“Komwos in Engunak! Nga Kutangla Fwalu Tari”

KE len in mise lun Jisus​—len ak14 ke malem lun met Ju pangpang Nisan—​el mutamwauk ke Thursday tokin fwatu tilli, March 31, 33 C.E. Ke fong se inge, Jisus a met tuma lutlut lal elos tukeni nu sie ke sie infwokil lung in sie loom fwin an Jerusalem in akfulatye Kofwen Alukela. Meyen el akola in “som liki fwal se inge nu sin Papa,” paenang Jisus el akkalemye la el lungse met sap lal nu kemwa nu ke safla. (Jon 13:1) Fuka el oru ou inge? El luti nu selos me lutlut mwo puspis, ke ma inge el kasrelos in akola ke ma e fwa sikyuk toko.

In fong se inge, Jisus el fwak nu sin met tuma lutlut lal: “Komwos in engunak! Nga kutangla fwalu tari.” (Jon 16:33) Mea el lungse in akkalemye ke kas pulaik inge? Pa inge kutu nu ke ma el lungse in akkalemye: ‘Ma koluk lun fwal se inge tia mokle yu in pulakin asor ku suk in fokoksak. Nga tia lela fwal se inge in mokle yu fwal nu ke lungse lal. Ma inge e ku in sikyuk pa nu sumwos.’ Ma Jisus el luti nu sin met tuma lutlut lal ke aur safla lun moul lal fwin fwalu ku in kasrelos pa in kutangla fwalu.

Su ku in fwak la fwalu misenge tia nenela ke ma koluk? Oiye fuka kut akkalemye ke nununku sesumwos a orekma silolel? Ya ma inge oru kut in srukye mulat ku suk foloksak? Fuka kut nu kemwa mokleyuk ke oiyen moul fokfok su raunikutla? Sayen ma inge, kut sesumwos a kena in oru ma koluk, ke sripe se inge oasr meun lasr lain fwal koluk se inge a lain munas lasr sifwanu. Ya kut ku in fwinsrak na paye ke kutangla fwinne wangin kasre sin God? Fuka kut ku in eis kasru lal? Kain in oiye fuka kut enenu in akkapye in kasru kut in lain kena koluk? In eis topuk nu ke kusensiyuk inge nu kemwa, lela kut in tuni ma Jisus el luti nu sin met tuma lutlut lal su el lungse ke len safla lun moul lal fwin fwalu.

Kutangla Inse Fulat ke Inse Pusisel

Ke sie me pupulyuk, loang akmwoye nu ke ma upa ke inse fulat ku fulang. Baibel el sramsram ke ma inge: “Fulang fwasr meet liki kunausten, a sie inse fulat meet liki putatla.” (Soakas 16:18) Ma Simusla el ouyepa kai kut: “Tu sie met fwin nunku el sifwanu fulat, ke el tia ou inge, el sifwanu keapella.” (Galetia 6:3) Aok, inse fulat el me kunausten a ku in keapella met. Ke ma inge kut lalmetmet in srunga “fulang, a fulanginkas.”​—Soakas 8:13.

Ya oasr ma upa lun met tuma lutlut lun Jisus ke inse fulat a fulang? Oasr sie pal, elos akukuin su fulat liki inmaslolos. (Mark 9:33-37) Ke siepa pal, Jemes a Jon elos siyuk ke nien muta fulat ke Togusrai. (Mark 10:35-45) Jisus el lungse met tuma lutlut lal in sisla kena sesumwos inge. Ke ma inge, ke pal in mongo lalos ke Kofwen Alukela, el tuyuk, filiye nuknuk lal a el eis sie taol, a tanla nien met tuma lutlut lal. Wangin alollo el likiye nu selos sie me lutlut su el lungse elos in lotela. “Na Nga, Leum a Met Luti, fwin tanla niomwos,” Jisus el fwak, “fwal nu sumwos in ouyepa tanla nien sie sin sie.” (Jon 13:14) Enenu in ayaolla inse fulat nu ke​—inse pusisel.

