Mea Togusrai Lun God Fwa Oru Ke Pal Fwasru
“Togusrai lom in tuku. Ma lungse lom in orek, oanu in kosrao, ou inge fwin fwalu.”—MATTU 6:10.
1. Mea kalmen tuku lun Togusrai lun God?
KE pal se Jisus el luti met tuma lutlut lal in pre ke Togusrai lun God, el etu la tuku lun ma inge fwa aksafyela kolyuk lun met su srela liki God ke lusen tausen yiu puspis. Ke lusen pal inge nu kemwa, apkurun ma lungse lun God nu kemwa tia orek fwin fwalu. (Sam 147:19, 20) Tusruktu, tokin oakiyuki lun Togusrai lun God in kosrao, ma lungse lun God nu kemwa e fwa orek in an nu kemwa. Pal in ayaol kolyuk lun met nu ke Togusrai lun God in kosrao arulanu futotoeni.
2. Mea akul ke ayaol lun kolyuk lun met nu ke kolyuk lun Togusrai?
2 Me akul ke pal in ayaol inge Jisus Kraist el pangon “ongoiye lulap, oanu tia liyeyuk ke mutamweyen, fwalu nu inge, mo, a fwa tia nu tok.” (Mattu 24:21) Baibel el tianu aketeye luseka pa inge, tusruktu ma upa su e fwa tuku ke lusen pal inge upa liki kutena ma upa su fwalu liye tari. Ke mutamweyen ongoiye lulap, oasr ma e sikyuk su me lut lulap na paye nu sin met nu kemwa fwin fwalu: kunanela lun alu kikiap nu kemwa. Ma inge tia me lut nu sin Met Lo lun Jeova, meyen elos sano tari ma inge ke lusen pal loeloes. (Fwakyuk 17:1, 15-17; 18:1-24) Ongoiye lulap e fwa safla ke Armagedun ke pal se Togusrai lun God el kunausla akmwuk nu kemwa lun Setan.—Daniel 2:44; Fwakyuk 16:14, 16.
3. Fuka Jeremaia el akkalemye saflaiyen met nu kemwa su seakos?
3 Mea kalmen ma inge nu sin met nu kemwa su “tia etu God, a nu selos su tia akos mwosasu,” ke Togusrai lal in kosrao ye koko lal Kraist. (2 Tessalonika 1:6-9) Kas palu lun Baibel aketeye nu sesr: “Liye! Ma koluk fwa illa liki sie mutanfwal nu ke sie mutanfwal, a sie paka lulap fwa tuyuk liki tafwunyen fwalu. A met anwuki lun Jeova fwa muta in len sa liki tafwun fwalu nu ke tafwun fwal ngia, wangin sie pa eoksra kalos, a elos fwa tia etukeni, ku pakpuki. Elos fwa fok fwin mutanfwalu.”—Jeremaia 25:32, 33.
Saflaiyen Ma Koluk
4. Efu oasr sumwos lun Jeova in aksafyela akmwuk koluk inge?
4 Ke lusen tausen yiu puspis, Jeova God el lela ma koluk in on, lusen pal inge su el lela fwal tari nu sin met fwokpap in liye la kolyuk lun met sie me keok. Ke sie me pupulyuk, fwal nu ke sropon sie me sramsram, ke century ak20 mukena, pus liki 150 million met anwuki ke meun lulap, ke meun lun kais sie an, a kutupa orekma koluk. Orekma silolel lun met arulanu kalem ke lusen pal in Meun Lulap II ke pal se 50 million met anwuki, pus selos sun kain in mise upa ke an inge pangpang Nazi concentration camps ku nien kapur lulap lun Nazi. Oanu ma Baibel el palye, ke pal lasr ‘met koluk a met mwosounkas elos fwa yokyokelik in ma koluk.’ (2 Timote 3:1-5, 13) Ke len inge, orekma lun kosro, ma koluk, orekma silolel, pusrapasr, a srunga ke akmwuk lun God arulanu pengpeng. Ke ma inge Jeova el arulanu sumwos in aksafyela akmwuk koluk inge.
