Su A Fwa Srikutla Liki Lung Lun God?
“Kut lungse, meyen el lungse kut meet.”—1 JON 4:19.
1, 2. (a) Efu ku in etu la oasr kutu met lungse kut arulanu yok sripe nu sesr? (b) Lungse lun su kut enenu emeet?
FUKA lupan saokye nu sum in etu la oasr kutu met su lungse kom? Ke pal in tulik me nu ke pal in matu, met nu kemwa suk lungse. Ya kom liye sie tulik awowo su nine kiel el kafsulak in lungse? Pal nu kemwa, ke kutena ma sikyuk su raunekutla, ke pal se awowo se inge el ngetuk nu ke mutun nine kiel su isrusr, wangin fosrnga lal, el arulanu inse misla ke paon nine kiel su lungsel. Ya kom esam pulakin lom ke lusen pal in ma upa lun moul lom ke pal se kom srakna fwusr? (1 Tessalonika 2:7) Kutupal, saap kom tia etu ma kom enenu na paye ku kom tia kalem ke ma kom pula, tusruktu, arulanu yok sripe na paye in etu la papa a nine kiom elos lungse kom! Ya tia sie me kasru nu sum in etu la kom ku in sunolos in eis kasru ke kutena ma upa ku kusensiyuk? Paye, ke inkanek lun moul nu kemwa, ma yok emeet su kut enenu pa lungse. Lungse se inge sie me akpayeye nu sesr la kut ma saok se.
2 Lungse mongfwusesr lun papa a nine sang kasru yok nu ke kapkapek mwo a sumwos. Fwinne ou inge, in oasr lalalfongi la Papa tumasr in kosrao, Jeova, el lungse kut, arulanu yok sripe ke kapkapek lasr in ngun a pulakin. Saap, kutu sin met rid lun magasin inge wangin papa a nine su kurunginelosyung na paye. Fwin ma inge ma sikyuk nu sum, lela kom in tia asor. Fwinne wangin ku sufwal lungse su tuku sin papa a nine, lungse lun God fwa akfwalye ma inge.
3. Fuka Jeova el akpayeye nu sin met lal ke lungse lal nu selos?
3 Ke inkanek lun met palu Isaia, Jeova el akkalemye la nine el ku in “mulkunla” awowo nutul, tusruktu el tia ku in oru ou inge nu sin met lal. (Isaia 49:15) In oupanu, Devid el lalalfongi a fwak: “Ke papa tumuk a nine kiuk elos fwasr liki yu, na Jeova el e fwa srukyuyuk.” (Sam 27:10) Sie me akkeye na paye pa inge! Ke kutena luma a ma sikyuk nu sum, kom fwin mwolela tari moul lom nu sin Jeova God, kom enenu in esam pal nu kemwa la lungse lal nu sum yok liki lungse lun kutena met!
Kaifweung in Muta ke Lungse lun God
4. Fuka met Kristian ke century se meet elos akkeyeyuk ke lungse yok lun God?
4 Piye pal se e meet kom eis etauk ke lungse lun Jeova? Wangin alollo, la ma su kom pula oanu ma met Kristian ke century se meet elos pula. Sapter ak5 ke leta lal Poul nu sin met Rom el aketeye arulanu mwo ke inkanek mwo su sie met koluk, ke pal se el loesla liki God, el koneak fuka lungse lun Jeova. In fus 5, kut ku in rid: “Lung lun God oakiyuki tari insiusr ke ngun mutal, su etuku nu sesr.” In fus 8, Poul el tafwela in fwak: “A God el fwakak oiyen lung lal nu sesr, in ma inge, tu Kraist el mise kasr, ke kut met koluk.”
5. Mea ma inge su kasre kom in kalem a sang kulo ke lungse yok lun God?
5 Ke oiye sepanu inge, ke pal se Kas paye lun God el sun insiom a kom mutamwauk in orekmakin in lalalfongi, na ngun mutal lun Jeova fwa kasre kom. Ke inkanek inge, kom fwa ku in mutamwauk in kalem a sang kulo ke ma Jeova el oru ke pal se el supwemu Mwen kulu nutul in mise keim. Ke ma inge, Jeova el kasre kom in akilen lupan lungse lal nu sin met nu kemwa. Ke pal se kom akilenak ma inge, kom fwinne isusla oanu sie met sesumwos su loesla liki God, Jeova el ikasla inkanek nu sin met tu elos in ekla met sumwosmwos su oasr fwinsrak lalos nu ke moul ma patpat, ya ma inge tia purakak insiom? Ya ma inge tia mokle insiom in lungse Jeova?—Rom 5:10.
