Me Molela ke Inkanek lun Togusrai lun God Apkurun Me!
“Togusrai lom in tuku. Ma lungse lom in orek, oana in kosrao, oinge fwin fwalu.”—MATTU 6:10.
1. Mea me luti yok lal Jisus?
KE PAL se Jisus Kraist el oru Me Sramsram lal Fwin Eolu, el akkalemye pa ke pre lun leum su akkalemyeyuk ke kas fototo ke me luti yok lal. El luti met tuma lutlut lal in pre nu sin God: “Togusrai lom in tuku. Ma lungse lom in orek, oana in kosrao, oinge fwin fwalu.” (Mattu 6:9-13) Jisus “el fwasr sasla in siti lulap a siti srisrik, luti a fwakak mwosasu lun togusrai lun God.” (Luk 8:1) Kraist el akkeye met tuma lutlut nukewa lal: ‘Komwos suk meet togusrai lal a ke ma sumwosmwos lun God.’ (Mattu 6:33, NW) Ke pal kom lutlutkin me lutlut se inge, suk ke inkanek puspus in orekmakin me lutlut yok sripe nu ke orekma lom in sulkakin peng mwo. Ke sie me pupulyuk, nunku ke inkanek mwomwo la fuka kom ku in sang me top nu ke kusensiyuk puspus inge: Fuka yok sripaiyen peng mwo lun Togusrai? Ke mea metu enenu in moliyukla? A fuka Togusrai lun God fwa molela met puspus?
2. Peng mwo lun Togusrai el yok sripe fuka?
2 Jisus el palye: “A mwosasu inge lun togusrai fwa sulkakinelik fwin fwalu nufon tu in ma lo nu sin mutanfwal nu kemwa; a na safla a fwa tuku.” (Mattu 24:14) Peng mwo ke Togusrai lun God el arulana yok sripe. Aok, peng mwo ka pa peng mwo se su mwo emeet fwin fwalu! Ke congregation lun Met Lo lun Jeova su pus liki 100,000, oasr apkurun ke million itkosr sin met kulansap lun God elos wi ke orekma in sulkakin peng mwo su wangin ma oana, elos fwakak nu sin met puspus la Togusrai el oakiyuki tari. Oakiyuki ke Togusrai el peng mwo meyen kalmeyen ma inge pa God el oakiye sie guferment in kosrao in karungin akwuk nukewa fwin fwalu. Ye koko lun Togusrai, ma lungse lun Jeova fwa orek fwin fwalu oana in kosrao.
3, 4. Mea e fwa sikyak ke pal se ma lungse lun God fwa orek fwin fwalu?
3 Mea fwa sikyak nu sin metu ke pal se ma lungse lun God el orek fwin fwalu? Jeova el fwa “ela sroninmutalos nu kemwa; a a fwa wangin pa mise; a elos fwa tia sifwil asor, ku tung, ku ngal.” (Fwakyuk 21:4) Metu fwa tia mas ku mise ke sripen ma koluk a oiyen sesumwos su elos usrui. Met mise nukewa su oasr ke me esmakin lun God elos ku in eis pal mwomwo nu ke moul ma patpat, meyen Baibel el akkalemye mwulela se inge: “A fwa oasr sifwil moulyuk nu sin met sumwos a met sesumwos.” (Orekma 24:15) Meun, mas, ku sral e fwa wanginla, a fwalu fwa orekla nu ke sie paredais. Fwinne kosro su lemnak ke pal inge fwa engankin misla mwomwo yurin metu a yurin kosro lemnak nukewa.—Sam 46:9; 72:16; Isaia 11:6-9; 33:24; Luk 23:43.
4 Ke sripen me insemwomwo inge su fwa sikyak ye kolyuk lun Togusrai, paenang tia sie me lut fwin kas palu in Baibel el akkalemye ke kain in moul mwomwo in pal sa: “A met fwokpap elos fwa usru fwalu, a fwa sifwana akengunyelos in misla puspus.” Tusruktu mea fwa sikyak nu sin met nukewa su orek lokwalok? Ma simusla el akkalemye ke kas in palu inge: “Tu kitin pal na, a met koluk fwa wanginla.” Tusruktu, “elos su tupan Jeova, elos fwa usru fwalu.”—Sam 37:9-11.
