Ya Kom A Loang Akmwoye Nu Ke Kas in Sensen Nukewa lun Jeova?

“Pa inge inkaneku. Komwos fwasr we.”—ISAIA 30:21.

1, 2. Mea Setan el lungse na paye in oru, a Baibel el kasre kut fuka?

KOM fwin fwasr ke soko inkanek, sie me akul su srusrngiye nu ke inkanek sito su kom ku in tula. Ma inge arlana sensen. Lumala akmwoye ke nunak lom fwin oasr sie met kawuk lom el fwak nu sum la oasr sie met koluk su ekulla sie me akul ke inkaneku meyen el lungse met puspus in tula ke fwufwasryesr lalos. Kalem la kom a loang akmwoye ke kas in sensen lun met kawuk se lom inge.

² Setan el oana met koluk se inge, a el lungse na paye in kiapekutla. (Fwakyuk 12:9) Me sensen nukewa su kut lutlutkin tari ke me lutlut se meeta pa ma puspus su Setan el orekmakin in oru kut in seakos Jeova a som liki inkanek nu ke moul ma patpat. (Mattu 7:13, 14) Tusruktu, kut lotela pa la met kawuk lasr, Jeova God, el sensenkin kut ke inkanek kutasrik lal Setan. Kut fwa sramsramkin ingena ma tolu saye su Setan el orekmakin in kiapekutla a la fuka Baibel el kasre kut in fwasr liki ma puspus inge. Ke pal se kut rid Baibel, kut ku in lumala ke nunak lasr la Jeova el fwasr pa siskesr a el fwak nu sesr: “Pa inge inkaneku. Komwos fwasr we.” (Isaia 30:21) Ke kut lutlutkin kas in sensen nukewa inge, kut fwa akpayeye lungse lasr in oru ma Jeova el fwak.

Nik Kom Fwasr Tokin “Met Luti Kikiap”

3, 4. (a) Efu ku met luti kikiap elos oana sie luf su wangin kof ka? (b) Met luti kikiap puspus elos tuku ya me, a mea elos lungse in oru?

³ Srike lumala ke nunak lom kom fwin fwasr yen mesis ne kom malula. Kom liyeak luf in kof se yen loes. Kom nunku mu kom ku in koneak kof in luf se inge, pasis kom som nu we. Tusruktu ke pal se kom sun luf se inge, kom koneak la wangin kof lu. Kom arlana asor! Kut ku in pupulyukkin ma paye nu ke kof, a met luti kikiap nukewa oana luf su wangin kof ka. Met puspus su nunku mu oasr yurin met luti inge ma paye elos fwa asor yok meyen elos koneak la tia paye. Jeova el orekmakin met sap Poul a Piter in sensenkin kut ke met luti kikiap puspus. (Ridi Orekma 20:29, 30; 2 Piter 2:1-3.) Su met luti kikiap inge? Kas su simusyukla sel Poul a Piter akkalemye nu sesr la met luti kikiap elos tuku ya me a la fuka elos kiapela metu.

⁴ Poul el fwak nu sin met elder puspus ke congregation lun Efesus: “A liki in maslomwos sifwana kutu met fwa tuyuk, a luti ma sesumwos.” A Piter el simusla kas inge ke sie leta lal nu sin congregation puspus: “A fwa oasr met luti sito in masrlomwos.” Ke ma inge met luti kikiap tuku liki congregation. Met luti kikiap inge elos wi lulalfongi ke ma paye meet tusruktu elos som liki alu paye. Mea elos lungse? Poul el fwak la ke pal se elos som liki u lun Jeova, elos lungse in “amakin met [tuma] lutlut in fwasr tukolos.” Met tuma lutlut su Poul el sramsramkin ka inge pa met tuma lutlut lun Jisus Kraist. Met luti kikiap inge tia som liki congregation in oru met tuma lutlut. Elos srike in eisla, met tuma lutlut puspus su wi ke congregation. Jisus el fwak la met luti kikiap inge elos oana kosro wolf su kangla sipu. Met apostate inge eltal lungse in kunausla lulalfongi lun met Kristian ke congregation a lungselos in som liki ma paye.—Mattu 7:15; 2 Timote 2:18.

