U Lun Jeova El Akkeye Orekma Lun Forfor Lom
“A Nga liye siepa lipufon el soksok yen engyengu, a yurol mwosasu ma patpat tu el fwa fwakak.”—FWAKYUK 14:6.
EFU arulanu yok sripe in akilen kunokon lun u lun Jeova in kosrao in sang kasru nu ke orekma lun forfor lun met Kristian? Efu, ya Met Lo lun Jeova elos ku in akpayeye orekma in luti ke peng mwo lun Togusrai lun God ke sie fwalu koluk fwin wangin kasru su tuku sin met kulansap lun Jeova in kosrao? Met Lo elos ku in oru orekma se inge ke lusen pal se su met puspis elos lungse mutanfwal lalos, ye akmwuk koluk lun politic, meun lulap puspis, a ye srunga na upa. Fwin wangin kasru sin Jeova ya Met Lo nu kemwa elos ku in kutangla liki srisri na upa fwin fwalu nu fon, nunuk koluk, a kolyai upa su orekmakinyuk lainelos?—Sam 34:7.
Kutangla Liki Fwinne Oasr Me Lain Fwin Fwalu Nu fon
2 Ke century ak20 inge, met lokwalok puspis, ke alu a politic, elos filiye kain in me kutong puspis, elos orekmakin ma sap a kutupa akmwuk, in kunausla orekma lun Jeova. Met lili mokul a mutan elos akkeokyeyuk, akkolukyeyuk, a kas kikiap puspis orekla in lainelos—pus selos anwuki—pal nu kemwa ma inge sikyuk ke sripen me purakak lun met kol lun alu lun Babulon Lulap. Fwal in fwak kas inge nu selos, oanu fwakyuk pa nu sin met Kristian in pal meeta, “tu fono ke u se inge, kut etu tu yen nu kemwa met elos kaskas ko ka.” Oanu met kol lun alu lun met Ju in pal lal Kraist su oru ma nu kemwa in kutongye orekma lun forfor lal, oupanu met kol a met luti kikiap, wekunang met kol lun politic su akesrui nu selos, elos srike in kunausla orekma in luti a ma lo lulap lun Met Lo lun Jeova.—Orekma 28:22; Mattu 26:59, 65-67.
3 Tuni oanu me srikasrak ma sikyuk fwin an Poland ke March 1, 1946. Henryka Żur, sie Met Lo su 15 matwe su tuku ke an Chelm el wi sin sie Met Lo, sie brother, in oru muteta nu sin kutu met su lungse in lutlut ke sie mura. Elos inge sroukilye sin un met solse lun Catholic pangpang Narodowe Siły Zbrojne (National Armed Forces). Elos uni na upa brother sa tusruktu el tianu mise. Tia nu sel Henryka. El arulanu akkeokyeyuk ke lusen aur puspis a elos liksreni in sapkin nu sel in orala akul ke sakseng lun Catholic. Sie sin met su akkeokyel el fwak: “Nunku kutena ma kom lungse in nunku, tusruktu kom enenu in orala akul ke sakseng. Meyen kom fwin tia oru sie sot ke likesik el sano kom!” Ya el munasla ke lalalfongi lal? Mo. Met sangentot inge lun alu elos wisella nu ke insak a likesikel. Fwinne ou inge, el srakna kutangla! Meyen elos tia kutangla in kunausla oaru lal.a—Rom 8:35-39.
4 Ke lusen yiu siefok, met kulansap lun God ke pal inge elos akkeokyeyuk a pilesreyuk. Meyen Met Lo lun Jeova elos tia, ku lungse in ekla, ipen alu puspis lal Setan, paenang elos inge nunkeyuk oanu met su fwal in akkeokyeyuk ku uniye sin kutena met su suk ma tafongla ku met lokwalok lalos. Elos akkeokyeyuk sin met kol lun politic. Met Lo lun Jeova puspis elos anwuki ke sripen lalalfongi lalos. Fwinne akwuk lun politic su pangonyuk democracy elos srike in kutongye orekma lun forfor. Ke yiu 1917 fwin an Canada a an United States, met kol lun alu fwin an we elos orala kas kikiap lain Met Lo lun Jeova, ku Bible Students meet, a fwak la elos lain guferment. Met kol lun Watch Tower Society elos filiye in kalbos, tusruktu tia pat toko elos aksukosokyelos meyen elos konaok la wangin kutena ma koluk su elos oru.—Fwakyuk 11:7-9; 12:17.
