Baibel el Ekulla Moul lun Met Puspus
Efu ku mutan se inge su wanginla lulalfongi ke alu lal in pal meeta el orekmakin pal yok lal ke pal inge in sang kasru nu sin met puspus in eis etauk ke God? Mea akkeye sie mokul su lungse oru sport su ku in akngalye metu el ekla sie met su lungse in orek misla? Fuka sie met su lungse orekmakin ono koluk, nim wain alukela ma fwal, a in anwuk nu sin met puspus pal nukewa ke inkaneku el ku in ekulla inkanek koluk in moul lal? Ridi ke ma elos fwak ka.
ME SRAMSRAM KE OIYEN MOUL LAL
EL: PENELOPE TOPLICESCU
MATWE: 40
MUTANFWAL SEL: AUSTRALIA
MA SIKYAK KE MOUL LAL: TULA INSEMWOMWO LAL KE ALU
PAL SOMLA KE MOUL LUK: Nga isusla in an Sydney, Australia, tusruktu ke nga yea luo matwe, sou luk som nu an New Guinea a kut muta we. Kut muta in an Rabaul ke lusen yea luo a kut muta in an Bougainville ke lusen yea oalkosr. In len se inge, wangin TV in an New Guinea, ke sripe se inge nga a tulik mokul wiyuk matula we a engankin in swimming, turong, a kut oru pa camping.
Ke pal se nga yea sengoul matwuk, nga mutawauk in nunku yok ke alu. Nine kiyuk el wi ke alu lun Catholic, ke ma inge el fwak nu sik ngan wi lutlut ke Baibel su orek sin sie mutan su kol alu se inge. Nga lulalfongi ke alu lun Catholic a baptaisla ke nga yea sengoul matwe.
Tusruktu, tokin kut folokla nu Australia a nga sun matwe oana sie met fwusr, nga mutawauk in oasr nunak luo a munasla lulalfongi luk ke ma nukewa su lutiyuk nu sik. Ke lusen pal nga wi ke high school, nga lutlutkin me sramsram lun metu su sikyak in pal meeta. A papa tumuk a nga kut sramsramkin ke lusen pal loeloes ke mutaweyen alu a ke me sramsram puspus su oasr in Baibel su kut nunku mu mena pihlenfong mukena. Ke ma inge, nga tui in wi ke alu lun Catholic.
Papa a nine kiyuk elos fwasrelik ke nga yea 16. Upa nu sin nine in muteng, a tok kutu nga wi Papa tumuk a mutan sasu kiyel in muta ke loom saye. Tulik mokul wiyuk el wi nine, a elos som nu ke an saye. Nga pulakin asor yok ke moul luk ke pal se inge. Tokin yea luo nga sifwil akmwoye fototo luk nu sin nine kiyuk. Tusruktu, nga mutawauk in nimnim wain, orekmakin ono koluk, a wi ke parti pal nukewa. Nga sisila liki loom lutlut, tokin ma inge nga koneak orekma luk. Nga kunausla akwuk ke moul luk ke Nga yea 20 kutu, moulkin moul fokfok pal nukewa.
Ke nga sun yea 25 matwe, nga sifwilpa nunku ke Baibel. Nga koneak sie orekma sasu a nga sun mutan se inge el Liene, sie mutan kato su arlana kulang nu sin boss lal pal nukewa, fwinne boss lal el tia mwo nu sel. Ke pal se nga siyuk sel la efu ku el tia folokin kaskas koluk nu sin boss lal, el akuteye nu sik la el lutlutkin Baibel yurin Met Lo lun Jeova a el kafweang in orekmakin akwuk mwomwo lun Baibel ke moul lal. Liene el siyuk sik fwin Nga lungse elan luti yu ke Baibel. Meyen Nga tia arla kalem ke ma el fwak, Nga nunku mu Nga ku in lotela ma nukewa el etu ke Baibel ke pal sefwanna ke lusen ao se. In fong se, Liene el orekmakin ao tolu in sang topuk kusensiyuk nukewa luk ke Baibel. Nga arlana lut a insemwomwo meyen me top nukewa lal el orekmakin pa ma simusla in Baibel in akpayeye ma el akuteye.
Nga esam ke Nga kasrusr ke sitosa nu ke loom sik tokin nga a Liene sramsram, a nga toasr sin God ke sripen el tia lela ngan lotela ma paye kel ke pal na sa. Nga etu la Met Lo elos moulkin moul nasnas a nga nunku mu patla tari in ekulla oiya koluk nukewa luk. Nga nunku pa mu nga tia ku in som loom nu ke loom in luti peng mwo oana Met Lo elos oru. Nga tafwela in lutlutkin Baibel yurin Met Lo, tusruktu nunak luk pa in suk ke ma sito ke me luti lalos tu in oasr nunak mwomwo luk fwin nga tui in lutlut yurolos. Sie len nga akilen la nga tia ku in koneak kutena ma sito ke me luti lalos.
