Srukye Insemwomwo Lom Ke Orekma Lun Jeova

“Engun in Leum pal e nu kemwa. A Nga sifwil fwak, engunak!”​—FILIPPAI 4:4.

1, 2. Fuka sie brother a sou lal elos srukye na engun lalos fwinne ma nu kemwa lalos tula?

JAMES, su yiu 70 matwe, el sie met Kristian su muta in an Sierra Leone, el oru orekma upa ke lusen moul lal nu fon. Nunku ke insemwomwo lal ke pal se el oreni mani su fwal in molela sie loom su oasr infwokil akosr ka! Tusruktu, ke lusen kitin pal na, tokin James a sou lal mutamwauk in muta ke loom inge, meun ke mutanfwal lal sikyuk, a loom sel furruryuk nu fon. Loom selos wanginla, tusruktu engun lalos onnu. Efu?

² James a sou lal elos filiye nunuk lalos ke ma se, tia ke ma tula lal, a ke ma su srakna oasr yurolos. James el aketeye: Fwinne ke lusen pal lun me aksangeng lulap, kut oru meeting lasr, rid Baibel, tukeni pre, a kut orekmakin kutena ma su oasr yurosr nu sin kutu met. Kut srukye na insemwomwo lasr meyen kut filiye nunuk lasr in futoto nu sin Jeova.” Ke inkanek in nunuk lasr ke me insemwomwo nu kemwa su oasr yurosr, ma yok emeetu pa ke futoto lasr nu sin Jeova, met Kristian oaru inge elos kaifweung na in srukye “engun lalos.” (2 Korint 13:11) Paye, tia fwusesr in muteng ke ma upa su oasr yurolos. Tusruktu elos tia tui in pulakin insemwomwo lalos nu sin Jeova.

3. Fuka met Kristian puspis in pal meeta elos srukye na engun lalos?

³ Met Kristian in pal meeta elos sun pa kain in ma upa su oanu ma upa su Jemes a sou lal sun. Fwinne ou inge, met sap Poul el simusla ke kas inge nu sin met Hibru Kristian: “[Komwos] insemwomwo ke pal ma gaspeyomwos kunausyukla.” Tokin ma inge Poul el aketeye sropon engun lalos: “Tu komwos etu tu oasr ma gaspeyomwos sifwanu mwo liki, su on ma patpat.” (Hibru 10:34) Aok oasr fwinsrak fukoko lun met Kristian ke century se meet inge. Elos ngetuk nu ke lalalfongi in eis ma se su tia ku in kunausyukla​—“tefuro lun moul” su tia ku in kulamwi in Togusrai lun God. (Fwakyuk 2:10) Ke len inge, fwinsrak lasr in oanu met Kristian​—fwinne in kosrao ku fwin fwalu—​ku in kasru kut in srukye engun lasr fwinne kut sun ma upa.

“Engun In Fwinsrak”

4, 5. (a) Efu ku kai lal Poul ke “engun in fwinsrak” arulanu mwo nu sin met Rom? (b) Mea ma inge su ku in oru engun lun met Kristian in tula?

⁴ Met sap Poul el kaifwe met lili wiel in lalalfongi fwin an Rom in “engun in fwinsrak” ke moul ma patpat. (Rom 12:12) Kas in kai inge fwalyung nu ke pal lun met Rom. Srik liki yiu siengoul tokin Poul el simusla ma inge, elos sun kolyai lulap, a kutu selos akkeokyeyuk nu ke mise ke ma sap lun Emperor Nero. Wangin alollo in lalalfongi lalos la God el sang nu selos tefuro lun moul su el mwolela ka, in akkeyelos ke pal in keok. A fuka nu sesr misinge?

