Lalalfongi Ku In Ekulla Moul Lom

“KU In moulkin moul mwo fwinne wangin God.” Pa inge sie agnostic el fwak. El fwak la el kasru tulik nutul in kapek ke sie moul nasnas fulat, a elos kasru pa tulik nutulos in kapek ke sie oiyen moul fulat​—ma inge nu kemwa sikyuk fwinne wangin God.

Ya kalmen ma inge pa lalalfongi sin God tia eneneyuk? Kalem la pa inge ma met se inge nunku. A paye la tia met nu kemwa su tia lalalfongi God elos met koluk. Met sap Poul el sramsram ke “met Pegan” su tia etu God tusruktu “oru ke lumalos ma lun ma sap.” (Rom 2:14) Met nu kemwa​—wekunang met agnostics—​oasr sie ella lalos ke pal in isusla. Pukanten selos kaifweung in fwasr tokin ma ella lalos sapkin nu selos in oru elos fwinne tia lalalfongi ke God su sang ku nu selos in akilen ma mwo a ma koluk.

Tusruktu, sie lalalfongi fukoko nu sin God​—su oakiyuki ke Baibel—​el sie me kasru fukoko nu ke ma mwo liki na ella su wangin kasru yuro ka. Sie lalalfongi su akmwuk ke Kas lun God, Baibel, sang kasru ke ella su, ku in oru ella sumwos in etu ma mwo a ma koluk. (Hibru 5:14) Sayen ma inge, lalalfongi ku in akkeye sie met in srukye sie oiye mwo ye me srifwe upa. Ke sie me pupulyuk, ke lusen century ak20, mutanfwal puspis muta ye koko lun met kol koluk, su purakak met mwo in ku in oru orekma silolel upa. Tusruktu, elos nu kemwa su oasr lalalfongi paye lalos nu sin God elos srunga in sisla oiyen moul nasnas lalos, elos fwinne etu la moul lalos e sun me fosrnga. In wekunang ma inge, sie lalalfongi paye su tuku ke Baibel el ku in ekulla sie met. Ma inge ku in molela moul su tula fwinsrak la a in kasru met in fwasr liki ma koluk upa. Tuni kutu me pupulyuk

Lalalfongi Ku In Ekulla Moul lun Sou

“Ke inkanek lun lalalfongi kom ku in aksumwosye ma upa.” Pa inge ma sie met nununku lun an English el fwak ke pal se el akkalemye nununku lal nu sel John a Tania ke oiye sumwos nu ke kurunginyen tulik nutulos. Ke pal se guferment el tuni moul lal John a Tania, elos sonna married a moul lalos arulanu koluk. John el orekmakin ono koluk a sritel mani, oru orekma koluk upa tu elan ku in akfwalye kena koluk lal. El sisla tulik nutul a mutan kiel. Ke ma inge kain in “menmen” fuka kalem tari?

Sie lena, Jon el long la sie tulik mokul fwusr nutin ma se wiel el sramsram ke Paredais. Meyen ma inge purakak insiel, paenang el siyuk kusensiyuk nu sin papa a nine kiel. Met Lo lun Jeova pa papa a nine kiel, a elos kasrel Jon in lutlut ke ma se inge su tuku ke Baibel. Kais kutu srisrik, Jon a Tania elos mutamwauk in akyokye oiyen lalalfongi lalos su tuku ke Baibel wikin pa in mutamwauk in ekulla oiyen moul lalos. Tok elos marriedla a sisla kain in orekma koluk lalos nu kemwa. Met lun guferment su tuku in checki loom selos elos arulanu lut ke ma elos konaok ke loom selos su luman tia ku in sikyuk ke lusen kitin pal na​—sie sou insemwomwo wikin sie loom nasnas selos, sie an mwo in tufala tulik we. Met nununku el sumwos in fwak la “menmen” se inge tuku ke lalalfongi sasu su John a Tania konaok.