FUKA BAIBEL EL EKULLA MOUL LUK: Ke etauk luk ke Baibel yokyokelik ke akwuk lun oiyen moul nasnas, nunak ku conscience luk el aktoasrye yu. In oru conscience luk in mwo, nga sisla orekma koluk luk in orekmakin ono koluk. Tusruktu in pal san nga som nu ke mutanfwal saye a nga sifwilpa wi ke parti a nimnim wain pal nukewa. Aok, pal nukewa su nga kafweang in kapkapek in akfwalye moul luk nu ke akwuk mwomwo lun Baibel, nga putatla a sifwil oru oiya koluk luk meeta. Nga arlana mwekin, nga pre nu sin Jeova, tusruktu nga srakna toasr ke ma nga oru.
Ke pal se nga lotela ke orekma koluk lal Togusra Devid nu sel Batsiba a ke Jeova el akkalemye pakoten nu selos, me sramsram inge kasre yu. Devid el pulaik in akkalemye ma koluk su el oru ke pal se el kaiyuk, a el tia mwukunla ma koluk su el orala. A el inse pusisel in eis me kai nu sel. (2 Samuel 12:1-13) Pal nukewa nga sifwilpa oru oiya koluk, nga esam ke me sramsram inge, a kasre yu in fusrasr in fwak nu sin Jeova la nga asor yok ke ma nga oru. Nga oru sulela luk in pre meet liki nga fuleak ke me srufwe a tia tokin nga orala tari ma koluk, a ma inge kasre yu na paye in kutangla ka.
FUKA NGA AKINSEMWOMWOYEYUK: Pal nukewa nga tia ku in kutongye mulat luk a oiya koluk luk. Tusruktu, ma simusla in Efesus 4:29-31 kasre yu in etu ke ma eneneyuk in fwasr liki “mwen nukewa, mulat a sulallel.” Ke nga lotela in kutongye mulat luk, nga lotela pa in kutongye inkanek luk in kaskas. In wekunang, kas in kai lun Jisus in “lela kas lomwos tu in Aok, Aok” kasre yu in oru sulela mwomwo pal nukewa.—Mattu 5:37.
Nine kiyuk, ke mutawauk el lain asrouki luk yurin Met Lo, tusruktu tok el fwak nu sik la el insemwomwo keik. El fwak pa la, “Nga etu la kom ekla mutan mwomwo tia ke sripen arlana mwo kasru su kom eis sin papa a nine kiom ke kom kapkapek, tusruktu ke sripen ma kom lotela kel Jeova.” Ke nga long kas lal inge oreyu in arlana insemwomwo.
Ingena nga pula la oasr akwuk mwomwo a kalme yok ke moul luk. Ke lusen yea yu somla, mokul tumuk a nga kut luti met puspus ke Baibel pal nukewa oana pioneer. Aok, nga som sulkakin peng mwo sie loom nu ke sie loom, a nga pulakin ingena la pa inge orekma yok sripe se meet su nga oru.
ME SRAMSRAM KE OIYEN MOUL LAL
EL: DENIS BUSIGIN
MATWE: 30
MUTANFWAL SEL: RUSSIA
MA SIKYAK KE MOUL LAL: EL ENGAN IN ORU KARATE
PAL SOMLA KE MOUL LUK: Nga isusla in siti lun Perm’ a matula in an Furmanov, sie siti su oasr in an Ivanovo, Russia oasr met 40,000 su muta we. An Furmanov el arlana kato a oasr sak lulap puspus su sra ka ekla rangrang a srusra ke malem lun October nu ke December. Ke yea 1980 nu ke 1999, orekma koluk ke akmas yokyokelik in siti se inge. Sou luk el kafweang in akfwalye lupan mani srisrik su tuku ke molin orekma lasr. Nga muta yurin papa a nine kiyuk a tulik mokul wiyuk su srik liki yu ke sie loom su oasr infwokil se na, paenang arlana iktok loom sesr.