5. Mea fwa sikyak ke akwuk lun ma puspus su oasr ke pal inge?
5 Oasr ma eneneyuk meet liki ma inge nukewa fwa sikyak, enenu in akwanginyeyukla akwuk nukewa ke kain in guferment puspus lun metu su lain sie sin sie, alu kikiap nukewa, a akwuk nukewa lun business. A pa inge ma guferment lun God in kosrao el fwa akola in oru. Met palu Daniel el akkalemye ke kas palu se inge su tuku sin God: “A in len lun togusra ingo [su kol ingena] God in kosrao fwa tulokunak sie togusrai [in kosrao] su fwa tia na kunausyukla. Ku filiye mwal ka nu sin siepa mutanfwal. A a fwa musalsallu a kanausla Togusrai inge [su oasr ke pal inge] nu kemwa, a a fwa tu ma patpat.” (Daniel 2:44) Togusrai lun God—el sie guferment sasu in kosrao—el fwa kol met nukewa su oasr ke akwuk sasu fwin fwalu. E fwa oasr “kosrao sasu a fwal sasu, yen sumwosmwos on we.”—2 Piter 3:13.
Me Enenu Yok nu ke Me Molela Ingena
6. Fuka Baibel el akkalemye ke ma koluk upa lun fwal koluk se inge?
6 Ke pal se Setan, Adam, a If elos lain God, ke sripen elos lungse in oru sulela nu selos sifwana ke ma mwo a ma koluk, pa inge mutamweyen ma upa puspus nu sin metu. Tokin yea 1,600 kutu, a meet liki pa Sronot lulap se su sikyak fwin fwalu, “ma koluk lun met fwin fwalu, a tu nunak lun insielos sitoena pal e nukewa.” (Genesis 6:5) Yea 1,300 tokin sronot, Solomon el liye ma upa puspus sikyak paenang el simusla: “Ke ma inge nga kaksakin met mise su mise omeet yok liki met moul su srakna moul. Aok, yok liki ma luo inge nga akfulatyel su sumwena muta, su sumwena liye orekma koluk su orek ye fwatu.” (Ekklisiastis 4:2, 3) A tokin yea 3,000 kutu su sun pal lasr inge, ma koluk el srakna yokyokelik.
7. Efu ku oasr ma enenu yok ke pal inge nu ke me molela lun God?
7 Aok paye la ma koluk el oasr tari ke lusen pal loeloes, tusruktu oasr ma eneneyuk yok ke pal inge nu ke me molela su tuku ke Togusrai lun God yok liki meeta. Ma puspus su sikyak ke yea 100 somla el koluk liki na ma sikyak in pal meeta, a ma koluk el yokyokelik pal nukewa. Ke sie me pupulyuk, Worldwatch Institute el reporti: “Pisen met nukewa su mise ke sripen meun su orek ke century [ak 20] inge el oasr ke pal tolu fwin srikeyuk nu ke pisen met su mise ke meun nukewa mutamwauk in century se meet AD nu ke yea 1899.” Mutamwauk in yea 1914 nu ke pal inge oasr pisen met su pus liki million 100 elos mise ke meun! Oasr sie buk su pangpang encyclopedia el akkalemye la oasr million 60 sin met elos mise ke Meun Lulap II. Ke sripen oasr mutanfwal puspus ke pal inge su oasr yurulos kofwen me meun lalos su pangpang nuclear, paenang oasr ku lun metu in uniye million puspus sin met fwin fwalu. A fwinne oasr kapkapek yok ke akwuk lun science a ono, ke kais sie yea sral srakna oru tulik srisrik puspus in mise su piselos oasr ke million limekosr kutu.—Srike liye sapta 9 ke buk se inge What Does the Bible Really Teach? (Mea Baibel el Luti Na Paye?)
