Fuka Lupan Lungse Lom Nu Ke Kas Lun God?
“O fuka Nga lungse ma sap lom! Nga nunku ka in len na fon.”—SAM 119:97.
1. Mea sie inkanek su oru met sangeng sin God in akkalemye lungse lalos ke Kas lun God?
FOKO foko million sin mokul a mutan oasr Baibel nutulos. Tusruktu in oasr Baibel a in lungse Kas lun God tia oanu sie. Ya sie met el ku in fwak la el lungse Kas lun God el fwin tia rid ma inge pal nu kemwa? Mo, el tia ku! Aok, oasr kutu met su tianu akfulatye Baibel in pal meeta, tusruktu ke pal inge elos ridi Baibel len nu kemwa. Elos lotela in lungse Kas lun God, a oanu ma met sim lun Sam, elos nunku Kas lun God “lena na fon.”—Sam 119:97.
2. Fuka lalalfongi lun sie Met Lo lun Jeova akkeyeyuk ye ma upa yok?
2 Sie met su lotela in lungse Kas lun God pa Nasho Dori. Wikin met lili wiel, el muteng ke lusen yiu puspis, kulansapu Jeova ke an sel su pangpang Albania. Ke lusen yiu puspis inge, wangin sukosok lun Met Lo lun Jeova, a supus me rid ke Baibel su met Kristian oaru inge nu kemwa elos ku in eis. Fwinne ou inge, lalalfongi lal Brother Dori fukoko na. Efu? “Nien sun luk,” el fwak, pa “in rid Baibel ke lusen aur se ke len nu kemwa, Nga oru ou inge ke lusen yiu 60 kutu meet liki mutuk okla.” Nu ke pal inge Baibel nu fon sonna orekla ke kas Albania, tusruktu Brother Dori el lutlut kas Greek ke el srakna srik, paenang el ridi Baibel ke kas inge. Ridi Baibel pal nu kemwa akkeyel Brother Dori in kutangla kain in me srifwe puspis, a ma inge ku in ouyepa akkeye kut.
“Akkapye Lungse” ke Kas lun God
3. Kain in oiye fuka met Kristian nu kemwa elos enenu in akkapye ke Kas lun God?
3 “A oanu tulik tufwa isusla,” met sap Piter el simusla, “komwos in lungse titi lun ngun su tia oasr kutusrik ka. (1 Piter 2:2) Oanu sie tulik awowo su akkalemye lungse yok ke titi lun nine kiel, met Kristian nu kemwa su nunku yok ke ma enenu lalos ke ma lun ngun elos akkalemye insemwomwo yok in ridi Kas lun God. Ya pa inge ma kom pula? Fwin tia, lela kom in tia asor. Kom ku in ouyepa akkapye lungse ke Kas lun God.
4. Mea ma inge su enenu in orek tu in pala ke ridi Baibel ke len nu kemwa?
4 In oru ou inge, ma se meet pa kom enenu in sifwanu leumi tu kom in pala in ridi Baibel pal nu kemwa, len nu kemwa fwin ku. (Orekma 17:11) Saap kom tia enenu in orekmakin aur se ke kais sie len in ridi Baibel oanu Brother Nasho Dori el oru, tusruktu, kom ku in pakiye sie pal ke len nu kemwa in ridi Kas lun God. Met Kristian puspis elos ngetalik sa in kalweni ke nunuk lalos sie me sramsram lun Baibel. Ya oasr kutena ma su mwo liki ma inge ke kom mutamwauk ke len lom? Kutu met elos sulela in aksafyela len lalos ke ridi Baibel meet liki elos motul. Kutu met elos ridi Baibel ke kutu pal mwesas lalos. Ma yok emeet pa in ridi Baibel pal nu kemwa. Tokin ma inge, orekmakin minit ekasr in kalweni ke nunuk lom ma kom ridi tari. Lela kut in tuni kutu me srikasrak lun met su eis ma lane su tuku ke ridi a kalweni ke ma elos ridi ke Kas lun God.
Sie Met Sim lun Sam Su Lungse Ma Sap lun God
5, 6. Fwinne kut tia ku in etu enel, tusruktu, mea kut ku in lotela ke met sim lun Sam 119 ke kut ridi a kalweni ke nunuk lal ma el simusla?
