Mwet Ke Muhtuhnfacl Pucspucs Eklac Mwet Christian

Mwet sap uh ahkos masap lal Jesus in fahkwack pweng wo yen nuhkewa facluh. In yac 47 C.E., mwet lili fin acn Antioch eltahl suhpwacllah Paul ac Barnabas in fahkwack nuh yen pucspucs. Mwet fahkwack luo inge suc moniyuck eltahl fuhfahsryucsr nuh acn Asia Minor nohfohn, oacna in acn Derbe, Lystra, ac Iconium.

Paul ac Barnabas fahkwack pweng wo nuh sin mwet nuhkewa, mwet kahsruhp kuh suhkahsruhp, mwet fuhsr kuh mahtuh. Puhs mwet suc luhlahlfongi ke ma pwacye kacl Jesus. Ke pacl se ma Paul ac Barnabas eltahl fahkwack nuh sin governor fin acn Cyprus pahngpahng Sergius Paulus, oasr sie mwet susfa suc srihke in tulohkohnuhltahl. Paul el fahk nuh sin mwet susfa sac: ‘Jeova el ac fah kai kom.’ In pacl sacna, mwet susfa sac pulauk kunlac muhtahl. Ke pacl se Governor Paulus el liye ma sikyak inge, el luhlahlfongilac.

Paul ac Barnabas fahkwack pweng wo yen nuhkewa, ke sie lohm nuhke sie lohm, ke acn in kuhka, ke inkacnek uh, ac ke iwen lohlngohk. Ke pacl se ma eltahl ahkkweyelah sie mukul ul niac fin acn Lystra, mwet suc liye mwenmwen se inge eltahl nuhnkuh muh god pa eltahl, ac eltahl epahsr ac orek alu nuh seltahl. Tuhsruhktuh Paul ac Barnabas tulohkohnuhltahl, ac fahk: ‘Komtacl in alu nuh sin God muhkwena! Mwet pacna pa kuht.’ Tohkoh, kuhtuh mwet Jew tuhkuh ac fahk ma kikiacp kacl Paul. Mwet uh tanglal, ac amackuhnuhllah nuh lihkihn siti uh, ac ke eltahl nuhnkuh muh el misac tari eltahl som luhkwel. Tuhsruhktuh Paul el srackna moul! Mwet lili uh sa na tuhkuh in kahsrel ac usacllah nuh in siti uh. Tukun kuhtuh pacl, Paul el fohlohklac nuh in acn Antioch.

Paul el sifwil oruh fuhfahsryucsr lal in yac 49 C.E. Tukun el fohlohkoh in muhtwacta nuh yurin mwet lili fin acn Asia Minor, el fahkwack pweng wo nuh yen loeslacna, nwe acn Europe. El som nuh acn Athens, Ephesus, Philippi, Thessalonica, ac nuhke acn sahyac uh. Silas, Luke, ac sie tuhlihk fuhsr pahngpahng Timothy weluhl Paul ke fuhfahsryucsr lal uh. Eltahl tuhkweni orekma in oakiyac congregation uh ac kahsreltahl in kuh. Paul el muhtana fin acn Corinth ke lusen yac se tahfuh, tuh in ahkkweye mwet lili we. El fahkwack, luti, ac suhmuhslah lwacta nuh sin congregation pucspucs. El oruh pac orekma oacna mwet orek lohm nuknuk. Tohkoh, Paul el fohlohk nuh in acn Antioch.

Paul el sifwilpac fuhfahsryucsr in yac 52 C.E. Pa inge fuhfahsryucsr ahktolu lal. El muhtwacwacack ke fuhfahsryucsr lal in acn Asia Minor nwe ke acn Philippi ma oasr lacyen eir, som nuh acn Corinth lacyen epang. Paul el muhtana fin acn Ephesus ke lusen yac ekahsr, ac ke pacl el oasr we, el luti, ahkkweyelah mwet mas, ac kahsruh congregation. Lwen nuhkewa el fahkwack ac luti mwet uh ke lohm in tuhkweni ma oasr ke sie lohm lutlut. Puhs mwet suc lohngohl ac eltahl ekuhllah moul laltahl. Tukun el fahkwack pweng wo in acn pucspucs, Paul el som nuh Jerusalem.