Kain in Kasru Fuka Lun Jisus Kraist Oasr Yurum?

FWIN nunkeyuk ke ma kut aketeye ke me lutlut taria, ya oasr kutena me alolo ka la me luti puspus lun Jisus ku in sang kasru yok nu fwin fwalu nufon? Kusensiyuk su kais sie sesr enenu in siyuk sesr sifwana, pa, “Kain in me kasru fuka me luti puspus lun Kraist oasr yuruk sifwana?”

Oasr kain in me luti puspus lun Jisus weang kain in sifwe puspus. Me luti yok su elos akkalemye ku in kasru kais sie inkanek lun moul lom. Lela kut in loang yok nu ke ma Jisus el luti ke oiyen akwuk lun ma yok sripe emeet a in akyokye kawuk nu sin God.

Oakiye Ma Yok Sripe Emeet Ke Moul

Fwalu misenge arulanu muila mukuikui lun ma nu kemwa paenang pal yok lasr a ku lasr nu ke ma lun ngun arlana upala ke pal puspus. Loang mwo ke ma sikyuk nu sin sie mokul ke el yea 20 matwe su kut pangnol Jerry. Fwinne Jerry el lungse in sramsramkin me lutlut puspus ke ma lun ngun a aksaokye ma el lotela yurolos ke ma lun ngun, el pulakin asor: “Nga tia na sang pal yok luk in orekmakin ma inge pal nu kemwa. Nga orekma len onkosr ke wik se. Sunday mukena pa len in mongle luk. A tokin Nga karunganang ma nu kemwa Nga enenu in oru, Nga totola na paye.” Kom fwin koneak sum sifwana la kom oasr ke oiya upa se inge, kom ku in eis ma lane ke ma Jisus el luti ke Me Sramsram Lal Fwin Eolu.

Jisus el fwak nu sin met puspus su tukeni nu sie in longul: “Nik komwos nununkala ke moul lomwos, mea komwos fwa mongo, ku mea komwos fwa nim, a tia ke monumwos, mea komwos fwa nukomang. Ya moul tia yok liki me mongo, a mano liki nuknuk? Liye mwon yen engyengu, tu elos tia taknelik, a elos tia kosrani, ku esani in nien fwulma; a Papa tumomwos su in kosrao el kitelos. Ya komwos tia arulanu saok lukelos? . . . Ke ma inge nik komwos nununkala, a fwak, ‘Mea kut fwa mongo?’ ku, ‘Mea kut fwa nim?’ ku, ‘Piya ma kut fwa nukomang? Tu met pegan elos sukok ma inge nu kemwa. Tu Papa tumomwos su in kosrao el etu tu komwos enenu ma inge nu kemwa. A komwos suk meet togusrai lal, a ma sumwosmwos lal, a ma inge nu kemwa fwa etukot pa nu sumwos.” (Mattu 6:25-33) Mea kom lotela ke ma inge?

Jisus el tia kaifwe kut in pilesru in karungin ma enenu lasr in ikwe a nu sin met in sou lasr. Tusruktu, Jisus el mwolela ka la kut fwin oru ma yok sripe meet a sang ma lun ngun in pa ma yok emeet, God el fwa kasru ke kutu ma enenu pa saye. Me lutlut inge kasre kut in etu ke inkanek kut enenu in oru in sang oakiye ma yok sripe emeet lasr. Fwin akosyuk me luti inge ku in kol nu ke me insemwomwo, meyen fwakak tari “insemwomwo elos su nunku yok ke ma enenu lalos in ngun.”​—Mattu 5:3, NW.

Akyokye Kawuk Nu Sin God

Elos su nunku yok ke ma enenu lalos in ngun akilen la eneneyuk in oasr futoto mwomwo nu sin God. Fuka kut ku in orala futoto mwomwo nu sin sie met? Ya kut tia srike in etu yok ke met se inge meet? Kut enenu in sang pal yok in lutlut ke nunak lal, oiya lal, ku lal, orekma lal nu kemwa, lungse lal a srunga lal. Ma inge arulanu eneneyuk nu ke inkanek in akyokye kawuk nu sin God. Etauk sumwos kel eneneyuk. Ke pal se el pre nu sin God ke met tuma lutlut lal, Jisus el fwak: “A pa inge moul ma patpat, tu elos fwa etu kom God paye mukefwanna, a Jisus Kraist su kom supalmu.” (Jon 17:3) Aok, in akyokye kawuk paye nu sin God enenu kut in etal. Inkanek sefwanna in eis etauk inge pa ke Kas lun God su etuku ke ngun, Baibel. (2 Timote 3:16) Kut enenu in oakiye pal yok in lutlutkin Ma Simusla.

Tusruktu, etauk mukena tia fwal. Ke pre sepana inge, Jisus el fwak: “Elos [met tuma lutlut lal] liaung kas lom.” (Jon 17:6) Kut tia enenu in eis etauk lun God mukena tusruktu kut enenu pa in orekma fwal nu ke etauk inge. Ke inkanek saye fuka kut ku in kawuk nu sin God? Ya kut lungse kawuk lasr nu sin kutena met in yokyokelik fwin kut sulela in oru orekma ke inkanek su lain nunak lal a akwuk lal? Nunak lun God a akwuk puspus lal, enenu in kol inkanek lasr nu kemwa ke moul.

Kom Ku In Eis Me Insemwomwo Ke Me Luti Nu Kemwa Lun Jisus

Me luti nu kemwa lun Jisus su kut aketeye tari arlana mwo, fusrasr, a ku. Metu ku in eis me insemwomwo fwin elos etu me luti puspus lal a orekmakin ma inge ke moul lalos.

Met Lo lun Jeova ke an sum elos insemwomwo in kasre kom in liye ke inkanek fuka kom ku in eis ma lane ke me luti mwomwo su lutiyuk ke kutena pal sin kutena met. Kut insemwomwo na paye in suli kom in welulos.

[Picture on page 5]

“Papa tumomwos su in kosrao el kitelos”