Ya Wanginla Kalmen Kas Se Inge “Kristian”?

MEA kalmen sie met Kristian? Kom a topuk fuka? Sie sulela ke oanu sie met ke mutanfwal puspis orekla in akkalemye kusensiyuk inge, a pa inge me srikasrak ke topuk puspis lalos:

“In fwasr tokin Jisus a in etawi orekma lal.”

“In ekla sie met mwo a in kulang nu sin kutu met.”

“In esel Kraist oanu Leum a Met Lango.”

“In som nu ke alu pangpang Mass, fwak Rosary, a in eis Holy Communion.”

“Nga tia lalalfongi la kom enenu in som nu ke alu tu in ekla sie met Kristian.”

Fwinne ke dictionary puspis oasr kain in aketeye puspis ke ma se inge. Ke ma paye, sie nu ke ma inge, el sang kalme siengoul ke kas se inge “Kristian,” mutamwauk ke “lalalalfongi ku tuku ke alu lun Jisus Kraist” nu ke “sie met mwo ku met fwal.” Paenang tia me lut met puspis elos sun ma upa in aketeye mea kalmen sie met Kristian.

Sie Kain in Nunuk Sukosok In Oru Sulela Arulanu Yok

Ke len inge, inmaslon met su ekin Kristian​—fwinne inmaslon met su wi ke u siefwunnu—​kom ku in konaok kain in nunuk puspis ke kain in met lutlut oanu, Baibel su etuku ke ngun lun God, me lutlut ke evolution, sroang lun alu nu ke politics, a ke orekma in fwakak lalalfongi lun sie met nu sin kutu met. Me sramsram yok ke moul lun met oanu abortion, mokul nu sin mokul ku mutan nu sin mutan, a tukeni muta fwinne sonna payuk, pal nu kemwa me purakak yok orala me akukuin. Paenang oiye pengpeng inge misinge pa sulela na lun kais sie met.

Ke sie me pupulyuk, sie alu lun Protestant, el tufwanu orala vote lalos in akkeye sumwos lun alu in “sulela sie mokul nu sin mokul matu in filiye nu ke governing board,” pa inge report ke Christian Century. Kutu sin met kol lun alu elos akkalemye nunuk a fwak la tia lalalfongi nu sin Jisus pa yok sripe nu ke molela. Elos lalalfongi la met Ju, Muslim, a kutupa met “saap elos e fwa somwak nu in kosrao [oanu met Kristian],” pa inge sie report ke The New York Times.

Nunku fwin kom ku, sie Marxist el akkeye capitalism ku sie democrat el akkeye dictatorship ku sie environmentalist el akkeye deforestation. “Saap kom akola in fwak la met inge tia sie Marxist ku sie democrat ku sie environmentalist,”​—a kom sumwos na paye ke ma se inge. Tusruktu, kom fwin tuni akmwoye nu ke nunuk lun met puspis misinge su ekin Kristian, kom ku in liye lalalfongi puspis su tia oanu sie a su lain sie sin sie a pal nu kemwa ma inge lain ma Met Oakiye lun Kristianity, Jisus Kraist, el luti. Mea kain in lalalfongi puspis inge su lain sie sin sie lungse in akkalemye ke luman Kristianity lalos sifwanu?​—1 Korint 1:10.

Me purakak in ekulla me luti Kristian in akfwalye nu ke ngun lun fwal se inge su oasr tari ke me sramsram lun fwalu ke lusen yiu puspis somla, oanu ma kut etu ku liye tari. Mea God a Jisus Kraist elos pula ke ekla se inge? Ya alu nu kemwa su luti me luti su tia tuku sin Kraist ku in fwal in pangnolos sifwanu met Kristian? Kusensiyuk inge e fwa sramsramkin ke me lutlut toko an.