⁵ Oanu met Kristian, kut lalalfongi pa la kut e sun kolyai. (2 Timote 3:12) Sayen ma inge, kut akilen la “pal a ma sikyuk” tuku nu sin met nu kemwa. (Ekklisiastis 9:11) Sie ongoiye ku in eisla moul lun met su kut lungse. Sie mas upa ku in uniye papa a nine ku kamwuk futoto se. Kut fwin tia loang pal nu kemwa nu ke fwinsrak lun Togusrai, kut ku in sun me sensen nu ke ku lasr in ngun fwin oasr kolyai sikyuk. Fwal nu ke ma inge, arulanu mwo kut fwin siyuk sesr sifwanu, ‘Ya Nga “engun in fwinsrak”? Pal ekasr Nga orekmakin pal in nunku ke ma inge? Ya Paredais su apkurun in tuku arulanu paye sik? Ya Nga liye oanu ke sie arurumu la Nga muta we? Ya pwar luk nu ke saflaiyen akmwuk koluk se inge srakna oasr oanu pwar luk meet ke pal se Nga tufwanu eis etauk lun ma paye?’ Kut enenu in nunku yok ke kusensiyuk safla inge. Efu? Meyen kut fwin tia mas, ku mani yok lasr su yok liki ma kut enenu, a kut fwin muta ke sie an fwin fwalu su wangin meun, sral ku ongoiye su sikyuk ke pal inge, kut ku in​—ke pal inge—​ku in eisla nunuk yok lasr ke me enenu nu ke fwal sasu lun God.

6. (a) Ke pal se Poul a Sailas elos sun me keok, elos filiye nunuk lalos oya? (b) Fuka me srikasrak lal Poul a Sailas akkeye kut ke len inge?

⁶ Poul el tafwela in kaifwe nu sin met Rom in “mongfwusesr in keok.” (Rom 12:12) Poul el arulanu etu kalmen keok. Oasr sie pal, el liye sie arurumu ke sie mokul su sulel in “fwasru nu Masedonia” in kasru kutu met in an we in lutlut kel Jeova. (Orekma 16:9) Ke ma inge, Poul, Luk, Sailas a Timote, elos fwafwasyesr nu an Europe. Mea e fwa sikyuk nu sin missionary moniyuk inge? Keok! Tokin elos luti ke siti lun Masedonia pangpang Filippai, Poul a Sailas elos eis anwuk a sisiyang nu in kalpous. Arulanu kalem la, kutu sin met fwin an Filippai elos tia lungse in long mukena ke peng lun Togusrai​—a elos arulanu srunga na paye ma inge. Ya ma sikyuk inge akmunasye missionary moniyuk inge paenang wanginla engun lalos? Mo. Tokin elos eis anwuk a sisila nu in kalpous, “a akurun nu ke infwulwen fong, Poul a Sailas eltal pre a onkin on in kaksak nu sin God.” (Orekma 16:25, 26) Paye, ngal su tuku ke anwuk tia akinsemwomwoyel Poul a Sailas, tusruktu, missionary luo inge elos tia loang nu ka. Aok, ma elos nunuk yok pa Jeova a inkanek puspis su el orekmakin in akinsemwomwoyelos. ‘Mongfwusesr lalos in keok,’ ke insemwomwo, Poul a Sailas elos orekma oanu me srikasrak mwo nu sin met lili fwin an Filippai a an saye.

7. Efu kut enenu in toeni sang kulo ke pre lasr?

⁷ Poul el simusla: “Sikalani in pre.” (Rom 12:12) Ya kom pre ke pal in ma upa? Mea kom siyuk ke pre? Saap kom sramsramkin ma upa lom a siyuk ke kasru lun Jeova. Tusruktu, kom ku in ouyepa toeni kas in kulo ke me insemwomwo nu kemwa su kom eis. Ke pal se ma upa sikyuk, nunuk yok ke orekma mwo nu kemwa lun Jeova nu sesr ku in kasru kut in “engun in fwinsrak.” Devid, su moul lal nenela ke ma upa, el simusla: “O Jeova God luk, pukanten orekma sakuruk lom su kom orala, a nunuk lom nu simem; ma inge koflanu takunyukla nu sum. Nga fwin lungse fwakak a kaskas ka, elos pus liki ku in oekyukla.” (Sam 40:5) Aok, oanu Devid, kut fwin kalweni pal nu kemwa ke nunuk lasr me insemwomwo nu kemwa su kut eis sin Jeova, kut ku in konaok la kut insemwomwo pal nu kemwa.

