Fuka Jisus El Ku In Ekulla Moul Lom?
JISUS KRAIST el sie Met Luti Pengpeng su muta fwin an Palestine apkurun yiu 2,000 somla. Tia arle yok ma eteyuk ke pal se ma el srakna tulik srisrik. Tusruktu, oasr me akpayeye la ke pal se el apkurun nu ke yiu 30 matwe, el mutamwauk ke orekma lun forfor lal in “orek ma lo nu ke ma paye.” (Jon 18:37; Luk 3:21-23) Met tuma lutlut akosr su simusla me sramsram ke moul lal elos loang yok ke yiu luo tafwu lun moul lal ke ma sikyuk ka.
Ke lusen pal in orekma lun forfor lal, Jisus Kraist el sang nu sin met tuma lutlut lal sie ma sap su ku in lain mas nu kemwa lun fwalu. Mea se inge? Jisus el fwak: “Sie ma sap sasu Nga sot nu sumwos, tu komwos in lungsumwos sie sin sie; aok oanu Nga lungsik komwos, tu komwos in ouyepa lungsumwos sie sin sie.” (Jon 13:34) Aok, inkanek in akmisyela ma upa nu kemwa fwin fwalu pa lungse. Oasr sie pal, sie met el siyuk kusensiyuk sel Jisus la piye ke ma sap pa yok emeet, el topuk a fwak: “ ‘Kom fwa lungsum Jeova God lom ke insiom kemwa, a ke ngunom kemwa, a ke nunkom kemwa.’ A ma se akluo oanu inge, ‘Kom fwa lungsum met tulan lom oanu kom sifwanu.’ ”—Mattu 22:37-40.
Jisus el akkalemye nu sesr ke kas a orekma in akkalemye lungse nu sin God a nu sin met tulan lasr. Lela kut in tuni akmwoye kutu me srikasrak a liye mea kut ku in lotela ka.
Me Luti Lal
Ke sie me sramsram na mwomwo lal su arulanu pengpeng, Jisus Kraist el fwak nu sin met tuma lutlut lal. “Wangin met ku in kulansap nu sin leum luo; tu el fwa srunga sie a lungse el se ngie; ku el fwa srukye sie, a pilesru el se ngie. Komwos koflanu kulansap nu sin God a Me Kasrup.” (Mattu 6:24, New World Translation) Ya me luti lal Jisus in sulela God meet ke moul lasr srakna mwo a fwal ke len inge, fwinne met puspis elos lalalfongi la mani na ku in aksumwosye ma upa nu kemwa? Paye, kut enenu mani ke moul lasr. (Ekklisiastis 7:12) Tusruktu, kut fwin lela “Me Kasrup” in ekla oanu leum lasr, na “lungse mani” el akpusisilye kut, el sroukye moul lasr ye koko lal. (1 Timote 6:9, 10) Met puspis su sremla ke me sruf inge paenang sou lalos tula fwasrelik, manolos munasla, a elos mise ke saflaiye.
Fwin lumeyuk ke inkanek saye, kut fwin ngetak nu sin God oanu Leum lasr ma inge ku in oasr kalmeye nu ke moul lasr. Oanu Met Su Orala ma nu kemwa, el Srupon Moul, ke ma inge el mukena fwal in alu nu se. (Sam 36:9; Fwakyuk 4:11) Elos nu kemwa su lutlut ke oiyel a mutamwauk in lungse el elos engunkin in akos ma sap lal. (Ekklisiastis 12:13; 1 Jon 5:3) Ke kut oru ou inge, kut akinsemwomwoye moul lasr sifwanu.—Isaia 48:17.
Ke Sramsram lal Fwin Eol, Jisus el ouyepa luti ke inkanek in akkalemye lungse nu sin met tulan lalos. El fwak: “Ke ma inge nu kemwa komwos lungsumwos met in oru nu sumwos, komwos in ouyepa oru ou inge nu selos.” (Mattu 7:12) Kas se inge “met” su Jisus el orekmakin ku in weang pa met lokwalok lun sie met. Ke me sramsram lal sifwanu inge, el fwak: “Lungse met lokwalok lomwos, a pre kalos su kolyai komwos.” (Mattu 5:43, 44) Ya kain in lungse se inge ku in aksumwosye ma upa puspis su kut sun misinge? Sie met kol lun Hindu Mohandas Gandhi el nunku ou inge. Oasr pal el fwak: “Kut fwin tukeni akos me luti puspis lun Jisus Kraist ke Me Sramsram lal Fwin Eolu, na kut ku in aksumwosye ma upa puspis lasr . . . fwin fwalu nu fon.” Me luti lun Jisus ke lungse, fwin orekmakin, na e ku in aksumwosye ma upa puspis lun metu.
