Sie Fwal Wangin Sekasrup Ka Apkuran Me

PETSA ke Paredais, el oana luman ma su oasr ke kolin magasin se inge, in purakak nunak lun met su pulakin moul sekasrup. Sie paredais el ma na paye nu sin siyanyen se meet, Edam a If. Loom selos pa imae lun Eden. (Genesis 2:7-23) Fwinne Paredais el tula, lalalfongi nu ke paredais ke pal fwasru​—ke sie fwal sasu su wanginla moul sekasrup—​el tia mwemwe se na. Ma inge fwa sikyuk na paye in fwal nu ke mwolela puspus su oasr in Baibel.

Tuni mwolela se su Jisus Kraist el orala ke len safla lun moul lal fwin fwalu. Sie sin met koluk su welul Jisus mise el akkalemye lalalfongi nu ke ku lun God in aksumwosye ma upa lun metu. El fwak: “Jisus, esam yu ke kom tuku nu in togusrai lom.” Kas se inge akkalemye la met koluk se inge el lalalfongi la Jisus el fwa kol oana sie Togusra a met mise elos fwa sifwil moulyuk nu ke moul. Jisus el topuk: “Payenu Nga fwak nu sum misenge, Kom fwa muta yuruk in Paredais.”​—Luk 23:42, 43.

In sramsramkin met puspus su fwa muta ke Paredais, Baibel el fwak: “Elos fwa musai loomu a muta we; a elos fwa eoki nien grepu a mongo fwako ka.” (Isaia 65:21) Aok, “elos fwa muta, kais sie met ye fain lal, a wangin sie fwa aksangengyelos; tu oalin Jeova lun un met meun fwak.”​—Maika 4:4.

Efu ku, oasr moul sekasrup sikyuk ke pal inge? Me kasru fuka God el sang nu sin met su sun moul sekasrup? Moul sekasrup fwa wanginla nge?

Efu Ku Moul Sekasrup El Sikyuk?

Paredais su Edam a If filiyuki we tula ke sripen orekma in lain su sie lipufon koluk, Setan su Devil el orala. Orekmakinyen soko serpent oana kofwen me sramsram lal, Setan el srifwel If lan kunausla masap lun God su sapkin in tia kang fwokinsak soko. El kiapella mu lalalfongi la moul sukosok liki God fwa ku in sang nu sel moul mwomwo. Ke pal se If el sang nu sel Edam fwokinsak su tia lela nu selos in kang, el mongo pa, el pilesru God a akinsemwomwoye mutan kiyel.​—Genesis 3:1-6; 1 Timote 2:14.

Siyanyen se inge su oru orekma in lain fwal elos in lisyukla liki Paredais a mutamwuk ke pal se inge fwala elos enenu in pulakin kain in ma upa puspus lun moul. Nu ke len inge, Jeova el lela Setan elan kol met koluk, in oru me akpayeye puspus in kalem ke orekma in seakos nu sin God. Me sramsram lun metu akpayeye la metu tia ku in orala Paredais fwin fwalu. (Jeremaia 10:23) A, oiyen sukosok liki God el orala me keok upa puspus, wekunang moul sekasrup.​—Ekklisiastis 8:9.

Tusruktu, met sekasrup elos tia mutana wangin me kasru ke fwalu su nenela ke ma koluk. Kas lun God su simusyukla, in Baibel, el sesesla ke kas in kolyuk mwomwo nu selos.

“Nik Komwos Nununkala”

Ke pal se el sramsram nu sin sie u lulap lun met puspus in long su wekunang pa met sekasrup puspus, Jisus el fwak: “Liye mwon yen engyengu, tu elos tia taknelik a elos tia kosrani, ku esani in nien fwulma; a Papa tumomwos su in kosrao el kitelos. Ya komwos tia arulanu saok lukelos? . . . Ke ma inge nik komwos nununkala a fwak, ‘Mea kut fwa mongo?’ ku, ‘Mea kut fwa nim?’ ku, ‘Piye ma kut fwa nukomang?’ Tu met pegan elos sukok ma inge nu kemwa. Tu Papa tumomwos su in kosrao el etu tu komwos enenu ma inge nu kemwa. A komwos suk meet togusrai lal, a ma sumwosmwos lal, a ma inge nu kemwa fwa etukot pa nu sumwos.”​—Mattu 6:26-33.

Sie met sekasrup el tia enenu in pusrapasr. (Soakas 6:30, 31) El ku in eis me kasru fwin el suk God meet ke moul lal. Orekma in pusrapasr el tia inkanek mwo nu sin met Kristian paye in moulkin. A, oasr lalalfongi lalos ke ku lun Jeova God in sang ma enenu lalos. (Hibru 13:5, 6) Sie inkanek su Jeova el sang nu sin met lal pa inkanek lun u lun met kulansap lal fwin fwalu nufon, su karungin sie sin sie.

Siepa inkanek su Jeova el kasru met sekasrup ka pa in sang kas in kai mwomwo nu selos ke moul len nu kemwa. Ke sie me pupulyuk, Baibel el sapkin: “El su pusr, lan tia sifwil pusre, a mwo liki tu lan orekma, orala ke paul mao ma mwo, tu el fwa ku in sang nu sin su enenu.” (Efesus 4:28) Pus met su wangin orekma lalos su ku in orala orekma nu selos sifwana, in oru orekma upa, oana eokiye a karungin imae lun kain in fwokinsak puspus. Baibel el kasru pa met sekasrup in etu in safiye mani ke inkanek mwo su ku in kasru in fwasr liki oiya koluk, nu ke orekmakinyen alkohol alukela ma fwal.​—Efesus 5:18.

Sie Fwal Su Wanginla Moul Sekasrup​—Nge?

Baibel el akkalemye la kut moul ke “len safla” ke kolyuk lun Setan. (2 Timote 3:1) Tia pat, Jeova God el fwa supalma Jisus Kraist in nununku metu. Mea fwa sikyuk ke pal san? Jisus el sang top nu ka ke sie me pupulyuk lal. El fwak: “A ke Mwen nutin met el fwa tuku in mwolanu lal, a lipufon nu kemwa oelul, na el fwa muta fwin tron in mwolanu lal. A mutanfwal nu kemwa fwa tukeni ye mutal, a el fwa srealoselik sie sin sie, oanu sie met sropu el srela sipu liki goatu.”​—Mattu 25:31-33.

Sip ke me pupulyuk inge el lumeyuk nu selos su akpusiselyelos nu ke kolyuk lun Jisus oana togusra. Jisus el pupulyukkunalos ke sip meyen elos aksol oana Met Seperd lalos. (Jon 10:16) Nu sin met su oana sip inge fwa eis moul ye kolyuk sumwosmwos lun Jisus. Ma inge fwa sie moul insemwomwo ke sie fwal sasu su wanginla moul sekasrup ka. Met su oana goat, su srunga kolyuk lun Jisus, elos fwa kanausyukla ma patpat.​—Mattu 25:46.

Togusrai lun God fwa aksafyela ma koluk nukemwa. Moul sekasrup fwa wanginla. A, fwalu fwa sesesla ke met su oasr lungse a karungin sie sin sie. Kain in fwal sasu inge ku in sikyuk a ma inge ku in liyeyuk ke u lun Met Lo lun Jeova oana met lili su oasr lungse nu sin sie sin sie fwin fwalu nufon, meyen Jisus el fwak: “Ke ma se inge met e nu kemwa fwa etu tu komwos met tumuk lutlut, komwos fwin lungsumwos sie sin sie.”​—Jon 13:35.