Yok Lun Jeova Koflanu Tuniyuk
“Jeova el yok, a fwal in arulanu kaksakunul a yok lal koflanu tuniyuk.”—SAM 145:3.
1, 2. Devid el kain in met fuka se, a fuka el nunkel sifwanu ye mutun God?
MET su simusla a orala Sam 145 el sie sin met pengpeng in pal meeta. Ke pal se el srakna tulik mokul fwusr se, el osun nu sin sie met fulat su oasr kofwen me meun a el unilye. A oanu sie togusra su sumat ke meun, met sim lun Sam inge el kutangla met lokwalok puspis. Enel pa Devid, a el pa togusra akluo lun Israel in pal meeta. Moul pengpeng lal Devid on na fwinne el mise tari, paenang million puspis misinge elos etu ma puspis kel.
2 Fwinne oasr ma mwo puspis su Devid el orala, tusruktu el inse pusisel. Ke pal se el sramsram kel Jeova, el on: “Ke Nga nunku ke kosrao lom, orekma lun kufinpoum, malem a itue ma kom pakiye, mea met tu kom in esmakunul, a mwen nutin met tu kom in tuku nu yurol?” (Sam 8:3, 4) El tia nunku la el sie met lulap, a el akkalemye la kutangla lal nu kemwa lain met lokwalok lal tuku sin Jeova a el fwak ke God: “Kom ouyepa ase nu sik me loeyuk lun lango lom, a inse pusisel lom oreyu in yok.” (2 Samuel 22:1, 2, 36, New World Translation.) Jeova el akkalemye inse pusisel ke pal se el akkalemye pakoten nu sin met koluk, a Devid el sang kulo ke lungkulang lun God.
‘Nga Fwa Akfulatye Kom Togusra’
3. (a) WMea Devid el nunku ke kolyuk lun togusra in an Israel? (b) Lupaka kena lun Devid in kaksakin Jeova?
3 Fwinne Devid el sie Togusra su pakiyuki sin God, tusruktu el nunku Jeova oanu el pa Togusra na paye lun Israel. Devid el fwak: “Togusrai ma lom, O Jeova, a Kom akfulatyeyuk oanu sifwe fwin ma nu kemwa.” (1 Kronikel 29:11) Devid el akfulatye na paye God oanu sie Met Kol! “Nga fwa akfulatye kom, God luk, O Togusra,” el on, “a Nga fwa kaksakin em ma patpat. Len nu kemwa Nga fwa kaksakin kom, a Nga a fwa kaksakin em nu tok ma patpat.” (Sam 145:1, 2) Kena lun Devid in kaksakin Jeova ke len nu kemwa a nu tok ma patpat.
4. Sam 145 el tukakinyuk kas in kas kikiap fuka?
4 Sam 145 el sie topuk fukoko lain Setan ke ma el fwak mu God el sie met kol rapku su srunga in sang sukosok nu sin orekla lal. (Genesis 3:1-5) Sam inge el tukakin pa kas kikiap lal Setan su akkalemye la elos nu kemwa su akos God elos oru ou inge ke sripen oasr ma lane su elos ku in eis ka, a tia ke sripen lungse lalos nu sin God. (Job 1:9-11; 2:4, 5) Oanu Devid, met Kristian paye ke len inge elos sang topuk pa ke kas kikiap lun Setan. Elos aksaokye fwinsrak lalos ke moul ma patpat ye koko lun Togusrai meyen elos lungse in kaksakin Jeova nu tok ma patpat. Million puspis tari sin met elos oru ou inge ke pal se elos akkalemye lalalfongi ke me kise lango lun Jisus a ke orekma in kulansap lalos nu sin Jeova ke sripen lungse oanu met mwolela a baptais su alu nu sel.—Rom 5:8; 1 Jon 5:3.
5, 6. WKain in pal mwo fuka kut ku in eis in akinsemwomwoye a in sang kaksak nu sin Jeova?
5 Nunku ke pal mwo lasr in akinsemwomwoye a in sang kaksak nu sin Jeova oanu met kulansap lal. Kut ku in oru ou inge ke pre ke pal se insiesr mokleyuk ke kutena ma kut rid ke Kas lal, pa Baibel. Kas in kaksak mwo a sang kulo kut ku in akkalemye ke kut nu kemwa mokleyuk ke inkanek lun God in kurunganang met lal ku ke pal se akinsemwomwoyeyuk ke ma orekla sakuruk lal. Kut akinsemwomwoye pa Jeova ke pal se kut sramsramkin akmwuk lal nu sin met lili wiesr in lalalfongi ke pal in meeting ku ke pal se kut muta sramsram yurin kutu met. Paye, “orekma mwo” nu kemwa su kut oru fwin oasr ip lun Togusrai lun God ka kut sang kaksak nu sin Jeova.—Mattu 5:16.