5. Fuka met luti kikiap elos kiapela met puspus?

⁵ Fuka met luti kikiap elos kiapela metu? Elos oru ma inge ke inkanek su arlana kutasrik. Met luti kikiap elos wise nunak lalos “in lukma” nu ke congregation, oana sie met koluk su us ma puspus nu ke sie mutunfwal ke inkanek lukma. Met luti kikiap inge elos orekmakin “kas tia paye.” Kalmen ma inge pa elos fwak ma puspus su oru nunak a kas lalos in oana paye, oana sie met akmas su orala document kikiap in luman ma paye se. Elos srike in oru met puspus in lulalfongi ke ‘me luti kutasrik lalos.’ Piter el fwak pa la elos lungse in “furela” ku ekulla ma Simusla. Elos akuteye fus in Baibel ke inkanek tia sumwos in oru met puspus in lulalfongi ke nunak lalos. (2 Piter 2:1, 3, 13; 3:16) Met luti kikiap inge elos tia nunku na paye kesr. Kut fwin fwasr tokolos, kut fwa som liki inkanek nu ke moul ma patpat.

6. Kas in sensen fuka Baibel el akkalemye nu sesr ke met luti kikiap?

⁶ Fuka kut ku in karungin kut yang sifwana liki met luti kikiap? Baibel el akkalemye nu sesr la mea kut enenu in oru. (Ridi Rom 16:17; 2 Jon 9-11.) Baibel el akkalemye kalem la kut enenu in: “Fwasr lukelos.” Kalmen ma inge pa kut in som lukelos a tia asrouki nu selos. Kas in sensen su oasr in Baibel el oana sie nu ke kas in sensen sin sie taktu su fwak nu sum la kom in fwasr liki sie met su oasr mas upa su ku in fwasrelik nu sin met puspus. Taktu se inge el etu la kom fwin eis mas se inge, kom e fwa mise. Kas in sensen lal arlana kalem, a kom e fwa oru ma el fwak nu sum. Baibel el akkalemye la met luti kikiap elos oana sie met su oasr mas upa a elos orekmakin me luti lalos in oru met puspus in nunku oana elos. (1 Timote 6:3, 4) Jeova el oana taktu mwo inge. El akkalemye kalem nu sesr la kut in som liki met luti kikiap puspus. Kut enenu in akpayeye in akos kas in sensen lal pal nukewa.

7, 8. (a) Mea kut enenu in oru in fwasr liki met luti kikiap? (b) Efu ku kom lungse na paye in fwasr liki met luti kikiap?

⁷ Mea kut enenu in oru in fwasr liki met luti kikiap? Kut in tia sramsram nu selos ku suleltal nu in loom sesr. Oayepa kut tia ridi buk natulos, tia liyelos ke television, tia rid ma elos simusla ke internet, ku simusla pa ma kut nunku ke ma elos simusla ke Internet. Efu ku kut lungse na paye in fwasr lukelos? Ma se meet, kut oru ma inge meyen kut lungse “God lun ma paye.” Ke ma inge kut srunga in long ke me luti kikiap su lain ma paye ke Kas lun God. (Sam 31:5; Jon 17:17) Kut lungse pa u su Jeova el orekmakin in luti kut ke ma paye su arlana mwo. U lun Jeova pa luti kut ke inel a ke kalmen ma inge, ke akwuk lal ke fwalu, ma sikyak nu sesr kut fwin mise, a ke fwinsrak ke sifwil moulyuk. Ya kom esam ke engan yok lom ke pal se meet kom lotela ma inge nukewa a kutupa ma paye? Ke ma inge nikmet lela ma kikiap puspus su tuku sin met luti kikiap in oru kom in forla liki u se inge su luti kom ke ma paye.—Jon 6:66-69.