Ke nga yea itkosr, nga mutawauk in lutlut ke karate. Nga lungse na paye sport; ke moul luk nufon nga orekmakin pal yok luk a nga nunku pal nukewa ka. Nga orekmakin pal nukewa luk ke gym, ke ma inge met kawuk luk nukewa elos wi ke sport. Ke nga yea 15, nga eis tari mwal fulat inge ke karate su pangpang red belt, a tokin yea se, nga eis brown belt su kalmekin la nga sumat na paye ka. Nga wi ke team lun karate, a u lasr inge wi ke sritel in amei nu sin team puspus su orek fwin an Russia a Eurasian. Pal fwasru luk motkeyuk mu arlana mwo, tusruktu ke pal se nga sun yea 17, moul luk nufon ekla.
Kutu sin met kawuk luk a nga orala ma koluk a policemen elos sruok kuti. Nga eis nununku ka a nga enenu in muta ke niyen kalpous ke lusen yea luo. Moul ke niyen kalpous arlana upa. Tusruktu, ke nga oasr ke niyen kalpous pa inge pal se meet nga liye Baibel. Nga ridi Genesis, Sam, a Testament Sasu. Nga ku in kalweni pre lun Leum su eteyuk pa oana Papa tumasr in kosrao. A nga kalweni ma inge fong nukewa meet liki nga motul, meyen nga nunku mu fwin nga oru ma inge ku in kasre yu.
Nga sukosokla liki niyen kalpous in yea 2000, tusruktu nga nukin la mea nga lungse in oru ke moul luk a nga pula mu wangin akwuk ke moul luk. Nga mutawauk in orekmakin ono koluk. Ke pal se inge nine kiyuk el mise. El pa met se su nga lungse na paye, a arlana upa nu sik in muteng ke mise lal. Tusruktu, nga sifwana kasre yu in tui liki orekmakinyen ono koluk a nga sifwilpa wi ke me sritel ke gym. Nga som pa nu ke siti lun Ivanovo a muta we. In an se inge, nga koneak sie orekma ke sto su kukakin me mongo. Met kol lun met orekma nukewa ke sto se inge el sie sin Met Lo lun Jeova. El akuteye nu sik ma paye puspus ke Baibel a el orala akwuk in oasr sie brother in oru lutlut lun Baibel nu sik pal nukewa.
FUKA BAIBEL EL EKULLA MOUL LUK: Ke pal in lutlut luk ke Baibel, ke pal se nga lotela la akwuk lun God in orala fwalu oana sie paredais ma inge sun na paye insiuk, a nga lungse in akfwalye moul luk tu nga ku in wi ke ma mwomwo inge su fwa akpayeyuk ke pal fwasru. Tia pat nga lotela la oasr akwuk fulat puspus lun Jeova God a el lungse metu in moulkin akwuk mwomwo inge. Nga orekmakin moul luk nufon in nunku keik sifwana. Tusruktu nga lotela la Jeova el lungse ngan nunku pa ke met puspus saye. A el lungse pa ngan akkeye oiya mwomwo puspus su nga soenna moulkin in pal se, oiya mwomwo oana kulang a in lungse orek misla.
Ke nga nunku yok ke ma nukewa su Jeova el oru keik, oana ke el orekmakin Mwen natul oana sie me kise in molela ma koluk luk, kulo luk nu ke lungse yok lun God mokle yu in ekulla moul luk. Ke sie me pupulyuk, nga lotela ke Sam 11:5 la Jeova el srunga orekma sulallel. Ke ma inge nga tui in liye program ke TV su akkalemye akmas a srunga. A fwinne arlana upa, nga sisla sport luk su ku in akngalye metu. Akwuk mwomwo su oasr in 1 Korint 15:33 kasre yu in kalem la met puspus su nga sulela in asrouki nu se ku in akkolukye yu. Sie me akpayeye ke me lutlut yok sripe inge lun Baibel pa nga a met kawuk luk kut filiyuki nu in kalpous. Ke ma inge nga tui in asrouki nu selos su lungse in orekmakin ke moul lalos sport su ku in akngalye met puspus.
FUKA NGA AKINSEMWOMWOYEYUK: Asrouki luk nu sin Met Lo lun Jeova a in lutlutkin Baibel kasre yu in ekla oana sie met oaru a paye. Ke sie me pupulyuk, nga lotela ke Hibru 13:5 ke ma enenu in akfwalye ma oasr yurosr a in lain kena koluk in lungse mani. Orekmakin kas in kasru inge kasre yu in srunga kaskas kikiap a pusrapasr.
Nga aksaokye pal nukewa oiyen kawuk. In pal somla, nga liye oiyen kawuk lun met puspus musalla ke sripen rapku ku sangeng. Met Lo lun Jeova elos tia met sumwosmwos, tusruktu nga lotela la elos akfulatye akwuk fulat lun God a kafweang yok in orekmakin kas in kasru lal ke oiya su elos akkalemye nu sin met puspus. Ingena nga koneak met kawuk paye inmasrlolos.