Srukye Sie Nunuk Sumwos

8. Mea ma inge su kasru met Kristian in srukye na insemwomwo ke pal se elos sun kolyai?

⁸ Jisus el kaifwe nu sin met tuma lutlut lal in srukye nunuk sumwos ke pal se elos sun kain in me srifwe puspis. El fwak: “Insemwomwo komwos ke met akangonye komwos, a kolyai komwos, a fwak kain in koluk nu kemwa lain komwos in kikiap keik.” (Mattu 5:11) Mea sripe oru kut in engun ke ma upa inge? Meyen ku lasr fwin ku lain me srifwe pa inge sie me akpayeye la ngun mutal lun Jeova oasr yurosr. Met sap piter el fwak nu sin met lili Kristian wiel in len lal: “Fwin akkolukyeyuk komwos ke en Kraist, komwos in insemwomwo, tu ngun lun ma mwomwo a lun God on fwomwos.” (1 Piter 4:13, 14) Ke inkanek lun ngun mutal lal, Jeova el ouyepa kasru kut in muteng a, ke sripe se inge, kut srukye na engun lasr.

9. Mea ma inge su kasru brother puspis in srukye insemwomwo lalos ke pal se elos muta in kalpous ke sripen lalalfongi lalos?

⁹ Fwinne kut muta ye ma upa lulap, kut ku in konaok me akengunye kut. Oasr sie met Kristian su pangpang Adolf el pulakin ou inge. El muta ke sie mutanfwal su orekma lun Met Lo lun Jeova tia sukosok ke lusen yiu puspis. Elos sroukilye Adolf a met asrouki nu kemwa lal a sang nu selos in kapur ke pal loeloes in prison meyen elos srunga in fwuleak lalalfongi lalos su tuku ke Baibel. Moul in kapur lalos arulanu upa, tusruktu, in oanu Poul a Sailas, Adolf a met asrouki nu kemwa lal elos pulakin kain in sripe puspis su fwal in sang kulo ka nu sin God. Elos pulakin la, experience lalos ke elos kalpous, kasrelos in akkeye lalalfongi lalos a in akyokye oiye mwo puspis lun met Kristian, in orekmakin kulang, pakoten, a in futoto a lungse met lili lalos. Ke me pupulyuk, fwin oasr sie met el eis sie package su tuku ke loom sel me, el kitalik koanon package se inge nu sin met lili wiel nu kemwa in lalalfongi, meyen el nunku ke me sang inge mu ma tuku sin Jeova me, el su Met sang lun “me kite mwo nu kemwa a kite fwal.” Kain in oiye lun kulang inge orala me insemwomwo nu sin met su engun in sang a elos su eis. Ke ma inge experience lalos in prison su orekla sin kutu met in sang kunausla lalalfongi lalos, ekla me akkeye ku lalos in ngun!​—Jemes 1:17; Orekma 20:35.

10, 11. Fuka sie sister el mongfwusesr nu ke me keok su tuku ke kusensiyuk puspis a ke muta lal in kalpous tokin ma inge?

¹⁰ Ella, su muta pa ke sie mutanfwal su orekma lun Togusrai tia pa sukosok we, elos sroukilyel pa ke sripen el akkalemye fwinsrak lal in oanu sie met Kristian nu sin kutupa met. Ke lusen malem alkosr, el muta ye ma upa puspis ke sripen elos siyuk ma puspis sel. Ke pal se elos wisela nu in court, elos sang nu sel sentence in muta in kapur su wangin kutena met saye we su alu nu sin Jeova ke lusen yiu siengoul. Ella el yiu 24 matwe na ke pal inge.