⁸ Paye la kut fwa tia fwasr tokin met luti kikiap inge fwinne oasr ma puspus su elos fwak! Wangin sripe kut in loang nu ke met luti su oana luf su wangin kof ka. Met nukewa su long met luti kikiap inge elos fwa asor yok. Kut lungse na paye in oaru nu sin Jeova a nu ke u lal. U se inge tia akasorye kut a ase nu sesr ma paye su tuku ke Kas lun God pal nukewa su oana kof nasnas.—Isaia 55:1-3; Mattu 24:45-47.

Nikmet “Liaung Sramsram Lusrongten”

9, 10. Kas in sensen fuka ke me sramsram lusrongten Poul el sang nu sel Timote? Me sramsram lusrongten fuka Poul el nunku ka? (Srike liye pa footnote.)

⁹ Sie me akul ke inkaneku su ku in srusrngiye nu ke inkanek sito ku in kiapekutla. Kutupal arlana fusrasr in liye la sie me akul el srusrngiye nu ke inkanek sito, tusruktu kutupal tia fusrasr in akilen. Ma inge paye pa nu ke ma kikiap puspus su tuku sin Setan. Kut fwin tia taran, kutu ma kikiap inge ku in kiapekutla. Met sap Poul el akkalemye kas in sensen nu sesr ke ma kikiap puspus inge. El pangon ma inge oana me “sramsram lusrongten.” (Ridi 1 Timote 1:3, 4.) Mea me sramsram lusrongten inge, a fuka kut ku in karungin kut in tia loang nu ke sramsram lusrongten inge? Kut enenu me top nu ke kusensiyuk inge tu kut in fwasr pal nukewa ke inkanek nu ke moul ma patpat.

¹⁰ Kas in sensen lal Poul ke me sramsram lusrongten oasr ke leta se meet su el simusla nu sel Timote, sie met Kristian elder. Poul el fwak nu sel Timote in karungin congregation in nasnas pal nukewa a in kasru met lili nukewa in sruokye oaru lalos nu sin Jeova. (1 Timote 1:18, 19) Kas Grik su Poul el orekmakin ke me “sramsram lusrongten” kalmekin nu ke “sie ma kikiap” ku “sie ma kineuk.” Sie buk el akkalemye la sie me sramsram lusrongten el “sie me sramsram ke alu su tia kupasr nu ke kutena ma paye.” (The International Standard Bible Encyclopaedia) Saap Poul el nunku ke ma kikiap puspus ke alu su tuku ke me sramsram matu su metu elos kineuk a oru met puspus in nunku yok ka.a Poul el fwak la me sramsram puspus inge arlana sensen meyen ma inge ‘kol nu ke kusensiyuk puspus su enenu me top.’ Kalmen ma inge pa met puspus su loang akmwoye nu ke me sramsram lusrongten inge elos mutawauk in siyuk ke ma puspus su tia paye a orekmakin pal lalos in srike in suk me top nu ka. Setan el orekmakin me sramsram lusrongten puspus inge a ma kikiap puspus lun alu in oru metu in mwulkunla ke ma yok sripe emeet. Kas lal Poul el arlana kalem: Nikmet loang akmwoye ke me sramsram lusrongten!

11. Setan el orekmakin fuka alu kikiap in kiapela metu? Kas in sensen fuka kut enenu in loang akmwoye nu ka?

¹¹ Mea kutu me sramsram lusrongten ku kikiap inge su ku in kiapekutla kut fwin tia taran ka? Kut ku in fwak la me sramsram lusrongten ku kikiap pa kutena me luti lun alu su oru in sresr in “forla liki ma paye,” kalme pa, ma inge oru kut in tui in loang nu ke ma paye. (2 Timote 4:3, 4) Setan el lalmetmet. El orekmakin alu kikiap in kiapela metu. Pa inge sripe paenang Baibel el akkalemye la el oral sifwana oana “sie lipufan lun kalem.” (2 Korint 11:14) Ke sie me pupulyuk, alu puspus fwak mu elos fwasr tokin Kraist, tusruktu elos luti ma kikiap puspus oana ke Trinity a ke isis. Elos luti pa mu oasr ma se ke metu srakna oasr tokin mano se mise tari. Met puspus elos nunku mu Christmas a Easter akinsemwomwoye God, tusruktu ma puspus su metu oru ke lusen pal in me akfulat inge tuku ke alu kikiap. Me sramsram kikiap fwa tia kiapekutla kut fwin loang akmwoye nu ke kas in sensen lun God in srikutla liki alu kikiap nukewa a “tia kalye kutena ma tia nasnas.”—2 Korint 6:14-17.

