Me Insemwomwo Su Tuku Ke Orekma Lun Pioneer
“Insemwomwo lun Jeova—me akkasrupye met, a el tia esani toasr nu ka.”—SOAKAS 10:22.
YA oasr kutena insemwomwo su yok liki insemwomwo in liye Baibel study lom in ekla met kulansap moniyuk lun Jeova? Sie me purakak a me akkeye lalalfongi na paye in liye ku lun Kas lun God in mokle sie met in ekulla moul lalos tu elos in ku in akinsemwomwoye Jeova.” Pa inge ma sie sister fwin an Canada su oru orekma lun pioneer ke lusen yiu 32 el simusla. El sramsram ke orekma lun pioneer lal, el fwak ou inge: “Wangin na kutena orekma su Nga ku in oru. Payela wangin kutena orekma Nga nunku su ku in use insemwomwo yok.
2 Ya kom tia insese la oasr insemwomwo ma lulap su tuku ke orekma in sang kasru nu sin kutena met ke inkanek nu ke moul? Paye, tia pioneer mukena pulakin kain in insemwomwo se inge. Met kulansap nu kemwa lun Jeova sapkinyuk in “oru met tumal lutlut,” a elos nu kemwa kaifweung in oru ou inge. (Mattu 28:19) Tusruktu, meyen pioneer el orekmakin pal yok ke orekma lun forfor, paenang oasr pal mwo lalos in pulakin pal nu kemwa insemwomwo yok su tuku ke orekma in suk met tumal lutlut. Tusruktu oasr pa me insemwomwo saye su tuku ke orekma lun pioneer. Sramsram nu sin pioneer, a elos fwa akkalemye nu sum la orekma lun pioneer sie inkanek sakuruk tu kom in pulakin ‘insemwomwo lun Jeova su akkasrupye sie met.’—Soakas 10:22.
3 Ke pal futoto somla, pioneer puspis su tuku ke an puspis fwin fwalu elos eis kusensiyuk ke me insemwomwo puspis su elos pula ke orekma lun pioneer. Lela kut in tuni ma elos fwak. Lela kom in tia asor fwin orekma lom tianu arle yok ke sripen mas, matuo, ku kutu ma ilya. Esam, ma yok pa, in kulansap nu sin Jeova ke insiom kemwa, ke kutena orekma lal. Tusruktu, in long sramsram lun kutu pioneer saap ku in purakak pwar lom in sroang nu ke orekma mwo inge ke ku lom.
Pulakin Yok ke Inse Misla a Insemwomwo
4 “Insemwomwo in sang yok liki insemwomwo in eis,” Jisus el fwak. (Orekma 20:35) Aok, oasr me insemwomwo lulap su tuku ke orekma in sang ke insemwomwo. (Soakas 11:25) Ma inge arulanu paye kut fwin sramsram ke orekma in sulkakin peng mwo nu sin kutu met. Paye, mea me sang yok emeet su kut ku in sang nu sin metu fwin tia ke orekma in kasrelos in eis etauk sumwos lun God, su ku in kol nu ke moul ma patpat?—Jon 17:3.
5 Tia me lut, elos nu kemwa su wi orekma lun pioneer pal nu kemwa elos sramsram ke me insemwomwo a inse misla su elos eis ke orekma lun forfor lalos. “Nga etu la wangin kutena orekma su ku in ase nu sik insemwomwo su tuku ke orekma in fwakak ma paye nu sin kutu met,” pa inge sie pioneer su 64 matwe lun an Britain el fwak. Sie mutan katinmas fwin an Zaire, el fwak la oasr kalme yok lun orekma lun pioneer nu sel: “Sie me pwarak na paye sik orekma lun pioneer tukun mokul tumuk su Nga arulanu lungse el mise. Ke pal se ma Nga forfor pal nu kemwa in sang kasru nu sin kutu met, ma inge kasru yu in tia arulanu nunku ke mokul tumuk su mise tari. Nga filiye lalalfongi luk ke mwolela puspis lun Jeova a Nga nunku pal nu kemwa fuka Nga ku in kasru Baibel study luk in ekula oiyen moul lalos. Ke saflaiyen kais sie len, mutol luk arulanu fulosumwos, a insiuk nenela ke insemwomwo.”
