Oru Orekma Oanu Met Tutafpo Ke Misla Lun God
“Fuka mwoiyen fwin eola nien el su wise kas mwo . . . su sulkakinelik misla.”—ISAIA 52:7.
OASR peng mwo su enenu in sulkakin! Peng mwo ke misla—misla na paye. Peng mwo ke molela pa inge ke inkanek lun Togusrai lun God. In pal meeta met palu Isaia el simusla ke ma se inge, a kas lal on na misinge in Isaia 52:7, kut ku in rid: “Fuka mwoiyen fwin eola nien el su wise kas mwo, su sulkakinelik misla, su wise kas mwo ke ma mwo, su sulkakinelik lango, su fwak nu sin Saion: ‘God lom el togusra!’ ”
2 Jeova el mokle met palu Isaia in simusla kas inge ke insemwomwo lun met Israel in pal meeta a ke insemwomwo lasr ke len inge. Mea kalmen ma inge? Ke pal se ma Isaia el simusla kas inge, togusrai lun Israel in an Eir elos muta tari ye koko lun met Assyria. Tia pat toko, met ma muta ke togusrai lun an Juda fwin an Epang elos ekla pa met sruo lun Babulon. Len ingo pal in ma upa a fos ke mutanfwal lalos meyen met Israel elos srunga in akos Jeova a ke sripe se inge wangin misla lalos yurin God. Oanu Jeova el fwak nu selos, oiye koluk lalos orala srisri inmaslolos a nu sin God lalos. (Isaia 42:24; 59:2-4) Fwinne ou inge, ke inkanek lal Isaia, Jeova el palye la ke pal pakiyuki lal srungal lun Babulon fwa ikakla. Met lun God elos sukosok in foloko nu ke an selos, in sifwil musaiyuk tempel lun Jeova. Saion e fwa sifwil musaiyuk, a alu nu sin God paye e fwa sifwil folokla nu Jerusalem.—Isaia 44:28; 52:1, 2.
3 Mwolela se inge ke molela oupanu kas palu ke misla. Meyen elos fwa folokla ke an se ma Jeova el sang nu selos paenang oasr me akpayeye nu sin met Israel ke pakoten lun God a ke auliyuk lalos. Ma inge akkalemye la oasr misla lalos yurin God.—Isaia 14:1; 48:17, 18.
“God Lom El Ekla Togusra!”
4 Ke pal se ma Jeova el oru molela se inge ke yiu 537 B.C.E., me fwakak enenu in orek fwin an Saion: “God lom el ekla Togusra!” Paye, “Jeova el Togusra ma patpat.” (Fwakyuk 15:3) Aok molela lal inge ke met lal sifwil akkalemye sumwos lal in kol. Ke sie inkanek sakuruk, el akkalemye ku lal su yok liki ku lun kutena guferment ke pal ingo. (Jeremaia 51:56, 57) Ke sripen orekma lun ngun mutal lun Jeova, kutu papu lun met koluk lain met lal kunausyukla. (Esther 9:24, 25) Pal puspis Jeova el oru ma lungse lal ke inkanek puspis tu in purakak togusra lun an Medo-Persia in akesrui a akpayeye ma lungse lal oanu sie Togusra. (Zekaraia 4:6) Ma sakuruk puspis su sikyuk ke len ingo simusyukla nu ke buk lun Baibel in Ezra, Neimaia, Esther, Haggeai, a Zekaraia ke insemwomwo lasr. A fuka sie me akkeye ke lalalfongi in kalweni ma inge nu kemwa!
5 Tusruktu, ma sikyuk ke yiu 537 B.C.E. a tukun pal inge oanu pal in mutamwauk na. Tia pat toko, tukun kas palu lun molela in Isaia sapter 52, Isaia el simusla ke tuku lun Messaia. (Isaia 52:13–53:12) Ke inkanek lun Messaia, su Jisus Kraist, Jeova el akola in sang peng mwo ke molela a misla su yok liki ma sikyuk ke yiu 537 B.C.E.
