Kaifweung In Orekmakin Ma Kom Lotela Tari

“Ma su komwos lutlut ka, a eis, a long, a liye in Nga, komwos in oru ma inge, a God lun misla el fwa muta yurumwos.”​—FILIPPAI 4:9.

1, 2. In oiye nu kemwa, ya Baibel el akkeye kain in met nu kemwa ma oralos mu elos lalalfongi ke alu? Aketeye.

“ME Purakak lun Alu Yokyokelik, Tusruktu Akmwuk ke Oiyen Moul Nasnas Wanginla.” Pa inge sifwen sie me sramsram ke newsletter se pangpang Emerging Trends ke oiyen ma sikyuk ke sie survey su orekla ke an Merike. Arulanu kalem la mutanfwal se inge el liye kapkapek ke pisen met su wi ke alu a akkalemye la arulanu yok sripen alu ke moul lalos. Tusruktu, report se inge akkalemye: “Fwinne me purakak na paye ke inse pise lulap lun met inge su wi ke alu, tusruktu oasr met puspis in maslon met Merike inge elos alollo ke ku lun alu in purakak na paye moul lun kais sie met a un met nu kemwa.”

² Oiye inge tia sikyuk in an siefwunnu. Fwin fwalu nu fon, met puspis su fwak mu elos insese nu ke Baibel a moniyuk ke alu lalos, wangin akilenye mu elos orekmakin sumwos akmwuk lun Baibel ke moul lalos. (2 Timote 3:5) “Kut arulanu akfulatye Baibel,” pa inge fwak lun sie met kol ke u in research se, tusruktu in sang pal yok in ridi, in lutlutkin, a in orekmakin​—ma inge fwal nu ke pal meeta.”

3. (a) Mea Baibel el oru nu sin met nu kemwa ma oralos mu elos met Kristian paye? (b) Fuka met tuma lutlut lun Jisus elos orekmakin kas in kai lal Poul in Filippai 4:9?

³ Tusruktu, nu sin met Kristian paye, tia ou inge. Orekmakinyen Kas lun God ku in ekulla nunuk a orekma lalos. Paye lun moul sasu lalos akilenyuk sin met nu kemwa. (Kolosse 3:5-10) Nu sin met tuma lutlut lun Jisus, wangin pal se elos ku in likiye Baibel nutulos in loom selos tia orekmakin. Fwal ma met sap Poul el fwak nu sin met Kristian fwin an Filippai: “Ma su komwos lutlut ka a eis a long a liye in Nga, komwos in oru ma inge; a God lun misla el fwa muta yuromwos.” (Filippai 4:9) Nu sin met Kristian elos oru orekma yok liki in lalalfongi mukena ma paye ke Kas lun God. Elos orekma fwal nu ke ma elos lotela, a tia fuleak in orekmakin kas in kai lun Baibel​—in sou lalos, yen in orekma lalos, in congregation, a ke moul lalos nu kemwa.

4. Efu ku upa in orekmakinyuk ma sap lun God?

⁴ In akos ma sap lun God a in orekmakin tia fwusesr. Meyen kut muta ke sie fwal su kolyuk ke ku lun Setan su Devil, su Baibel el akkalemye oanu “god lun fwal se inge.” (2 Korint 4:4; 1 Jon 5:19) Ke ma inge, yok eneneye kut in kurunginkutyung sifwanu liki kutena kain in me sruf su fwa kunausla oaru paye lasr nu sin Jeova God. Mea ku in kasre kut in sroukye na oaru paye lasr?

Srukye Ku “Akmwuk lun Kas Paye”

5. Mea kas inge lun Jisus lungse in akkalemye: “Fwasr tukok penganu len”?

⁵ Sie inkanek in akkalemye la kut kaifweung na in sroukye ma su kut lotela ke alu paye, pa in tia fuleak fwinne met su tia lalalfongi elos lain kut a akkolukye kut. Kaifweung eneneyuk ke mongfwusesr. “Kutena met fwin lungsel in tuku fwasr tukuk,” Jisus el fwak, “lela lan sifwanu lafwekunul, a srukak sak soko lal, a fwasr tukuk.” (Mattu 16:24) Jisus el tia sapkin kut in fwasr tukol ke lusen wik se, ku malem se, ku yiu se. Tusruktu, el fwak: “Fwasr tukok in pal nu kemwa.” Kalmen kas lal inge akkalemye la orekma in kulansap lasr tia ma nu ke kitin pal na ke lusen moul lasr, ku oanu kut moniyuk misenge tusruktu lutu wanginla. Fwin paye mwolela lasr nu ke alu paye, kut enenu in sroukye ku inkanek in moul lasr su kut mwolela ka, fwinne oasr me keok sikyuk. Kut ku in oru fuka?