6. Efu kutupal kut pulakin la kut luman loesla liki Jeova?
6 Meyen kom mokleyukyak ke lungse lun Papa tumom in kosrao tu kom in futoto nu sel a kom in aksumwosye moul lom in akinsemwomwoyel, paenang kom sang mwolela moul lom nu sin God. Ke pal inge kom engunkin misla yurin God. Tusruktu, ya oasr pal kom pulakin mu kom tia na futoto nu sin Jeova? Ma inge ku in sikyuk nu sin kutena met inmaslosr. Tusruktu, kom enenu in esam pal nu kemwa la God el tia ekyek. Lungse lal onnu a tia ekla, oanu fwat su tia tui in sang kalem nu fwin fwalu. (Malakai 3:6; Jemes 1:17) Fwin ke luma saye, kut ku in ekyek—ke kais kutu pal. Oapanu ke mokuikui lun fwalu ke oasr pal tafwu oan ke losr. In oupanu, ke kut som liki God, fwinne kitin pal na, kut ku in oula lun futoto lasr nu sel. Mea kut enenu in oru in aksumwosye luma a ma sikyuk inge?
7. Fuka lutlut lasr sifwanu ke moul lasr kasru kut in muta in lungse lun God?
7 Kut fwin akilen la kut mutamwauk in fwasr liki lungse lun God, kut enenu in siyuk sesr sifwanu: ‘Ya Nga pilesreyuk in aksaokye lungse lun God? Ya Nga mutamwauk in kakasrisrik fwasr liki lungse lun God su moul, a akkalemye ke inkanek puspis la oasr na munasla lun lalalfongi? Ya Nga filiye nunuk luk ke “ma lun ikwe,” a tia ke “ma lun ngun”?’ (Rom 8:5-8; Hibru 3:12) Kut fwin akyokye tari moul lasr nu sin Jeova, kut ku in suk inkanek in aksumwosye ma sikyuk inge, kut in sifwil fuloko nu ke sie moul mwo, su futoto nu sel. Jemes el kaifwe kut: “Komwos in kalukyung nu yurin God, a el e fwa kalukot nu yuromwos.” (Jemes 4:8) Esam kas lal Jud: “A komwos met kulu, komwos sifwanu musai komwos fwin lalalfongi lomwos, a pre in ngun mutal, a kurunginkomwosyung in lungse lun God.”—Jud 20, 21.
Ekyek lun Kutena Luma Tia Ekulla Lungse lun God
8. Kain in ekla fuka ke pal sa ku in sikyuk ke moul lasr?
8 Moul lasr ke akmwuk se inge pal nu kemwa ekla. Togusra Solomon el liye la “pal a a ma sikyuk tuku nu [sesr] kemwa.” (Ekklisiastis 9:11) Ke pal na futoto, moul lasr nu kemwa ku in ekla. Ke sie len kut ku in mano, a ke len toku kut mas upa. Ke sie len, oasr orekma lasr, ke len toka, wanginla orekma lasr. Ke kutena pal su kut tia etu, mise el sikyuk nu sin met su kut lungse. Met Kristian ke kutu an saap elos engunkin misla ke kutu pal, na, tia pat nu ke pal se su elos tia nunku, oasr sie ma upa sikyuk. Saap elos fwakak ma kikiap lain kut, a ke sripe se inge, kut sun nununku sesumwos. Aok, moul lasr tia misla a tia insemwomwo pal nu kemwa.—Jemes 4:13-15.
9. Efu arulanu mwo in lutlutkin kutu ipen ma simusla in Rom sapter 8?
9 Ke pal se me akasor sun kut, kut mutamwauk in pulakin la kut supwar asor, paenang lungse lasr nu sin God srikeni. Ke sripen kut nu kemwa ku in sun kain in luma inge, paenang arulanu mwo kut in loang akmwoye nu ke kas in akkeye mwo lal Poul su simusyukla in Rom sapter 8. Kas inge akkalemyeyuk nu in met Kristian akmusrala, Tusruktu, ke akmwuk, ma inge fwal pa nu sin met nu kemwa su wi ke sip ngie, su aksumwosyeyuk oanu met kamwuk lun God, oanu Ebream meet liki pal lun met Kristian.—Rom 4:20-22; Jemes 2:21-23.
