Tia Na Matu In Lutlut

KSENIYA el isusla in yiu 1897. Oasr tulik mutan 3 nutul, tulik mokul se, grandchildren 15, a great-grandchildren 25. Ke lusen moul lal nu fon el oru na ma papa a nine kiel sapkin nu sel lan oru. Fwinne el tuku nu fwin an Moscow oanu sie met kaeng lun an Abkhaz Republic su oasr meun we, a futoto nu ke Black Sea a Caucasus, tusruktu el inse misla tari ke moul lal, yokna ke alu su el usru sin sou lal.

In 1993, tulik mutan nutul Kseniya pangpang Meri el ekla sie Met Lo lun Jeova. Meri el mutamwauk in sramsram nu sel Kseniya kel Jeova God a ke Baibel, tusruktu el srunga in long. Kseniya el kaifweung in fwak kas inge nu sin tulik nutul, “Nga arulanu matuo in lutlut ma sasu.”

Tusruktu, tulik mutan nutul inge Meri; mutan kien grandson nutul inge, Londa; a great-grandchildren nutul inge Nana a Zaza, su Met Lo lun Jeova nu fon, elos kaifweung in sramsram nu sel ke Baibel. Ke fong lun 1999, elos ridi ma simusla nu sel Kseniya su arulanu purakak insiel. Pa inge kas mwomwo lal Jisus nu sin met sap oaru lal ke pal se el oakiye Mongo in Eku lun Leum. (Luk 22:19, 20) Ke matwe lal inge 102 yiu, Kseniya el oakiye ke fong inge in mutamwauk lutlut ke Baibel.

“Tokin el moul ke lusen yiu 102,” Kseniya el fwak, “Nga tufwanu koneak kalmen moul. Ke pal inge Nga akilen la wangin kutena ma su mwo liki kulansap nu sin God mwolanu a lungse, Jeova. Nga srakna fukoko. Nga ku in rid fwinne Nga tia orekmakin eyeglass a Nga asrouki pal nu kemwa nu ke sou luk.”

In November 5, 2000, Kseniya el baptaisla. El fwak: “Ke pal inge Nga sang tari moul luk in kulansap nu sin Jeova ke lungse. Nga kitakut magasin a tracts ke pal se Nga muta ke bus stop futoto nu ke loom sik. Pal nu kemwa sou luk elos tuku in muteta, a Nga insemwomwo in akkalemye nu selos ma paye kel Jeova.”

Kseniya el ngetuk nu ke sie len ke pal se ‘ikwel fwa mwo liki ikwen sie tulik, a el folokla nu in len in fwusr lal.’ (Job 33:25) Fwin sie met centenarian el tia pulakin la el arulanu matuo tari in lutlut ke kalmen moul su tuku ke Baibel, a fuka kom?