5 Met sim lun Sam 119 el akkalemye na paye insemwomwo yok na paye lal ke Kas lun God. Su simusla Sam inge? Tianu akkalemyeyuk in Baibel met simusla Sam se inge. Tusruktu, kut fwin tuni kutu fus, kut ku in lotela ma puspis ke moul lal, a kut ku in etu la moul lal tia sukosok liki ke ma upa. Kutu sin met su futoto nu sel su enenu in met kulansap lun Jeova elos tia welul in akkalemye lungse ke ma sap lun Baibel. Fwinne ou inge, met sim lun Sam el tia lela oiye lalos in kutongilye liki in oru ma sumwos. (Sam 119:23) Kom fwin muta ku orekma yurin sie met su tia akfulatye ma sap lun Baibel, saap kom ku in liye oanu ke ma sikyuk nu sin met sim lun Sam a nu sum sifwanu.
6 El fwinne met lun God, met sim lun Sam el tia nunku mu el met sumwosmwos. El akilen na paye moul sesumwos lal sifwanu. (Sam 119:5, 6, 67) Tusruktu, el tia lela ma koluk in kutangula. “Ke mea sie met fwusr fwa aknasnasye inkanek lal?” El siyuk. Na el sifwanu topuk: “Ke el arulanu liaung inkanek lal fwal nu ke kas lom.” (Sam 119:9) Na, in akkalemye me purakak ku lun Kas lun God ke ma mwo, met sim lun Sam el tafwela: “Nga likiye kas lom insiuk, tu Nga in tia orek ma sito nu sum.” (Sam 119:11) Ku inge su ku in kasre kut in fwasr liki ma koluk su lain God arulanu fukoko na paye!
7. Efu met fwusr yokna enenu in nunku yok ke ma enenu in ridi Baibel ke len nu kemwa?
7 Arulanu mwo nu sin met Kristian fwusr ke pal inge in tuni kas lun Sam. Met Kristian fwusr elos muta ye me srifwe ke len inge. Devil el lungse na paye in akkolukye fwil sasu lun met fwusr su alu nu sin Jeova. Nien sun lun Setan pa in purakak kena kulok lun met fwusr Kristian a in kunausla ma sap lun God. Pitse mokuikui a program ke television pal nu kemwa akkalemye nunuk lun Devil. Aten met pengpeng ke kain in program inge kato a purakak met in lungse etaweltal; orekma lun kosro inmasloltal akkalemyeyuk oanu ma fwal. Mea ma inge lungse in akkalemye? ‘Tukeni oan inmaslon met tia payuk mwona fwin elos lungse sie sin sie.’ Sie me asor, meyen ke kais sie yiu met fwusr puspis lun met Kristian elos sremla ke kain in nunuk inge. Kutu selos tula lalalfongi lalos. Ke ma inge, ma upa arulanu yokyokelik! Tusruktu, ya ma upa inge arulanu yok paenang wanginla fwinsrak lun met fwusr in muteng? Mo na mo! Jeova el sang inkanek nu sin met Kristian fwusr in kutangla kena koluk. Elos ku in lain kutena me meun su Setan el oru elos fwin ‘liaung fwal nu ke Kas lun God, a aksaokye ma inge ke insielos.’ Lupaka pal kom orekmakin in rid Baibel pal nu kemwa a ke kalweni ma kom rid?