6 Kutu sin met su wi ke orekma lun pioneer ke lusen yiu puspis oasr pal mwo lalos in kulansap ke an loes puspis, elos oakiye congregation puspis, su ke saflaiye ma inge kapek nu ke circuit. Ke sie me pupulyuk, in an Abashiri, tuku srisrik liyen Eir lun an Hokkaido Japan, oasr sie sister su wi ke orekma lun pioneer ke lusen yiu 33. El esam la ke circuit assembly se meet lal—fwin an Hokkaido nu fon—oasr met 70 na su wi. Fuka misinge? Oasr circuit 12 ke tuka se inge, a met orekma nu fon su oasr ka oasr ke 12,000 kutu met orekma. Nunku fuka insiel arulanu nenela ke insemwomwo ke pal se ma el wi ke toeni lulap puspis fwin an we wikin met orekma puspis lun Togusrai ke tuka se inge!
7 Kutu sin pioneer su muta pat ke orekma lalos elos insemwomwo in liye Baibel study lalos in baptaisla a suk orekma yok ke orekma lun forfor. In an Japan sie sister su kulansap oanu sie pioneer ke kain in assignment puspis mutamwauk 1957 el esam la el kitelik sie Awake! magasin nu sin sie mutan fwusr su oru orekma ke bank. Ke lusen malem eu mutan fwusr se inge el baptaisla. Tia pat toko el payuk, el a mokul tumal ekla special pioneer. Fuka sie me insemwomwo lulap nu sin sister se inge ke pal se ma, ke assignmet aktulo lal, congregation su el wi eis muteta sin circuit overseer sasu a mutan kiel—el pa Baibel study lal meet!
8 Tia me lut, paenang elos nu kemwa su sulela orekma lun pioneer oanu ipen moul lalos elos nunku ou inge oanu “sie me sang su enenu in aksaokyeyuk,” pa inge sie pioneer ke lusen yiu 22 el fwak!
Me Akpayeye ke Kurungin lun Jeova
9 Jeova, su Met Kasru Lulap, el mwolela in sang kasru nu sin met kulansap lal, ke ma lun ngun a ma lun ikwe. Togusra Devid in pal meeta el ku in fwak: “Nga fwusr meet, a inge Nga matu, tusruktu Nga sumwena liye met sumwosmwos sisyukla, ku fute lal ngusr ma nelos.” (Sam 37:25) Paye, me akpayeye mutal inge tia aksukosokye kut liki kunokon lasr in sang ma enenu in ikwe lun sou lasr, ku el aksukosokosokye kut in orekmakin kulang lun met Kristian lili wiesr. (1 Tessalonika 4:11, 12; 1 Timote 5:8) Aok, ke pal se ma kut kisekin moul lasr nu sin Jeova ke insemwomwo tu kut in ku in kulansap nu sel ke inkanek yok, el akola in tia siskutla ke kutena pal.—Mattu 6:33.
10 Pioneer puspis fwin fwalu nu fon elos etu ke experience la Jeova el sang ma enenu lun met nu kemwa su filiye moul lalos ye po kulang lal. Tuni ma sikyuk nu sin seanyen pioneer su som nu ke an srisrik su oasr enenu yok ke met orekma lun Togusrai. Tukun malem ekasr, upa in suk orekma ke an se inge, a wanginla mani lalos. Tia pat toko insurance el siyuk nu selos ke molin insurance lalos su oasr ke tala $81! “Wangin inkanek lasr in moli ma inge,” brother se inge el fwak. “Kut sekalani in pre ke fong se ingo.” Ke lututeng, elos eis sie card su tuku sin sie sou su kaifweung pa in suk ma enenu lalos in moul. Sou se inge el eis refund ke tax, card sa el aketeye, a ke sripen refund su elos eis yok liki ma elos nunku, paenang elos lungse in epeis mani lalos nu sin seanyen pioneer. Wikin card se inge pa sie check su oasr ke tala $81! “Nga tia ku in mulkunla na paye len sa—nga arulanu insemwomwo a lut na paye. “Kut arulanu sang kulo na paye ke kulang lun sou se inge.” Jeova el ouyepa insemwomwo ke kain in oiye kulang inge, su arulanu pengpeng ke ngun kulang su el kaifwe nu sin met kulansap lal in akkalemye.—Soakas 19:17; Hibru 13:16.
11 Pioneer puspis elos ku in akkalemye experience puspis su apkurun in oanu sie ke ma se inge. Siyuk selos, elos fwa fwakak nu sum la elos tia “sisyukla” na paye. Ke pal se ma el esam ma sikyuk ke lusen yiu 55 limekosr somla ke orekma lal oanu sie pioneer, sie mokul pioneer su 72 matwe el fwak, “Jeova el tia sisyula ke kutena pal.”—Hibru 13:5, 6.