Tausen puspis ke mail fwin an England me, oasr sie mutan fwusr su payuk muta futoto nu Near East el apkurun kiukyung nu ke sie me sramsram koluk. El akola in weang million puspis ke kais sie yiu sin met payuk su aksafyela payuk lalos ke divorce. Oasr tulik se nutul, tusruktu mokul tumal matu lukel ke yiu puspis. Ke sripe se inge, sou lal kaifwe elan divorce, a el mutamwauk in orala ma inge. Tusruktu, el lutlut sin sie Met Lo lun Jeova. Ke pal se Met Lo el akilen oiyen ma sikyuk inge, el aketeye nu sel ke ma Baibel fwak ke oiyen moul lun payuk​—nu ke me pupulyuk, moul in payuk el sie me sang lun God a tia fwusesr in fwasrelik. (Mattu 19:4-6, 9) Mutan se inge el nunku ke moul lal sifwanu, ‘Arulanu sakuruk na paye meyen mutan se inge, el sie met saye, a el kaifweung in akmwoye sou luk tusruktu elos nu kemwa su futoto nu sik elos lungse in kunausla.’ Lalalfongi sasu su el konaok kasrel elan akkeye moul in payuk lal.

Oasr sie ma su sikyuk in me akasorye sou puspis pa ke abortion ku uniye awowo ke el srakna oan insien nine kiel. Sie report lun United Nations akkalemye la kais sie yiu apkurun in oasr 45 million awowo uniyuki meet liki elos isusla. Kais sie ma sikyuk inge akkalemye ke ongoiye. Etauk lun Baibel kasru sie mutan fwin an Philippines in sensenkin kain in moul inge.

Met Lo lun Jeova elos sun mutan se inge, a insese in eis sie buk srisrik ke me lutlut lun Baibel su sifwen buk srisrik pa Mea God El Siyuk Sesr?,a na el mutamwauk in lutlut ke Baibel. Tokin malem ekasr na, el aketeyela efu ku el insese in lutlut Baibel. Mutan se inge putete ke pal in osun se meet lun Met Lo se inge, tusruktu el a mokul tumal insese in uniye awowo se nutulos su sonna isusla. Tusruktu, pitse ke awowo su soena isusla ke sra 24 lun buk srisrik inge mokleyuk yok insien mutan se inge. Aketeye su tuku ke Baibel akkalemye la moul el arulanu mutal meyen ‘God el sropon moul’ paenang eltal in tia uniye awowo nutultal su soena isusla. (Sam 36:9) Inge el sie nine kien sie awowo na kato a fukoko.

Lalalfongi El Kasrelos Su Srungeyuk

Fwin an Ethiopia, oasr mokul sikasrup luo nuknukyung ke nuknuk fokfok elos tuku nu ke sie meeting lun Met Lo lun Jeova. Ke saflaiyen meeting, sie Met Lo el akkalemyel nu selos ke oiye lun kamwuk kulang. Mokul inge siyuk ke me kasru lun ikwe. Met Lo el sang me enenu nu selos, tia ke mani, a ma mwo liki. El kaifwe nu selos in akyokyelik lalalfongi lalos nu sin God “su saok yok liki Gold.” (1 Piter 1:7) Sie seltal akkalemye pwar a mutamwauk in lutlut Baibel. Ma inge ekulla oiyen moul lal. Ke el mutamwauk in lalalfongi, el sisla paip, nimnim alukela ma fwal, kosro, a orekmakinyen khat (sie kain in ono koluk). El lotela in kurungin me enenu lal sifwanu a in tia sifwil ngusr a in pal inge el moulkin sie moul nasnas, moul insemwomwo.

Fwin an Italy sie mokul matu su yiu 47 matwe el kapuri ke nien kalbos ke lusen yiu 10 a el kapur ke sie loom ono su kurunganang met mas ke nunuk. Sie sin Met Lo lun Jeova su oasr sukosok la in fwasr nu in nien kalbos in sang kasru ke ma lun ngun ke lutlut Baibel nu sel. Mokul se inge arulanu kapkapek. Lalalfongi el ekulla na paye oiyen moul lal oru kutu sin met kalbos elos sonol in siyuk la kasru fuka elos ku in oru in kutangla ma upa lalos. Lalalfongi lal su tuku ke Baibel mokle met inge nu kemwa in akfulatyel, a met liaung ke nien kapur elos wi pa lalalfongel.

Ke yiu ekasr somla newspaper puspis reporti ke meun puspis fwin an Africa. Me aksangeng yok in me sramsram inge pa ke mokul fwusr puspis su eis akpa lun solse. Elos sang ono nu sin tulik inge, akkolukyelos, a sapkinyuk ke ku in oru ma koluk upa nu sin sou lalos in filiye lalalfongi lalos nu ke u su elos wi. Ya lalalfongi su tuku ke Baibel arulanu ku in sang ekulla moul lun kain in mokul fwusr inge? Aok, oasr me akpayeye luo ke ma inge.