8. Fuka me srikasrak su akkalemyeyuk ke paragraph inge ku in kasru kom in kapkapek ke insemwomwo ke Ma Sap lal Moses?
8 Met sim lun Sam 119 el fwak: “O fuka Nga lungse ma sap lom!” (Sam 119:97) El sramsram ke ma sap fuka? Ke kas lun Jeova su el akkalemye, wekunang Ma Sap lal Moses. Ke liye se meet lun met kutu selos ku in nunku mu Ma Sap lal Moses arulanu matu a tia fwal nu ke pal lasr a elos nunku la e fuka sie met el ku in lungse ma inge. Tusruktu, kut fwin kalweni ke nunuk lal ip puspis lun Ma Sap lal Moses, oanu met sim lun Sam el oru, kut ku in engunkin yok ke me etauk su oasr ke Ma Sap inge. Sayen kas palu puspis lun Ma Sap, oasr pa ma sap puspis ke oiyen moul nasnas, a ke inkanek in kurunganang mano ke mongo, su ma inge nu kemwa akkeye moul nasnas a mano fukoko. (Livitikus 7:23, 24, 26; 11:2-8) Ma Sap inge akkeye srikasrak mwo nu ke business a akkeye met Israel in akkalemye pakoten a in nunku oanu kutena met lili wielos su oasr enenu la. (Exodus 22:26, 27; 23:6; Livitikus 19:35, 36; Duteronomi 24:17-21) Akmwuk in oru nununku enenu in orek ke inkanek sumwos a tia sulosol met. (Duteronomi 16:19; 19:15) Ke pal se met sim lun Sam 119 el eis experience yok lal ke moul, el liye na paye la fuka saflaiyen met nu kemwa su orekmakin Ma Sap lun God, a lungse lal nu ka yokyokelik. Oupanu ke len inge, ke pal se met Kristian elos kapkapek ke orekmakinyen ma sap lun Baibel, lungse a insemwomwo lalos ke Kas lun God yokyokelik.
Sie Fwisrak Pulaik in Srella
9. Kain in oiye fuka Togusra Hezekaia el akkapye ke Kas lun God.
9 Koanon Sam 119 arulanu fwal nu ke ma kut etu kel Hezekaia ke pal se el srakna fwusr oanu sie met fwisrak. Kutu scholar lun Baibel elos fwak la Hezekaia pa met sim lun sam. Fwinne kut tia ku in fwak na paye ou inge, tusruktu kut etu la oasr akfulat yok lal Hezekaia nu ke Kas lun God. Ke inkanek in moul lal, el akkalemye la el insee na paye ke insiel ke ma simusla in Sam 119:97. Nu sel Hezekaia, Baibel el akkalemye: “Tu el fulyung nu sin Jeova. el tia kufla liki in fwasr tokol, a el liaung ma sap lal, su Jeova el sapkin nu sel Moses.”—2 Togusra 18:6.
10. Me srikasrak lal Hezekaia sang me akkeye fuka nu sin met Kristian su kapek ke sou su tia lalalfongi?
10 Ke me sramsram nu kemwa, Hezekaia el tia kapek ke sou su oasr lungse la ke God. Papa tumal, Togusra Ehaz, el sie met su alu nu ke me srulela su ke sie pal el oru tulik se nutul—ma wiel Hezekaia—in fururyuk ke e ke el srakna moul tu in me kise nu sin sie God kikiap! (2 Togusra 16:3) Ne yok me srikasrak koluk in pal inge, Hezekaia el “aknasnasye inkanek lal” su me purakak nu sin met pegan ke pal se el liaung Kas lun God.—2 Kronikel 29:2.
11. Oanu Hezekaia el liye, mea saflaiyen papa tumal su tia lalalfongi?
11 Ke pal se Hezekaia el kapek, el liye na paye akmwuk lun papa tumal in alu nu ke me srulela su el sang kol mokuikui lun mutanfwal lal. Met lokwalok puspis. Rezin, togusra lun an Syria, su akesrui nu sel Togusra Peka lun Israel su apunla Jerusalem. (2 Togusra 16:5, 6) Oasr met Edom a met Filistia, su kutangla ke meun lalos lain Juda a eisla kutu siti lun an Juda. (2 Kronikel 28:16-19) Mea Ehaz el oru ke ma upa nu kemwa? El tia siyuk kasru lun Jeova ke meun lal lain an Syria, a el forla nu sin togusra lun an Assyria, el sang nu sel gold a silver oanu me eyeinse, wikin ma inge me kasrup su oan in tempel. Tusruktu ma inge tia sang misla ma patpat nu ke mutanfwal Juda.—2 Togusra 16:6, 8.