Orekma Lal
Jisus el tia luti mukena ma paye ke inkanek yok in akkalemye lungse a el ouyepa orekmakin ke moul lal ma el luti. Ke sie me pupulyuk, el nunku meet ke met ngie meet liki moul lal sifwanu. Sie len a Jisus a met tuma lutlut lal arulanu kafofo in kasru kutu met paenang wangin pal lalos in mongo. Jisus el liye enenu lun met tuma lutlut in mongle kitin pal, paenang el wiselosla nu ke sie an misla. Tusruktu ke pal se elos sun an inge, elos konaok la oasr un met puspis su sanoltal. Mea kom akola in oru kom fwin liye sie un met na pus su sanoe kom in oru orekma kom fwinne pula la kom enenu in mongle? Jisus el “pakomutalos” a “El mutamwauk in luti ma puspis nu selos.” (Mark 6:34) Kain in nunuk ou inge nu sin kutu met pal nu kemwa moklel Jisus in kasrelos.
Oasr pa kutu orekma su Jisus el oru sayen luti lal nu sin metu. El ouyepa kasrelos ke inkanek fwal. Ke sie me pupulyuk, el kite me mongo nu sin 5,000 met su long sramsram lal nu ke fongeni. Tia pat tokin ma inge, el sulpa kitakut mongo nu sin siepa u lulap—ke pal inge pus liki 4,000 met—su long sramsram lal ke lusen len tolu a wanginla me mongo lula nelos. Ke pal se meet, el orekmakin loaves limekosr a ik lukwe, a ke ma se akluo el orekmakin loaves itkosr a ik srisrik ekasr. (Mattu 14:14-22; 15:32-38) Menmen pa inge? Aok, el sie met su orek menmen.
Jisus el ouyepa akkeye met puspis ke mas lalos. El akkeye met kun, met leper, a met silongkas. Aok, el akmoulyeak met mise! (Luk 7:22; Jon 11:30-45) Oasr sie pal met leper se el kaifwe nu sel: “Kom fwin lungsum, kom ku in aknasnasye yu.” Mea Jisus el oru? “A ke el pakomutal, el asroela paol, a kalilye, a fwak nu sel: ‘Nga lungsik. Kom in nasnas.’ ” (Mark 1:40, 41) Ke inkanek lun menmen inge nu kemwa, Jisus el akkalemye lungse lal nu sin met keok.
Ya kom konaok tu arulanu upa in lalalfongi ke menmen lal Jisus? Oasr kutu met elos ou inge. Tusruktu, lela kom in esam, la Jisus el oru menmen lal ye mutun met puspis. Fwinne met lokwalok lal su suk ma tafongla lal pal nu kemwa, tia ku in fwak la el tia sie met orek menmen. (Jon 9:1-34) Sayen ma inge, oasr nien sun lun menmen lal Jisus. Elos kasru kutu met in akilenul oanu Sie Met su supeyukme sin God.—Jon 6:14.
Ke pal el oru menmen Jisus el tia lungse in mokle insien met in loang nu sel. A, in akfulatye God, el su Srupon ku lal. Oasr sie pal fwin an Keperneum el muta ke sie loom su nenela ke met. Na sie met mas matoltol el lungse in eis kasru sel tusruktu el tia ku in utyuk. Ke ma inge kamwuk lal elos ikasla mangon loomu elos koela kulus se su met mas matoltol el on fwe. A ke Jisus el liye lalalfongi lalos, el akkeye met mas matoltol se. Ke sripe se inge, met elos “kaksakin God” a fwak: “Kut sumwena liye ou inge meet.” (Mark 2:1-4, 11, 12) Menmen lal Jisus sang kaksak nu sin Jeova, God lal, a kasrelos su oasr enenu.
Tusruktu tia in akkeye met mas pa nien sun yok se meet ke orekma in forfor lun Jisus. Sie met su simusla me sramsram ke moul lun Jisus el fwak: “A ma inge simla, tu komwos fwa lalalfongi tu Jisus el Kraist, Mwen nutin God, a tu, ke komwos lalalfongi, komwos fwa eis moul in el.” (Jon 20:31) Aok, Jisus el tuku nu fwalu, in ikasla nu sin met nu kemwa su lalalfongi in eis moul.
Me Kise Lal
‘Jisus el tuku nu fwalu meet?’ saap kom ku in siyuk. ‘El tuku ya me?’ Jisus el sifwanu fwak: “Tu Nga oatui in kosrao me, tia in oru ma lungse luk, a ma lungse lal su supeyume.” (Jon 6:38) El moul tari oanu Mwen Kulu nutin God meet liki el tuku nu fwalu oanu sie met. Ke ma inge mea ma lungse Lal su supalma nu fwin fwalu? “Tu God el lungsel fwalu ou inge, tu el ase Mwen siefwunnu isusla nutul,” Jon el fwak, sie sin met sim ke Gospel, “tu el su lalalfongel fwa tia tula, a el fwa eis moul ma patpat.” (Jon 3:16) Fuka ma inge ku in siyuk?
