Ya God El Akola in Kunausla Fwalu?
FWAL nu ke kas lal Pope John Paul II, met nu kemwa elos ku in ngetuk nu ke pal fwasru ke sie nunuk sumwos. Ke lusen century puspis, el fwak, “metu el tafwela in oru ma koluk, saap ma koluk inge yok liki ma koluk su akkalemyeyuk sin met meet liki sronot.” Tusruktu, Pope el fwak, “ke kas su oasr ke mwoleung lun God nu sel Noa, kut ku in akilen la wangin kutena ma koluk su metu elos oru ke pal inge su ku in mokle God in kunausla fwalu se inge su el sifwanu orala.”
Ya God el e fwa tia kunausla fwalu se inge na paye? Baibel el aketeye la tokin sronot, God el fwak nu sel Noa: “A ikwe nu kemwa a fwa tia sifwil wanginla liki fwin fwalu ke kofwen sronot, a a fwa tia sifwil kunausla fwalu ke sronot.” (Genesis 9:11) Pope el fwak la ke kas inge, “oasr kunokon lun God in tia kunausla fwalu.”
Baibel el akkalemye na paye la Met Orala ma nu kemwa el tia lela fwalu se inge in musalla. “A fwalu on nu tok,” Baibel el fwak. (Ekklisiastis 1:4) Tusruktu oasr ma yok su kut ku in lotela ke Sronot—ma se su Pope el tianu aketeye.
Jisus el fwak la luman fwalu ke pal in oasr tari lal oanu “in len lal Noa,” metu elos “tia etu nu ke pal se sronot tuku, a wiselosla nu kemwa.” (Mattu 24:37-39) In oupanu ou inge, met sap Piter el simusla, “ke ma inge fwalu su on meeta, salongla ke kof a musalla,” oupanu, “len in nununku a kunausla lun met koluk” arulanu apkurun in tuku ke fwalu se inge.—2 Piter 3:5-7.
Ya Jisus a Piter elos mulkunla mwoleung lun God nu sel Noa? Mo elos tia. Oanu ma el akkalemye ke mwoleung lal nu sel Noa, God el tia sifwil orekmakin kof in aksafyela akmwuk koluk se inge. A, el orekmakin ku lun “Togusra lun togusra a Leum lun leum,” Jisus Kraist. (Fwakyuk 19:11-21) Ke ma inge, fwal nu ke ma simusla in Baibel, fwalu se inge e fwa tia musalla, tusruktu “fwalu” su lumeyuk nu ke met koluk e fwa kunanela. (Soakas 2:21, 22; Fwakyuk 11:18) Tokin ma inge, “met sumwosmwos elos fwa usru fwalu, a muta we ma patpat.”—Sam 37:29.