“Sie Inkanek Mwo Emeet Tu in Futoto nu Sin Jeova”
12 Ke pal se ma Jeova el siyuk sesr in sulkakin peng mwo lun Togusrai lal ma inge sie me sang nu sesr. El nunku kut—fwinne kut met sesumwos—oanu “met orekma yurol” ke sie orekma inge su molela moul. (1 Korint 3:9; 1 Timote 4:16) Ke kut luti kutu met ke Togusrai lun God, ke kut sulkakin safla lun ma koluk, ke kut aketeye nu sin met lungse sakuruk lal ke pal se ma el sang sie lango, ke pal se ma kut ikasla Kas Lal su moul a luti koanon ma inge nu sin met fwokpap, ma inge oru kut in futoto nu sin Met Orekutla, Jeova.—Sam 145:11; Jon 3:16; Hibru 4:12.
13 Pioneer nu kemwa elos ku in orekmakin pal yok ke kais sie malem in lutlut a luti kel Jeova. Mea elos pula ke sripen ma inge el orekma ke futoto lalos nu sin God? “Orekma lun pioneer pa sie inkanek yok emeet tu in futoto nu sin Jeova,” pa inge topuk lun sie met elder fwin an France su wi pioneer ke lusen yiu siengoul kutu. Siepa pioneer ke an se inge, su wi ke orekma se inge ke lusen yiu 18, el fwak: “Orekma lun pioneer el lela kut in ‘pulakin a liye tu Jeova el mwo,’ a ma inge musaiyuk futoto nu sin Met Orekutla.” (Sam 34:8) Sie sister fwin an Britain su wi ke orekma lun pioneer ke lusen yiu 30 el pulakin pa ou inge. “In siyuk ke ngun mutal lun Jeova in kol yu ke orekma lun forfor ma inge oru Nga in futoto nu sel,” el fwak. “Nga pula na paye ngun mutal lun Jeova ke pal puspis, el kol yu ke sie loom ke pal fwal.”—Srike liye Orekma 16:6-10.
14 Pioneer puspis elos konaok la in orekmakinyen Baibel a me rid su tuku ke Baibel ke len nu kemwa in aketeye a in luti ma paye lun Baibel, ma inge kasrelos in kapkapek ke etauk ke Kas lun God. Sie brother su 85 matwe fwin an Spain su wi pioneer ke lusen yiu 31 el aketeye ou inge: “Orekma lun pioneer el kasru yu in eis etauk loal lun Baibel, etauk su Nga orekmakin in kasru met puspis in etu Jeova a akmwuk lal.” Sie sister fwin an Britain su wi ke orekma lun pioneer ke lusen yiu 23 el fwak: “Orekma lun pioneer el kasru yu in akkapye kena ke inse ke me mongo in ngun.” In aketeye nu sin kutu met “sripen fwinsrak su oasr yurosr” ku in akkeye kaifweung lom sifwanu ke lalalfongi su kom arulanu aksaokye. (1 Piter 3:15) Pa inge sie pioneer el fwak fwin an Australia: “Orekma lun pioneer arulanu akkapye lalalfongi luk ke pal se ma Nga sramsram nu sin kutu met.”
15 Kalem la, met orekma pioneer inge nu kemwa elos lalalfongi la elos sulela sie kain in orekma su use me insemwomwo puspis su tuku sin Jeova. Tia me lut, met puspis elos akola in ekulla oiyen moul lalos, a kutu elos pilesru me kasrup a orekma lun fwalu, tu elos in ku in sroang nu ke orekma lun pioneer a muta na ke orekma se inge!—Soakas 28:20.
Ya Insiom El Mokle Kom In Oru Yok?
16 Tukun kom tuni mea pioneer puspis elos fwak ke me insemwomwo puspis su tuku ke orekma lun pioneer, saap kom mutamwauk in nunku fwin orekma lun pioneer fwal nu sum. Fwin fwal nu sum, efu kom tia sramsram nu sin sie pioneer su arulanu kapkapek ke orekma se inge? Saap kom ku in konaok me kasru kom fwin sramsram nu sin met elder lun congregation, el su etu kom na paye—ku lun monum, lupan ku lom in oru orekma, a kunokon lom ke sou. (Soakas 15:22) Sramsram paye lun kutu met saap ku in kasru kom in tuni na paye fwin orekma lun pioneer arulanu fwal nu sum. (Srike liye Luk 14:28) Kom fwin ku in pioneer, arulanu yok na paye me insemwomwo su kom ku in eis.—Malakai 3:10.