6. Me srikasrak mwomwo fuka ke kas lun God su met Kristian in century se meet elos lotela kel Poul?

⁶ Poul el sapkin nu sel Timote su welul orekma: “Kom in srukye ku me srikasrak lun kas sumwos su kom long keik in lalalfongi a lungse su oan in Kraist Jisus.” (2 Timote 1:13) Mea Poul el kalmekin inge? In kas Greek orekmakinyuk kas se inge “srikasrak” in kalmekin nu ke sie luma su lumeyukla nu ke ma sie met sroal el orala meet liki el sroal na paye. Fwinne tia aketeyuki nu ke ip srisrik me srikasrak inge, tusruktu, kais sie srowasrik ka orekla kalem nu sin met su orekmakin in ku lumala mwo. A oupanu me srikasrak su Poul el luti nu sel Timote a nu sin kutupa met ke pal el sramsram nu selos el tia oru ou inge in aketeye nu fon topuk nu ke kusensiyuk nu kemwa lalos. Tusruktu, me luti lal, sang kasru mwo​—oanu sie me srikasrak—​in kasru met nu kemwa su akos in akilen mea Jeova el siyuk selos in oru. Aok, in akinsemwomwoye God, elos enenu in sroukye ku me srikasrak lun ma paye tu elos in ku in orekmakin sumwos nu ke ma elos lotela.

7. Fuka met Kristian elos ku in srukye mwo kas in kasru mwomwo?

⁷ Ke century se meet, kain in met su oanu Hymenaeus, Alexander, a Philetus elos akkeye me luti su tia fwal nu ke “me srikasrak lun kas sumwos.” (1 Timote 1:18-20; 2 Timote 2:16, 17) Fuka met Kristian in century se meet elos ku in kutangla met luti kikiap in pal meeta? Pa ke elos lutlutkin ma simusla in Baibel a orekmakin ke moul lalos. Elos nu kemwa su fwasr fwal nu ke me srikasrak lal Poul a kutupa met oaru elos akilen a sisla kutena ma su tia fwal nu ke me srikasrak lun kas sumwos su elos luti. (Filippai 3:17; Hibru 5:14) Elos arulanu liaung in tia “lungse me siyuk a akukuin ke kas,” a in moniyuk ke kunokon in kulansap lalos nu sin God. (1 Timote 6:3-6) Kut ku in oru oupanu ke pal se kut fwin moniyuk in luti ma paye su kut lotela nu sin kutu met. Fuka mwoiye in liye ke million puspis sin met su kulansap nu sin Jeova fwin fwalu nu fon elos sroukye ku me srikasrak paye lun Baibel su elos lotela.​—1 Tessalonika 1:2-5.

“Tia Long nu ke Me Sramsram Kikiap”

8. (a) Setan el suk fuka in kunausla lalalfongi lasr misenge? (b) Mea me sensen lal Poul su on in 2 Timote 4:3, 4?

⁸ Setan el lungse in kunausla oaru lasr ke inkanek in sang me alollo ke nunuk lasr ke ma kut lotela tari. Misenge, el tia ekla liki century se meet, ke oasr met luti kikiap puspis a wekunang kutupa met su lungse in kunausla lalafongi lun met su moulkin moul sumwos a paye. (Galetia 2:4; 5:7, 8) Kutupal elos lungse in orekmakin akmwuk lun news in sang akyokyelik sramsram kikiap lun me akkoluk ku in kinauk kas tia paye in sang lain akmwuk ku orekma lun Met Lo lun Jeova. Poul el sensenkin in fwak la oasr kutu met su fwa forla liki ma paye. “Tu pal se e fwa tuku,” el simusla, “ke elos tia muteng me luti paye, a meyen elos fwa akpusye nu selos met luti su oanu lung kulok lalos sifwanu, a furokla srelos liki ma paye a kufla nu ke sramsram losrongten.”​—2 Timote 4:3, 4.