¹¹ Paye, Ella el tia nunku in orekmakin lusen moul in fwusr lal nu fon ke sie imwen kalpous. Tusruktu meyen el tia ku in eisla ma su sikyuk nu sel, paenang el sulela in orala sie akmwuk lal. Fwal nu ke sulela lal, el mutamwauk in orala nien kalpous lal in oanu sie an in orek ma lo lal. “Oasr orekma in luti puspis su eneneyuk in orek, el fwak, “oru yiu u arulanu mui la.” Tokin yiu limekosr, elos sifwilpa akkeokyel ella ke kain in kusensiyuk puspis. Meyen elos akilen la el ne kalkalyuk ke mwusra in nien kalpous tusruktu tia ku in kunausla lalalfongi lal, paenang met su akkeokyel ke kusensiyuk puspis elos fwak nu sel: “Kut tia ku in aksukosokye kom la; meyen kom tia ekla.” “Tusruktu Nga ekla tari!” pa inge top fukoko lal Ella. “Ke pal inge oiye luk mwo liki ke Nga tufwanu utyuk nu ke kalpous, a lalalfongi luk ku liki meeta!” A el tafwela in fwak: “Komwos fwin tia lungse in aksukosokye yu la, na Nga fwa muta ne ke na Jeova el liye pal fwal in aksukosokye yu la.” Muta lal Ella in kalpous ke lusen yiu limekosr tafwu tia eisla engun lal! El lotela in inse misla kin kutena luma a ma sikyuk nu sel. Ya oasr ma kom ku in lotela ke me srikasrak lal?​—Hibru 13:5.

12. Mea ku in eisla misla ke nunuk lun sie met Kristian su sun ke ma upa?

¹² Lela kom in tia nunku mu oasr kutena ma usnguk yurol ella su wangin yurin kutu met paenang el ku in tu ku in lain me srifwe inge. In sramsramkin me keok su sikyuk ke kusensiyuk puspis su elos siyuk sel meet liki el eis sentence lal, Ella el fwak: “Nga esam la oasr pusren wisik ke sripen Nga rarrar ke sangeng, Nga pulakin la Nga oanu mwon sparo su arulanu sangeng.” Tusruktu, oasr lalalfongi fukoko lal Ella nu sin Jeova. El lotela in filiye lalalfongi lal nu sel. (Soakas 3:5-7) Ke sripe se inge, God el arulanu kasrel yok liki meeta. El aketeye: “Pal nu kemwa Nga utyuk nu ke infwokil su elos orekmakin in siyuk kusensiyuk puspis, oasr na pulakin in misla yok tuku nu sik. . . . Fwin yokelik me aksangeng, na yokelik pa inse misla su tuku nu sik.” Jeova pa sropon misla inge. Met sap Poul el aketeye: “Nik komwos nununkela in kutena ma, a in ma nu kemwa ke pre a kaifwe wi sang kulo, komwos in fwakak me siyuk lomwos nu sin God; a misla lun God, su alukela ma eteyuk nu kemwa, fwa liaung insiomwos a nunkumwos in Kraist Jisus.”​—Filippai 4:6, 7.

13. Kut fwin sun ma upa, mea ku in kasre kut in lalalfongi la, oasr ku yurosr in kutangla?

¹³ Ella, su aksukosokyeyukla tari, el srukye na engun lal fwinne oasr ma upa. El oru ou inge tia ke ku lal sifwanu, a ke ku lun Jeova su el sang nu sel. Ma inge paye pa nu sel Poul met sap, su simusla: “Ke ma inge, Nga fwa arulanu engun in konkun in munas luk, tu ku lun Kraist fwa on fwuk. . . . Tu ke Nga munas, na Nga ku.”​—2 Korint 12:9, 10.