5, 6. Aketeye luman ma koluk su ku in liyeyuk fwin an Kenan in pal meeta.
5 Luma a ma sikyuk ke len inge oanu sie ke ma sikyuk fwin an Kenan 3,500 yiu somla. Baibel el fwak: “Elos oru nu sin god lalos me srungeyuk nu kemwa nu sin Jeova, ma el srunga tu paye elos esukak in e mwen nutulos a an nutulos nu sin god lalos.” (Duteronomi 12:31) Jeova el akkalemye nu sin mutanfwal lun Israel: “Meyen ma koluk lun mutanfwal inge Jeova God lom el luselosla liki ye mutom.” (Duteronomi 9:5) Met sramsram lun Baibel pangpang Henry H. Halley el fwak: “Ke pal in alu nu sel Beal, Ashtoreth, a kutupa god lun met Kenan ku in liyeyuk orekma lun kosro, nimnim alukela ma fwal, on a onsrosro su wangin me kutong lun met nu kemwa su wi ke toeni inge; tempel nu kemwa lalos pa center lun orekma koluk.”
6 Halley el akkalemye lupan ma koluk upa su elos sremla ka, meyen ke sie an inmaslon an puspis su elos muta we meet, met archaeologist elos “konaok sufa puspis su oasr tulik srisrik puspis su elos kisekin nu sel Beal.” El fwak: “An inge sie kalyuk lun awowo nu kemwa su tufwanu isusla. . . . Met Kenan elos alu, ke inkanek lun kosro upa, oanu sie ipen alu, ye mutan god lalos; na, elos uniye mwen se meet nutulos, oanu me kise nu ke god sepanu inge. Ke sie inkanek yok, an Kenan el ekla oanu Sodom a Gomorrah lulap. . . . Ya oasr sumwos lun kain in met inge nu kemwa su oasr me srungeyuk a fokfok a silolel in moul lalos? . . . Met archaeologist ku met nu kemwa su pukunak ma musalla we elos lut la efu ku God el tia sa in kunauselosla oanu ma el oru tok.”
Usrui Fwalu
7, 8. Fuka God el aknasnasye fwalu se inge?
7 Fwin God el aknasnasye an Kenan meet, el aknasnasye pa fwalu nu fon ke pal fwasru a el sang ma inge nu sin met nu kemwa su oru ma lungse lal. “Tu met sumwos fwa muta in fwalu, a met sumwosna fwa muta na we. A met koluk fwa mwotla liki fwalu.” (Soakas 2:21, 22) A met sim lun Sam el fwak: “Tu kitin pal na, a met koluk fwa wanginla . . . A met fwokpap elos fwa usru fwalu, a fwa sifwanu akengunyelos in misla puspis.” (Sam 37:10, 11) Setan el ouyepa wanginla, tu lan “tia sifwil kiapu mutanfwal, nu ke pal sie tausen yiu safla.” (Fwakyuk 20:1-3) Aok, “fwalu wanginla, a lung kolukla, a el su oru ma lungse lun God fwa muta ma patpat.”—1 Jon 2:17.
8 In aketeye ke kas futoto fwinsrak mwolanu lun met nu kemwa su lungse in moul ma patpat fwin fwalu, Jisus el fwak: “Insemwomwo elos su fwokpap tu fwalu fwa ma lalos.” (Mattu 5:5) Kalem la el sramsram ke Sam 37:29, su palye: “Met sumwosmwos elos fwa usru fwalu, a muta we ma patpat.” Jisus el etu la akmwuk lun Jeova nu sin met sumwosmwos nu kemwa pa in muta ke sie paredais fwin fwalu ma patpat. Jeova el fwak: “Nga orala fwalu, metu a kosro su muta fwin mutan fwalu, ke ku lulap luk . . . a Nga sang nu selos su Nga nunku mu mwo.”—Jeremaia 27:5.