5 Setan el orekmakin kofwen orekma nu kemwa lal tu lan ku in kutongye orekma lo lun ma wiel Kraist a met asrouki lalos. Tusruktu, oanu experience puspis el akkalemye, kas in aksangeng, orekma silolel, nien kalbos, nien kapur lulap pangpang concentration camp, ku fwinne mise, ma inge nu kemwa tia ku in kutongye Met Lo lun Jeova. Pa inge ma sikyuk ke lusen century puspis. Pal nu kemwa, kas lal Elaisa el orekma oanu me akkeye nu selos: “Nikmet sangeng, tu elos su muta yurosr pus lukelos su muta yurolos.” Sie sripe pa, meyen lipufon oaru elos pus liki demon!—2 Togusra 6:16; Orekma 5:27-32, 41, 42.
Jeova El Akinsemwomwoye Orekma in Luti Moniyuk
6 Ke lusen century aklungoul, Met Lo lun Jeova elos orekmakin kofwen orekma sasu puspis in akyokye a akpisrpisrye orekma lo lulap meet liki safla tuku. Ke 1914, Pastor Russell, president se meet lun Watch Tower Bible and Tract Society, el akkeye akwuk in orekmakinyen slides a pitse mokuikui, a sramsram ke Baibel su tuku ke phonograph elos kapsreni nu ka, ma elos orala inge ke lusen aur alkosr su tuku ke Baibel elos pangpang “The Photo-Drama of Creation.” Ma inge aklutye met puspis ke mutanfwal puspis in pal meeta. Tok ke yiu 1930 kutu a 1940, Met Lo lun Jeova elos eteyuk ke orekma in luti lalos loom nu ke loom elos wis phonograph, elos sritelkin me sramsram ke Baibel su akalemyeyuk sel J. F. Rutherford, president akluo lun Society.
7 Ke yiu 1943 sie orekma lulap elos oru ye koko lal Nathan H. Knorr, president aktulo lun Society, ke pal se ma elos sulela in oakiye sie lutlut lun met orekma ku Theocratic Ministry School ke kais sie congregation. Met Lo nu kemwa elos eis akpa in fwakak a luti loom nu ke loom tia orekmakinyen phonograph. Mutamwauk ke pal ingo, kutu pa akmwuk in lutlut elos oakiye in sang akpa nu sin missionary, met orekma pioneer, met elder, a kutupa met liaung ke ofus puspis lun Watch Tower Society. Mea fwokin ma inge?
8 Ke yiu 1943, ke lusen Meun Lulap II, oasr 129,000 Met Lo mukena su oru orekma ke an 54. Tusruktu, oasr lalalfongi a fwinsrak la Mattu 24:14 el fwa akpayeye meet liki safla el tuku. Elos lalalfongi la oasr kas in sensen saok lun Jeova su enenu in sulkakinelik meet liki ma sikyuk puspis el tuku su kol nu ke saflaiyen akmwuk koluk se inge. (Mattu 24:21; Fwakyuk 16:16; 19:11-16, 19-21; 20:1-3) Ya kaifweung lalos akinsemwomwoyeyuk?