Baibel el aketeye la mise el sie ma su met nu kemwa tia ku in kaengkun. Seanyen se meet elos eis moul sin God su oasr fwinsrak in moul nu tok ma patpat. Tusruktu, elos sulela in lain Met Su Orelosla. (Genesis 3:1-19) Ke sripen ma inge, met se meet el oru ma koluk, tulik nutul Edam a If nu kemwa elos usrui mise elos fwinne tia lungse. (Rom 5:12) In sang moul paye nu sin met nu kemwa, ma koluk a mise enenu in wanginla.
Wangin kutena scientist ku in akwanginyela mise ke inkanek lun genetic engineering. Aok, Met Su Orala metu oasr inkanek lal in ekulla met nu kemwa su aksol nu ke moul sumwosmwos tu elos in ku in eis moul ma patpat. In Baibel inkanek se inge pangpang lango. Seanyen se meet elos oakiye moul lalos sifwanu a tulik nutulos nu kemwa nu ke met kos lun ma koluk a mise. Elos ekulla moul sumwosmwos lalos in akos God a eis sie moul su sukosok liki God, in ku in sifwanu oru sulela nu ke ma mwo a ma koluk. In sifwil folokunma moul sumwosmwos, enenu in oasr sie lupan moul na fwal in sang molela moul sumwosmwos se su papa a nine matu se meet kiesr elos sisla. Meyen met nu kemwa usrui ma koluk, paenang wangin sie met ku in akfwalyela moul se inge.—Sam 49:7.
Ke ma inge Jeova el akola in sang kasru. El sang moul sumwosmwos lun Mwen kulu siefwunnu nutul nu insien sie mutan virgin, su oswela Jisus. Ke yiu puspis somla saap kom silalalfongi ke luti lun sie virgin in putete isusla. Aok, ke len inge, scientist elos clone mammals a elos orani genes lun sie kosro nu ke siepa kosro. Ke ma inge, su ku in siyuk ke ku lun Met su Orekutla in tia fwasr ke mutamweyen akmwuk lun ma orekla nu kemwa.
Meyen oasr tari sie met sumwosmwos, paenang me moul se su mu ku in molela met nu kemwa liki ma koluk a mise ku in orekmakinyuk. Tusruktu, tulik srisrik Jisus su isusla fwin fwalu, el enenu in kapek oanu sie “met ono” su oasr ku lal in “sang ono” in akkeye met mas nu kemwa ke mas lalos. El oru ou inge ke pal se el moulkin sie moul sumwosmwos, wangin ma koluk. Jisus el tia liye mukena me asor lun metu ye koko lun ma koluk, a el ouyepa sifwanu pulakin la sie met el tia ku in oru ma nu kemwa. Ma inge paenang in yok pakoten lal oanu sie “met ono.” (Hibru 4:15) Menmen lal nu kemwa in akkeye la met mas su el oru ke el muta fwin fwalu akkalemye la el lungse na paye a oasr ku lal in akkeye met mas.—Mattu 4:23.
Tokin orekma lun forfor lal fwin fwalu ke lusen yiu tolu tafwu, Jisus el anwuki sin met lokwalok lal. El akkalemye la sie met sumwosmwos se el ku in akos Met Orekutla el fwinne sun me srifwe yok emeet. (1 Piter 2:22) Moul sumwosmwos lal su el kisekinla ekla me lango, su ku in molela met nu kemwa liki ma koluk a mise. Jisus Kraist el fwak: “Wangin lungse yurin met yok liki lungse se inge, tu sie met fwa filiye moul lal ke met kamwuk lal.” (Jon 15:13) Ke len aktulo tokin mise lal, Jisus el sifwil moulyuk in ngun, a tokin wik na el somwak nu in kosrao in wis me lango nu sin Jeova God. (1 Korint 15:3, 4; Hibru 9:11-14) In oru ou inge, Jisus el ku in orekmakin me lane su tuku ke me lango lal nu selos nu kemwa su fwasr tokol.
Ya kom lungse in eis ma lane su tuku ke inkanek inge in akkeye mas in ngun, me pulakin, a mano? In kasru ma inge kom enenu in lalalfongi Jisus Kraist. Efu kom tia suk “Met Ono.” Kom ku in oru ou inge kom fwin lutlut kel Jisus Kraist a ke kunokon lal in molela met oaru. Met Lo lun Jeova elos insemwomwo in kasru kom.
[Picture on page 5]
Jisus el lungse a oasr ku lal in akkeye met mas