Sie Fwalu Sasu Mwolanu
9. Kain in fwalu fuka Togusrai lun God el oakiye?
9 Tokin Armagedun, Togusrai lun God el oakiye sie “fwalu sasu” mwolanu, “yen sumwosmwos on we.” (2 Piter 3:13) Sie mongle lulap na paye pa inge nu sin met nu kemwa su moula liki Armagedun meyen wanginla akmwuk koluk inge nu kemwa! Sie me insemwomwo na paye nu selos in ilyuk nu ke fwalu sasu sumwosmwos ye koko lun Togusrai guferment lun God in kosrao, wikin me insemwomwo sakuruk puspis a fwinsrak nu ke moul ma patpat!—Fwakyuk 7:9-17.
10. Kain in ma koluk puspis fuka tia ku in sifwil liyeyuk ye koko lun Togusrai?
10 Wanginla met su fwa akkeokyeyuk ke meun, orekma silolel, sral, ku kosro koluk. “A Nga fwa oru sie mwuleung in misla yurolos [met luk], a fwa oru kosro koluk in tela oasr in fwal sa . . . A sak lun imae fwa oswe fwako, a fwalu fwa oswe ma laesla, a elos fwa muta in misla in fwal selos.” “Elos fwa tuktukye kutlas nutulos nu ke mwusra lun plau, a mwusra nutulos nu ke mitmit in pakpuk lesak. Mutanfwal fwa tia sifwil srukak kutlas lain mutanfwal, a elos fwa tia sifwil lutlut meun. A elos fwa muta, kais sie met ye fain lal a ye sak fig lal, a wangin sie fwa aksangengyelos.”—Ezekiel 34:25-28; Maika 4:3, 4.
11. Efu kut ku in lalalfongi la mas nu kemwa in manosr e fwa wanginla?
11 Mas, asor, a fwinne mise e fwa wanginla. “A met su muta we fwa tia fwak: ‘Nga mas.’ Fwa nunuk munas ke ma koluk lun met su muta we.” (Isaia 33:24) “[God] El fwa ela sroninmutalos nu kemwa, a a fwa wangin pa mise, a elos fwa tia sifwil asor, ku tung, ku ngal, tu ma meeta, wanginla. . . . Liye! Nga oru ma nu kemwa sasu.’ ” (Fwakyuk 21:4, 5) Ke pal se el muta fwin fwalu, Jisus el akkalemye ku lal in oru ou inge ke inkanek lun ku su God el sang nu sel. Ke kasru lun ngun mutal, Jisus el som nu in an nu kemwa akkeye met fuka a met mas nu kemwa.—Mattu 15:30, 31.
12. Kain in fwinsrak fuka oasr yurin met mise?
12 Jisus el oru pa ma lulap. El akmoulyeak met mise. Oiye fuka met fwokpap elos akkalemye? Ke pal se el akmoulyeak tulik mutan se su yiu 12 matwe, papa a nine kiel elos “lut ke lut lulap.” (Mark 5:42) Pa inge siepa me srikasrak ke ma Jisus el akola in oru fwin fwalu nu fon on ye koko lun Togusrai lun God, meyen fwin an we “fwa oasr sifwil moulyuk nu sin met sumwos a met sesumwos.” (Orekma 24:15) Nunku ke me lut lulap lun metu ke pal se met elos sifwil moulyuk a sifwil osun nu sin met nu kemwa su elos lungse! Wangin alollo la oasr sie lutlut lulap e fwa orek ye koko lun Togusrai “fwalu fwa sesesla ke etu Jeova, oanu kofu afwunla mwea.”—Isaia 11:9.