Met Tutafpo Lulap Emeet lun Jeova ke Misla
6 Jisus Kraist pa met tutafpo lulap emeet lun Jeova ke misla. El pa Kas lun God, Met kaskas lun Jeova. (Jon 1:14) In fwal nu ke ma se inge, tia pat toko tukun baptais lal ke infwal Jordan, Jisus el som nu ke sie imwen lolngok fwin an Nazareth a ridi ke pusra lulap kunokon lal su oasr in Isaia sapter 61. Konokon lal inge akkalemye la el supweyukla in luti a wikin ma inge pa in “tulala” a “in sang liyaten,” a sang pal mwo nu sin met in esel Jeova. Aok, Jisus el orekma yok liki in sulkakin na peng mwo ke misla. God el ouyepa supwella in sang nu sin met key ke misla ma patpat.—Luk 4:16-21.
7 Ke pal in isusla lal Jisus, lipufon elos sikme apkurun an Bethlehem, kaksakin God a fwak: “Mwolanu nu sin God in fulat liki nu kemwa, a misla fwin fwalu inmaslon met su el insemwomwo kelos.” (Luk 2:8, 13, 14) Aok, oasr misla nu selos nu kemwa su God el insemwomwo kelos meyen elos akkalemye lalalfongi ke me sang lal ke inkanek lun Mwen nutul. Mea kalmen ma inge? Kalmen ma inge pa, fwinne sie met el isusla ke ma koluk, elos ku in eis moul nasnas ye mutun God, sie kain in moul su God el lela lan futoto nu sel. (Rom 5:1) Elos ku in pulakin inse misla, misla su elos ku in eis ke inkanek inge mukena. Ke pal pakiyuki lun God, oasr tulala ke fwokin ma koluk su kut usru nu sel Edam, wekunang mas a mise. Wanginla met kun, met silongkas ku met fuke. Munas su akasorye kut a mas ke nunuk e fwa wanginla ma patpat. Sie moul sumwosmwos su insemwomwo ma patpat ku in tuku na paye.—Isaia 33:24; Mattu 9:35; Jon 3:16.
8 Nu sin su misla lun God inge etukyung nu se? Nu selos nu kemwa su akkalemye lalalfongi nu sel Jisus Kraist. Met sap Poul el simusla la ‘me insemwomwo nu sin God in akiumwela ma nu kemwa nu sel Kraist ke el oru tari misla ke sran sak soko lal.’ Met sap Poul el tafwela in aketeye la wikin ma akiumwela inge pa “ma in kosrao”—elos su akola in ekla met usru wilul Kraist in kosrao. A “ma fwin fwalu”—elos su eis insemwomwo in moul ma patpat fwin fwalu tukun fwalu se inge el akla sie paredais. (Kolosse 1:19, 20) Ke sripen elos lalalfongi ke me kise lal Kraist a ke sripen elos akos God ke insielos, elos inge nu kemwa ku in engunkin futoto nu sin God oanu kamwuk lalos.—Srike liye Jemes 2:22, 23.
9Arulanu yok sripe na paye misla inge nu sin God! Fwin wangin misla yurin God, wangin misla ma patpat ku misla su oasr sripe ke kutena oiye. Misla yurin God pa foundeson lun misla na paye fwin fwalu. (Isaia 57:19-21) Arulanu fwal, Jisus Kraist pa fwisrak in misla. (Isaia 9:6) Ke inkanek lal met nu kemwa ku in sifwil futoto nu sin God, Jeova el ouyepa sang nu sel sumwos in kol. (Daniel 7:13, 14) A fwokin kolyuk lal Kraist nu sin met nu kemwa fwin fwalu oanu fwisrak in misla, Jeova el mwolela: “Wangin saflaiyen misla.”—Isaia 9:7; Sam 72:7.
10 Met nu kemwa enenu peng mwo lun God ke misla. Jisus el akkalemye me srikasrak moniyuk in luti ma inge. El oru ou inge ke likinum lun tempel fwin an Jerusalem, fwin eol, ke inkanek, nu sin mutan Samaria ke sie lufin kof, a ke loom sin met. An nu kemwa oasr met, Jisus el suk pal in luti ke misla a ke Togusrai lun God.—Mattu 4:18, 19; 5:1, 2; 9:9; 26:55; Mark 6:34; Luk 19:1-10; Jon 4:5-26.
Kom In Pala in Fwasr ke Fwalkel Kraist
11 Jisus el luti met tumal lutlut lal in sulkakin peng mwo lun God ke misla. Oanu Jisus su “met lo oaru,” elos ouyepa akilen la oasr kunokon lalos in orek lo. (Fwakyuk 3:14; Isaia 43:10-12) Elos ngetuk nu sel Kraist oanu Met Kol lalos.
