Mea Kom Nunku ke Mise?

MISE el oanu nguna su muta seskasr pal nu kemwa ke kut oru orekma lasr ke len nu kemwa, fwinne kut arulanu ku ke manosr ku fwinne kut met kasrup se. Mise el ku in tuku ke pal se kut sasla nu ke inkaneku ku ke pal se kut on ke bed lasr. Kain in ongoiye su met terrorist elos orala ke September 11, 2001, in an New York City a Washington, D.C., oru kut in akilen la “met lokwalok se tok,” mise, ku in tuku nu sin kain in met nu kemwa, kain in matwe nu kemwa, kutupal el ku in tuku nu sin tausen puspis met ke lusen minit na ekasr.​—1 Korint 15:26.

Fwinne mise el sie me aksangeng, tusruktu el purakak met puspis in loang ka. Wangin kutena news saye su purakak met puspis in moli newpaper ku in liye television sayen news ke mise lun met, yokna fwin ma inge sikyuk nu sin met puspis ke inkanek sakuruk a me aksangeng. Metu elos tia totola ke kutena pal in long report ke mise, mise ke meun, ke ongoiye, ke orekma silolel, ku ke mas. Sie me lut na paye meyen nunuk yok inge ke mise akkalemyeyuk yok ke mise lun met pengpeng a met eteyuk.

Kain in pulakin puspis ke mise kut ku in liye. Met nu kemwa elos tafwela in nunku yok ke mise​—ke mise lun kutu met. Tusruktu in nunku ke mise lalos sifwanu, elos srunga in oru inge. Kut nu kemwa srunga na paye in sramsramkin mise lasr sifwanu a kut tia ku in muteng in oru ou inge.

Lut na Paye ke Mise?

Pal nu kemwa sie me srungeyuk na paye in nunku ke mise lasr sifwanu. Efu ou inge? Meyen God el filiye ke insiesr kena in moul ma patpat. “El filiye ma patpat insielos,” pa inge Ekklisiastis 3:11 el fwak, fwal nu ke Anchor Bible. Ke ma inge mise su sun met nu kemwa, el oanu sie meun ke insien met, ma inge akfosyel pal nu kemwa. In aksumwosye ma upa inge ke insiel a in akfwalye kena lal in moul ma patpat, metu el sifwanu orala kain in lalalfongi puspis, mutamwauk ke lalalfongi ke ngun su tia ku in mise nu ke lalalfongi ke reincarnation.

Ke kutena luma a ma sikyuk, mise el me aksupwarye met, a me aksangeng, a sangeng ke mise ku in liyeyuk in an nu kemwa. Ke ma inge kut tia enenu in lut fwin met nu kemwa elos nunku ke mise oanu sie me lain. Ke sie sripe, meyen mise el akkalemye la wangin sripen moul su orekmakinyuk nu ke suk me karup a in ku yurin kutupa met.

Met Su Mukena Muta ke Pal Se El Apkurun in Mise?

In pal meeta, sie met su mas upa a wanginla fwinsrak ku sie met su oasr kinet upa su tia ku in sulpa kela elos lela pal nu kemwa in mise ke loom sel a in an lal su el lungse. Pa inge ma sikyuk pal nu kemwa in pal meeta ke me sramsram lun Baibel, a ma inge srakna orek nu ke an puspis nu misenge. (Genesis 49:1, 2, 33) Ke kain in luma inge, met nu kemwa in sou elos tukeni nu sie, a elos toeni tulik nu kemwa ke pal in sramsram. Ma inge oru kais sie met in pulakin la tia el mukena pa asor a ma inge sang nu selos me pwarak meyen elos akesrui in oru ou inge a akesrui in srukak me keok su tuku ka.

Ma inge tia oanu sie ke ma sikyuk ke sie fwal su nunku mu tia sumwos in sramsramkin mise, ma inge sie me aksangeng nu selos, a tia fwal nu sin tulik srisrik in long meyen ma inge ku in “aktoasryelos alukela ma fwal.” Mise ke pal inge siena liki, a pal nu kemwa kol nu ke me asor yok. Fwinne met puspis elos lungse in mise in loom selos, in misla a ye kurungin lungkulang lun sou lal, tusruktu nu sin met puspis arulanu upa ma sikyuk selos meyen elos mise ke loom ono, pal nu kemwa elos mukena muta in keok a ngal, a elos oan nu ke kofwen me kasru puspis lun met mas. Ke inkanek saye, million puspis misenge elos mise a tia eteyuk​—met puspis su mise ke sripen genocide, sral, AIDS, meun, ku sikasrup upa lun moul.

Sie Me Lutlut Su Fwal Kut in Nunku

Baibel el tia sapkin nu sesr in tia nunku ke mise. Aok, Ekklisiastis 7:2 fwakak nu sesr: “Som nu ke loom sin met su memelil mwo liki som nu ke loom sin met su orek kofwo, tu mao saflaiyen met e nu kemwa.” Ke pal se kut apkurun in mise, saap kut e forla liki orekma puspis su akkafofoye kut ke pal e nu kemwa a kut mutamwauk in loang nu ke lusen pal futoto lun moul. Ma inge ku in kasre kut in orekmakin moul lasr ke sie inkanek mwo a tia ke ma wangin sripe.

Mea nunuk lom ke mise? Ya kom tuni tari pulakin lom ka, lalalfongi, fwinsrak, a sangeng ke saflaiyen moul lom?

Metu tia ku in akilen a aketeye na paye luman moul a luman mise. Met siefwunnu su ku in sramsram a aketeye sumwos ke ma inge pa Met Orekutla. “Tu unon in moul” oasr yurol, a ma lal “inkanek sin mise me.” (Sam 36:9; 68:20) Fwinne luman me lut pa inge, tusruktu sie lutlut ke Kas lun God ke kain in lalalfongi puspis ke mise ku in sie me pwarak a me insemwomwo nu sesr. Ma inge efwa akkalemye la tia mise pa enenu in saflaiyen ma nu kemwa.

[Blurb on page 4]

Mise su ku in sikyuk ke kutena pal ku in kasre kut in orekmakin moul lasr ke inkanek mwo