Sumwos in Kol Lun Jeova akilenyuk
13. Fuka sumwosmwos lun kolyuk lun God ku in liyeyuk?
13 Ke saflaiyen tausen yiu kolyuk lun Togusrai, sou nu kemwa fwin fwalu folokla tari nu ke mano a nunuk sumwosmwos. Fwalu nu fon ekla tari imae lun Eden, sie paredais. Misla, insemwomwo, wangin sensen, a un met nu kemwa su oasr lungse sie sin sie oakiyuki tari. Kut sonna liye kain in luma inge ke me sramsram lun met meet liki kolyuk lun Togusrai. Sie ma yok pa inge su tia oanu sie ke sramsram matu lun metu su akkalemyeyuk inmaslon keok ke lusen tausen yiu puspis lun met a ke kolyuk mwolanu ke lusen tausen yiu lun Togusrai lun God in kosrao! Kolyuk lun God ke inkanek lun Togusrai lal fwa akkalemye la el sumwosmwos ke ma nu kemwa. Sumwos lun God in kol, kolyuk lal, fwa akkeyeyuk.
14. Mea sikyuk nu sin met lain nu kemwa ke saflaiyen tausen yiu?
14 Ke saflaiyen tausen yiu, Jeova el lela met sumwosmwos in orekmakin sukosok lalos in oru sulela ke met su elos lungse in kulansapu. Baibel el akkalemye la “Setan fwa taltalla liki prison lal.” El sulpa srike in keapela metu, a kutu selos akola in sulela in som liki God. Tu in tia lela ‘ongoiye in tuyuk pal se akluo,’ Jeova el kunausla Setan a demon lal, a met nu kemwa su lain kolyuk lun Jeova. Wangin kutena met su anwuki ma patpat ke pal inge ku in lain a fwak la wangin pal mwo ku orekma koluk lalos tuku ke moul sesumwos. Mo, elos met sumwosmwos tari oanu Edam a If, su sulela na paye ke insemwomwo in lain kolyuk sumwosmwos lun Jeova.—Fwakyuk 20:7-10; Nehum 1:9.
15. Kain in futoto fuka oasr yurin met oaru nu sin Jeova?
15 Ke inkanek saye, u lulap lun met elos sulela in akkeye sumwos lun Jeova in kol. Yurin kais sie met lain su anwuki, met sumwosmwos elos fwa tu ye mutun Jeova, meyen elos sasla ke me srifwe safla ke oaru. Jeova el eis met sumwosmwos inge nu kemwa oanu tulik mokul a tulik mutan nutul. Ke ma inge elos sifwil folokla nu ke sie moul futoto su oasr yurol Edam a If nu sin God meet liki elos lain. Ke ma inge Rom 8:21 e fwa akpayeyuk: “Tu ouyepa ma orekla fwa taltalla liki sruo lun ma kulamwi nu ke sukosok lun mwolanu lun tulik nutin God.” Met palu Isaia el palye: “[God] el nuna okomla mise nu tok, a Leum Jeova el fwa ela sroninmet liki muta nu kemwa.”—Isaia 25:8.
Fwinsrak ke Moul Ma Patpat
16. Efu arulanu fwal in ngetuk nu ke pal fwasru ke me sang ke moul ma patpat?
16 Sie fwinsrak mwolanu na paye sano met oaru nu kemwa, in etu la God el okoela a kakla oanu af me insemwomwo nu kemwa ke ma lun ngun a ikwe! Met sim lun Sam el sumwosmwos in fwak: “Kom oalngelik poum a akkupye ma lungse lun ma nu kemwa su moul.” (Sam 145:16) Jeova el akkeye un met nu kemwa su oasr fwinsrak fwin fwalu in orala fwinsrak in moul ke sie paredais in ipen lalalfongi lalos nu sel. Fwinne me sramsram yok ke sumwos lun Jeova in kol arulanu yok sripe, tusruktu el tia siyuk nu sin kutena met in kulansap nu sel ke sripen sie ma lane su elos ku in eis. Ke me sramsram nu fon in Baibel, oaru nu sin God a fwinsrak ke moul ma patpat kapsreni nu sie a ip yok se ke lalalfongi lun met Kristian nu sin God. “Tu el su tuku nu yurin God el fwa lalalfongi tu el God, a tu el met sang moul nu selos su sukol.”—Hibru 11:6.