12 Met sap Poul el sramsram ke yok sripe lun orekma in luti, el fwak: “Tu Ma Simusla fwak: ‘El su lalalfongi el fwa tia akmwekinyeyuk.’ ” Kalmen ma inge pa, wangin kutena met su akkalemye lalalfongi nu sel Jisus Kraist oanu Leum lun Molela lun Jeova fwa akmwekinyeyuk. A tia ke sripen sruf ku tun paenang sie met el tia ku in wi ke akmwuk se inge, meyen met sap Poul el tafwela in fwak: “Tu wangin sie liki inmaslon met Ju a met Grik, tu Leum siefwunnu el Leum fwe nu kemwa, a el kasrup nu sin met nu kemwa su pangon nu sel. Tu ‘elos nu kemwa su pangon nu ke En Jeova elos fwa moul.’ ” (Rom 10:11-13) Tusruktu fuka met puspis elos ku in lutlut ke pal mwo lalos inge?
13 Poul el sramsram nu ke ma enenu inge ke pal se ma el siyuk kusensiyuk su oru met kulansap nu kemwa lun Jeova in nunku. Met sap inge el siyuk: “Na fuka elos fwa pang nu sel su elos tia lalalfongi? A fuka elos fwa lalalfongi el, su elos tia long kel? A fuka elos fwa long, fwin wangin me luti? A fuka elos luti fwin tia supalosla?” (Rom 10:14, 15) Record lun met Kristian in pal meeta sie me akpayeye yok su akkalemye la mokul a mutan, met fwusr a met matu, elos fwasr tukun me srikasrak lal Jisus a met sap lal. Elos arulanu moniyuk ke orekma in sulkakin peng mwo. In etawi Jisus, elos luti nu sin met nu kemwa ke an nu kemwa elos liyelos. Ke sripen elos lungse tu in wangin kutena met su tia long peng mwo, paenang elos oru orekma lalos loom nu ke loom a an puspis su met elos muta we.—Orekma 17:17; 20:20.
14 Paye, tia met nu kemwa elos eis met luti Kristian ke kulang. Fwinne ou inge, sramsram lal Poul su tuku in Isaia 52:7 arulanu paye. Tukun el siyuk kusensiyuk inge, ‘A fuka elos fwa luti fwin tia supalosla?’ el tafwela in fwak: “Aok, oanu ma simusla: ‘Fuka mwolanu lun nielos su wise mwosasu lun ma mwo!’ ” Apkurun kut nu kemwa tia nunku la kato niesr. Ke ma inge, mea kalmen kas se inge? Paye nie pa orala sie met in forfor tu lan ku in luti kutu met. Nie se inge aoliyen met se. A kut ku in fwak na paye la nu selos nu kemwa su long peng mwo nu sin met sap a met tumal lutlut lal Kraist ke century se meet, met Kristian inge kato in liyeyuk. (Orekma 16:13-15) Yok liki ma inge, elos inge nu kemwa saok ye mutun God.
15 Oasr peng mwo ke misla lun met tumal lutlut lal Kraist, a elos sulkakin ma inge ke inkanek misla. Jisus el sang nu sin met tumal lutlut lal kas in kai se inge: “A in kutena loom komwos ilyuk nu we, komwos fwa meet, ‘Misla nu ke loom se inge.’ A sie mwen nutin misla fwin muta we, misla lomwos fwa on fwe. A fwin tia, a fwa sifwil foloko nu yuromwos.” (Luk 10:5, 6) Sha·lohmʹ, ku “misla,” pa fasin lun met Ju fwin elos paing. Tusruktu, oasr ma yok liki kas in kai lal Jisus inge. Oanu “met tutafpo ke Kraist,” met tumal lutlut akmusrala lal elos kaifwe nu sin met: “in iumwela nu sin God.” (2 Korint 5:20) Fwal nu ke kas in kai lal Jisus, elos sramsram nu sin met ke Togusrai lun God a mea kalmen ma inge nu selos oanu met se met se. Elos nu kemwa su porongo elos eis insemwomwo; elos su srunga na peng mwo tula nu selos.
16 Met Lo lun Jeova elos oru orekma lun forfor lalos ke len inge ke inkanek se na. Peng mwo su elos akkalemye nu sin met tia ma lalos; ma inge tuku nu Sel su supwelosla. Kunokon na lalos in akkalemye ma inge. Fwin sie met el eis, el filiye moul lal ke sie inkanek su kol nu ke me insemwomwo puspis. Fwin elos srunga, elos srunga misla yurin Jeova God a Mwen nutul Jisus Kraist.—Luk 10:16.
