ma nukewa, sie kusensiyuk su tia ku in top ke kitin pal na. Lela kut in kalweni la mea sikyak in pal san.
Jeova God el orala mokul a mutan se meet arlana sumwosmwos a el fililosi nu in Paredais. Oasr me sang su God el sang nu selos, a ma inge oralos in siena liki ma orakrak nukewa. Me sang inge pa ke oiyen sukosok in oru sulela lalos sifwana. (Genesis 1:28; 2:15, 19) Adam a If elos orekla ke inkanek su oasr ku lalos in sulela in oru ma mwo ku ma koluk, paenang elos ku in orekmakin nunak lalos in sulela in akkalemye lungse, kulansap, a akos God su Oralosla. Ku elos ku in sulela sie inkanek in sukosokla liki God a in tia aksol.
God el sang pal mwomwo nu sel Adam a If in akkalemye lungse lalos nu sel, a el sapkin nu selos ma se su elos tia ku in oru. El sapkin Adam: “Kom ku in mongo ke sak nu kemwa in ima se inge oana kom lungsum. A ke sak in etu ma mwo a ma koluk, nik kom mongo ka, tu in len se kom mongo ka paye kom fwa mise.” (Genesis 2:16, 17) Tu elos in engunkin insemwomwo lun God pal nukewa, a in akinsemwomwoyelos sifwana a tulik natultal su fwa isusla, Adam a If elos enenu in tia kang fwako lun sak soko inge. Ya elos akos masap inge?
Baibel el akkalemye nu sesr ke ma sikyak. Setan el orekmakin soko serpent in lumala mu el pa kaskas, ke inkanek inge el sramsram nu sel If a fwak: “Ya God el fwak, nik komtal mongo ke sak nu kemwa in ima se inge?” Ke pal se If el kalweni masap lun God, Setan el fwak nu sel: “Paye komtal fwa tia mise. Tu God el etu tu in len se komtal mongo ka, na mutomtal fwa ikakla, a komtal fwa oana God in etu ma mwo a ma koluk.” Ke If el liye sak soko inge, ma inge arlana mwo a me engun in liye paenang el “eis fwokin sak soko inge, a mongo.” Baibel el akkalemye pa: “A el sang pa nu sin mokul tumal oelul, a el mongo.” (Genesis 3:1-6) Aok Adam a If elos tia orekmakin sukosok lalos in oru sulela ke inkanek sumwos a elos oru ma koluk ke elos seakos God.
Ya kom etu a kalem ke me lutlut ke ma sikyak inge? Devil el lain ma God el fwak nu sel Adam. Kas lal Setan akkalemye la Adam a If elos tia enenu kasru lun Jeova in oru sulela lalos ke ma mwo a ma koluk nu selos. Ke ma inge, kas in lain su Setan el akkalemye el kusensiyukkin sumwos lun Jeova in kol metu. Kalme pa kusensiyuk yok sripe su Setan el akkalemye pa in lain sumwos lun Jeova in kol. Ke inkanek fuka God el topuk kas in lain inge?
Enenu Pal Loeloes in Topukyuk Kusensiyuk Sa
Oasr ku lun Jeova in kunausla Setan, Adam, a If. Paye la God el ku lukelos. Tusruktu Setan el tia lain ku lun God. A, el lain sumwos lun God in kol. Kas kikiap lal inge lain pa ma orekla nukewa wekunang lipufan a met nukewa su oasr sukosok in oru sulela lalos. Elos enenu in kalem ka la me sang in oru sulela enenu in orekmakin ke inkanek sumwos, su fwal nu ke masap lun God ke oiya nukewa, wekunang orekma in alu nu sel. Fwin masap inge tia akpayeyuk, oasr ma upa puspus ku in sikyak, oana ke sie met el atula liki loom fulat ke el tia nunku ke masap ke gravity, su kalme pa ma nukewa fwa putatla nu ten. (Galetia 6:7, 8) Lipufan a met nukewa elos ku in lotela me lutlut yok ke elos liye fwako koluk su tuku ke sulela tia mwo in sukosokla liki God. Aok pal yok eneneyuk tu ma orekla nukewa inge ku in akilen me lutlut mwomwo inge.
Ma inge ku in pupulyukkinyuk ouinge: Fwin sie papa el lungse in lain sie pa na papa ke sie na sou in akkalemye la su ka inmasrlolos fokoko liki sie. Oiya se inge ku in akilenyuk. Ku lalos ku in liyeyuk sin met nukewa ke elos srukak eot lulap. Papa se ma ku in srukak nu lung eot su toasr na paye el pa fokoko u. Tusruktu fwin elos akkalemye la su inmasrlon papa luo inge lungse na paye tulik mokul a mutan puspus natul a fwin tulik natul lungse pa el. Na fuka fwin oasr ma upa ku kas in lain la su inmasrlon papa luo inge karungin mwo sou lal ke inkanek mwomwo? Oasr ma saye eneneyuk liki na in akkalemye ku lalos ku kas lalos mukena. Aok, enenu pal loes tu metu in akilen ke orekma lun papa luo inge a oru sulela lalos la su inmasrlon papa luo inge el mwo.