10, 11. (a) Mea kutu kas kikiap su lain met lun God orekla sin met loklwalok lalos? (b) Efu kas kikiap inge tia yok sripe nu sin met Kristian?
10 Rid Rom 8:31-34. Poul el siyuk: “God el fwin wi kut, su ku in lain kut?” Paye, Setan a fwal koluk lal lain kut. Met koluk elos ku in kaskas kikiap lain kut, nu ke court panu lun anu. Kutu sin papa a nine Kristian elos akalemyeyuk mu, elos srunga tulik nutulos meyen elos tia lela tulik nutulos in eis kutena akmwuk lun ono su kunausla ma sap lun God, ku meyen elos tia lela in wi ke kutena me akfulat lun met pegan. (Orekma 15:28, 29; 2 Korint 6:14-16) Kutu sin met Kristian oaru elos akolukyeyuk ke kas kikiap su fwakak mu elos lain guferment meyen elos tia esalos in wi uniye kutu met ke pal in meun ku elos srunga in wi ke politic. (Jon 17:16) Kutu sin met lain elos kaskas kikiap nu sin media, a kineak in fwak la Met Lo lun Jeova elos sie u srisrik ke alu su oan ye koko lun met su sang me sensen nu sin metu.
11 Tusruktu, lela kut in tia mulkunla la in len lun met sap, akkalemyeye pe ou inge meet: “Tu fono ke u se inge, kut etu tu yen nu kemwa met elos kaskas ko ka.” (Orekma 28:22) Ya kas kikiap inge oasr sripe? God mukena pa aksumwosye met Kristian paye, fwal nu ke lalalfongi lalos ke me kise lun Kraist. Efu ku Jeova el an tila lungse met nu kemwa su alu nu sel tokin el sang nu selos me sang saok se omeet—ke Mwen kulu nutul? (1 Jon 4:10) Inge, ke Kraist el moulyuk tari liki mise a muta lepo leyut lun God, paenang el ku in sang pe kasru nu sin met Kristian pal nu kemwa. Su ku in lain inkanek in kasru lun Kraist nu sin met tuma lutlut lal ku su ku in lain nununku sumwosmwos lun God nu sin met tuma lutlut oaru lal? Wangin kutena met ku in oru ou inge!—Isaia 50:8, 9; Hibru 4:15, 16.
12, 13. (a) Mea kutu luma a ma sikyuk su tia ku in srikutla liki lungse lun God? (b) Mea nien sun lun Devil paenang el orala ma upa nu sesr? (c) Efu met Kristian nu kemwa ku in kutangla?
12 Rid Rom 8:35-37. Nu sin met se met se, ya oasr kutena met ku kutena ma su ku in srikutla liki lungse lun Jeova a Mwen nutul, Jisus Kraist? Setan el ku in srike in orekmakin met lal fwin fwalu in orek lokwalok nu sin met Kristian. Ke lusen century somla, pus sin met lili wiesr mokul a mutan elos sun kolyai upa in an puspis. In kutu an ke pal inge, met lili wiesr elos sun ma upa ke mani len nu kemwa. Kutu selos pulakin ngal su tuku ke sral ku ke sripen wangin nuknuk su elos ku in nukom. Mea nien sun lun Devil paenang el oru kain in ma upa inge? Sie nien sun lal pa in akmunasyela alu paye lun Jeova. Setan el lungse kut in lalalfongi mu wanginla lungse lun God nu sesr. Tusruktu, ya pa inge ma sikyuk na paye?