6 Toeni nu ke me srikasrak puspis ke kain in orekma mwo inge pa construction lun nien alu puspis lun met kulansap lun Jeova in an sikasrup puspis. Pus ke ma inge orekla ke sripen kasru ke mani lun met lili wielos in an an saye. Kutu met Kristian elos sang kasru ke pal se elos som nu ke an puspis inge in wi akesrui in musaiyuk Kingdom Hall puspis. A ma saok emeet ke orekma mwo inge nu kemwa pa in sang kaksak nu sin Jeova ke inkanek in orekma in luti ke peng mwo lun Togusrai. (Mattu 24:14) Oanu fus safla lun Sam 145 el akkalemye, Devid el akkalemye insemwomwo lal ke kolyuk lun God a kaksakin kolyuk lal oanu Togusra. (Sam 145:11, 12) Ya kom akkalemye pa kain in insemwomwo inge ke inkanek kulang lun God in kol? a, ya kom sramsram pal nu kemwa nu sin kutu met ke Togusrai lal?
Me Srikasrak ke Mwolanu lun God
7. Sang sripe se yok efu fwal in kaksakin Jeova.
7 Sam 145:3 el ase nu sesr sripe se yok emeet in kaksakin Jeova. Devid el on: “Jeova el yok, a fwal in arulanu kaksakunul, a yok lal koflanu tuniyuk.” Wangin saflaiyen mwolanu lun Jeova. Kut koflanu tuniyuk na paye, a srikeye a in kalem nu fon ka. Tusruktu, kut ku in eis ma lane ke pal inge kut fwin sramsramkin me srikasrak lun Jeova ke mwolanu lal su kut koflanu tuniyuk.
8. Mea kosrao a fwalu elos akkalemye ke mwolanu a ku lun Jeova?
8 Srike in nunku ke sie pal kom muta ke sie an su loes liki kalem puspis lun sie siti a ke kom ngetuk nu lung a liye yen engyengu su wangin pukunyeng. Ya kom tia lut ke pal se kom liye itue puspis in kosrao? Ya ma inge tia mokle kom in kaksakin Jeova ke yok lal ke pal se el orala ma in kosrao inge nu kemwa? Tusruktu, ma kom liye inge, sie percent srisrik na ke pisen itue ke galaxy su fwalu se inge on ka. Sayen ma inge, sie estimate akkalemye la oasr siefok billion galaxy, a ma tolu mukena pa kut ku in liye fwinne kut tia orekmakin sie telescope. Paye, itue puspis a galaxy puspis su kut tia ku in oekla su oasr in kosrao sie me akpayeye ke ku lun Jeova in orala a ke mwolanu lal su koflanu tuniyuk.—Isaia 40:26.
9, 10. (a) Kain in ma mwolanu fuka lun Jeova akkalemyeyuk ke inkanek lun Jisus Kraist? (b) Fuka sifwil moulyuk lun Jisus purakak lalalfongi lasr?
9 Loang akmwoye pa ke kutu me srikasrak ke mwolanu lun Jeova—ma kel Jisus Kraist. Mwolanu lun Jeova akkalemyeyuk pa ke pal se el orala Mwen nutul a orekmakunal ke lusen pal loelos su kut tia ku in oekla oanu Sie “met orekma usrnguk.” (Soakas 8:22-31) Mwolanu lun lungse lun Jeova akkalemyeyuk ke pal se el ase nu sesr Mwen kulu nutul oanu sie me kise lango nu sin met nu kemwa. (Mattu 20:28; Jon 3:16; 1 Jon 2:1, 2) A alukela liki ma metu elos nunku pa ke mwolanu a mano in ngun su Jeova el sang nu sin Jisus ke pal in sifwil moulyuk lal.—1 Piter 3:18.