In an Liberia, Alex el kulansap oanu sie altar boy ke alu lun Catholic. Tusruktu ke pal se el yiu 13 matwe el sroang nu ke sie u in wi meun a el ekla sie solse silolel. In oru lan pulaik ke meun, el forla nu ke orekma lun inutnut. Alex el liye met puspis su welul anwuki, tusruktu el moul. In 1997 el osun nu sin Met Lo lun Jeova a el konaok la elos tia pilesrel. A, elos kasrel in liye mea Baibel el fwak ke orekma silolel. Alex el srola liki solse. Ke pal se lalalfongi lal mutamwauk in yokyokelik, el akos ma sap lun Baibel: “A lela lan forla liki ma koluk a oru ma mwo; lela lan suk misla a fwasr ka.”​—1 Piter 3:11.

Ke pal sepanu inge, sie solse meet su pangpang Samson el tuku nu ke an se su Alex el muta we in pal inge. El sie tulik srisrik su wi ke choir meet, tusruktu in yiu 1993 el ekla sie solse a wi pa orekmakinyen ono koluk, orekma lun inutnut, a kosro. In yiu 1997 u lal fwasrelik. Samson el akola in som nu Monrovia in wi sie un met meun ke pal se kamwuk lal kaifwe nu sel in lutlut Baibel yurin Met Lo lun Jeova, a ke sripe se inge, el akyokyelik sie lalalfongi su tuku ke Baibel. Ma inge kasrel elan pulaik in sisla inkanek lal su lungse meun. Alex a Samson in pal inge elos kemwanu muta ke sie moul nasnas a misla. Ya oasr kutena ma fwin tia ke lalalfongi su tuku ke Baibel mukena ku in ekulla moul lun met su akkolukyeyuk meet?

Lalalfongi Sumwos

Pa inge kutu sin me srikasrak puspis su kut ku in srukak in akkalemye ke ku lun lalalfongi paye su tuku ke Baibel. Paye tia met nu kemwa su fwakak la elos lalalfongi God moul fwal nu ke ma sap lun Baibel. Paye, kutu sin met atheist saap elos moulkin sie moul su mwo liki moul lun met su ekin Kristian. Meyen oasr ma puspis su eneneyuk nu ke lalalfongi su tuku ke Baibel liki in lalalfongi na ke God.

Met sap Poul el pangon lalalfongi “el me etauk lun ma su a fwinsrak ka, a me eyeinse lun ma su tia liyeyuk.” (Hibru 11:1) Ke ma inge, wikin lalalfongi pa sie fwinsrak fukoko​—su tuku ke me akpayeye sumwosmwos—​ke ma su tia liyeyuk. Wikin ma inge pa lalalfongi na paye la God el oasr, el pwar sesr, a el akinsemwomwoyelos su oru ma lungse lal. Met sap el ouyepa fwak: “Tu el su tuku nu yurin God el fwa lalalfongi tu el God, a tu el met sang moul nu selos su sukol.”​—Hibru 11:6.

Kain in lalalfongi inge pa ekulla moul lal John a Tania, a kutupa met ke me lutlut inge. Ma inge moklelos in fwuliya lalalfongi paye ke Kas lun God, Baibel, in me kol nu ke suleyen ma se. Ma inge kasrelos in kisekin moul lalos sifwanu ke kitin pal, tu elos in tia fwasr ke inkanek fwusesr, tusruktu koluk. Tia oanu sie experience lalos ke moul, tusruktu elos nu kemwa mutamwauk ke inkanek siefwunnu. Sie sin Met Lo lun Jeova lutlut nu sin kais sie met, a elos pulakin ma paye ke ma Baibel el fwak: “Tu kas lun God moul a ku.” (Hibru 4:12) Ku lun Kas lun God kasru kais sie met in musaiyuk lalalfongi paye fukoko su ekulla moul lalos nu ke ma mwo.

Met Lo lun Jeova elos kafofo ke orekma lalos in an a taka ke mwea su pus liki an 230. Elos suli kom in oru sie Baibel study. Efu? Meyen elos lalalfongi la lalalfongi se su tuku ke Baibel ku in oru in oasr ekla yok ke moul lom.

[Footnote]

[Picture on page 3]

Sie lalalfongi su tuku ke Baibel ekulla moul som nu ke ma mwo

[Picture Credit Line on page 2]

Title card of Biblia niswieska by Szymon Budny, 1572