14. Akkalemye la fuka sie met Kristian el ku in srukye na nunuk sumwos fwin ma upa a mea fwokin ma inge.

¹⁴ Ma upa su kom sun ke pal inge saap tia oanu sie nu ke ma su kut sramsramkin tari. Fwinne ou inge, in kutena kain in luma su sikyuk, arulanu upa in muteng ma upa. Ke sie me pupulyuk, saap met kol lom ke nien orekma el arulanu lungse in suk ma tafongla ke orekma lom​—yok liki ma tafongla lun kutu met orekma su wi ke kutu alu. Saap tia fwusesr nu sum in suk na kutupa orekma. Fuka kom ku in srukye engun lom? Esam Adolf a met asrouki nu kemwa lal, ke experience lalos in kalpous elos lotelos in kaifweung na oiye mwo puspis lalos. Kom fwin kaifweung na paye in akinsemwomwoye met kol lom ke orekma​—fwinne elos “su kou”—​kom ku in akpaye oiye lun met Kristian paye su mongfwusesr a muteng. (1 Piter 2:18) Sayen ma inge, saap kom ku in ekla sie met orekma mwo, su ku in akyokye pal mwo lom in eis orekma mwomwo ke pal fwasru. Inge lela kut in sramsramkin inkanek saye su ku in kasru kut in srukye engun lasr ke orekma lun Jeova.

Oru in Fwusesr Kol nu ke Engun

15-17. Mea seanyen se elos lotela su ku in akfwusesrye ma upa, fwinne sropon ma inge tia ku in eisla nu fon ma upa?

¹⁵ Saap tiana yok pal mwo lom in sulela orekma su kom lungse in oru ku ke an su kom lungse in oru orekma we, tusruktu saap oasr kutu oiye mwo ke moul lom su kom ku in orekmakin in sang akkalemye mongfwusesr lom sifwanu. Loang akmwoye nu ke kutu experience inge.

¹⁶ Sie seanyen Kristian elos suli sie met elder nu ke sie mongo in eku in loom seltal. Ke pal inge, brother se inge a mutan kiel elos akkalemye nu sel ke me keok upa lalos ke ma lun moul. Oasr orekma lalos su eisla pal yok a ku lulap lalos, a wangin ku lalos in suk orekma saye. Elos muta na nunku, la luseka elos ku in muteng ke ma upa inge.

¹⁷ Ke pal se elos siyuk ke kas in kasru, met elder el top a fwak, “Akfwusesrye ma nu kemwa.” Ke inkanek fuka? Mokul a mutan kiel elos sisla aur tolu ke fwafwasryesr lalos ke len nu kemwa liki loom selos nu ke nien orekma lalos a foloko. Met elder inge su etu na paye seanyen se inge, el kaifwe nu selos in suk in muta futoto nu ke nien orekma lalos, in aksrikyela lusen pal in fwafwasyesr lalos len nu kemwa. Lusen pal su elos aksrikyela inge elos ku in orekmakin nu ke ma saok puspis​—ku elos ku in eis mongle ka. Fwin ma upa lun moul mutamwauk in kunausla insemwomwo lom, efu kom ku tia tuni luman moul lom a suk la piye ma kom ku in eis in sang kasre kom in oru me aksumwos nu ke oiyen moul lom.?

18. Efu arulanu yok sripe in nunku yok meet liki kut oru sulela?

¹⁸ Siepa inkanek in aksrikye ma upa pa in orekmakin nunuk lom in nunkela mwo meet liki kom oru sulela. Ke sie me pupulyuk, sie met Kristian el sulela in musa sie loom. El fwinne soenna orala loom meet, el sulela sie kain in ate lun loom su tia fwusesr in oru. Ke pal inge el akilen la el ‘fwin liaung mwo nunuk lal’ ke pal se el oru sulela lal ke aten loom sel meet, el lukun tia sun kain in ma upa puspis su el sun ke pal inge (Soakas 14:15) Siepa met Kristian el insese in kasru sie met lili wiel in lalalfongi in orala loan. Fwal nu ke pepu in agreement, fwin met su orala loan el tia ku in moli, el su kasrel pa oasr kunokon la in moli ma inge. Ke mutamwauk, ma nu kemwa fwasr mwo, tusruktu fwala nu tok kutu na met su ma orala loan el tia ku in sifwil oru kunokon lal. Met se su ma sang loan el mutamwauk in sensen a el siyuk sin met su sang kasru in molela loan sa nu fon. Ma inge orala ma upa yok nu sin met inge su sang kasru. Ma upa inge el tia sun fwin el loang akmwoye ke ma nu kemwa meet liki el insese la in eis kunokon in kasru?​—Soakas 17:18.