Tusruktu, tia fwusesr in kutangla inse fulat. Tia pat toko ke fong senpanu inge tokin Jisus el sapkin nu sel Judas Iscariot in som, el su akola in tukakunal, sie akukuin upa sifwil sikyuk inmaslon met sap 11. Elos akukuin ke mea? Su selos e fwa fulat liki nu kemwa! Jisus el tia mulat nu selos, a el mongfwusesr in sifwil akkalemye nu selos ma saok su tuku ke kulansap nu sin sie sin sie. El fwak: “Togusra lun met Pegan elos leum fwelos, a elos su leum fwelos elos pangpang Met Kulang. A, komwos fwa tia ou inge, a el su fulat inmalomwos, lela lan oanu met fwusr, a el su leum oanu el su kulansap.” In akismakinyelos ke me srikasrak lal, el fwak: “Nga muta in maslomwos oanu el su kulansap.”​—Luk 22:24-27.

Ya met sap nu kemwa elos eis me lutlut yok ke ma se inge? Kalem la elos oru ou inge. Yiu puspis toko met sap Piter el simusla: “Komwos nu kemwa in nunuk siefwunnu, komwos in pakoten sie sin sie, lungse oanu met lili, fwusesr inse, fulpap in nunuk.” (1 Piter 3:8) Arulanu yok sripe nu sesr in kutangla pa inse fulat nu ke inse pusisel! Kut lalmetmet fwin kut tia sremla nu ke orekma in sukok pengpeng, ku, ku mwal fulat. “God el lainelos su fulang,” Baibel el fwak, “a el esung lung nu selos su fulpap.” (Jemes 4:6) In oupanu, sie Soakas in pal meeta el fwak: “Molin fwokpap a sangeng sin Jeova, me kasrup, a sunak, a moul.”​—Soakas 22:4.

Kutangla Srunga​—Ke Inkanek Fuka?

Lela kut in tuni sie kain in oiye pa su arulanu pengpeng fwin fwalu​—srunga. Fwinne ma inge tuku ke sangeng, nunukin, srisri, keok, nununku sesumwos, lungse ke mutanfwal sifwanu, lungse ke sruf sifwanu, ku tun sifwanu, srunga arulanu pengpeng in an nu kemwa. (2 Timote 3:1-4) Srunga el arulanu pengpeng pa in len lun Jisus. Met roso nu kemwa su siyuk ke takma elos me srungeyuk nu sin met Ju. Met Ju elos tia aengune yurin met Samaria. (Jon 4:9) A met Pegan, a met saye su tia Ju, elos akkolukyeyuk sin met Ju. Tusruktu, ke saflaiye, ke akmwuk in alu su Jisus el oakiye el suli met nu kemwa su tuku ke mutanfwal nu kemwa. (Orekma 10:34, 35; Galetia 3:28) Ke ma inge, el sang nu sin met tuma lutlut lal sie ma sasu.

Jisus el fwak: “Sie ma sap sasu Nga sot nu sumwos, tu komwos in lungsuwos sie sin sie; aok, oanu Nga lungsik komwos, tu komwos in ouyepa lungsumwos sie sin sie.” Elos enenu in lutlut fuka in akkalemye kain in lungse se inge, meyen el tafwela in fwak: “Ke ma se inge, met e nu kemwa fwa etu tu komwos met tumuk lutlut, komwos fwin lungsumwos sie sin sie.” (Jon 13:34, 35) Ma sap se inge ma sasu meyen kom tia enenu mukena in “lungse met tulan lom oanu kom sifwanu.” (Livitikus 19:18) Ke inkanek fuka? Jisus el akkalemye ma inge ke pal se el fwak: “Pa inge ma sap luk, tu komwos in lungsumwos sie sin sie, aok, oanu Nga lungsik komwos. Wangin lungse yurin met yok liki lungse se inge, tu sie met fwa filiye moul lal ke met kamwuk lal.” (Jon 15:12, 13) Elos akola in filiye moul lalos sie sin sie.