10 Oasr ma mwolanu puspis su koflanu tuniyuk ke orekma lun Jeova su kapsreni nu ke sifwil moulyuk lun Jisus. Wangin alollo la God el sifwil folokonang nu sel Jisus etauk nu kemwa su oasr ke nunuk lal ke lupan orekma su el oru ke pal se ma God el orala ma nu kemwa su ku in liyeyuk a tia liyeyuk. (Kolosse 1:15, 16) Wikin ma inge su ku in liyeyuk a tia liyeyuk pa, ma orekla in ngun, kosrao a ma in kosrao nu kemwa, fwalu su nenela ke ma puspis, a kain in ma moul nu kemwa su ku in liyeyuk fwin fwalu. In toeni nu ke orekma lal in sifwil folokonang etauk lun Mwen nutul ke me sramsram nu fon ke ma moul in kosrao a fwalu su Jisus el liye ke lusen moul lal meet liki el ekla met, Jeova el sifwil folokonang pa etauk nu kemwa lun Jisus ke experience lal oanu sie met sumwosmwos su muta fwin fwalu. Aok, mwolanu lulap lun Jeova arulanu kalem ke sifwil moulyuk lun Jisus. Sayen ma inge, orekma yok inge, sie me akpayeye la oasr pa sifwil moulyuk lun kutu met mise. Ma inge enenu in akkeye lalalfongi lasr ke ku lun God in sifwil akmoulyeak million puspis sin met su el srakna esam ke nunuk sumwosmwos lal.—Jon 5:28, 29; Orekma 17:31.
Orekma Sakuruk a Orekma Kulanu
11. Kain in orekma yok fuka Jeova el oakiye in Pentecost 33 C.E.?
11 Mutamwauk ke sifwil moulyuk lun Jisus, Jeova el orala kutupa orekma sakuruk a mwolanu. (Sam 40:5) In Pentecost 33 C.E., Jeova el oru in sikyuk sie mutanfwal sasu, “Israel lun God,” orekla sin met tuma lutlut lun Kraist su mosweyukla ke ngun mutal. (Galetia 6:16) Ke sie orekma kulanu, mutanfwal sasu inge in ngun el kapkapek fwin fwalu nu fon su eteyuk in pal meeta. Fwinne met luti kikiap el sikyuk su kol nu ke kapkapek lun Kristendom tokin mise lun met sap nu kemwa lun Jisus, tusruktu Jeova el tafwela in orala orekma sakuruk in akpayeye akmwuk lal.
12. Meyen Baibel el orekla nu ke kain in kas yok puspis fwin fwalu paenang ma inge sie me akpayeye ke mea?
12 Ke sie me pupulyuk, el kurunganang Bible canon su ke saflaiye el lela in langasyukla nu ke kas pengpeng puspis fwin fwalu ke len inge. Orekma in leng ke Baibel tia fwusesr a oasr me sensen ke moul lun met leng meyen met lun Setan el lungse in unilosla. Paye, leng ke Baibel nu ke kas 2,000 kutu tia ku in sikyuk fwin tia ke lungse lun God mwolanu, Jeova!
13. Mutamwauk 1914, fuka mwolanu lun Jeova akkalemyeyuk ke inkanek lun akmwuk lal ke Togusrai?
13 Mwolanu lun Jeova akkalemyeyuk pa ke akmwuk lal ke Togusrai. Ke sie me pupulyuk, in yiu 1914, el filiye Jisus Kraist, Mwen nutul fwin tron, oanu sie Togusra in kosrao. Tia pat toko, Jisus el oru orekma lain Setan a dimon lal. Elos sisila liki kosrao nu fwalu a tia ku in sifwil foloko nu we, ke an se inge elos sano in sisila nu in abyss. (Fwakyuk 12:9-12; 20:1-3) Mutamwauk ke pal inge, met akmusrala lun Jisus elos pulakin kolyai lulap su yokyokelik. Tusruktu, Jeova el kurunginelos ke pal inge lun oasr tari lun Kraist su tia ku in liyeyuk.—Mattu 24:3; Fwakyuk 12:17.
14. Kain in orekma sakuruk fuka Jeova el orala in 1919, a mea ma inge el akpayeye?
14 In yiu 1919, Jeova el sulpa orala ma sakuruk su akkalemye mwolanu lal. Met akmusrala lun Jisus, su akmunasyeyuk in ngun elos sifwil mutamwauk in orekma. (Fwakyuk 11:3-11) Mutamwauk ke pal inge, tokin yiu ekasr na, met akmusrala elos akkalemye moniyuk in luti ke peng mwo lun Togusrai in kosrao su oakiyuki tari. Kutupa met akmusrala orekeni in akfwalye piselos su oasr ke 144,000. (Fwakyuk 14:1-3) A ke inkanek lun met akmusrala lun Kraist, Jeova el oakiye foundeson lun “sie fwalu sasu,” sie un met sumwosmwos. (Fwakyuk 21:1) Tusruktu, mea sikyuk nu ke “fwalu sasu” tokin met akmusrala nu kemwa elos som nu in kosrao?
