Peng Ke Met Fwakelik Ke Togusrai
God el Akkapye Fwin An Alaska
YE snow a ice, sie fute el sano pal mwo lal in kapek. Ke lusen malem tulo futoto su orala summer fwin an Alaska, futen cabbage se inge su lupa ka oasr ke sie tafwu alkosr ke inch se el ku in kapek nu ke na el poun 90! Aok, an se inge su nunkeyuk meet sin met puspis oanu an koluk, ke sripen ice el ku in oswela fwako mwo puspis.
Ma inge arulanu paye pa ke an in orekma ke ma lun ngun fwin an Alaska. Fwin an we, sie an su arulanu loes pal in musresr, Met Lo lun Jeova elos tafwela in taknelik futen Togusrai. Oanu ma sikyuk ke kutu an fwin fwalu, God el akkapye fute se inge ke inse mwo puspis.—1 Korint 3:6, 7.
● Sie pal ke el wi ke school bus, sie Met Lo fwusr pangpang Vanessa el liye tulik lutlut wiel, pangpang Ann, su mukena muta pal nu kemwa. Ann el luman asor, ke ma inge Vanessa el suli Ann in muta siskel. Aok, fwal nu sel Ann in asor na paye! Nine kiel el mise ke musen heart, a tia pat toko, papa tumal el mise ke cancer. Pa inge sripe efu Ann el muta ke sou lal fwin an Alaska.
Vanessa el tuku in loom sin met kamwuk sasu lal ke pal in orekma lun forfor ke sie Saturday a el sang nu sel buk srisrik inge Does God Really Care About Us? Ke sie Monday toko ke loom lutlut, Ann el suk Met Lo fwusr sa. Oasr kusensiyuk puspis lal Ann, a Vanessa el ku in topuk nu fon. “Komtel alu ye?” El siyuk. Ke fong sa na nge Ann el wi ke meeting se meet lal in Kingdom Hall.
Tia enenu pal loes in som meet liki tulik mutan fwusr mukaimtal inge su 17 matwe el konaok ‘papa’ puspis a ‘nine’ puspis, oanu Jisus el mwolela. (Mattu 19:29) A fuka sie me insemwomwo na paye in liye engun a isrusr lal Ann ke pal se ma el mwolela moul lal nu sin Jeova a sang akul nu ke ma inge ke inkanek lan baptais ke toeni lulap inge “Met Tutafpo ke Misla lun God!”
● Ke sie an loes lun Arctic fwin an Alaska—an se ma mura puspis fwasrelik a luse inmaslon sie sin sie oasr ke mail foko foko—oaksok lun Watch Tower Society su oasr engine luo orekmakinyuk in taknelik futen Togusrai ke 150 kutu mura. Tusruktu kapkapek ke ma lun ngun ke inkanek lun lutlut ke Baibel pal nu kemwa orekla ke inkanek lun leta. Ke sripen tia fwusesr nu sin kutu met in sim leta, paenang sie met luti ke Baibel el enenu in nunku inkanek puspis fuka in oru ou inge tu lan ku in purakak insien tulik lutlut pal nu kemwa. Fuka elos oru ou inge?
Kathy el luti Edna ke Baibel pal nu kemwa, elos fwinne fwasrelik ke lusen mail 400! El tia toeni ke leta lal kusensiyuk ke buk, a, Kathy el orala sie pepu su oasr kusensiyuk puspis su el eisla ke buk a ke pepu se inge oasr sie an mwesas su Baibel study lal el ku in simusla top. Tokin Edna el simusla topuk lal ke pepu, Kathy el tuni ma inge a simusla kutu aketeye in akkalemye me lutlut. Kathy el fwak: “Nga pakiye ekun Wednesday ke ‘Baibel study,’ a Nga kaifweung na paye in srukye ma inge oanu schedule na paye ke Baibel study nu sin kutu met. Nga ouyepa supwela nu sel Edna envelope su oasr tari address ka a stamp ka. Ke sripen enenu wik luo meet liki leta el sun met se, paenang lutlut ke inkanek lun leta luman patla.”
Nunku ke insemwomwo lulap ke pal se ma Kathy a Edna elos liye sie sin sie ke sie toeni lulap lun district fwin an Anchorage tokin malen siengoul lun lutlut lalos ke inkanek lun leta! Met Lo elos engun pa in liye Baibel study puspis a kutu met su pwar in lutlut elos su tuku ke mura loes puspis lun an Alaska, elos tuku in wi ke toeni.
Fwinne kapek lun ma se luman patla, tusruktu kutu fute su “srunak tari” fwin kalem lun ma paye takak nu selos elos pisrpisr in kapek. Ke sie average, pus liki met kaksak siefok lun Jeova baptaisla ke kais sie yiu fwin an Alaska! Kut ku in fwak, “Kulo nu sum, Jeova,” meyen kom oru ma inge in kapek!