Kom Ku In Lalalfongi ke Mwolela Lun Su?
“MWOLELA lal in pal meeta arulanu ku, oanu el su arulanu ku; tusruktu ma el oru wangin sripe, oanu el ke pal inge wanginla pa sripe.”—King Henry the Eighth, sel William Shakespeare.
Mwolela fukoko se inge su Shakespeare el sramsramkin pa mwolela lun English cardinal inge Thomas Wolsey, su srukye ku lulup ke politics in an England ke lusen century ak16. Met puspis elos insese la ma Shakespeare el fwak inge fwal pa in fwak ke mwolela puspis su elos long ke pal inge. Pal nu kemwa, metu elos long mwolela yok tusruktu arulanu srik ma elos eisla. Ke ma inge, arulanu fwusesr in akilen efu ku met puspis elos alollo ke kutena mwolela.
Me Asor Arulanu Yok
Ke sie me srikasrak, ke lusen pal in meun upa in an Balkans in yiu 1990 kutu, United Nations Security Council el mwolela a akkalemye la mura se inge lun Bosnia pangpang Srebrenica el sie an su “muta ye liaung lun United Nations peacekeeping troops a wangin kutena me sensen we.” Ma el fwak inge oanu sie kas su tuku sin international community su met nu kemwa elos ku in lalalfongi. Tausen puspis lun met kaeng Muslim in an Srebrenica elos nunku pa ou inge. Tusruktu, ke saflaiye, mwolela se inge ke wangin me sensen wangin sripe. (Sam 146:3) In July lun 1995, un met meun elos tuku a kutangla un met meun lun UN a filiye mura se inge ye koko lalos. Pus liki 6,000 Muslim we tia sifwil liyeyuk, a apkurun nu ke 1,200 Muslim su tia wi meun elos anwuki.
Akmwuk nu kemwa lun moul arulanu nenela ke mwolela su kunausyukla. Met puspis elos pulakin la elos keapeyukla ke inkanek lun “me purakak puspis su tia paye in moli ku eis ma puspis” su elos liye ku rid ku long in len nu kemwa. Elos arulanu supwar ke “mwolela kikiap pukanten lun met kol puspis lun politics.” (The New Encyclopædia Britannica, Volume 15, sra 37) Met kol puspis lun alu su met puspis lalalfongi a mwolela nu selos in kurunganang u lalos elos oru ma koluk nu selos ke sie kain in ma koluk su arulanu srungeyuk. Fwinne ke akmwuk lun lutlut a ono—su enenu in oasr pakomuta a nunuk yok nu sin kutu met—kutu sin met su wi ke akmwuk inge elos kunausla lalalfongi lun met puspis, elos oru ma koluk nu sin met a kutupal elos uniye met su muta ye liaung lalos. Tia me lut ke pal se ma Baibel el ase nu sesr kas in sensen in tia filiye lalalfongi ke kas nu kemwa!—Soakas 14:15.
Mwolela Su Akpayeyuk
Paye, oasr met puspis su akpayeye ma elos mwolela, kutupal elos oru ou inge fwinne oasr ma tula yok nu selos. (Sam 15:4) Kas lalos pa oanu me akpayeye, a elos akfulatye ma inge. Kutu met elos lungse na paye in akpayeye ma elos mwolela ke sie inkanek mwo. Elos akola a insemwomwo in oru ma elos mwolela tusruktu elos kofla. Luma a ma sikyuk kutupal kosroila akpayeye lun plan mwomwo.—Ekklisiastis 9:11.
Ke kutena sripe, ma paye pa, met puspis elos konaok la arulanu upa na paye in filiye lalalfongi lalos ke kutena mwolela. Ke ma inge kusensiyuk se sikyuk: Ya oasr kutena mwolela su kut ku in lalalfongi? Aok. Kut ku in lalalfongi mwolela su ku in konoiyukyuk ke Kas lun God, Baibel. Efu kut tia tuni me lutlut toko ke ma el aketeye ke sifwe se inge? Saap kom ku in fwak ke saflaiye, oanu million puspis sin met elos oru tari, la kut ku in lalalfongi na paye mwolela lun God.
[Picture Credit Line on page 3]
AP Photo/Amel Emric