17 A, fuka met orekma puspis lun Togusrai su oaru tusruktu tia ku in wi pioneer, fwinne elos lungse in akyokye orekma lun forfor lalos? Ke sie me pupulyuk, nunku ke pulakin lun sie sister Kristian su arulanu kaifweung in kurungin tulik akosr nutul kel sifwanu. “Koluk ikuk,” el fwak, “meyen Nga wi ke regular pioneer meet, tusruktu ke pal inge, ke sripen ma sikyuk nu sik inge, Nga tia ku in som nu ke orekma lun forfor oanu ma Nga oru meet.” Sister se inge arulanu lungse tulik nutul a lungse in sang ma enenu lalos. In pal se na el kena in akyokye orekma lun forfor lal. “Nga lungse orekma lun forfor,” el aketeye. Pa inge pulakin pa lun kutu met Kristian oaru su lungse lalos nu sin God moklelos in pulakin lungse in kulansap nu sin Jeova ‘ke insielos kemwa.’—Sam 86:12.
18 Esam la ma Jeova el siyuk sesr pa orekma su tuku ke inse. Lupan ma inge saap tia oanu sie ke kais sie met. Kutu met elos ku in ekulla oiyen moul lalos tu elos in ku in kulansapu oanu sie regular pioneer. Kutu elos sroang nu ke auxiliary pioneer kais kutu pal ku pal nu kemwa, orekmakin aur 60 ke kais sie malem ke orekma lun forfor. Tusruktu, pus sin met lun Jeova elos orekmakin moul lalos ke orekma lun forfor a orekma in luti oanu sie met orekma ke insielos kemwa. Ke ma inge kom fwin munas ke mano, matuo, ku oasr kunokon yok lom ke sou, ku oasr kutu ma ilya, lela kom in tia asor. Kom fwin sang ma nu kemwa ke ku lom, na orekma lom yok sripe ye mutun God, oanu sie ke orekma lun met nu kemwa su wi ke orekma lun pioneer!
Met nu Kemwa Ku in Akkalemye Ngun lun Pioneer
19 Kom fwinne tia ku in sroang nu ke orekma lun pioneer, kom ku in akkalemye ngun lun pioneer. Mea se inge ngun lun pioneer? Me lutlut ke July 1988 Orekma lun Togusrai Lasr el fwak: “Ma inge ku in kalmekin nunuk a oiye sumwos ke ma sap in luti a oru met tumal lutlut, oasr kena na paye in akkalemye lungse a nunuk yok nu sin met saye, akola in kisekin moul, eis insemwomwo ke orekma in fwasr tukun Met Kol lal ke inkanek futoto, a in eis insemwomwo ke ma lun ngun a tia ke ma lun fwalu.” Fuka kom ku in akkalemye ngun lun pioneer?
20 Kom fwin papa a nine su oasr tulik srisrik nutum, kom ku in kaifwe nu selos ke insiom kemwa orekma lun pioneer oanu nien sun lalos. Nunuk a oiye sumwos lom ke orekma lun forfor ku in purakak insielos a nunku la orekma lun Jeova pa ma se ma yok emeet ke moul lalos. Kom ku in suli pioneer puspis ku met fwafwasryesr a mutan kielos in muteta nu in loom sum a ke ma inge tulik nutum elos fwa eis insemwomwo ke me srikasrak lalos su eis insemwomwo ke orekma lun pioneer. (Srike liye Hibru 13:7.) Fwinne ke sie loom su tia muta ke lalalfongi siefwunnu, papa ku nine su lalalfongi su akkalemye me srikasrak mwo ke kas a orekma, elos ku in kasru tulik nutulos in orala orekma lun pioneer oanu nien sun lalos ke moul.—2 Timote 1:5; 3:15.
21 Ke congregation, kut nu kemwa ku in sang kasru ke insiesr kemwa nu selos nu kemwa su ku in wi pioneer. Ke sie me pupulyuk, ya kom ku in kaifweung in wi sin sie pioneer ke orekma lun forfor, yokna fwin sie pal el tuku la wangin kutena met su ku in wilul? Kom ku in konaok la komwos ku in “akpwarye sie sin sie.” (Rom 1:11, 12) Kom fwin sie met elder, kom ku in oru orekma yok in akkeye pioneer. Ke pal se ma un met elder elos tukeni nu sie, elos enenu in tuni pal nu kemwa ma enenu lun pioneer. Fwin sie pioneer el luman asor ku sun ma upa, lela kom in tia silaklak in kaifwe nu sel in srola liki orekma lun pioneer. Fwinne ma inge kutupal eneneyuk, tusruktu lela kom in tia mulkunla la orekma lun pioneer sie kain in orekma saok su sie met pioneer el arulanu aksaokye. Sie kas in akkeye a kas in kai ku kasru pa saap eneneyuk. Ofus lun Society fwin an Spain el simusla: “Fwin met elder elos akkeye orekma lun pioneer, sang kasru nu sin pioneer ke orekma lun forfor, a akkeyelos pal nu kemwa, na pioneer elos fwa insemwomwo, elos pulakin la oasr sripen orekma lalos, a elos tafwela in oru orekma se inge fwinne oasr kutena me kutong su touyuk.”