17. Fuka Jisus el akkalemye la arulanu sumwos in akkeyeyuk ke fwinsrak lasr inge?
17 Jisus el fwak: “A pa inge moul ma patpat, tu elos fwa ete kom God paye mukefwunnu, a Jisus Kraist su kom supalmu.” (Jon 17:3) Ke fus inge el kapsreni etu ke God a ke akmwuk lal ke me sang su e fwa tuku ke sripen etauk inge. Oanu sie me pupulyuk, ke pal se met koluk se el siyuk sel Jisus in esamul tokin el sun Togusrai lal, Jisus el fwak: “Payenu Nga fwak nu sum misinge, kom fwa muta yurok in Paredais.” (Luk 23:43 NW) El tia fwak nu sin mokul in lalalfongi na el fwinne tia eis sie me sang. El etu la Jeova el lungse met kulansap lal nu kemwa in oasr fwinsrak ke moul ma patpat ke sie paredais fwin fwalu a ma inge ku in kasrelos a akkeyelos ke pal se elos sun kain in me srifwe puspis fwin fwalu. Ke ma inge, in ngetuk nu ke me sang ke pal fwasru sie me kasru yok ke muteng oanu sie met Kristian.
Pal Fwasru lun Togusrai
18, 19. Mea sikyuk nu sin Togusra a ke Togusrai ke saflaiyen Tausen Yiu Kolyuk lal?
18 Ke sripen Togusrai inge pa guferment se akluo su Jeova el orekmakin in orala fwalu a met nu kemwa su muta ka in sumwosmwos a in sifwil futoto nu sel, na mea kunokon lun Jisus Kraist su Togusra a 144,000 togusra a met tol tokin Millennium? “Na, tuku saflaiye, ke el fwa sang togusrai nu sin God, aok, Papa tumal, ke el ella tari leumi lun leum nu kemwa, a mwal lalos nu kemwa, a ku lalos nu kemwa. Tu el fwa Leum, nu ke pal el likiye met lokwalok lal nu kemwa ye niel.”—1 Korint 15:24, 25.
19 Ke pal se Kraist el sang Togusrai nu sin God, na fuka kut ku in kalem ke ma simusla ke pal se el fwak la togusrai inge fwa on nu tok ma patpat? Ma nu kemwa su Togusrai inge orala fwa on nu tok ma patpat. Kraist el eis akfulat ma patpat ke sripen orekma lal in akkeye sumwos lun God in kol. Tusruktu, ke sripen ma koluk a mise wanginla ke pal inge, a met nu kemwa moliyukla liki tari, ma inge aksafyela orekma lal oanu sie met su mol. Kolyuk lun Togusrai ke Tausen Yiu ouyepa aksafyeyukla; ke ma inge tia sifwil enenu guferment akluo in oasr inmaslon Jeova a met fwokpap. Ke ma inge, “God el fwa ma nu kemwa in ma nu kemwa.”—1 Korint 15:28.
20. Fuka kut ku in etu pal fwasru lal Kraist a 144,000?
20 Mea kunokon lun Kraist a met kol nu kemwa su welul tokin Kolyuk la ke Tausen Yiu aksafyeyukla? Baibel el tia fwak. Tusruktu, kut ku in lalalfongi la Jeova el sang nu selos me sang ke orekma puspis ke ma orekla lal. Lela kut nu kemwa in akkeye sumwos lun Jeova in kol a in fwal nu ke moul ma patpat, na ke pal fwasru, kut fwa moul in liye mea akmwuk lun Jeova nu sin Togusra a met nu kemwa su welul-togusra, a ke ma orekla sakuruk lal nu kemwa in kosrao a fwalu!
Me Lutlut Yok Ke Kalweni
• Kain in ayaol fuka ke kolyuk arulanu apkurun?
• Fuka God el oru nununku nu sin met koluk a met mwo?
• Kain in luma fuka ku in liyeyuk ke fwalu sasu?
• Fuka sumwos lun Jeova in kol ku in akkeyeyuk na paye?
[Pictures on page 25]
“Oasr sifwil moulyuk lun met sumwos a met sesumwos”
[Picture on page 26]
Met oaru nu kemwa elos fwa sifwil foloko ke futoto sumwos lalos nu sin Jeova