19. Mea kutu inkanek su kut ku in oru in aksrikye ma upa ke moul lasr?

¹⁹ Fwin kut totola, lela kut in tia fwak mu kut ku in aksrikye ma upa a srukye na engun lasr kut fwin aksrikyela pal in lutlut lasr ke Baibel, orekma lun forfor lasr, a in wi meeting pal nu kemwa. Lela kut in tia oru ou inge, meyen pa inge inkanek puspis su Jeova God el orekmakin in ase nu sesr ngun mutal, a sie fwokin ma inge pa engun. (Galetia 5:22) Pal nu kemwa orekma lun met Kristian el orala me insemwomwo a pal nu kemwa tia me aktotoye in alukela ma fwal. (Mattu 11:28-30) Orekma saye lasr ku me akengun lasr, tia ma lun ngun, pa oru kut in arulanu totola. Lutlut in motul fwal nu ke pal mwo ku in kasru kut in eis ku lun manosr. Eis mongle srisrik ku in orala kasru yok. N. H. Knorr, su kulansap oanu sie sin met ke Governing Body lun Met Lo lun Jeova, el fwak meet nu sin missionary puspis: “Fwin kom pulakin asor yok, ma se meet kom enenu in oru pa in mongle. Kom fwa e lut na paye la efu ku arulanu fwusesr in aksumwosye la kutena ma upa tokin kom motula a eis mongle mwomwo ke fong sa!”

20. (a) Aketeye ke kas futoto kutu inkanek su kut ku in orekmakin in srukye engun lasr. (b) Kain in sripe puspis fuka kom ku in nunku tu in engun pal nu kemwa? (Srike liye pok ke sra 23.)

²⁰ Oasr pal mwo lun met Kristian nu kemwa in kulansap nu sin “God su insemwomwo.” (1 Timote 1:11) Oanu ma kut liye tari, kut ku in srukye insemwomwo lasr fwinne kut sun kain in ma upa puspis. Lela kut in filiye fwinsrak lun Togusrai ye mutasr, aksumwosye nunuk lasr fwin eneneyuk, a oru moul lasr in fwusesr. Na, kutena ma sikyuk nu sesr, kut fwa ku in topuk oanu kas lun met sap Poul: “Engun in Leum pal e nu kemwa. A Nga sifwil fwak, Engunak!”​—Filippai 4:4.

Loang Akmwoye ke Kusensiyuk Puspis Inge:

• Efu met Kristian nu kemwa elos enenu in srukye a kalem ke nunuk lalos fwinsrak ke Togusrai?

• Mea ma inge su ku in kasru kut in srukye engun fwinne kut muta ye ma upa puspis?

• Efu kut enenu in srike in akfwusesrye moul lasr?

• Ke inkanek saye fuka kutu sin met elos akfwusesrye moul lalos?

[Box/​Pictures on page 23]

Sripe Puspis in Engun

Oanu met Kristian, oasr sripe puspis lasr in engun. Loang akmwoye ke ma inge:

1. Kut etu Jeova.

2. Kut lotela tari ma paye su tuku ke Kas lun God.

3. Kut ku in oru in siyuk nunuk munas ke ma koluk lasr ke inkanek lun lalalfongi lasr ke me kise lal Jisus.

4. Togusrai lun God mutamwauk in kol​—ke pal na futoto fwalu sasu e tuku!

5. Jeova el wiskutla nu ke sie paredais in ngun.

6. Kut engunkin sie asrouki mwo Kristian.

7. Oasr pal mwo lasr in akesrui ke orekma in luti.

8. Kut moul, a oasr lupan ku lasr.

Mea pa kutu sripen insemwomwo su kom ku in srukak?

[Picture on page 19]

Poul a Sailas elos engun elos fwinne muta in kalpous

[Pictures on page 21]

Ya kom filiye mutom nu ke insemwomwo ke fwinsrak lom ke fwalu sasu lun God?