13 Oanu Poul, su orekmakin Sam 44:22, kut lutlutkin tari Kas lun God su simusyukla. Kut kalem ka la, ke sripen en God paenang ma inge nu kemwa sikyuk nu sesr, meyen kut “sip” nutul. Akmutalye en God a in akilen sumwosmwos lal in kol ke ma nu kemwa pa paenang ma sikyuk inge. Ke sripen me sramsram yok inge paenang God el lela me srifwe, a tia ke sripen wanginla lungse lal nu sesr. Ke kutena ma upa su ku in sikyuk, kut nu kemwa akkeyeyuk in etu la lungse lun God nu sin met lal, a nu sin kais sie sesr, tia ekla. Ke kutena kain in me keok kut ku in kutangyukla kut fwin srukye na lalalfongi paye lasr. Kut nu kemwa akkeyeyuk a musaiyuk ke lungse lun God su tia ku in wanginla.
14. Efu ku Poul el lalalfongi ke lungse lun God fwinne oasr ma upa su met Kristian elos sun?
14 Rid Rom 8:38, 39. Mea ma inge su paenang Poul el an lalalfongi la wangin kutena ma su ku in srela met Kristian liki lungse lun God? Wangin alollo la, experience lal Poul ke orekma lun forfor pa akkeye lalalfongi lal la kutena ma upa su sikyuk tia ku in kunausla lungse lun God nu sesr. (2 Korint 11:23-27; Filippai 4:13) Ouyepa, oasr etauk lal Poul ke akmwuk sumwosmwos a orekma lun God nu sin met lal. Ya mise ku in kutangla lungse lun God nu sin met nu kemwa su kulansap nu sel ke paye? Mo na mo! Met oaru inge nu kemwa su mise elos moulkin ke nunuk sumwosmwos lun God, a el akmoulyelosyuk ke pal pakiyuki lal.—Luk 20:37, 38; 1 Korint 15:22-26.
15, 16. Sromon kutu ma sikyuk su tia ku in oru lungse lun God in tui nu sin met kulansap oaru lal.
15 Ke kutena ma upa su sikyuk ke moul misinge—ongoiye ku mas su tia ku in wanginla, ma upa lun mani—koflanu kunausla lungse lun God nu sin met lal. Fwinne lipufon, in oanu lipufon seakos se su ekla Setan, el tia ku in oru Jeova el an eisla lungse lal nu sin met kulansap oaru lal. (Job 2:3) Gufernment puspis elos ku in kosroila, in filiye nu in kalpous, a akkeokye met kulansap lun God a pangnolos “persona non grata.” (1 Korint 4:13) Kain in oiye koluk lun mutanfwal inge ku in mokle kutu met in oru orekma koluk in lain kut, tusruktu, ma inge tia ku in paenang Met Ku Liki Ku in kosrao a fwalu in som liki kut.
16 Oanu met Kristian, kut tia enenu in sano kutena ma su Poul el pangon “ma oasr inge”—ma sikyuk puspis, luma puspis ke akmwuk inge—ku “ma e fwa tuku” ke pal fwasru fwa tia ku in kunausla futoto lun God nu sin met lal. Fwinne ku fwin fwalu a kosrao orek meun nu sesr, lungse paye lun God fwa onnu in akkeye kut. Tia “fulat ku loal” ku in kutongye lungse lun God, oanu Poul el akkalemye. Aok, wangin kutena ma su ku in akmunasye kut, ku kutena ma su me purakak yok nu sesr, ku in srikutla liki lungse lun God; ku kutena ma orekla saye ku in kunausla futoto lun Met Orekutla nu sin met kulansap oaru lal. Lungse lun God tia wanginla; el on nu tok ma patpat.—1 Korint 13:8.
Aksaokye Lungse lun God Ma Patpat
17. (a) Efu ku in oasr lungse lun God “mwo liki moul”? (b) Efu ku kut in akkalemye la kut aksaokye lung kulang lun God?
17 Fuka lupan saok lun lungse lun God nu sum? Ya kom pulakin ma Devid el pula, su simusyukla: “Tu lungkulang lom mwo liki moul, ngoasrok fwa kaksakin kom. Ou inge, Nga fwa kolu nu sum ke Nga moul; Nga fwa kolak pouk in em”? (Sam 63:3, 4) Paye, ya oasr kutena ma moul fwin fwalu ku in wise ma mwo su mwo liki lungse lun God a kamwuk paye lal? Ke sie me pupulyuk, ya orekma in suk mani el mwo liki inse misla a insemwomwo su tuku ke sie moul futoto nu sin God? (Luk 12:15) Kutu sin met Kristian elos enenu in oru sulela paye meet la elos e fwasr liki Jeova a eis moul ku elos fwa srukye lalalfongi lalos nu sin Jeova a eis mise. Ma inge sikyuk meet nu sin Met Lo lun Jeova puspis ke akmwuk lun Nazi in concentration camps ke lusen Meun Lulap Ak2. Fwinne oasr met su fwuleak, tusruktu pus sin met lili wiesr elos sulela in sroukye ku lungse lun God, elos akola in mise fwin eneneyuk. Elos nu kemwa su sroukye na lungse lal elos ku in lalalfongi nu ke fwinsrak ma patpat su tuku sin God, pa inge ma su fwalu tia ku in ase. (Mark 8:34-36) Tusruktu, oasr ma saye a tia moul ma patpat mukena.
