Alu Nu Sin God In Paye
Sie alu su akinsemwomwoye God, enenu in oakiye ke ma paye. (Jon 4:23) Baibel el akkalemye la met alu paye elos tuku ke “congregation lun God moul, su sru a pelung nu ke ma paye.” (1 Timote 3:15) Elos nu kemwa su wi ke congregation lun God moul elos tia lalalfongi mukena ke paye lun Kas lun God a elos ouyepa moulkin moul fwal nu ka a elos akkeye ma inge, a oru ma inge in eteyuk fwin fwalu nu fon.—Mattu 24:14; Rom 10:9-15.
MET LO LUN JEOVA elos arulanu pengpeng ke orekma in luti lalos ke Baibel ke an 200 kutu. Elos lutlut ke Baibel a luti ke ma inge oanu ma paye se, a elos tia toeni kutena lalmetmet lun met tu in akmunasye ma inge. Ya kom pula ke me luti lalos su tuku ke Baibel? Met puspis elos alolo in long fwin Met Lo lun Jeova elos sramsram meyen elos long tari me sramsram puspis lun met saye su akkolukyelos. Tusruktu kut suli met inse pusisel in tuni a oru sulela lalos fwin paye ku tia ma Met Lo lun Jeova elos luti. Kain in sulela lalos inge enenu in tia tuku ke ma elos long na nu sin met saye. Met puspis su kaifweung in tuni me luti lun Met Lo lun Jeova ke lungse lalos sifwanu eis ma lane yok.
Etauk ke Ma Paye Akwanginye Sangeng
Ke sie me pupulyuk, tuni ma sikyuk nu sel Eugenia. El kapek ke sie loom su arulanu fukoko ke alu lun Catholic. Papa tumal el sie met su wi ke sie u su oakiye muteta lun met kol lun Catholic pangpang pope ke 1979. Ke sie pal in muteta lal ke sie kamwuk, Eugenia el osun nu sin Met Lo lun Jeova. Ke kasru lalos el mutamwauk in tuni mwo na paye ma Baibel el fwak. El esam: “Ke mutamwauk, sangeng luk yokyokelik. Nga konaok ma paye! Kalmen ma inge pa apkurun ma nu kemwa su Nga lalalfongi in pal meeta elos sito. Lalafongi lun sou luk, kamwuk luk, met nu kemwa su Nga lungse—elos nu kemwa tafongla. Nga arulanu sangeng na paye. Nga siyuk sik sifwanu, mea pulakin lun sou luk ke ma sasu su Nga tufwanu konaok. Ke kasru lun Jeova, tokin sie pal, Nga mutamwauk in pala ke ma sikyuk inge. Sie len, Nga sulela in sramsram nu sin met kamwuk lun sou lasr, el sie professor lun theology. Nga akkalemye nu sel kena luk in konaok ma paye. El fwak, ‘Kom fwin lungse in etu ma paye, suk Met Lo lun Jeova.’ ”
Ma Eugenia el sangeng in sikyuk el sikyuk na paye, sou lal sapkinyuk nu sel in som liki loom’u. Aok, Met Lo lun Jeova elos tafwela in kasrel ke ma lun ngun. El fwak: “Nga arulanu akkeyeyuk na paye in tu ku ke ma paye. Nga akilen la arulanu fwal tu Ngan meun ke sripen ma paye. Insemwomwo lun Met Lo lun Jeova su eis yu arulanu yok sripe na paye. Nga pulakin na paye lungse su tuku sin congregation lun met Kristian. Futoto luk ke u lun God kasre yu in kutangla liki sangeng a in tu ku ke ma paye fwinne wangin kasru su tuku ke sou luk na paye.”
Tuni kutupa me srikasrak. Sabrina el kapek ke sie sou su pala in sramsram pal nu kemwa ke Baibel. Ke ma paye elos orala sie kain in ‘akmwuk lun sou ke alu.’ El lungse in asrouki nu sin kutu met su oasr alu saye in sromun ma tafongla lalos. Ke pal se ma sie Met Lo lun Jeova el sulel in welul lutlut ke Baibel, el silaklak in insese ke ma se inge meyen el lungse in akpayeye la sito lalalfongi lun Met Lo lun Jeova. El esam: “Tokin Nga lutlut ke lusen yiu se kutu, Nga mutamwauk in sangeng a sensen in tula ‘ma paye luk.’ Nga konaok meet la arulanu fwusesr in orekmakin ma paye luk sifwanu in tukakin orekma kutusrik lun alu puspis su Nga asrouki nu se, tusruktu ke pal inge Nga akilen la tia fwusesr in orekmakin ma paye luk sifwanu nu sin met Lo lun Jeova.”