12, 13. (a) Ma kikiap fuka tolu tuku sel Setan? A mea ma paye ke kais sie ma kikiap inge? (b) Mea kut enenu in oru kut fwin tia lungse Setan in kiapekutla ke me sramsram lusrongten ku kikiap inge?

¹² Oasr pa ma kikiap puspus saye su Setan el orekmakin su ku in kiapekutla kut fwin tia taran ka. Lela kut in sramsram ke ma kikiap tolu inge. Ma kikiap se meet pa: Kom ku in oru ma nukewa kom lungse; kom oru sulela lom ke ma sumwos a ke ma koluk. Pal nukewa kut ku in long ma inge ke television, ke petsa mukuikui, a kut ridi ke me rid puspus, ke newspaper a ke Internet. Ke sripen kut long ke ma kikiap inge pal nukewa, paenang arlana fusrasr nu sesr in mutawauk in nunku pa ke inkanek inge a in etawi nunak fokfok lun met puspus lun fwalu. Tusruktu ma paye pa kut enenu God in fwak nu sesr la mea ma mwo a mea ma koluk. (Jeremaia 10:23) Ma kikiap akluo pa: God el fwa tia ekulla kutena ma fwin fwalu. Kain in nunak inge oru met puspus in nunku ke pal inge mukena. Elos tia nunku ke pal fwasru a tia pa nunku in akinsemwomwoye God. Saap kut mutawauk in nunku oana elos a tokin ma inge kut ku in “alsrangesr a talap” nu ke orekma in kulansap lasr nu sin God. (2 Piter 1:8) Ma paye pa Jeova el apkuran in ekulla ma puspus fwin fwalu, a kut enenu in akkalemye ke inkanek in moul su kut moulkin la kut lulalfongi na paye ma inge. (Mattu 24:44) Ma kikiap aktolu pa: God el tia nunku keim a karungin kom. Setan el lungse kut in lulalfongi mu kut sufwal a tia arlana mwo tu God in lungse kut. Fwin Setan el oru kut in lulalfongi ke ma kikiap inge, saap kut fwa tui in kulansap nu sin Jeova. Ma paye pa Jeova el lungse kais sie met kulansap lal, a kais sie selos arlana yok sripe nu sel.—Mattu 10:29-31.

¹³ Kut enenu in taran pal nukewa in tia akkalemye kain in nunak lun met puspus ke fwal lal Setan. Kutupal saap ma elos fwak a nunak lalos oana in ma paye. Tusruktu, esam la Setan el lungse in kiapekutla, a wangin kutena met su etu in kiapela metu liki ma el oru. Kut enenu in loang akmwoye nu ke kas in sensen su oasr in Baibel kut fwin tia lungse Setan in kiapekutla ke me sramsram lusrongten ku kikiap.—2 Piter 1:16.

Nikmet “Fwasr Tokol Setan”

14. Kas in sensen fuka Poul el sang nu sin kutu mutan katinmas fwusr? Efu ku kut nukewa enenu in loang akmwoye ke kas in sensen se inge?