9. Mea on in nunuk lal Poul ke pal se el sramsramkin “me sramsram kikiap oanu pulenfong”?

⁹ Ke sripen elos fwasr liki me srikasrak lun kas sumwos, paenang kutu selos engunkin in long kutena kain in “sramsram kikiap.” Kain in sramsram kikiap fuka? Saap Poul el nunku ke kain in pulenfong oanu me sramsram su tia paye su oasr ke buk lun apocrypha pangpang Tobit.a Weang nu ke me sramsram kikiap inge pa me sramsram sakuruk su tia paye a lisrek. Ke ma inge, kutu selos​—“fwal nu ke nunuk lalos sifwanu”—​elos inge akkolukyeyuk sin kutu met su akkeye nunuk sukosok ke akmwuk a ma sap lun God su lungse in akkolukye met kol lun congregation. (3 Jon 9, 10; Jud 4) Fwin oasr kutena me aktukulkul su sikyuk, arulanu kalem la kutu met elos sulela ma kikiap liki ma paye su tuku ke Kas lun God. Tia pat tok wanginla orekmakinyen ma paye su elos lotela, a ma inge akkolukye moul in ngun lalos.​—2 Piter 3:15, 16.

10. Mea kutu me sramsram kikiap su orekmakinyuk in pal inge, a fuka Jon el liksreni in akkalemye kas in sensen nu ka?

¹⁰ Kut ku in tia loang nu ke sramsram kikiap lun pulenfong su orekmakinyuk yok in pal inge fwin kut sensenkin a srike in tuni akmwoye ma kut long a ma kut ridi. Nu ke sie me pupulyuk, pa ke news u pal puspis el srike in akyokye orekma lun moul fokfok. Met puspis elos akkeye nunuk a in luti la wangin God. Met puspis su suk ma tafongla pal nu kemwa elos fwak la Baibel el tia kas lun God. A misenge met Kristian kikiap elos srakna oru luti kikiap lalos in sang aktafongyela lalalfongi lun met Kristian puspis. In sensenkin me luti kikiap lun met palu kikiap in century se meet met sap Jon el akkalemye: “Met kulu, komwos in tia lalalfongi ngun nu kemwa, a akpaye ngun, elos fwin ma sin God me ku tia, tu met palu kikiap puspis elos fwasrelik nu fwalu.” (1 Jon 4:1) Paenang kut enenu in arulanu kurunginkutyung.

11. Piye sie inkanek in sang koneak la kut muta in lalalfongi?

¹¹ Ke sripe se inge, Poul el simusla: “Komwos in sifwanu srike komwos, komwos fwin muta in lalalfongi.” (2 Korint 13:5) Met sap se inge el kaifwe nu sesr in sifwanu srike kut, kut fwin muta na in lalalfongi nu fon lun met Kristian. Kut fwin lungse in long me sramsram lun met su lungse in torkaskas, kut enenu in tuni moul lasr sifwanu ke inkanek lun pre. (Sam 139:23, 24) Ya kut sifwanu srike in suk ma tafongla lun met wiesr su lalalfongi Jeova? Fwin kut pulakin tu paye, efu? Ya kut wi pulakin toasr ke sripen kas a orekma lun kutu met? Fwin aok, ya kut sifwanu suk inkanek in akmwoyela? Lela kut in esam la kutena me akkeok su kut pulakin ke akmwuk lun fwal se inge ma nu ke kitin pal na. (2 Korint 4:17) Kut fwin sun kutena me akkeok ke congregation, me mea kut in fuleak ke kulansap lasr nu sin God? Fwin kut sun kutena me aktoasr, ya tia mwo kut in sifwanu suk me kasru in akmwoyela a filiye ma nu kemwa nu sin Jeova in kasru?​—Sam 4:4; Soakas 3:5, 6; Efesus 4:26.

12. Fuka met in an Berea elos oakiye sie me srikasrak mwomwo nu sesr?

¹² Lela kut in taran in tia suk ma tafongla, a lela kut in kurunganang moul in ngun lasr in fukoko a srukye nunuk sumwos ke me lutlut su kut eis ke inkanek lun lutlut Baibel lasr sifwanu a ke pal in meeting nu kemwa lun congregation. (1 Korint 2:14, 15) Srike in wangin nunuk in alollo nu ke Kas lun God, sie inkanek lalmetmet in orekmakin me srikasrak lun met Berea in century se meet ke elos suk in Ma Simusla in liye ma inge la paye ku sito! (Orekma 17:10, 11) Ke ma inge, lela kut in oru ma nu kemwa fwal nu ke ma kut lotela, a in tia porongo me luti kikiap a in sroukye ku me luti lun ma paye.