9 Ke pal inge oasr mutanfwal 13 su Met Lo moniyuk ke kais sie an inge pus liki 100,000. Pus ke mutanfwal inge alu lun Catholic pa fukoko emeet. Tusruktu tuni ma sikyuk. Oasr met orekma 450,000 kutu ke peng mwo fwin an Brazil, a pus liki 1,200,000 met elos wi ke Memorial ke mise lal Kraist ke 1997. An Mexico el siepa me srikasrak, apkurun 500,000 Met Lo muta fwin an we a pus liki 1,600,000 met elos wi ke akfulat lun Memorial. Kutu mutanfwal su fukoko alu lun Catholic pa an Italy (pus liki 225,000 Met Lo muta fwin an we), Spain (pus liki 105,000), a Argentina (pus liki 115,000). Fwin an United States, an se ma alu lun Protestant, Catholic, a Jewish pa fukoko, oasr 975,000 kutu Met Lo fwin an we a pus liki 2,000,000 met elos wi ke Memorial. Paye na paye, u lulap elos illa liki Babulon Lulap, su lumeyuk nu ke alu kikiap nu kemwa, wikin me luti sakuruk lal, a elos forla nu ke mwolela kalem a paye lun God ke “kosrao sasu a fwalu sasu.”—2 Piter 3:13; Isaia 2:3, 4; 65:17; Fwakyuk 18:4, 5; 21:1-4.
Akfwalye nu ke Ma Enenu lun Metu
10 Pukanten selos su forla nu sin Jeova ke inkanek lal Kraist elos inge konoiyukyuk ke orekma loom nu ke loom. (Jon 3:16; Orekma 20:20) Tusruktu oasr pa kutu akmwuk su orekmakin. Oasr ma ekla ke pal, a ke sripen ma upa ke mani paenang mutan puspis elos oru orekma sayen orekma in loom selos. Pal nu kemwa ke lusen wik se, arulanu supus met ma muta in loom selos. Ke ma inge, Met Lo lun Jeova elos akfwalye orekma lalos fwal nu ke ma enenu. Oanu Jisus a met tumal lutlut lal in pal meeta, elos som nu ke an su oasr met puspis we.—Mattu 5:1, 2; 9:35; Mark 6:34; 10:1; Orekma 2:14; 17:16, 17.
11 Met Lo elos orekmakin lalmetmet a elos usrnguk ke elos luti nu sin met puspis ke nien park lulap ke sitosa, sto lulap, nien orekma ke ma puspis, ofus, nien kuka, loom lutlut, police station, gas station, hotel, restaurant, a ke inkaneku. Ke ma paye, elos luti ke an nu kemwa su oasr met we. A ke pal se ma oasr met su muta in loom, Met Lo elos tafwela in muteta nu selos we. Orekma lalos inge in akfwalye inkanek in osun lalos nu sin met ku in kol nu ke puseni lun me rid su elos kitela. Met su luman sip elos inge konoiyukyuk. Baibel study sasu puspis oakiyuki. Orekma in luti su yok emeet ke me sramsram lun metu orekla sin met orekma moniyuk su kisekin moul lalos sifwanu, su piselos oasr ke limekosr tafwu million! Ya oasr pal mwo lom tu kom in ekla sie selos?—2 Korint 2:14-17; 3:5, 6.
Mea Ma Inge Su Mokle Met Lo lun Jeova?
12 Fuka u in kosrao el orekma nu ke ma inge nu kemwa? Isaia el palye: “A tulik nutum nu kemwa fwa lutiyuk sin Jeova, a misla lun tulik nutum pa yok.” (Isaia 54:13) Jeova el luti un met lili inge fwin fwalu nu fon ke inkanek lun u lal su ku in liyeyuk fwin fwalu—ke Kingdom Hall, a ke toeni lulap puspis. Fwokin ma inge pa inse siefwunnu a misla. Me luti lun Jeova oswela sie kain in met, su lutiyuk in lungse sie sin sie a met tulan lalos oanu elos sifwanu, elos in tia srunga met tulan lalos, elos fwinne muta ke an nu kemwa lun fwalu se inge su kitakatelik.—Mattu 22:36-40.