18. Efu ku sie me insemwomwo na paye in moul ma patpat?
18 Kut fwinne tia ku in eis moul ma patpat fwin Jeova el tia lela, srike nunku pa ke oiyen sie moul loeloes fwin El su Orekutla wangin ka. Kain in moul ou inge wangin sripe, wangin kutena me insemwomwo paye. Jeova el sang orekma mwomwo nu sin met lal ke len safla inge. Ke ma inge, kut ku in lalalfongi la fwin Jeova, El Su Akpayeye Akmwuk Lal, pa ase moul ma patpat, na kain in moul inge fwa ku in nenela ke me insemwomwo, a ma saok puspis su kut ku in lutlut ka a oru. (Ekklisiastis 3:11) Kutena kain in me lutlut su kut ku in lotela ke millennium puspis in pal fwasru, kut tia ku in kasru kut in etu nu fon ma “loal in gaspen lalmetmet a etauk lun God.”—Rom 11:33.
Papa El Sifwanu Lungse Komwos
19. Kain in kas mwomwo fuka Jisus Kraist el sang nu sin met tuma lutlut lal?
19 Ke Nisan 14, 33 C.E., in fong safla lal yurin met sap oaru 11, Jisus el sramsramkin ke ma puspis in akkeyelos ke ma e fwa sikyuk ke pal fwasru. Elos nu kemwa welul Jisus ke me keok su sonol, a elos pulakin na paye lungse lal nu selos. (Luk 22:28, 30; Jon 1:16; 13:1) Jisus el akkeyelos a fwak: “Tu Papa el sifwanu lungsel komwos.” (Jon 16:27) Fuka yokiyen kas inge in sang kasru met tumal lutlut lal in akilen futoto lun Papa tumalos su in kosrao nu selos!
20. Mea kom kaifweung in oru, a mea kom ku in lalalfongi?
20 Met puspis su moul misinge elos kulansap nu sin Jeova ke lusen yiu puspis. Wangin alollo, meet liki saflaiyen akmwuk koluk inge, kut fwa sun kain in me srifwe puspis. Nikmwet lela me srifwe ku ma upa inge nu kemwa in paenang alollo nu sum ke lungse lun God nu sum. Kut tia ku in alollo nu ke ma paye inge, Jeova el lungse kom. (Jemes 5:11) Lela kais sie sesr in kaifweung na in oru kunokon lasr, a oaru in akos ma sap lun God. (Jon 15:8-10) Lela kut nu kemwa in orekmakin pal mwo lasr kemwa in kaksakunul. Lela kut in akkeye sulela lasr in sroukye na futoto lasr nu sin Jeova ke pre a ke lutlut ke Kas lal. Nu ke kutena ma su fwa sikyuk ke pal fwasru, fwin kut oru ma nu kemwa ke ku lasr in akinsemwomwoye Jeova, kut fwa muta na in misla, a fwa filiye lalalfongi yok nu ke lungse lal su tia ku in wanginla.—2 Piter 3:14.
Kom Topuk Fuka?
• Kut fwin srukye na ku lasr in ngun a pulakin insemwomwo, lungse lun su kut enenu?
• Mea ma puspis su tia ku in orala Jeova el an tui ke lungse lal nu sin met kulansap lal?
• Efu ku in pulakin lungse lun Jeova “mwo liki moul”?
[Pictures on page 7]
Kut fwin pulakin la kut srikutla liki lungse lun God, kut ku in orekma in aksumwosye ma inge
[Picture on page 9]
Poul el etu la efu el sun kolyai