Kusensiyuk Su Tuku Sin Met Rid
Fuka serpent ke imae lun Eden el akkalemye nu sel If me purakak lal in kunausla ma sap lun God ke sak in etu ma mwo a ma koluk?
Genesis 3:1 el fwak: “A serpent el lalmetmet liki kosro lemnak nu kemwa in imae, su Jeova God el orala. A el fwak nu sin mutan se inge: ‘Aok, ya God el fwak, nik komtal mongo ke sak nu kemwa in imae se inge?’ ” Oasr kain in nunuk puspis ke inkanek se ma serpent el orekmakin in akkalemye ma lungse lal nu sel If. Sie nunuk lun metu pa el sramsram nu sel ke inkanek lun srisrsrisr ku mokuikui lun manol. Ke sie me pupulyuk, English cleric inge Joseph Benson el fwak: “El oru ou inge ke inkanek lun srisrisr. Kutu met elos fwak mu ku in nunuk a inkanek in kaskas saap serpent el ku in oru in pal meeta, . . . tusruktu wangin me akpayeye ke ma se inge.”
Tusruktu, el fwin orekmakin srisrsrisr ke inkanek lun manol, fuka serpent el ku in akkalemye nu sel If la el fwin mongo fwokinsak sa elos ku in ekla oanu God, su oasr ku lalos in oru sulela ma mwo a ma koluk? Sayen ma inge, If el sramsram pa nu se, el sang me top nu ke kusensiyuk lun serpent. (Genesis 3:2-5) Kain in nunuk su akkalemye la serpent el akkalemye ma lungse lal ke inkanek lun srisrisr ku mokuikui lun mano ku in kol nu ke nunuk la If el topuk pa ke inkanek in srisrsrisr, tusruktu, Baibel el akkalemye la If el sramsram.
Ke pal se el srukak me sramsram inge, met sap Poul el sang kas in sensen nu sin met lili Kristian wiel: “A Nga sangeng, saap, ke kutena ma, oanu serpent el keapella If ke kutasrik lal, ou inge nunuk lomwos fwa akkolukyeyuk.” Me sensen su Poul el sramsramkin inge tuku sin “met sap kikiap, met orekma kutasrik,” Me sensen su tuku sin “met sap fulatlanu inge” tia tuku ke mokuikui lun manolos ku srisrisr mukena. Wikin ma inge kas lalos—sramsram kutasrik lalos, su elos oru in keapela kutu met.—2 Korint 11:3-5, 13.
Fwinne inkanek in sramsram pa orekmakinyuk in sang keapella If ke imae lun Eden, tusruktu wangin me akpayeye la oasr ku lun serpent in kaskas. Aok, el tia enenu ma inge. Ke pal se lipufon lun God el kaskas nu sel Belum ke inkanek lun kosro ass nutul, kosro inge el tia enenu voice box ku ku in sramsram oanu ma oasr yurin met. (Oekyuk 22:26-31) Arulanu kalem, la ke pal se ‘kosro ass inge su tia kaskaskin pusren met el kaskas,’ ku lal in kaskas tuku sin ngun su tia ku in liyeyuk.—2 Piter 2:16.
Ma orekla in ngun su kasru serpent in sramsram nu sel If akilenyuk in Baibel oanu “serpent matu, el su pangpang Setan a Devil.” (Fwakyuk 12:9) Kaskas su If el long a me top su tuku sel Setan, “sifwanu oral sie lipufon lun kalem.”—2 Korint 11:14.
[Picture on page 19]
“Komtal fwa oanu God, in etu ma mwo a ma koluk”