12. Ke inkanek fuka Hezekaia el ku in fwasr liki tafongla lun papa tumal?
12 Ke saflaiye, Ehaz el mise, a Hezekaia el ekla Togusra ke pal se el yiu 25 matwe. (2 Kronikel 29:1) El arulanu fwusr, tusruktu ma inge tia kutongilye in ekla sie togusra mwomwo. El fulyung nu ke Ma Sap lun Jeova a tia etawi papa tumal. Wikin ma inge pa sie ma sap nu sin togusra nu kemwa: “A fwa te oru, ke el muta fwin tron lun togusrai lal, el e fwa simusla nu sel sie me etawi lun ma lo se inge in sie buk, liki ma on yurin met tol met Livai. A a fwa on yurol, a el fwa rid ka in len nu kemwa in moul lal, tu el fwa ku in lutlut in sangeng sin Jeova God lal, in liaung kas nu kemwa in ma lo se inge a ma sap inge, in oru.” (Duteronomi 17:18, 19) Ke pal se el ridi Kas lun God ke len nu kemwa, Hezekaia el lotela in sangeng sin Jeova a tia fwasr tokin orekma koluk lun Papa tumal su tia sangeng sin God.
13. Fuka sie met Kristian el ku in lalalfongi na paye la, fwin ke ma lun ngun ma nu kemwa fwa kapkapek?
13 Tia togusra mukena pa akkeyeyuk in orekmakin pal nu kemwa Kas lun God, a met Israel nu kemwa su sangeng sin God elos enenu pa in oru ou inge. Sam se meet el akkalemye la met su insemwomwo na paye pa elos nu kemwa su “engunak in ma sap lun Jeova; a el nunkauk ke ma sap lal len a fong.” (Sam 1:1, 2) Ke kain in met inge, met sim lun sam el fwak: “A ma nu kemwa el oru fwa kapkapek.” (Sam 1:3) Elos nu kemwa su wangin lalalfongila nu sin Jeova God, Baibel el fwak: “El met inse luo a siokak oiyel in ma nu kemwa.” (Jemes 1:8) Kut nu kemwa lungse in insemwomwo a in mwo oiye. Rid Baibel ke len nu kemwa ku in sang kasru nu ke me insemwomwo lasr.
Kas lun God Akkeyel Jisus
14. Fuka Jisus el akkalemye lungse ke Kas lun God?
14 Ke sie pal, papa a nine kiel Jisus elos liyel ke el muta inmaslon met luti in tempel fwin an Jerusalem. Fuka met sroasr Ma Sap lun God elos “lut ke lalmetmet lal a topuk lal”! (Luk 2:46, 47) Pal inge Jisus el yiu 12 matwe. Aok, el fwinne fwusr, arulanu kalem la el lungse na paye Kas lun God. Tok, Jisus el orekmakin Ma Simusla in kael Devil, el fwak: “Metu fwa tia moul ke bred mukena, a ke kas nu kemwa su tuku liki oalin God.” (Mattu 4:3-10) Tia pat tokin ma inge, Jisus el luti nu sin met su muta ke an sel pangpang Nazareth, a orekmakin Ma Simusla.—Luk 4:16-21.
15. Fuka Jisus el akkalemye me srikasrak mwo ke orekma in luti nu sin kutu met?
15 Jisus el orekmakin pal nu kemwa Kas lun God el akkeye me luti lal. Met su longol “elos lut ke me luti lal.” (Mattu 7:28) Tia me lut pa inge—meyen me luti lun Jesus tuku sin Jeova God! Jisus el fwak: “Me luti luk tia ma luk, a ma lal su supeyume. El su sifwanu kaskas el suk mwolanu lal sifwanu; a el su suk mwolanu lun el su supalmu, el nu paye, a wangin sesumwos in el.”—Jon 7:16, 18.
16. Lupaka Jisus Kraist el akkalemye lungse lal ke Kas lun God?
16 Tia oanu met sim lun Sam 119, wangin kutena ma sesumwos in Jisus. Wangin ma koluk lal, el Mwen nutin God, su “el sifwanu akpusisilyel a el akos nu ke mise.” (Filippai 2:8; Hibru 7:26) Aok, el fwinne met sumwos, Jisus el lutlut a akos Ma Sap lun God. Pa inge key yok paenang el ku in srukye na oaru lal. Ke pal se Piter el orekmakin kutlas in kutongye met su lungse in sroukilye Leum lal, Jisus el kai met sap lal a siyuk: “Ku kom nunku mu Nga tia ku in siyuk sin Papa tumuk, a el fwa supamu nu yurok inge pus liki siengoul luo lijion lun lipufon? Na fuka Ma Simusla in akpayeyuk, tu e fwa ou inge?” (Mattu 26:53, 54) Aok, nu sel Jisus, akpayeye lun Ma Simusla pa yok liki in kaeng lal liki keok nu ke mise lal. Sie lungse yok na paye pa inge ke Kas lun God!