13. Fuka tu kut in nukin la kut akyokyelik sramsram kikiap ku pulenfong?

¹³ Oasr pa sie inkanek in luti kikiap su kut enenu in kurunginkutyung liki. Me sramsram sakuruk puspis a experience puspis fwasrelik, pal nu kemwa ke inkanek lun E-mail. Yok eneneye in sensenkin kain in me sramsram inge, fwin kut tia etu na paye sropon me sramsram inge. Fwinne oasr experience ku me sramsram supeyuk sin met Kristian su eteyuk mu mwo nunuk lal, saap kain in met inge long na me sramsram sen a tia etu na paye la sumwos a paye ku sito. Paenang arulanu yok sripe kut in taran oiyen ma kut srumun ku in tafu kutena sramsram su kut long su kut tia etu fwin paye ku sito. Kut lungse na paye in tia tafu ku kalweni “sramsram pulenfong,” ku “sramsram losrongten su kunausla ma mutal.” (1 Timote 4:7; New International Version) Ke sripen oasr eneneye nu sesr in kaskas paye nu sin sie sin sie pal nu kemwa, paenang lela kut in oru ma nu kemwa in tia orala kut in sramsramkin kas kikiap.​—Efesus 4:25.

Me Insemwomwo Su Sikyuk ke Kas Paye

14. Mea ma lane yok kut ku in eis fwin kut orekmakin sumwos ma kut lotela ke Kas lun God?

¹⁴ Orekmakinyen ma su kut lotela ke lutlut lun Baibel lasr sifwanu a in wi meeting lun met Kristian ku in orala me insemwomwo puspis. Ke sie me pupulyuk, kut ku in koneak la futoto lasr nu sin met lili wiesr in lalalfongi arulanu kapkapek. (Galetia 6:10) Oiyesr sifwanu ku in ekla mwo fwin kut orekmakin paye akmwuk lun Baibel. (Sam 19:8) Yok liki nu kemwa, fwin kut orekmakin ma kut lotela tari, kut ‘akmwoyela luti lun God’ a e ku pa in ikasla inkanek nu sin kutu met in tuku nu ke alu paye.​—Taitus 2:6-10.

15. (a) Fuka tulik fwusr se el tia sangeng in orek lo ke loom lutlut? (b) Mea kom lotela ke experience se inge?

¹⁵ Inmaslon Met Lo lun Jeova, pukanten sin met fwusr su etu in orekmakin ma nu kemwa elos lotela ke lutlut lun Baibel lalos sifwanu a me rid lun met Kristian a wekunang ma elos lotela ke meeting puspis lun congregation. Ella mwomwo lalos orala me akpayeye fukoko nu sin met luti lalos a tulik lutlut wielos ke nien lutlut. (1 Piter 2:12) Nunku kel Leslie, sie tulik mutan su yiu 13 matwe fwin an United States. El sifwanu akkalemye la arulanu upa nu sel in sramsram nu sin tulik lutlut su welul in nien lutlut ke lalalfongi lal, tusruktu oasr sie len el koneak la el ekla. “Oasr me sramsram lun tulik lutlut su elos oru ke oiyen met kuka su oru ma nu kemwa in kukakin kutena me kuka lalos. Na oasr sie tulik mutan el srukak paol a sramsramkin ke oiyen Met Lo lun Jeova oanu me pupulyuk ke ma se inge.” In oanu sie Met Lo lun Jeova ke el long, mea Leslie el oru? “Nga srike in aksumwosye lalalfongi luk,” el fwak, “su Nga lalalfongi mu orala me lut lulap nu sin tulik nu kemwa, meyen pal nu kemwa Nga tia wi muta sramsram yokla in lutlut a.” Mea sikyuk ke pulaik lal Leslie? “Nga ku in filiye buk srisrik a sie tract nu sin tulik lutlut, ke sripen oasr pa kutu kusensiyuk lal,” Leslie el fwak. Jeova el insemwomwokin fwin tulik fwusr elos orekmakin ma nu kemwa elos lotela nu sin tulik lutlut in loom lutlut a!​—Soakas 27:11; Hibru 6:10.

16. Fuka akmwuk lun Theocratic Ministry School el sang ma lane yok nu sin tulik fwusr?

¹⁶ Siepa me srikasrak pa kel Elizabeth. Mutamwauk ke yiu itkosr nu ke na lusen yiu in lutlut lal ke elementary school, tulik mutan fwusr se inge el muta in suli teacher se lal inge nu Kingdom Hall ke pal nu kemwa oasr kunokon lal ke Theocratic Ministry School. Fwin teacher se lal inge kofla tuku nu ke meeting, Elizabeth el e muta ke saflaiyen lutlut a oru sramsram lal nu sin teacher se inge. Ke yiu safla lal ke high school, Elizabeth el simusla report se lal su oasr ke page siengoul ke oiyen ma mwomwo el eis ke Theocratic Ministry School a srumun nu sin sie panel su oasr ke pisen teacher akosr. El ouyepa suliyuk in oru sie sramsram ke oiyen akmwuk lun Theocratic Ministry School oanu me srikasrak se, su in sramsram se inge el sulela in orekmakin sifwe se inge “Efu Ku God El Lela Ma Koluk?” Elizabeth el eis ma lane yok ke kain in akmwuk lun lutlut su orek ou inge sin Met Lo lun Jeova ke Theocratic Ministry School. El sie inmaslon met fwusr Kristian su sang kaksak nu sin Jeova, ke inkanek in orekmakin ma mwo nu kemwa su el lotela ke Kas Lal.