13 Lungse pa mokel Met Lo lun Jeova in tafwela in luti fwinne oasr srunga ku kolyai. (1 Korint 13:1-8) Elos etu la orekma in molela lalos el fwasr ye koko su tuku kosrao me, oanu Fwakyuk 14:6 el fwak. Mea peng mwo se inge su sulkakinelik ye koko lun lipufon? “Komwos in sangeng sin God, a sang mwolanu nu sel su orala kosrao a fwalu a mwea a unon in kof.” Orekma in luti ke peng mwo lun Togusrai sang kaksak nu ke en Jeova. Met nu kemwa elos eis me solsol in sang mwolanu nu sin Met Su Orala ma nu kemwa, God a tia evolution. A efu ku orekma in luti inge enenu in aksaye? Meyen aur in nununku el tuku tari—nununku lain Babulon Lulap a kutupa ipen ma lal Setan su ku in liyeyuk ke akmwuk se inge.—Fwakyuk 14:7; 18:8-10.
14 Wangin kutena met Kristian su mwolela tari ku in sukosok liki orekma in luti. Met elder in ngun elos kol ke orekma in luti lun congregation. Pioneer puspis su eis tari akpa elos kafofo ke orekma se inge. Met orekma moniyuk ke peng mwo lun Togusrai elos fwinne ku in in forfor na ke lusen aur ekasr ku pus liki ke malem se, tusruktu elos inge sulkakin peng mwo ke sromwasrik akosr lun fwalu.—Mattu 28:19, 20; Hibru 13:7, 17.
15 Ya fwalu se inge el pulakin kaifweung lalos inge nu kemwa? Aok, sie me akpayeye ke ma inge pa, pal puspis elos akkalemye Met Lo lun Jeova ke program ke TV a ke newspaper. Pal nu kemwa ma inge akkalemye kaifweung a moniyuk lasr in sun met nu kemwa. Aok, moniyuk lasr a orekma lun forfor lasr pal nu kemwa elos pulakin na paye, fwinne u lulap lun met elos pilesru peng mwo se inge a met tutafpo su wis ma inge!
Moniyuk Lasr in Akpayeye Orekma In Sang Ma Lo
16 Kut tianu etu pal lula ke akmwuk se inge ku oasr sripe nu sesr in etu pal lula fwin nunuk lasr in kulansap nu sin Jeova arulanu mwo. (Mattu 24:36; 1 Korint 13:1-3) Tusruktu kut etu la, tu in akkalemye lungse, ku, a nununku sumwos lun Jeova, peng mwo se inge enenu in lutiyuk “meet.” (Mark 13:10) Ke ma inge, fwinne kut sano pat ku kut sano futoto ke saflaiyen akmwuk, nununku sesumwos, a orekma silolel lun fwalu se inge, kut enenu in moul ke moniyuk fwal nu ke mwolela lasr ke ku lasr nu kemwa. Saap kut matuo tari ku mas, tusruktu kut srakna ku in kulansap nu sin Jeova ke moniyuk su oanu oasr yurosr meet ke pal se ma kut srakna fwusr a fukoko in mano. Saap kut tia ku in sifwil orekma ke lusen pal loes ke orekma lun forfor oanu ma kut oru meet, tusruktu kut srakna ku in oru me kise mwomwo lasr nu sin Jeova.—Hibru 13:15.
17 Ke ma inge, kom fwinne met fwusr ku met matu, lela kut in akkalemye moniyuk a akkalemye fwinsrak lasr ke sie fwalu sasu nu sin met nu kemwa su kut osun nu sa. Lela kut in oanu tulik mutan mwekin inge su yiu itkosr matwe su wi yurin nine kiel ke sto se. El long ke Kingdom Hall la arulanu yok sripe nu sin met nu kemwa in luti, paenang el filiye buk srisrik luo ma tuku ke Baibel ke bag nutul. Ke pal se ma nine kiel el kafofo ke counter, tulik mutan se inge el som liki nine kiel. Na ke pal se ma nine kiel el sokol, el konielak el kitakut buk srisrik nu sin mutan se! Nine kiel el silaklak in som nu yurol a siyuk nunuk munas nu sin mutan sa fwin oasr kutena ma losrongten tulik nutul el oru. Tusruktu mutan se inge el insemwomwo in eis buk srisrik. Ke pal se ma tulik srisrik inge a nine kiel mukena muta, nine el siyuk nu sin tulik nutul fuka el eis pulaik in osun nu sin sie met su el tianu etu. “Nga fwak na, Ready, Set, Go! Na Nga som!”