Fuka sie met sesumwos el ku in sisla srunga kutasrik ke moul lalos? El fwin ayaola ma inge ke kain in lungse oanu lungse lun Jisus. Million puspis sin met su tuku ke kain in sruf puspis, tun puspis, alu puspis, a ke kain in akmwuk puspis lun politic elos oru ou inge. Elos inge nu kemwa esani nu sie ke sie u su muta inse siefwunnu, a wangin srunga​—un met lili fwin fwalu nu fon lun Met Lo lun Jeova. Elos akos pal nu kemwa kas lun met sap Jon su etuku ke ngun lun God: “Kutena met su srunga met lel, el sie met akmas, a komwos etu tu moul ma patpat tia on in kutena met akmas.” (1 Jon 3:15) Met Kristian paye elos tia srunga mukena in srukak kofwen me meun ke kutena meun, a elos kafweung in lungse sie sin sie.

Na, fuka nunuk lasr nu sin met nu kemwa su tia wi kut in lalalfongi su akkalemye la elos srunga kut? Ke pal se el sripsripyuk fwin sak soko, Jisus el pre kelos su akola in unilye, el fwak: “Papa, kom nunuk munas nu selos, tu elos tia etu ma elos oru.” (Luk 23:34) Ke pal se met srunga elos tanglal Stefen nu ke na el mise, kas safla lal pa: “Jeova, tia filiye ma koluk se inge tu in metalos.” (Orekma 7:60) Jisus a Stefen elos srunga in oasr meta lun met nu kemwa su srungelos. Elos tia srukye mulat ke insielos. “Lela kut in oru mwo nu sin met nu kemwa,” Baibel el kai kut ou inge.​—Galetia 6:10.

‘Sie Me Kasru Ma Patpat’

Ke pal in aenguni lal nu sin met sap oaru 11, Jisus el akkalemye nu selos la kitin pal lula el e fwa som lukelos. (Jon 14:28; 16:28) Tusruktu el akkeyelos: “A Nga fwa pre nu sin Papa, a el fwa sot nu sumwos siepa akmwoyauk, tu lan wi komwos ma patpat.” (Jon 14:16) Me akmwoyauk inge su el mwolela nu selos pa Ngun Mutal lun God. Ma inge ku in luti nu selos ma loal puspis ke Ma Simusla a akismakinyelos ke ma Jisus el luti nu selos ke lusen pal in orekma lun forfor lal fwin fwalu.​—Jon 14:26.

Fuka ngun mutal ku in kasre kut ke pal inge? Aok, Baibel el kas lun God. A met nu kemwa su orekmakinyuk in sang kas palu a simusla Baibel “ngun mutal akkaskasyelos.” (2 Piter 1:20, 21; 2 Timote 3:16) Lutlut lasr ke Ma Simusla a orekmakinyen ma kut lotela tari ase nu sesr etauk, lalmetmet, kalem, liyaten, a ku in nunuk. Ya ma inge nu kemwa tia kasru kut in akola na paye in sun ma upa su tuku ke fwal koluk inge?

Ngun mutal el sie me kasru ke siepa inkanek. Ngun mutal lun God el sie ku su purakak ma mwo nu sin met. “A fwako lun ngun lungse, engun, misla, mongfwusesr, kulang, lalalfongi, oaru, fwokpap, sifwanu leum fwom,” Baibel el fwak. Ya tia pa inge oiye mwo nu kemwa su kut enenu tu kut in kutangla kena koluk in kosro, amei, lemta, koskusrok, a kutupa ma koluk saye?​—Galetia 5:19-23.