¹⁴ Srike lumala ke nunak lom la oasr sie me akul ke inkanek su akkalemye ouinge: “Pa Inge Inkaneku in Fwasr Tokol Setan.” Aok, wangin met Kristian su lungse in fwasr tokin sie me akul inge. Tusruktu met Kristian paye elos ku pa in mutawauk in “fwasr tokol Setan.” Poul el sensenkin kut la fuka ma inge ku in sikyak. (Ridi 1 Timote 5:11-15.) El simusla ke kutu mutan katinmas su srakna fwusr ke congregation in pal san, tusruktu kut nukewa ku in lotela ke ma el fwak. Mutan katinmas inge elos tia nunku mu elos fwasr tokol Setan, tusruktu ma elos oru a ma elos sramsramkin akkalemye la elos fwasr tokol. Fuka kut ku in fwasr liki in tia etawel Setan? Kut fwa sramsramkin ingena ke kas in sensen su Poul el simusla ke orekma in lesrik, kalme pa, in srumon ma koluk ke met puspus saye.

15. Mea Setan el lungse in oru? In fwal nu ke ma Poul el fwak, ma puspus fuka Setan el orekmakin in kufuskutla in oru ma el lungse?

¹⁵ Setan el tia lungse kut in sramsramkin ke ma kut lulalfongi. El lungse kut in tui in fwakak peng mwo. (Fwakyuk 12:17) El lungse kut in orekmakin pal lasr in oru ma puspus su tia mwo, ku ma puspus su ku in oru met kulansap puspus lun Jeova in lain sie sin sie. Poul el akkalemye ke kutu ma su Setan el orekmakin in kufuskutla in oru ma el lungse. Poul el fwak la mutan katinmas puspus in len lal elos “alsrangesr, a takuskus.” Mutan katinmas inge elos orekmakin pal yok lalos in muteta nu yurin met kawuk lalos a sramsramkin ma puspus su tia yok sripe. Kut enenu in taran in tia oru oiya inge. Ke sie me pupulyuk, kut ku in orekmakin pal yok lasr a pal lun met puspus saye ke kut rid a supwela e-mail, rid a supwela text, a sramsram nu sin met ke telefon ke pal loeloes, a in muteta nu yurolos in sramsramkin ma puspus su tia yok sripe a kutupal tia paye. Poul el fwak pa la mutan katinmas inge elos lungse in “lesriki met.” Met lesrik kutupal elos lungse in fwak ma koluk ke met puspus saye. Ma inge arlana sensen meyen lesrik ku in ekla oana sie kas in akkolukye sie met, kalme pa kas kikiap ke met puspus saye. Kas kikiap inge oru met puspus in anwuk ku lain sie sin sie. (Soakas 26:20) Met puspus su fwak ma kikiap ke met saye elos oana Setan su Devil, fwinne elos nukin ma inge.b (Liye footnote.) Oayepa, Poul el fwak la mutan katinmas elos ‘utuk in masrol’ a kaskas ke ma su tia fwal in fwak. Elos srike in fwak nu sin met saye la fuka elos ku in moulkin moul lalos. Wangin kutena met oasr sumwos lal in oru ma inge. Me sensen nukewa inge ku in oru kut in tui in nunku ke orekma yok sripe su Jeova el sapkin nu sesr in oru. Kut enenu in orekmakin pal lasr in sulkakin ke Togusrai lun God. Kut fwin tui in fwakak peng mwo, kut mutawauk in fwasr tokol Setan. A kut fwin welul Setan, kut lain Jeova. Kut nukewa enenu in oru sulela lasr la su kut lungse in wi.—Mattu 12:30.

16. Mea kut enenu in oru kut fwin srunga in fwasr tokol Setan?

¹⁶ Kut fwin loang akmwoye ke ma Baibel el akkalemye, kut fwa tia fwasr tokol Setan. Poul el akkalemye kutu ma su fwa kasre kut. El fwak la kut enenu in “orekma nu sin Leum pal e nukewa.” (1 Korint 15:58) Kut fwin alken in orekma nu sin Jeova, wangin pal lasr nu ke ma puspus su tia yok sripe a ku in arlana sensen nu sesr. (Mattu 6:33) Sie ma su Poul el akkalemye nu sesr in oru pa in kaskaskin ma “su mwo, kas in musaiyuk.” (Efesus 4:29) Nikmet lesrik, a nikmet long ke kas in lesrik sin met puspus saye. (Srike liye pok se inge “Unen Mwon Sokak Nu Yen Engyengu.”) Akkalemye sunak a lulalfongi nu sin met lili wiyom nukewa. Kom fwin oru ma inge, kom e fwa fwakak ma mwomwo puspus kelos pal nukewa. Poul el akkalemye pa nu sesr ke ma mwo su kut enenu in oru. El fwak: “Liaung orekma lomwos” sifwana. (1 Tessalonika 4:11) Akkalemye nu sin met puspus la kom nunku kelos, tusruktu kom oru ma inge wi oiyen sunak. Esam la saap oasr ma puspus kelos sifwana su elos srunga in sramsramkin a elos srunga met puspus saye in etu. A esam la kut enenu in tia oru sulela lun met saye ke ma puspus su elos sifwana enenu in oru.—Galetia 6:5.