8. Wangin alolo ka la kolyuk lun metu ke lusen tausan puspus yea el sang me akpayeye nu ke mea?
8 Orekma a kafweang yok lun metu in tulokinye ma koluk el tia ku in kutangla. Akwuk lun fwal se inge ke politic, akwuk lun business, a alu puspus elos tia akpayeye ma enenu yok lun metu nu ke misla, moul mwomwo, a ke mano fukoko su wangin mas ka. Kain in u nukewa lun metu el akyokye me keok a ma upa nu sin met, a tia ku in sang me aksumwos nu ka. Aok, me kolyuk lun metu ke lusen tausan puspus yea el sang me akpayeye nu ke kas inge: “Tu inkanek lun met tia on in el sifwana. Tia ma lun met su fwasr in aksumwosye fwalkel.” (Jeremaia 10:23) Paye la, “oasr ku yurin sie met fwin siepa met nu ke ongoiye lal.” (Ekklisiastis 8:9) Sayen ma inge, “tu ma orekla nukewa sao a tukeni ngalnu nu ke pal se inge.”—Rom 8:22.
9. Kain in oiya upa fuka met Kristian paye elos etu tari ka la efwa ku in liyeyuk ke “len safla” inge?
9 Ke pal lasr inge, Baibel el akkalemye ke kas palu inge: “A etu ma se inge, tu in len safla pal in ongoiye lulap a fwa tuku.” Tokin akuteyuki ke oiyen ma upa puspus in len safla inge su on ye kolyuk lun metu, kas palu se inge el akkalemye pa: “A met koluk a met mwosounkas elos fwa yokyokelik in ma koluk.” (Ridi 2 Timote 3:1-5, 13.) Pa inge ma met Kristian elos etu tari ka la ku in sikyak, meyen “fwalu nufon on ye ku lun met koluk se,” Setan. (1 Jon 5:19) Tusruktu, oasr pwe peng mwo la tia pat God el fwa molela met nukewa su lungse el. Elos fwa moliyukla liki fwal se inge, su arulana yokyokelik in ma koluk la.
Sropon Ma Paye Sefwanna nu ke Me Molela
10. Efu ku Jeova mukena pa Sropon ma paye sefwanna nu ke me molela?
10 Pal nukewa ke kom sulkakin peng mwo, kom in akuteye nu sin met su long kom la Jeova pa Sropon ma paye sefwanna nu ke me molela. El mukena pa oasr ku yuru a el lungse na paye in molela met kulansap nukewa lal liki kutena oiya upa. (Orekma 4:24, 31; Fwakyuk 4:11) Kut ku in lulalfongi la Jeova el ku in molela met kulansap lal pal nukewa a el fwa akpayeye mwulela lal, meyen el fwak: “Paye, oana Nga nunku, ou inge a fwa te oru.” Kas Lal “fwa tia foloko nu [yurul] a wangin sripe.”—Ridi Isaia 14:24, 25; 55:10, 11.
11, 12. Kain in mwulela fuka God el sang nu sin met kulansap nukewa lal?
11 Jeova el mwulela la el fwa molela met kulansap nukewa lal ke pal se el oru nununku lal nu sin met koluk nukewa. Ke pal se el supwella met palu Jeremaia in kaskas pulaik nu sin met puspus su upa ma koluk lalos, God el fwak: “Nikmet sangeng selos.” Efu? “Tu Nga wi kom in molikomla.” (Jeremaia 1:8) Ke inkanek ou inge, meet liki Jeova el kunausla met koluk in an Sodom a Gomorra, el supwela lipufan luo in penulla Lot a sou lal nu ke sie an in molela lalos. “Na Jeova el sisye brimston a e oana af nu fwin Sodom a Gomorra.”—Genesis 19:15, 24, 25.
12 Jeova el ku in molela met nukewa su oru ma lungse lal, fwinne elos oasr yen nukewa fwin fwalu nufon. Ke pal se el kunausla met koluk nukewa ke Sronot, el “molella Noa a met itkosr oelul, sie met luti lun sumwosmwos.” (2 Piter 2:5) Jeova el fwa sifwil molela met sumwosmwos nukewa ke pal se el fwa kunausla fwal koluk se inge. Kas lal el akkalemye: “Suk Jeova, komwos met fulpap lun fwalu nu kemwa . . . Suk sumwosmwos, suk fulpap. Saap komwos fwa mwukinyukla in len in mulat lun Jeova.” (Zefenaia 2:3) Tokin met koluk nukewa fwin fwalu elos kunausyukla, na ‘met sumwos fwa muta in fwalu, a met koluk fwa mwotla liki fwalu.’—Soakas 2:21, 22.
