Baibel Sie Buk Sakuruk

Ma inge pangonyuk buk su pus emeet ma kukakin fwin fwalu, paye na paye pa inge. Pus sin met elos ridi a aksaokye na paye Baibel liki kutena buk. Ke len inge, pisen ma kitakutla tari ke Baibel nu fon se (ku kutu ipen Baibel) nunkeyuk mu sun tari billion akosr ke kas 2,000 kutu.

Tusruktu sie me purakak nunuk yok liki pisen ma kitakutla inge pa Baibel sifwanu el fwak la el tuku sin God me. “Baibel nu kemwa etuku ke ngun lun God,” met sap Kristian pangpang Poul el simusla. (2 Timote 3:16) Mea kalmen ma inge? kas se inge “etuku ke ngun lun God” (Greek, the·oʹpneu·stos) ku in kalmekin “momong lun God.” Sie kas Grik su oupanu kas inge, pneuʹma, ku in kalmekin “ngun.” Ke ma inge, ngun mutal lun God el mokle met sim, el oanu momong nu selos, paenang fwal in pangon ma simusla se inge Kas lun God, tia ma lun met. Paye, met puspis su lutlut Baibel elos lut ke sifwe siefwunnu lal, sumwos lal ke akmwuk lun science, oaru a sumwos lun met sim lal, a yok liki nu kemwa pa kas palu lal su akpayeyuk​—⁠ma inge nu kemwa mokleyuk million sin met in lalalfongi la buk inge tuku sin El su fulat liki met.a

Tusruktu fuka lupan futoto lun God ke pal se ma el kol in simusla Baibel? Kutu met elos fwak la God el orekmakin kas nu ke kas ke pal in sim lun Baibel. Kutu met elos fwak la kalmen ma simusla na pa tuku sel a tia kas su oasr in Baibel. Tusruktu, ke ma paye, kolyuk lun God ke inkanek lun ngun mutal tia ku in orek ke inkanek siefwunnu, meyen God el kaskas “in oiye puspis nu sin papa tumasr yurin met palu puspis.” (Hibru 1:1; srike liye 1 Korint 12:6.) Ke me lutlut toko’an kut pa tuni inkanek puspis lun God in sramsram nu sin met sim 40 su simusla Baibel.

[Footnote]