22 Kut moul misinge ke sie pal in ma upa ke me sramsram lun metu. Jeova el ase nu sesr sie orekma in molela su kut enenu in oru a aksafyela. (Rom 10:13, 14) Fwinne kut ku in wi ke orekma se inge oanu sie pioneer ku tia, lela kut in akkalemye ngun lun pioneer. Lela kut in akkalemye la kut silaklak ke orekma se inge a kut akkalemye la kut akola in kisekin moul lasr sifwanu. Lela kut in kaifweung in sang nu sin Jeova ma el siyuk sesr—orekma ke insiesr kemwa. A lela kut in esam la kut fwin sang ma nu kemwa su kut ku, fwinne ma inge oanu mani srisrik lun mutan katinmas se, ku oanu me akmusra lal Mary su yok molo, na orekma lasr tuku ke insiesr kemwa, a Jeova el arulanu aksaokye orekma lasr nu kemwa su tuku ke insiesr!
Ya Kom Esam?
◻ Efu ku orekma lun pioneer use inse misla a insemwomwo?
◻ Fwin ke experience, mea pioneer puspis elos etu ke ku lun Jeova in kurunganang met kulansap lal?
◻ Pioneer nu kemwa elos pulakin la orekma lun forfor oasr orekma fuka ke futoto lalos nu sin Jeova?
◻ Fuka kom ku in akkalemye ngunin pioneer?
[Study Questions]
1, 2. (a) Fuka sie pioneer el akkalemye pulakin lal ke orekma lun pioneer? (b) Efu ku oasr pal mwo lun pioneer nu kemwa in pulakin yok insemwomwo su tuku ke orekma in orala met tumal lutlut?
3. Mea ma inge su saap ku in purakak insiesr ke kut tafwela in kulansap nu sin Jeova?
4, 5. (a) Efu orekma in sulkakin peng mwo nu sin kutu met sie experience su oasr me insemwomwo yok su tuku ka? (b) Mea pioneer puspis elos pulakin ke orekma lalos in sroang nu ke orekma lun forfor pal nu kemwa?
6. Kain in me insemwomwo yok fuka pioneer puspis elos pula
7, 8. Kain in me insemwomwo yok fuka pioneer nu kemwa su muta pat ke orekma se inge elos pula?
9. Oanu Met Kulang Lulap, mea Jeova el mwolela nu sin met kulansap lal, a mea kalmen ma inge nu sesr?
10, 11. Fwin ke experience, mea pioneer puspis elos etu ke ku lun Jeova in sang?
12. Efu ku orekma in sulkakin mwosasu sie me sang na yok?
13. Mea kutu met elos fwak ke orekma lun pioneer ke futoto lalos nu sin Jeova?
14. Fuka pioneer puspis elos eis ma lane su tuku ke orekmakinyen Baibel a me rid su tuku ke Baibel ke orekma in luti lalos ke len nu kemwa?
15. Mea met puspis elos insemwomwo in oru tu elos in ku in sroang nu ke orekma lun pioneer a muta na ka a efu?
16, 17. (a) Kom fwin tuni a nunku fwin orekma lun pioneer fwal nu sum, na mea saap kom enenu in oru? (b) Mea met puspis elos pula ke pal se ma elos tia ku in pioneer?
18. (a) Mea Jeova el lungse kut in oru? (b) Efu kut tia enenu in asor fwin ma sikyuk nu sesr aksrikye orekma su kut ku in oru?
19. Mea se inge ngun lun pioneer?
20. Fuka papa a nine elos ku in akkalemye ngunin pioneer?
21. (a) Fuka kut nu kemwa ku in sang kasru nu selos nu kemwa su oru orekma lun pioneer? (b) Mea met elder elos ku in oru in akkeye pioneer?
22. Ke pal in ma upa se inge ke me sramsram lun fwalu, mea kut nu kemwa enenu in kaifweung in oru?
[Picture on page 17]
Pioneer nu kemwa elos eis insemwomwo lulap ke orekma in oru met tumal lutlut
[Picture on page 17]
Tulik nutum elos fwa eis ma lane su tuku ke asrouki lalos nu sin pioneer su sulkakin peng mwo lun Togusrai pal nu kemwa
[Picture on page 17]
Met elder elos ku in akkeye pioneer ke pal in orekma lun forfor