Ya Metu Ku In Akwanginyela Moul Sekasrup?

MILLION puspus sin met elos kapek matou a tia pulakin sekasrup. Elos tia na som nu fwin bed kiyelos musrinsral ku motul musrisr ke sripen ou. Fwinne oinge, met puspus elos pulakin pakomuta nu sin met sekasrup a elos kaifweang in kasrelos.

Tusruktu, oiyen sekasrup el pulakinyuk sin met puspus ke sripen metu elos meuni sie sin sie, ke sripen sronot, anu paola meyen wangin af, a ke kutu pa ma upa. Ma upa puspus pulakinyuk sin met imae puspus fwin an Africa ke sripen ma upa puspus su sikyuk. Kutu met elos som liki loom selos a toula nu in siti lulap puspus ku moulkin moul lalos oana refugees ku met kaeng ke mutanfwal saye. Met puspus saye su muta ke mura lalos elos som nu ke siti puspus meyen elos tafongla ke kutena mwolela su suk ke sie moul mwomwo.

Ke pal puspus siti nukemwa su arulana nenela ke kain in met puspus pa oasr moul sekasrup ka. Fwin oasr an in eok sak ku fwokinsak, an inge arulana srikla tia fwal. Orekma in suk mani arulana upa in koneyukyak. Ke sripen met puspus pulakin asor yok, elos forla in suk moul ke inkanek koluk. Met puspus su muta in siti elos kaifweang in suk ke kasru, tusruktu gufernment puspus tia ku in aksumwosye ma upa lun moul sekasrup su yokyokelik. In fwal nu ke sie report lun United Nation su orekla in November 2003, me rid inge su pangpang The Independent of London el fwak: “Puseni pisen met su pulakin musrinsral fwin fwalu nufon.” El ouyepa fwak: “Fwin fwalu nufon motkoeyuk mu oasr 842 million met ke pal inge arulana srikla mongo nelos​—a pise se inge el puseni ku yokyokelik, meyen oasr pa million 5 sin met elos musrinsral ke kais sie yea.”

Oasr pal branch ofus lun Met Lo lun Jeova fwin an South Africa el eis leta puspus sin met puspus su pulakin moul sekasrup. Oasr sie me pupulyuk, ke sie mokul su simusla: “Wangin orekma luk, a Nga pusrapasr ke siti pal nukemwa fwin oasr pal mwo in oru ma inge. Fwin nga tia oru, kut musrinsral ke lusen len puspus​—sayen ma inge oasr pa ma upa puspus. Wangin na paye orekma. Met puspus elos fwasr ke inkaneku in suk orekma a suk kutena kain in me mongo in kang. Nga etula met puspus elos ilus me sisi kutkut in suk me mongo nalos. Oasr kutu met elos loksakla. Met puspus su oana nga elos pulakin me asor yok a wangin fwinsrak lalos. Wanginla na paye fwinsrak nu ke pal fwasru. Ya God, su orekutla su oasr me enenu lun mongo a ke nuknuk, tia liye ma inge?”

Oasr me top mwo puspus su ku in sang me kasru yok nu ke kusensiyuk lun mokul se inge. In oana me lutlut toko el fwa akkalemye, me top puspus su koneyukyak ke Kas lun God, Baibel.