Mongfusrasr Lal Akinsemwomwoyeyuk

Met puspus su paye insielos elos lungse met in sou lalos in eis etauk ke akwuk puspus lun God a ke ma inge oasr sie moul insemwomwo. Fwin sie met el mwolela moul lal nu sin God, met fwusr wekunang met matou puspus saye, elos ku in fwak mu me kasru yok nu ke sulela lalos inge a ke sripen oiya mwo lalos. Pa inge ma sikyak kel Jearim, mutan fwusr se in an Mexico, su sang nu sin brother wiyesr su oasr kunokon in liaung leta fototo inge ke sie len in special assembly lun Met Lo lun Jeova el fwak:

“Nga lungse in akkalemye nu sumwos insemwomwo a engan luk. Lela ngan fwak nu sumwos la efu. Yea singuhul oalkosr somla, ke pal se ma nga soenna isusla, papa a nine kiyuk elos lotela ma paye. Nine kiyuk el kapkapek ke ma paye, a tok tulik mokul wiyuk su srik liki yu, a nga pa. Kut tukeni pre nu sin Jeova tu papa tumasr lan fwa fwasr pa ke inkanek nu ke moul. Oasr tari yea singuhul oalkosr somla, a misenge pa sie len saoklana nu sesr. Papa tumuk el e baptaisla. Nga sang kulo nu sin Jeova meyen el soenna aksafyela akwuk lun fwal se inge meet liki pal mwomwo inge sikyak. Kulo na ma lulap, Jeova!”

Ke lusen yea puspus, wangin alolo ka la oasr in nunak lun sou lun tulik mutan fwusr se inge me lutlut yok sripe su akkalemyeyuk in 1 Piter 3:1, 2, su fwak: “Mutan kie, komwos in akos mokul tumomwos, tu, kutena fwin tia akos kas lun God, elos fwa kolyuk fwinne wangin kas ke oiyen mutan kielos, ke elos liye oiya mwo lomwos wikin sangeng [“sunak paye,” NW].” A wangin alolo ka la mutan fwusr se inge pangpang Jearim el orekmakin kas in Duteronomi 5:16: “Sunakin papa tumom a nine kiom, oana Jeova God lom el sapkin nu sum.” In orekmakin kain in me lutlut yok sripe inge a mongfusrasr in sano Jeova, paye sang me insemwomwo puspus nu sel Jearim a sou lal.