Elos Akkalemye Misla ke Sie Fwalu Su Fos
17 Ke kutena oiye su metu elos akkalemye, arulanu yok sripe nu sin met kulansap lun Jeova in filiye ke nunuk lalos la elos met tutafpo ke misla lun God. Saap met fwin fwalu se inge elos lungse akukuin a lela koskosrok lalos in akilenyuk ke inkanek in kaskas koluk a wowon nu selos su akkoskosrokyelos. Saap kutu met inmaslosr oru pa ou inge meet. Tusruktu, kut fwin nukomang met sasu a tia ma lun fwalu se inge, kut tia etawi orekma lalos. (Efesus 4:23, 24, 31; Jemes 1:19, 20) Ke kutena oiye su met lun fwalu se inge elos akkalemye, kut fwa loang ke kas in kai se inge: “Komwos fwin ku, oanu oan yuromwos, komwos misla yurin met nu kemwa.”—Rom 12:18.
18 Saap kutu pal kut enenu in osun nu sin met kol lun guferment ke sripen orekma lun forfor lasr. In akkalemye ku lalos, saap elos ‘siyuk nu sesr’ sie aketeye efu kut tia oru ma se ku efu kut oru ma se. Saap elos lungse in etu efu kut luti peng mwo oanu ma kut oru—kut akkalemye alu kikiap a fwakak saflaiyen akmwuk inge. Sunak lasr ke me srikasrak lal Kraist fwa mokle kut in akkalemye fwokpap a sunak lulap. (1 Piter 2:23; 3:15) Pal nu kemwa, met kol lun guferment inge elos mokleyuk upa sin met kol ke alu ku kutu met su fulat lukelos. Sie topuk fwusesr ku in kasrelos in etu la orekma lasr tia sang me sensen nu selos ku ke misla lun an’u. Kain in topuk lasr inge enenu in akilenyuk ke sunak, akesrui, a misla nu selos nu kemwa su eis ma inge.—Taitus 3:1, 2.
19 Met Lo lun Jeova elos eteyuk fwin fwalu nu fon oanu sie alu su tia wi ke kutena u fwin fwalu su lain sie sin sie. Elos tia wi ke meun lun fwalu ke sripen politic, tun, a alu. (Jon 17:14) Ke sripen kas lun God el sapkin nu sesr in “akos ku su fulat liki kut,” paenang kut tia nunku in wi ke kutena u su akkolukye ku lain akmwuk lun guferment. (Rom 13:1) Met Lo lun Jeova elos tia wi ke kutena u su nunku in kunausla guferment. Ke sripen akmwuk su Jeova el sang nu sin met kulansap Kristian lal, paenang fwinne in nunku in wi ke kutena orekma in aksororye sra elos tia oru! Met Kristian paye elos tia sramsram mukena ke misla, a elos moul fwal nu ke ma elos luti.
20 Tia oanu met Kristian paye, elos nu kemwa su aoliyen alu puspis lun Kristendom elos tia akkalemye la elos met tutafpo lun misla. Alu nu kemwa lun Babulon Lulap—alu lun Kristendom a alu su tia ekin Kristian—elos lela, sang kasru, a kol ke meun lun mutanfwalu. Elos ouyepa kol ke kolyai a ke akmas sin met kulansap oaru lun Jeova. Fwin ke Babulon Lulap, Fwakyuk 18:24 el fwak: “A konoiyukyuk in el sran met palu a met mwo, a elos nu kemwa su anwuki fwin fwalu meet.”
21 Tia oanu alu nu kemwa lun Kristendom a Babulon Lulap, alu paye el fukoko, oasr ku lal in orala kain in met nu kemwa in oasr nunuk siefwunu. Nu sin met tumal lutlut paye lal, Jisus el fwak: “Ke ma se inge met e nu kemwa fwa etu tu komwos met tumuk lutlut, komwos fwin lungsumwos sie sin sie.” (Jon 13:35) Pa inge kain in lungse su kutangla liki mutanfwal puspis, un met puspis, met kasrup, sruf a tun su ke pal inge oru metu in kitakatelik. Ke sripen elos liye ma inge, million sin met fwin fwalu nu fon elos fwak kas inge nu sin met kulansap akmusrala lun Jeova: “Kut fwa wi kom som, tu kut long tu God el oasr yuromwos.”—Zekaraia 8:23.
