Met Tulan Lasr Nu Kemwa Elos Som Nu Oya?
“Un met puspis misinge elos tia akilen met tulan lalos.”—Benjamin Disraeli, 19th-century English statesman.
MET Cuba nu kemwa oasr sie akmwuk mwo in akkeye insemwomwo inmaslon met se met se: Elos pangon ma inge, un met tulan, ku círculos de abuelos (un papa a nine matu). Fwal nu ke sie report in yiu 1997, 1 inmaslon met 5 lun met Cuba elos wi ke kain in u inge, su kasrelos in koneak met asrouki, me pwarak a me akkeye, a me kasru nu selos in sruokye sie akmwuk ku in mano. Magasin inge World Health el aketeye la, “Pal nu kemwa oasr enenu ke taktu lun sou in orala sie campaign ke vaccination ku fakfok in kosrkosr mas,” “u se inge círculos de abuelos el oasr we in sang kasru.”
Tusruktu, sie me asor yok meyen in an puspis fwin fwalu, wanginla kain futoto se inge inmaslon met tulan. Loang akmwoye ke sie me srikasrak lun sie mokul pangpang Wolfgang Dircks, su muta ke sie loom apartment in an western Europe. Ke kutu yiu somla, newspaper inge The Canberra Times el reporti la fwinne oasr sou 17 su muta ke loom apartment inge a elos nu kemwa tia liyel Wolfgang ke lusen sie pal na loes, “tusruktu, wangin ne sie selos tunye doorbell lal ke srungal in sukol.” Ke pal se met su ma la loom apartment inge el tuku, “ma el koneak pa sri lal Wolfgang su wanginla ikwe, el oasr ke siya ye mutun television.” Ma oasr ke imwel pa sie buk ke program lun television ke December 5, 1993. Wolfgang el mise tari ke lusen yiu limekosr. Ma inge sie me akpayeye koluk ke musalla ku ke wanginla futoto a nunku sie sin sie inmaslon met tulan! Tia me lut, sie met sim su orala essay ku me sramsram se el aketeye ke The New York Times Magazine la met tulan lal nu fon, elos oanu met saye, elos ekla oanu “sie un met su tia etu sie sin sie.” Ya ma inge ku in liyeyuk pa in an sum?
Paye met puspis in kutu an elos srakna engunkin futoto paye inmaslon met tulan, a kutu sin met su muta ke an lulap elos kaifweung pa in akkalemye nunuk yok lalos nu sin met tulan lalos. Fwinne ou inge, met puspis su muta ke siti elos pulakin la wangin kutena met su loang nu selos a elos sensen nu sin met tulan lalos. Elos sifwanu srella a tia asrouki nu sin met tulan lalos. Efu ou inge?
Sifwanu Srella a Wangin Met Saye Etu
Paye kut nu kemwa oasr met tulan lasr su muta futoto nu ke loom sesr. Kalem su tuku ke sie television, nguna su ku in liyeyuk ke window, lam in loomu su elos ikasla a kaliye, pusren sitosa ke pal in tuku a pal in som lalos, key puspis su ikasla a kaliye srungal, ma inge nu kemwa akkalemye la met tulan lasr elos “moul.” Tusruktu, kutena akul su akkalemye la oasr met tulan lasr ku in wanginla fwin kais sie met su tukeni muta ke sie an oanu met tulan elos sifwanu srella a tia loang sie sin sie ke sripen kafofo lun moul. Saap met puspis elos pulakin la elos tia enenu in asrouki nu sin met tulan lalos ku wangin kunokon lalos nu sin met tulan lalos ke kutena inkanek.
Ke sie fwal su metu elos “sifwanu lungselos,” met nu kemwa su muta we elos kosrani ma upa su tuku ke sifwanu nunku a tia nunku kutu met. (2 Timote 3:2) Fwokin ma inge pa me asor yok a sifwanu srella. Sifwanu srella ku in kol nu ke silalalfongi nu sin kutu met, yokna fwin orekma silolel upa sang me sensen nu sin met nu kemwa su muta ke an inge. Ke sripe se inge, silalalfongi nu sin kutu met el akwanginyela pakomuta.
Wangin alollo la, ke kutena luma a ma sikyuk in an sum, kom insese la sie met tulan mwo el sie me kasru yok ke an sum. Met nu kemwa ku in oru orekma yok fwin oasr nien sun siefwunnu lalos. Sie met atalani mwo, sie me insemwomwo na paye. Me lutlut toko el fwa aketeye efu ou inge.