Kut fwin lalalfongi ke ngun mutal lun God, kut ku in eis pa “yoklanu lun ku” tu kut in ku in sun ke inkanek mwo kutena ma upa ku me asor. (2 Korint 4:7) Fwinne ngun mutal el tia eisla me srifwe ku me sruf, tusruktu el ku in kasre kut na paye tu kut in ku in muteng. (1 Korint 10:13) “Nga ku in oru ma nu kemwa in el su akkeye yu,” pa inge ma met sap Poul el simusla. (Filippai 4:13) God el ase nu sesr ku inge ke inkanek lun ngun mutal. Kut arulanu sang kulo na paye ke ngun mutal! Ma inge mwoleyukla nu selos su ‘lungse Jisus a liaung ma sap lal.’​—Jon 14:15.

“Mutanu in Lungse Luk”

Ke fong safla lal oanu sie met, Jisus el ouyepa fwak nu sin met tuma lutlut lal: “El su ma sap luk oasr yurol, a el liuang, el met se su lungsel Nga. A el su lungsel Nga Papa tumuk el fwa lungse el.” (Jon 14:21) “Komwos in mutanu in lungse luk,” el kaifwe nu selos. (Jon 15:9) Fuka in mutanu in lungse lun Papa a Mwen ku in kasre kut ke meun lasr lain kena koluk lasr sifwanu a ke fwal koluk se inge?

Aok, ya kut ku in kosroela kena koluk lasr fwin wangin me purakak ku nu sesr in oru ou inge? Ya oasr kutena ma su mwo liki moul futoto nu sin Jeova God a Mwen nutul? Ernesto,a sie mokul fwusr su meuni meun upa lain moul fokfok ke el tulik srisrik me, el aketeye: “Nga lungse in akinsemwomwoye God, a Nga lotela ke Baibel la el tia insese ke inkanek in moul luk. Ke ma inge Nga sulela in ekulla oiyen moul luk, a akos ma sap lun God. Len nu kemwa, Nga srakna enenu in meun lain nunuk fokfok su srakna sikyuk a nekla nunuk luk. Tusruktu, Nga kaifweung na paye in kutangla ke meun inge luk, a Nga pre nu sin God ke kasru pal nu kemwa. Tokin yiu luo Nga kutangla tari ke ma upa yok puspis, fwinne Nga srakna enenu in taran na paye ke moul luk.”

Ke meun lalos ke fwal se inge, loang akmwoye ke pre safla lun Jisus meet liki el som liki infwokil lung inge in an Jerusalem. Ke insemwomwo lun met tuma lutlut lal, el pre nu sin Papa tumal a siyuk: “Nga tia pre tu kom fwa eselosla liki fwalu, a tu kom fwa liyelosyung liki ma koluk. Elos tia ma lun fwalu, aok oanu Nga tia ma lun fwalu.” (Jon 17:15, 16) Sie me akkeye na paye pa inge! Jeova el kurunginelos nu kemwa su lungse el a el akkeyelos ke elos kaifweung in tia ma lun fwalu.

“Komwos Lalalfongi”

Akos ke ma sap lun Jisus ku in kasru kut na paye in kutangla ke meun lasr lain fwal koluk se inge a kena koluk lasr. Tusruktu, fwinne arulanu yok sripe kutangla lasr inge, el tia ku in eisla fwal koluk ku ma koluk su kut usrui. Aok, lela kut in tia asor.

“A fwalu wanginla, a lung koluk la,” Baibel el fwak, “a el su oru ma lungse lun God fwa muta ma patpat.” (1 Jon 2:17) Jisus el sang moul lal in molela liki ma koluk a mise “el su lalalfongel.” (Jon 3:16) Ke ma inge, ke kut kapek ke etauk lasr ke ma lungse a akmwuk lun God, lela kut in filiye ke insiesr kas in akkeye lun Jisus: “Komwos lalalfongi God, komwos in ouyepa lalalfongi yu.”​—Jon 14:1.

[Footnote]

[Picture on page 6, 7]

“Mutanu in lungse luk,” Jisus el kaifwe nu sin met sap lal

[Picture on page 7]

Sukosokla liki ma koluk a fwokin ma inge e fwa tuku na paye ke pal na futoto