Kutu Met Etawi Kraist
17. Fuka lupan saok lun Kas lun God nu sel met sap Poul?
17 Met sap Poul el sim nu sin met Kristian wiel: “Komwos in met etawi yu, oanu Nga ouyepa met etawi Kraist.” (1 Korint 11:1) Oanu Leum lal, Poul el akyokye lungse lun Ma Simusla. El fwak: “Tu Nga engun in Ma Sap lun God ke insiuk.” (Rom 7:22, The Jerusalem Bible) Poul el orekmakin Kas lun God pal nu kemwa. (Orekma 13:32-41; 17:2, 3; 28:23) Ke pal se el orala kas safla lal nu sel Timote, sie met kulansap kulu oanu el, Poul el akkalemye ip saok su Kas lun God enenu in oru ke moul lun “met lun God” ke len nu kemwa.—2 Timote 3:15-17.
18. Akkalemye sie me srikasrak lun met ke len inge, su akkalemye sunak nu ke Kas lun God.
18 Met kulansap oaru puspis lun Jeova in pal inge elos ouyepa etawi Jisus ke lungse lal nu ke Kas lun God. Ke mutamweyen century se inge, sie mokul fwusr el eis Baibel nutul sin sie kamwuk. El akkalemye mea me sang saok inge oru nu sel: “Nga oakiye ma inge oanu sie ma enenu nu ke moul luk in ridi sie ip lun Baibel ke kais sie len.” Mokul fwusr se inge pa Frederick Franz, a lungse lal ke Baibel kol nu ke insemwomwo a in aksafyela me enenu yok ke moul in kulansap lal nu sin Jeova. Esamul ke ku lal in esam sapter nu kemwa lun Baibel fwinne el tianu rid.
19. Fuka kutu met elos orala schedule ke ridi Baibel ke wik nu kemwa su pakiyuki ke Theocratic Ministry School?
19 Met Lo lun Jeova elos aksaokye na paye rid Baibel ke len nu kemwa. Ke kais sie wik, in akola nu ke meeting lalos oanu sie met Kristian, Theocratic Ministry School, elos ridi sapter puspis ke Baibel. Kas fulat ke fus in Baibel su pakiyuki in rid sramsramkinyuk ke lusen pal in meeting. Kutu sin Met Lo elos konaok la sie inkanek mwo in kitelik me rid lun Baibel nu ke ip srisrik itkosr a rid kais sie ip inge ke len nu kemwa. Ke pal se elos ridi, elos ouyepa nunku ke koanon ma elos ridi. Fwin ku, elos orani kutu research lun kutu me rid su tuku ke Baibel.
20. Mea ma enenu in oasr pal in ridi Baibel ke len nu kemwa?
20 Saap kom enenu in ‘molela pal’ ke kutu orekma su kom oru tu kom in ku in ridi Baibel len nu kemwa. (Efesus 5:16) Tusruktu, ma lane su tuku ka yok liki kutena orekma su kom kisekinyuk nu ka. Ke kom akkapye kena lom in ridi Baibel, lungse lom nu ke Kas lun God fwa kapkapek. Ke pal na futoto, kom e fwa engunkin in fwak kas su met sim lun Sam el fwak: “O fuka Nga lungse ma sap lom! Nga nunku ka in len nu fon.” (Sam 119:97) Kain in oiye se inge ku in wise ma lane yok ke pal inge a ke pal se su e fwa tuku, oanu me lutlut lasr toko fwa akkalemye.
Ya Kom Esam?
◻ Fuka met sim lun Sam 119 el akkalemye lungse yok ke Kas lun God?
◻ Me lutlut fuka kut ku in eis ke me srikasrak lal Jisus a Poul?
◻ Fuka kut ku in sifwanu akkapye lungse lasr ke Kas lun God?
[Pictures on page 20]
Togusra oaru nu kemwa elos enenu in ridi Kas lun God ke len nu kemwa. Ya kom oru pa ou inge?
[Picture on page 22]
El fwinne sie tulik mokul, Jisus el akkalemye lungse ke Kas lun God