18 Kut nu kemwa enenu sie kain in ngun oanu ngunin mutan Australia se inge, yokna tu kut in ku in osun nu sin met saye ku met lulap ke peng mwo. Saap kut sangeng fwin sie met el srunga. Fwin ou inge, lela kut in tia mulkunla ma Jisus el fwak: “Nik komwos nununkala fuka ku mea komwos fwa topuk, ku mea komwos fwa fwak; tu ngun mutal el fwa luti nu sumwos in aur sa ma fwal nu sumwos in fwak.”—Luk 12:11, 12.
19 Ke ma inge lalalfongi ke kasru lun ngun mutal lun God ke kom osun nu sin met ke inkanek kulang ke peng mwo. Million puspis sin met elos filiye pal nu kemwa lalalfongi lalos nu sin mokul a mutan su wangin sripe su oasr ke pal inge tusruktu lutu elos wanginla. Kut lalalfongi Jeova a u lal in kosrao—Jisus Kraist, lipufon mutal, a ke met akmusrala Kristian su sifwil moulyuk tari—su moul ma patpat! Ke ma inge, esam: “Elos su muta yurosr pus lukelos su muta yurolos”!—2 Togusra 6:16.
[Footnote]
a Fwin ke me srikasrak saye, srike liye 1994 Yearbook of Jehovah’s Witnesses, sra 217-20.
Fuka Kom Topuk?
◻ Mea orekma lun u lun God in kosrao ke molela lun met lun Jeova?
◻ Kain in ipen politic a alu fuka elos lain Met Lo lun Jeova ke century ak20 inge?
◻ Fuka Met Lo lun Jeova elos akfwalye orekma lun forfor lalos ke ma enenu lun pal?
◻ Mea mokle kom in luti?
[Study Questions]
1. Fuka Met Lo lun Jeova elos srikeyuk, a efu elos kutangla?
2. Mea ma oanu sie inmaslon met Kristian paye ke century se meet a met Kristian ke pal inge?
3. Mea kut ku in lotela ke oaru lal Henryka Żur?
4. Fuka met kol lun politic a met kol lun alu elos srike in kunausla orekma in luti ke Togusrai?
5. Kain in kas fuka el orekma in akkeye met kulansap lun Jeova?
6, 7. (a) Kain in kaifweung fuka orekla in pal meeta in luti ke peng mwo? (b) Kain in ma ekla fuka su yok sripe el sikyuk mutamwauk 1943?
8. Fuka Met Lo elos akkalemye lalalfongi yok ke 1943?
9. Mea me akpayeye su akkalemye la orekma lun Met Lo el kapek?
10. Fuka luma a ma sikyuk el ekla ke an puspis?
11. Met Lo lun Jeova elos luti oiye ke len inge, a mea fwokin ma inge?
12. (a) Fuka Jeova el luti met lal? (b) Mea fwako lun orekma in luti inge?
13. Fuka kut ku in etu na paye la kolyuk lun lipufon oasr ke orekma in luti?
14. Su met inge su wi ke orekma in luti lulap inge?
15. Mea ma inge su akkalemye la orekma in luti lun Met Lo lun Jeova el purakak met?
16. Kain in oiye fuka enenu in akkalemye ingenu ke sripen pal lula su futotoeni?
17. Akkalemye experience mwomwo su ku in kasru kut nu kemwa.
18. Fuka kut ku in akkalemye oiye mwo?
19. Mea pulakin lom ke orekma lun forfor su kom oru?
[Picture on page 9]
Henryka Żur
[Pictures on page 10]
Japan
Martinique
United States
Kenya
United States
Met Lo lun Jeova elos luti pal nu kemwa ke an nu kemwa su oasr met we
[Picture on page 12]
Ke mutamweyeyn century se inge, phonograph orekmakinyuk in sulkakin peng mwo lun Togusrai