22 Oanu met lun God, kut arulanu insemwomwo ke ma kut oru tari, tusruktu orekma sonna tari. Tukun el taknelik fute a liaung imae lal, sie met imae el tia tui. El tafwela ke orekma, yokna ke pal in kosrani. Enenu kaifweung, a ku ke pal in kosrani. A ke pal inge oasr kosrani su yok liki kutena pal ke met kulansap lun God. Pal in engun pa inge. (Isaia 9:3) Paye, kut osun nu ke me lain, a srunga. Saap kais sie sesr enenu in kaifweung ke sripen mas in mano, ma upa ke sou, ku moul sikasrup. Tusruktu lungse nu sin Jeova mokle kut in kaifweung. Metu elos enenu in long peng mwo su God el ase nu sesr. Peng mwo ke misla pa inge. Paye, pa inge peng mwo su Jisus el luti meet—peng mwo ke Togusrai lun God.
Mea Topuk Lom?
◻ Mea akpayeye lun Isaia 52:7 nu sin met Israel in pal meeta?
◻ Fuka Jisus el akkalemye la el met tutafpo yok emeet lun misla?
◻ Fuka met sap Poul el kapsreni Isaia 52:7 ke orekma su met Kristian elos enenu in oru?
◻ Mea ma inge su eneneyuk kut fwin met tutafpo lun misla ke len lasr?
[Study Questions]
1, 2. (a) Oanu Isaia 52:7 el fwak, kain in peng mwo fuka enenu in lutiyuk? (b) Mea kalmen kas palu lal Isaia fwin ke ma sikyuk nu sin met Israel in pal meeta?
3. Efu ku mwolela ke tulala lun Israel ma inge oupanu kas palu ke misla?
4. (a) Ke inkanek fuka kut ku in fwak la ke yiu 537 B.C.E. ‘Jeova el ekla togusra’? (b) Fuka Jeova el orekma ke insemwomwo lun met lal ke yiu puspis toko?
5. Mea ma sikyuk yok su akkalemyeyuk in Isaia 52:13–53:12?
6. Su met tutafpo lulap emeet lun Jeova ke misla, a kunokon fuka el sifwanu akkalemye?
7. Mea fwokin misla yurin God su ku in sikyuk na paye ke inkanek lal Jisus Kraist?
8. Misla lun God etukyung nu sin su?
9. (a) Misla yurin God purakak kain in futoto fuka? (b) Ke sripen nien sun lal in sang misla ma patpat in an nu kemwa, paenang kain in mwal fuka Jeova el sang nu sin tulik nutul?
10. Fuka Jisus el sang me srikasrak ke orekma in sulkakin peng mwo lun misla?
11. Jisus el sang akpa nu sin met tumal lutlut lal ke kain in orekma fuka?
12. Fuka Poul el akkalemye yok sripen orekma lun forfor?
13. Mea eneneyuk nu sin met tu elos in ku in long peng mwo, a fuka met Kristian ke century se meet elos topuk nu ke ma enenu se inge?
14. Fuka arulanu paye la “nielos” su sulkakin peng mwo arulanu “kato”?
15, 16. (a) Fuka met Kristian ke century se meet elos akkalemye la elos met tutafpo na paye lun misla? Mea ma inge su ku in kasru kut in tafwela ke orekma lun forfor lasr oanu met Kristian ke century se meet elos oru?
17. Fwinne met koluk elos sun kut, oiye fuka kut akkalemye, a efu ou inge?
18. Oiye fuka kut akkalemye fwin met kol ke guferment elos tia mwo nu sesr, a efu ou inge?
19. Ke kain in orekma fuka Met Lo lun Jeova elos tia wi ke kutena pal
20. Fwin ke misla, kain in record fuka Babulon Lulap el orala?
21. Mea met puspis su inse pusisel elos oru ke pal se ma elos liye ma tia oanu sie ke oiyen met lun Jeova a ke met ma muta ke alu kikiap?
22. Nunuk fuka enenu in oasr yurosr ke orek lo su kut srakna enenu in oru?
[Pictures on page 8]
Oanu Jisus, Met Lo lun Jeova elos met tutafpo lun misla lun God
[Pictures on page 10]
Met Lo lun Jeova elos akkalemye misla ke kutena oiye su metu elos akkalemye ke peng mwo lun Togusrai