Sangeng lal Sabrina moklel in tui ke lutlut lal ke Baibel nu sin Met Lo lun Jeova. Tusruktu tokin el oru ou inge el pulakin la oasr ma tula lukel. Paenang el sulela in tafwela ke lutlut lal a ke saflaiye el eis ma paye sasu se inge su el konaok. Sabrina el kapkapek nu ke na el pula tu el lungse in sulkakin nu sin kutu met ma el lotela tari. El siyuk pa sin Met Lo el fwin ku in welultal ke orekma lun forfor lalos sie loom nu ke sie loom. Sabrina el fwak: “Meet liki elos lela Nga in welultal luti, elos siyuk sik: ‘Ya kom lungse na paye in ekla sie Met Lo lun Jeova?’ Mo!’ Nga topuk. Sangeng el sulpa yokelik ke insiuk.” Ke saflaiye, tokin el wi ke meeting nu kemwa a tokin el tuni met lun God a liye fuka elos orekmakin ke moul lalos ma sap lun Baibel, Sabrina el akilen la pa inge ma paye. El baptaisla a ke pal inge el sie met orekma lun forfor pal nu kemwa.
Efu Siena Liki?
Saap sie met el siyuk, ‘Efu luti lun Met Lo lun Jeova el siena liki luti lun alu saye?’ Lutlut futoto ke ma Met Lo lun Jeova lalalfongi ku in kasru kom in liye la elos met Kristian oaru, a met lutlut mwo ke Baibel. Kut kaifwe kom in liye ke Baibel nutum fus puspis su akpayeye lalalfongi lalos su simusyukla lung’u.
Lutlut mwo ke ma Met Lo lun Jeova elos lalalfongi a ke inkanek fuka elos fwasr tokin ma Baibel el luti, ku in kasru kom in eis sukosok su ma paye el ku in sot nu sum. (Jon 17:17) Wangin sripe kom in sangeng ke ma paye. Esam mwolela lal Jisus: “A komwos fwa etu ma paye, a ma paye fwa aksukosokye komwos.”—Jon 8:32.
[Box on page 6]
KUTU LALALFONGI PENGPENG LUN MET LO LUN JEOVA
◯ Jeova el God Ku Liki Ku. E lal sikyuk pal 7,000 ke buk limlim lun Baibel in pal meeta.—Sam 83:18.
◯ Jisus Kraist el Mwen nutin God, el tuku fwin fwalu in sang moul lal nu sin metu. (Jon 3:16, 17) Met Lo lun Jeova elos akos ke me luti lal Jisus Kraist su ku in konoiyukyuk in Gospel.
◯ E se inge Met Lo lun Jeova tuku in Isaia 43:10, su fwak: “ ‘Komwos met lo luk.’ Jeova el fwak.”
◯ Togusrai se su metu elos siyuk ke pre ke “pre lun Leum” pa sie guferment su akola in akwanginye keok a ngal ke fwalu se inge a in oru fwalu nu fon sie paredais fwal nu ke mwolela lun Baibel.—Isaia 9:6, 7; Daniel 2:44; Mattu 6:9, 10; Fwakyuk 21:3, 4.
◯ Met nu kemwa su oru ma lungse lun God oasr pal mwo lalos in engunkin me insemwomwo ma patpat su tuku ke Togusrai.—Jon 17:3; 1 Jon 2:17.
◯ Met Kristian nu kemwa elos enenu in moulkin moul fwal nu ke ma Baibel el fwak. Elos enenu in kaifweung in oaru, in moulkin moul nasnas, a in akkalemye lungse nu sin met tulan lalos. —Mattu 22:39; Jon 13:35; 1 Korint 6:9, 10.
[Picture on page 5]
Met Lo lun Jeova elos sulkakin ma paye lun Baibel nu sin met ke an 200 kutu