13. Fuka met kulansap lun Jeova su mise tari elos ku in moliyukla?
13 Tusruktu, oasr met kulansap puspus lun God su mise tari ke sripen mas, me kalyai, a ke kutupa sripe. (Mattu 24:9) Ke ma inge, fuka met mise nukewa inge elos ku in moliyukla? In oana ke ma akkalemyeyuk tari ke me lutlut inge, “a fwa oasr sifwil moulyuk nu sin met sumwos.” (Orekma 24:15) Sie me akkeye na paye pa inge in etu la wangin kutena ma su ku in kutongilye Jeova in molela met kulansap nukewa lal!
Sie Guferment Sumwosmwos
14. Efu ku kut ku in lulalfongi la Togusrai lun God el sie guferment sumwosmwos?
14 Ke orekma in luti lom, kom ku in akuteye la Togusrai lun Jeova in kosrao el sie guferment sumwosmwos. Aok ma inge el sumwosmwos ke sripen el akkalemye oiya mwomwo puspus lun God, oana nununku sumwos, sumwosmwos, a lungse. (Duteronomi 32:4; 1 Jon 4:8) God el sang Togusrai inge nu sin Jisus Kraist, el su fwal emeet in kol fwalu. Jeova el orala pa akwuk lal la efwa oasr met Kristian akmusrala su piselos oasr ke 144,000 su fwa moliyukla liki fwalu a sifwil akmoulyeyukyak nu in kosrao oana met usru su fwa welul Kraist in kol fwalu nufon.—Fwakyuk 14:1-5.
15. Akkalemye ma tia oana sie nu ke kolyuk lun Togusrai lun God a ke kolyuk lun metu.
15 Paye la oasr ma yok su tia oana sie nu ke kolyuk lun Jisus a met 144,000 nu ke kolyuk lun met nukewa su sesumwos! Met kol puspus lun fwal se inge elos akkalemye oiya koluk pal nukewa a kol met puspus lalos nu ke meun puspus, su pa inge sripe paenang oasr million puspus sin met elos anwuki. Wangin alolo ka la ma Simusla el kai kut in tia filiye lulalfongi lasr nu sin met, “su wangin kasru yuro”! (Sam 146:3) Tusruktu kolyuk lun Kraist el fwa akpayeye ke oiya mwomwo lal! “Fwasru nu yuruk, komwos nu kemwa su orekma a fwuni,” Jisus el fwak, “a Nga fwa sot mongla nu sumwos. Eis srenenu luk nu fwomwos, a lutlut sik, tu Nga fwokpap a inse pusisel, a komwos fwa konoiyuk mongla in ngunumwos. Tu srenenu luk fusrasr, a me utuk luk mulalla.”—Mattu 11:28-30.
Len Safla Tia Pat Fwa Aksafyeyukla!
16. Fuka len safla inge fwa aksafyeyukla?
16 Fwal se inge oasr tari in len safla lal ke lusen yea puspus, ku oasr tari ke “saflaiyen akwuk lun ma puspus,” mutamwauk in yea 1914. (Mattu 24:3, NW) Tia pat, ma su Jisus el sramsramkin ke “ongoiye lulap” fwa sikyak. (Ridi Mattu 24:21.) Kain in ongoiye inge su wangin ma oana fwa kol nu ke saflaiyen akwuk nukewa lal Setan. Tusruktu fuka ongoiye lulap se inge fwa mutamwauk? A ma inge fwa aksafyeyukla fuka?
17. Mea Baibel el akkalemye oana ke mutamweyen ongoiye lulap?
17 Ongoiye lulap fwa sa in sikyak, tia pat el fwa mutamwauk. Aok, “len lun Jeova” fwa sikyak ke pal se metu elos tia nunku ka, “ke elos fwak: ‘Misla a nikmet sangeng!’” (Ridi 1 Tessalonika 5:2, 3.) Ongoiye lulap inge su palyeyuk tari fwa mutamwauk ke pal se mutanfwal nukewa elos nunku mu elos apkurun in eis me akmwoye ma upa nukewa lalos. A kunausla lun “Babulon Lulap,” su lumeyuk nu ke alu kikiap nukewa, fwa aklutye fwalu nufon. Togusra puspus a met puspus saye elos fwa lut ma lulap ke pal se nununku el orek nu sin Babulon Lulap.—Fwakyuk 17:1-6, 18; 18:9, 10, 15, 16, 19.