15. Kain in orekma fuka met Kristian akmusrala elos akpisrpisrye, a mea fwokin ma inge?
15 In yiu 1935, August 1 a August 15 lun me rid inge el sramsram yok ke “u lulap” su akkalemyeyuk in Fwakyuk sapter 7. Met Kristian akmusrala elos mutamwauk ke moniyuk in suk a suli met inge su tuku ke mutanfwal nu kemwa, sruf nu kemwa, met nu kemwa, a loa nu kemwa in asrouki nu selos. Oasr fwinsrak lun “u lulap” se inge in moula liki “ongoiye lulap,” wikin fwinsrak in moul ma patpat ke sie paredais oanu sie met “lun fwalu sasu” ma patpat. (Fwakyuk 7:9-14) Ke sripen orekma in luti ke Togusrai, a orekma in oru met tuma lutlut, su met Kristian akmusrala elos akpisrpisrye, oasr onkosr million kutu sin met ke pal inge su engunkin fwinsrak lalos in moul ma patpat ke sie paredais fwin fwalu. Su fwal in eis kaksak ke kapkapek inge ye me lain lal Setan a fwal koluk lal? (1 Jon 5:19) Jeova mukefwunnu ku in akpayeye ma inge nu kemwa, ke el orekmakin ngun mutal lal.—Isaia 60:22; Zekaraia 4:6.
Mwolanu Yok lun Jeova a Mwal Lulap
16. Efu ku metu elos tia ku in liye na paye ke mutalos ‘mwolanu a ku lun Jeova’?
16 Ke kutena orekma su el oru, “orekma sakuruk” a “orekma kulanu” lun Jeova tia ku in mulkunyukla. Devid el simusla: “Sie fwil a fwa kaksakin orekma lom nu ke siepa, a fwa fwakak orekma ku lom. Nga fwa nunkauk ke mwal mwolanu lun sunak lom, a orekma sakuruk lom. A met elos fwa kaskas ke ku lun me fosrnga kom orala; a Nga fwa fwakak yok lom.” (Sam 145:4-6) Aok, fuka lupan etu lal Devid ke mwolanu lun Jeova, meyen “God el ngun,” ke ma inge met tia ku in liyeyuk?—Jon 1:18; 4:24.
17, 18. Fuka Devid el kapkapek ke insemwomwo lal ke ‘mwolanu lun Jeova’?
17 Fwinne el tia ku in liye God, tusruktu, oasr inkanek puspis lal Devid in akkapye insemwomwo lal ke mwolanu lun Jeova. Ke sie me pupulyuk, el ku in rid record ke Ma Simusla ke orekma kulanu lun God, oanu kunanela lun fwal koluk in pal meeta ke inkanek lun sie sronot fwin fwalu nu fon. Arulanu kalem, Devid el lotela fuka god kikiap puspis lun an Ijipt akmwenkinyeyuk ke pal se God el molela met Israel liki sruo lalos in an Ijipt. Kain ma sikyuk inge nu kemwa sang me akpayeye ke mwolanu a ku lun Jeova.
18 Wangin alollo insemwomwo lun Devid ke mwolanu lun God arulanu kapkapek tia ke rid mukena ke Ma Simusla a ouyepa ke pal se el nunku ma inge. Ke sie me pupulyuk, saap el lumala ke nunuk lal ma sikyuk ke pal se Jeova el sang Ma Sap nu sin met Israel. Oasr pulal, sarom, sie pukunyeng a losr matoltol, a pusral lulap lun me ukuk. Eol Sainai el kusrusrusr a fururrur. Met Israel su muta sisken Fwin Eol inge elos long “Ma Sap Siengoul” inmaslon e a pukunyeng ke pal se Jeova el kaskas nu selos ke inkanek lun sie lipufon. (Duteronomi 4:32-36; 5:22-24; 10:4; Exodus 19:16-20; Orekma 7:38, 53) Sie orekma sakuruk pa inge lun Jeova! Met lun Kas lun God su lumala ke nunuk lalos me sramsram inge arulanu mokleyuk ke ‘luman mwolanu lun Jeova.’ Paye, ke len inge, oasr yurosr Baibel nu fon, su nenela ke arurumu ke ma mwolanu puspis su purakak insiesr in nunku ke mwolanu lun Jeova.—Ezekiel 1:26-28; Daniel 7:9, 10; Fwakyuk, sapter 4.