Mea Pal Loes Somla el Akkalemye
Oasr yea 6,000 kutu somla mutawauk ke pal se Setan el lain sumwos lun God in kol. Mea ma sikyak mutawauk in pal san nu ke pal inge akkalemye? Nunku ke oiya luo su Setan el lain God ka. Setan el fwak nu sel If: “Paye komtal fwa tia mise.” (Genesis 3:4) Ke el fwak mu Adam a If elos tia ku in mise fwin elos eis a kang fwokin saku, Setan el pangon Jeova oana sie met kikiap. Sie kas in lain upa pa inge! Fwin God el tia kaskaskin ma paye ke oiya inge, na fuka ma orekla nukewa ku in filiye lulalfongi lalos nu sel? Tusruktu, mea pal loes somla tari akkalemye?
Adam a If elos pulakin mas, ngal, oiyen matou, a ke saflaiye elos mise. “A len nukewa Adam el moul yea eufoko tolngoul, a el mise,” Baibel el akkalemye. (Genesis 3:19; 5:5) A met nukewa usrui kain in oiya nukewa inge sel Adam. (Rom 5:12) Lusen pal somla tari sang me akpayeye la Setan el sie “met kikiap a papa tuman ma kikiap” a akkalemye la Jeova pa “God lun ma paye.”—Jon 8:44; Sam 31:5.
Setan el fwak pa nu sel If: “God el etu tu in len se komtal mongo ka [fwokinsak soko su elos tia ku in mongo ka] na mutomtal [Adam a If] fwa ikakla, a komtal fwa oana God in etu ma mwo a ma koluk.” (Genesis 3:5) Ke inkanek lun kaskas kikiap a kutasrik inge, Setan el akkalemye nu sin metu ke sie pal mwomwo su tia paye in kololos sifwana. Ke sripen el lungse in kiapelosla, paenang Setan el akkalemye la metu elos ku in engunkin ma mwomwo puspus fwin elos sukosok liki God. Ya ma inge paye?
Mutawauk in pal meeta ne ke pal inge, kain in me kolyuk nukewa lun metu sikyak a tokin kutu pal wanginla. Oasr kain in kolyuk ku guferment puspus su metu elos srike in orekmakin. Tusruktu, ke pal puspus oasr kain in ongoiye a me keok puspus su sikyak nu sin metu. “Oasr sie pal ke oasr ku yurin sie met fwin siepa met nu ke ongoiye lal,” sie met sim lun Baibel el akkalemye kas inge yea 3,000 somla. (Ekklisiastis 8:9) Met palu Jeremaia el simusla pa kas inge: “Tia ma lun met su fwasr in aksumwosye fwalkel.” (Jeremaia 10:23) Aok oasr akwuk mwomwo puspus su science a technology orala a akpayeye tusruktu ma inge tia ku in lain kas paye lun fus se inge. Ma sikyak nukewa ke pal loes somla sang me akpayeye la kas nukewa inge ke ma Simusla el arlana paye.
Mea Kom Fwa Oru?
Lusen pal somla su God el tia kunausla met lain nukewa inge el sang me akpayeye la Setan el sito ke kas in lain lal nu ke sumwos lun Jeova in kol. Jeova God el Met Kol sumwosmwos lanu in kosrao a fwin fwalu. Oasr sumwos lal in kol ma orekla nukewa lal, a inkanek lal in kol pa mwo emeet. Lipufan oaru nukewa su muta ye kolyuk lun God ke lusen pal loeloes elos akkalemye kas inge: “Fwal nu sum, Leum lasr a God lasr, tu kom in eis mwolanu a kaksak a ku, tu kom orala ma nukemwa, a ke lungse lom elos on, a orekla tari.”—Fwakyuk 4:11.
Mea kom nunku ke kusensiyuk ku kas in lain nu ke kolyuk lun God? Ya kom insese la God el arlana fwal in kol kom? Kom fwin lulalfongi ouinge, kom enenu in akilen a akos kolyuk lun Jeova. Kom ku in oru ma inge kom fwin orekmakin ma paye a kas in kai nukewa su oasr ke Kas lun God, in Baibel, ke moul lom. “God el lung,” a masap nukewa lal el tuku ke lungse lal nu sin ma orekla nukewa lal. (1 Jon 4:8) Jeova el lungse in ase nu sesr ma mwomwo nukewa. Ke ma inge, kom ku in orekmakin ke insiom kas in kaifwe lun Baibel inge: “Lulalfongi Jeova ke insiom kemwa, a tia fungla nu ke etauk lom sifwana. Kom fwakulak inkanek lom nu kemwa, a el fwa akkalemye inkanek lom.”—Soakas 3:5, 6.
[Picture on page 7]
Kom ku in sulela me kolyuk lun God ke inkanek in lutlutkin Baibel a orekmakin ke moul lom ke ma el akkalemye
[Picture Credit Line on page 4]
© Jeroen Oerlemans/Panos Pictures