17, 18. (a) Mea Baibel el akkalemye ke oiyen oaru a sumwos? (b) Mea oaru lun sie Met Lo lun Jeova el oru nu sin sie mokul?

¹⁷ Baibel el sapkin nu sin met Kristian elos in orekmakin moul sumwos a paye in ma nu kemwa. (Hibru 13:18) Orekma kutasraik a sesumwos kunausla futoto inmaslon met puspis, a yok liki nu kemwa, nu sin Jeova sifwanu. (Soakas 12:22) Fwokin orekma sumwos a paye lasr akpayeye ma nu kemwa su kut lotela, a pa inge paenang met puspis in kulang a akkalemye sunak nu sin Met Lo lun Jeova.

¹⁸ Srike tuni pa sie experience lun sie solse su pangpang Phillip. El nukanla blank check se, su el signie tari a tia etu la piye check se inge ne ke na folokinyuk me nu sel ke mail. Tusruktu, check se inge konoiyukyuk sin sie Met Lo lun Jeova, a oasr note se simusyukla ka su akkalemye la lalalfongi lun met su konoiyuk check inge moklel in folokinyukla nu sin met la u. Phillip el arulanu lut. “Elos ku na in orekmakunla nu fon lupan mani luk su oasr ke $9,000!” el akkalemye. Ke sie pal somla el toasrla ke sie luma su sikyuk nu ke susu lal su pusrapasrla ke loom alu lal. Fwin tuniyuk ma inge, nu sin met su ma el etu pal nu kemwa el pusrala susu lal, a funu nu sin met se ma el tia etu ke sripen alu lal el pa folokon ma check se lal su lupan mani su oasr ka ku in tausen puspis dollar! Aok, met Kristian sumwos a paye orala me kaksak mwomwo nu sin Jeova God!

Kaifweung in Orekmakin Ma Kom Lotela

19, 20. Fuka kut ku in eis ma lane yok ke sripen orekma sumwos lasr nu ke ma kut lotela ke Baibel?

¹⁹ Met nu kemwa su orekmakin sumwos ma elos lotela ke Kas lun God elos eis ma lane puspis. Met tuma lutlut Jemes el simusla: “El su suiye ma sap fwal su ma sap lun sukosok a muta lu, a el tia met long oanu el su mulkunla, tu el met oru su orekma, met ou inge fwa insemwomwo in orekma la.” (Jemes 1:25) Aok, kut fwin orekma fwal nu ke ma kut lotela ke Baibel, kut ku in koneak me insemwomwo puspis a fwa ku in kutangla me keok puspis lun moul su kut pulakin. Yok liki nu kemwa, kut fwa ku in eis me insemwomwo sin Jeova a fwinsrak nu ke moul ma patpat!​—Soakas 10:22; 1 Timote 6:6.

²⁰ Ke ma inge, ke inkanek nu kemwa, lela kom in kaifweung in lutlut pal nu kemwa ke Kas lun God. Suk in wi toeni pal nu kemwa yurin met nu kemwa su alu nu sin Jeova a loang akmwoye nu ke me lutlut nu kemwa su sramsramkinyuk ke meeting nu kemwa lun met Kristian. Srike in orekmakin ma nu kemwa kom lotela, oru ou inge pal nu kemwa, a “God lun misla el fwa muta yurumwos.”​—Filippai 4:9.

[Footnote]

Ya Kom Esam?

• Mea “me srikasrak nu ke kas mwolanu,” a kut ku in sroukye fuka?

• Kain in “sramsram kikiap ku pulenfong” kut enenu in sisla?

• Mea ma lane yok nu selos su lutlut ke Kas lun God?

[Picture on page 15]

Fuka met Kristian in century se meet elos kutangla kain in luti kikiap lun met luti sito in pal meeta?

[Pictures on page 16]

Futen alollo ke nunuk ku in taknelik ke inkanek lun news, Internet, a sin met luti sito in pal inge

[Picture on page 17]

Tia mwo in sulkakin kutena report su tia sumwos

[Pictures on page 18]

Ke nien orekma, yen lutlut, a in an nu kemwa, Met Lo lun Jeova elos orekmakin ma nu kemwa elos ridi a lotela ke Kas lun God