Efu Kut Enenu In Sang Kulo?

SIE laslas ke spinal lal oru Harley lan ekula oiyen orekma lal, el sie met machinist meet, ne el ekula orekma lal nu ke met clerk ke ufus. Ke pal se ma elos siyuk sel ke ma el pula ke ekla lun orekma lal, Harley el fwak: “Nga arulanu asroela orekma luk oanu met machinist. Tusruktu, Nga ku in fwak sumwos nu sum la, Nga insemwomwo ke orekma luk ingenu yok liki orekma luk meet.”

Ke pal se ma el aketeye sripen insemwomwo lal, Harley el fwak: “Oiyen met su wi yu ke orekma pa paenang. Elos tia oanu sie ke met su wi yu ke nien orekma luk meet, supervisor luk ke orekma ingenu wikin kutu met orekma wi yu elos inge lungse in sang kulo ke kutena ma Nga oru, a elos tia srunga in sang kas in kaksak. Oiye lalos inge siena liki oiyen fwalu se inge.” Meyen el pula tu oasr sripe lal, paenang Harry el sie met orekma insemwomwo.

Kas in kaksak ku sang kulo, fwin eneneyuk in sang, sie me purakak inse na paye. Tusruktu fwako lun sie oiye su nukin in sang kulo arulanu koluk oanu Shakespeare el tuni: “Okla, okla, kom eng in musris, lela kom in tia sikulang oanu oiyen sie met su nukin in sang kulo.” Sie me asor, met puspis elos eis kain in oiye sekulang inge.

Kurunganang Moul Lom Lain Oiye Su Nukin in Sang Kulo

Ke fwalu misinge orekma in sang kulo ke inse tia orek pal nu kemwa. Ke sie me pupulyuk sie met sim el srukak sie kusensiyuk: “Fwin sie mutan pusla el ku in eis pal in simusla me solsol 200, efu el tia ku in konaok pal in simusla sie leta in sang kulo ke me sang 163 su el eis ke pal in alu lal?” Pal nu kemwa kas fwusesr se inge “kulo” met puspis tia orekmakinyuk. Met puspis elos ayaola oiye in sang kulo ke oiye se inge, Nga meet. Kain in oiye se inge sie akul ke len safla. Met sap Poul el sang kas in sensen: “A etu ma se inge, tu in len safla pal in me sensen yok e fwa tuku. Tu met elos fwa sifwanu lungselos . . . Elos tia sang kulo.”​—2 Timote 3:​1, 2, Phillips.

Ke kutu ma sikyuk, oiye in sang kulo elos ayaola nu ke kas in kaksak kikiap. Kas in sang kulo na paye ma inge tuku ke inse a tia nunku ke kutena ma lane. Tusruktu kas in kaksak kikiap, pal nu kemwa tia tuku ke inse a alukela ma fwal in fwak, a saap sie met el oru ou inge meyen el lungse in kilukyuk ke orekma ku eis kutu ma lane. (Jud 16) Sayen orekma se inge su keapela met su long kas in kaksak se inge, kain in kas mwomwo inge pal nu kemwa fwako lun insefulat a fulang. Ke ma inge, su lungse in eis kas in kaksak kikiap? Aok, kas in kulo paye arulanu sang insemwomwo.

Sie met su akkalemye kulo pal nu kemwa elos eis ma lane su tuku ka. Insemwomwo su el akkalemye paenang el sang kulo ke insiel sang kasru yok ke insemwomwo a inse misla lal sifwanu. (Srike liye 15:13, 15.) A ke sripen ma inge sie oiye mwo, paenang orekma lal in sang kulo sie me loeyuk lal lain inse koluk oanu mulat, sok, srunga.

“Komwos in Sang Kulo”

Baibel el sapkin nu sesr in akkapye ngun in sang kulo. Poul el simusla: “Komwos in sang kulo in ma nu kemwa. Tu pa inge ma lungse lun God in Kraist Jisus keyumwos.” (1 Tessalonika 5:​18) A Poul el kai met Kolosse: “A lela misla lun Kraist in leumi insiomwos . . . A komwos in sang kulo.” (Kolosse 3:​15) On puspis in Sam akkalemye kas in kulo, ma inge akkalemye la kas in kulo ke inse sie oiye mwo su tuku sin God. (Sam 27:​4; 75:⁠1) Arulanu kalem, Jeova el insemwomwo kut fwin sang kulo ke kain in ma sikyuk nu kemwa ke moul lasr ke len nu kemwa.

Tusruktu kain in luma fuka ke fwalu se inge su nukin in sang kulo oru in upa nu sesr in akkapye ngun in sang kulo? Fuka kut ku in akkalemye sie oiye mwo in sang kulo ke len nu kemwa? Topuk ke kusensiyuk inge e fwa sramsramkin ke me lutlut toko.