18. Mea Jeova el fwa oru ke pal se Setan el oru me lain yok lal a kalyai met kulansap nukewa Lal?
18 Pal se efwa tuku, su e fwa oasr “me akul in fwat a malem a itue,” a “me akul lun Mwen nutin met fwa sikyuk in kosrao.” In pal se inge kut ku in ‘keyuk sifwesr tu molela lasr apkuran.’ (Luk 21:25-28; Mattu 24:29, 30) Setan, ku Gog, el fwa forokla un met meun lal in lain met kulansap nukewa lun God. Tusruktu nu sin met nukewa su kalyai met kulansap oaru lal, Jeova el fwak: “El su kalkomwosi kalye atron mutuk.” (Zekaraia 2:8) Ke ma inge, orekma lal Setan in srike in kunauselos la fwa tia eis kutangla. Efu? Meyen Leum Jeova el fwa sang me karungin in molela met kulansap nukewa lal.—Ezikiel 38:9, 18.
19. Efu ku kut ku in lulalfongi la lipufan nukewa lun Jeova fwa orekmakinyuk in kunausla akwuk nukewa lal Setan?
19 Ke pal se Jeova el oru orekma in lain mutanfwal nukewa, ‘elos fwa etu la el pa Jeova.’ (Ezikiel 36:23) El fwa supwela met meun lal in oru nununku lal—oana lipufan ku puspus lal ye kolyuk lun Jisus Kraist—in kunausla akwuk nukewa lal Setan fwin fwalu. (Fwakyuk 19:11-19) Kut fwin srakna esam la oasr sie pal su lipufan sefwanna el uniye “siefok oalngoul limekosr tausan” sin met lokwalok lun God ke fong sefwanna, paenang ma sikyak inge ku in kasre kut in lulalfongi na paye la lipufan puspus in kosrao elos fwa ku a fusrasr pa nu selos in kunausla akwuk nukewa lal Setan fwin fwalu ke pal se ongoiye lulap fwa aksafyeyukla ke pal se Armagedun el mutamwauk in sikyak. (2 Togusra 19:35; Fwakyuk 16:14, 16) Setan a dimon nukewa lal elos fwa sisila nu in abyss ke lusen sie tausan yea. Tokin ma inge, elos fwa kunausyukla.—Fwakyuk 20:1-3.
20. Mea Jeova el fwa akpayeye ke inkanek lun Togusrai?
20 Fwalu fwa aknasnasyeyukla liki ma koluk nukewa, a met sumwosmwos elos fwa moul ma patpat fwin fwalu. Jeova el fwa akpayeye la el pa Met Molela Lulap. (Sam 145:20) Ke inkanek lun Togusrai, el fwa akmutalye sumwos lal in kol, a akmutalye e mutal lal, a el fwa akpayeye akwuk mwolana lal nu fwin fwalu. Lela kom in pulakin me engan yok ke orekma lom in kafweang ke inkanek in luti yok ke kom sulkakin peng mwo a kasru met puspus su “paye insielos nu ke moul ma patpat” tu elos in ku in etu a akilen la molela ke inkanek lun Togusrai lun God el arulana apkurun!—Orekma 13:48, NW.
Ya Kom Esam?
• Fuka Jisus el akkalemye ke yok sripaiyen Togusrai?
• Efu ku oasr ma enenu yok nu ke me molela ke pal inge yok liki meeta?
• Kain in oiya fuka kut ku in lulalfongi mu ku in sikyak ke pal in ongoiye lulap?
• Fuka Jeova el akpayeye la el pa Met Molela Lulap?
[Pictures on page 16, 17]
Kas lun God el akkalemye ke kas palu ke orekma in sulkakin peng mwo fwin fwalu nufon ke pal lasr inge el tia ku in lumeyuk nu ke kutena kain in orekma su yok sripe
[Picture on page 19]
In oana ke orekma lun Jeova in molella Noa a sou lal, El ku in oru oapana in molikutla
[Picture on page 20]
Jeova “el fwa ella sroninmutun met nukewa . . . , a mise fwa wanginla.”—Fwakyuk 21:4