19. Mea ku in akkapye insemwomwo lasr ke mwolanu lun Jeova?
19 Siepa inkanek su purakak insiel Devid in nunku ke mwolanu lun God pa ke lutlut lal ke Ma Sap su etukyung nu sin met Israel. (Duteronomi 17:18-20; Sam 19:7-11) Akos ke ma sap lun Jeova akfulatye mutanfwal Israel a oru el an siena liki mutanfwal saye. (Duteronomi 4:6-8) Oanu ma sikyuk na paye sel Devid, rid Baibel len nu kemwa, nunku yok ke ma inge, a lutlutkin ma inge fwa ku in akkapye insemwomwo lasr ke mwolanu lun Jeova.
Oiye Fulat lun Jeova Akkalemye Mwolanu Lal
20, 21. (a) Sam 145:7-9 el akfulatye mwolanu lun Jeova in kapsreni nu ke kain in oiye fulat puspis fuka lun Jeova? (b) Mea oiye fulat puspis lun God su sramsramkinyuk ke an inge el oru nu sin met nu kemwa su lungse el?
20 Oanu ma kut konaok tari, fus onkosr lun Sam 145 ase nu sesr sripe puspis in kaksakin Jeova ke ma puspis su kapsreni nu ke mwolanu lal su koflanu tuniyuk. Fus 7 nu ke 9 el akkalemye mwolanu lun God ke pal se el sramsram ke oiye fulat puspis lal. Devid el on: “Elos fwa fwak me esamyen mwo lulap lom, a fwa on ke sumwosmwos lom. Jeova el kulang a el tingtingi ke pakomuta, el patla in mulat, a yoklanu lungkulang lal. Jeova el mwo nu sin met nu kemwa, a me kulang lal on fwin orekma lal nu kemwa.”
21 Ke fus inge Devid el akfulatye meet mwo lulap lun Jeova a sumwosmwos lal—oiye puspis pa inge su Devil el fwak mu wangin yurol. Fuka oiye mwo puspis inge purakak met nu kemwa su lungse God a pusisel nu ke kolyuk lal? Aok, mwo lulap lun Jeova a inkanek sumwosmwos lal in kol sang insemwomwo nu sin met nu kemwa su alu nu sel a elos koflanu tia kaskas in kaksakunul. Sayen ma inge, mwo lulap lun Jeova sun “met nu kemwa.” Kut fwinsrak la ma inge ku in kasru met puspis in ekla met kulansap lal meet liki patla.—Orekma 14:15-17.
22. Oiye fuka Jeova el akkalemye nu sin met kulansap lal?
22 Devid el akkalemye pa insemwomwo ke oiye fulat puspis su God el sifwanu fwak ke pal se el “alukela ye mutal [Moses] a fwak: ‘Jeova, Jeova, sie God pakomuta a kulang, tia sa in mulat, a yoklanu lungkulang a paye lal.’ ” (Exodus 34:6) Ke ma inge, Devid el ku in fwak: “Jeova el kulang a pakoten, tia sa in mulat a yoklanu lungkulang lal.” Fwinne Jeova el fulat liki nu kemwa, tusruktu el akfulatye met kulansap lal ke pal se el akkalemye kulang nu selos. El sesesla ke pakoten, akola in sang nunuk munas nu sin met koluk su auliyuk ke kasru lun me kise lango lun Jisus. Jeova el tia sa pa in mulat, meyen el sang pal mwo nu sin met kulansap lal in kutangla liki munas lalos su ku in kutongyelos in tia ilyuk nu ke fwalu sasu sumwosmwos.—2 Piter 3:9, 13, 14.
23. Kain in oiye mwo fuka kut akola in sramsramkin ke me lutlut toko?
23 Devid el akfulatye lungkulang lun God, ku lungse oaru. Aok, Sam 145 nu fon el akkalemye oiye fulat inge lun Jeova a el akkalemye pa fuka met kulansap lal elos topuk nu ke lungkulang lal. Me sramsram inge e fwa sramsramkinyuk ke me lutlut toko.
Fuka Kom Ku In Topuk?
• Kain in pal mwo puspis fuka oasr yurosr in kaksakin Jeova “len fon”?
• Mea me srikasrak puspis su akkalemye la mwolanu lun Jeova koflanu tuniyuk?
• Fuka kut ku in akkapye insemwomwo lasr ke mwolanu lun Jeova?
[Picture on page 8]
Galaxy puspis in kosrao sang me akpayeye ke mwolanu lun Jeova
[Credit Line]
Courtesy of Anglo-Australian Observatory, photograph by David Malin
[Picture on page 10]
Fuka Jeova el akkalemye mwolanu lal ke inkanek lun Jisus Kraist?