Nga nunku la mea ku in sikyak ke moul luk fwin nga tia lotela in moulkin akwuk mwomwo lun Baibel. Saap nga sifwilpa muta ke niyen kalpous ku nga oru ma koluk puspus nu sin met pus su ku in akngalyelos a akkeokyelos. Tusruktu, ke pal inge, nga payuk tari nu sin mutan kato a kulang, a oasr tulik mokul luo nutik. A oana sie sou, kut pulakin insemwomwo yok in kasru met puspus in lotela ma paye ke God.
ME SRAMSRAM KE OIYEN MOUL LAL
EL: JOSÉ CARLOS PEREIRA DA SILVA
MATWE: 31
MUTANFWAL SEL: BRAZIL
MA SIKYAK KE MOUL LAL: LUNGSE IN ANWUK NU SIN MET PUSPUS KE INKANEKU
PAL SOMLA KE MOUL LUK: Nga matula ke sie an su nenela ke loom sekato a met sekasrup fwin an Americana, São Paulo. Kut tia ku in eis kof in nimnim nasnas a wangin akwuk mwo ke loom fwasr. An se inge el eteyuk mu pukanten met sulallel a lungse in orek akmas.
Nga matula a lungse in oru orekma sulallel a lungse in anwuk. Pal nukewa nga wi anwuk nu sin met ke inkaneku, ke ma inge met tulan lasr elos sangeng sik. Nuknuk luk, me yun luk a ella luk akkalemye la nga sie met su arlana sensenkinyuk. Nga nimnim wain alukela ma fwal, nu ke nga motulla. Oana tulik mokul wiyuk nukewa, nga orekmakin pa ono koluk. Ke sripe se inge sie sin tulik mokul wiyuk el mise ke sripen ono koluk su el orekmakin alukela ma fwal.
FUKA BAIBEL EL EKULLA MOUL LUK: Ke pal se nga sun Met Lo lun Jeova, elos akkalemye nu sik ke Baibel la God el fwa oru fwalu nufon oana sie paredais. (Luk 23:42, 43; Fwakyuk 21:3, 4) Nga lotela pa la met mise elos tia etu kutena ma, a God el tia akkeokye met koluk ke sie an in isis. (Ekklisiastis 9:5, 6) Sie me kasru na yok pa inge nu sik. Ma nga lotela ke God el akkeye yu in ekulla inkanek in moul luk. Tusruktu tia fusrasr in ekulla moul luk, in sisla ono koluk, orekma luk in nimnim wain, anwuk, a ke kaskas koluk su nga pala tari in orekmakin pal nukewa.
Tusruktu, nga eis me akkeye yok ke kas lun met sap Poul su simusyukla in 1 Korint 6:9-11. Ma simusla el akkalemye la oasr met Kristian in century se meet elos moulkin moul koluk oana ke ma nga oru. Tusruktu fus inge el akkalemye pa la: “A kutu sumwos ou inge meet. A komwos aknasnasyeyuk tari, a komwos akmutalyeyuk tari, a komwos aksumwosyeyuk in en Leum Jisus Kraist, a in ngun lun God lasr.” Kas inge akkeye fwinsrak luk u la nga ku in ekulla pa ma puspus ke moul luk in akinsemwomwoye God.
Ke pal se nga mutawauk in asrouki yurin Met Lo lun Jeova, nga lulalfongi yok la elos moulkin moul sumwos oana met Kristian paye. Elos etu ke ella koluk luk meet, ke oiyen sulallel luk, a lungse in akngalye kutu met. Ne ouinge elos srakna paing yu a akkalemye kulang a lungse lalos nu sik.
FUKA NGA AKINSEMWOMWOYEYUK: Fwin nga tia lutlut ke Baibel a tia ekulla inkanek koluk lun moul luk, saap nga mise tari ke pal inge. Ingena nga srakna moul, a nga insemwomwo in kasru sie sin tulik mokul wiyuk in eis etauk ke Baibel a in sukosokla liki orekmakin ono koluk. A nga akkeye pa met puspus ke sou luk in lutlutkin Baibel. Nga sang kulo yok meyen nga mwulela tari moul luk nu sin God in kulansap nu sel, su nunku kesr a karungin kut ke inkanek yok!
[Blurb on page 24]
“Nga oru sulela luk in pre meet liki nga fuleak ke sie me srufwe a tia tokin nga srufweyukla tari, a ma inge kasre yu na paye.”