17. (a) Efu ku Jeova el ase nu sesr kas in sensen nukewa su kut sramsramkin inge? (b) Mea kut lungse na paye in oru?

¹⁷ Kut sang kulo nu sin Jeova meyen el akkalemye kalem nu sesr ma kut tia enenu in oru! Kut enenu in esam pal nukewa la Jeova el ase nu sesr kas in sensen nukewa su kut sramsramkin inge meyen el lungse kut na paye. El tia lungse Setan in kiapekutla a akkeokye kut. Inkanek su Jeova el lungse kut in sulela upa in fwasr ka, tusruktu pa inge inkanek sefwanna nu ke moul ma patpat. (Mattu 7:14) Kut enenu in akpayeye pal nukewa in loang akmwoye nu sin Jeova ke pal se el fwak nu sesr: “Pa inge inkaneku. Komwos fwasr we.”—Isaia 30:21.

[Footnote]

Mea Topuk Lom?

Kom ku in akkalemye fuka la kom loang akmwoye nu ke kas in sensen su oasr ke ma simusla puspus inge?

• 2 Piter 2:1-3

• 1 Timote 1:3, 4

• 1 Timote 5:11-15

[Box/Petsac ke sra 11]

Unen Mwon Sokak Nu Yen Engyengu

Oasr sie me sramsram matu lun met Ju su akkalemye la orekma in lesrik arlana sensen.

Oasr sie mokul su fwak ma kikiap puspus ke sie mokul su lalmetmet emeet ke mura lal. Tokin kutu pal, mokul se ma fwak ma kikiap el lungse met lalmetmet se inge in nunak munas nu sel. Ke ma inge el siyuk sin mokul lalmetmet sa: “Mea nga ku in oru in akkalemye la nga auliyuk ke ma nga fwak keim?” Mokul lalmetmet sa el fwak nu sel: “Oasr ma se su kom ku in oru. Eis sie ilul su nenela ke unen mwon. Tulalik ilul san a lela engu in ugla unen mwon nukewa ka.” Mokul se inge el nukin la efu ku ma inge enenu in orek, ne ouinge el oru ma mokul lalmetmet el fwak nu sel elan oru. Tok, el folokla nu yurin met lalmetmet a siyuk sel: “Ya kom nunak munas ke ma koluk luk ingena?” Mokul lalmetmet se el fwak nu sel: “Ma se meet, kom som a sukak unen mwon nukewa.” Mokul se inge el fwak: “Arlana upa in oru ma kom fwak ngan. Engu ukla tari unen mwon yen nukewa. Nga kofla koneak unen mwon nukewa inge.” Ke ma inge, met lalmetmet el fwak: “In oana ke unen mwon sokak nu yen nukewa, kas kikiap lom som nu sin met puspus. A oana ke kom kofla in sifwil koneak unen mwon inge, kom tia ku pa in oru metu in mwulkunla ma kom fwak nu selos.”

Me lutlut ka arlana kalem. Kut tia ku in ekulla ma kut fwak tari. A kutupal kut tia ku in ekulla fwako koluk su tuku ke ma kut fwak. Ke ma inge meet liki kut fwak ma koluk ke met puspus saye, arlana mwo in esam la kas lasr oana sie nu ke unen mwon su sokak nu yen engyengu.