Cornelius El Eis Nguhn Muhtahl

In acn Caesarea, oasr sie mwet kol luhn un mwet mweun luhn acn Rome, inel pa Cornelius. Finne el tiac sie mwet Jew, mwet Jew uh ahkkahlwemye suhnak nuh sel. Yohk kahsruh ma el oruh nuh sin mwet suhkahsruhp ac mwet enenuh. Cornelius el luhlahlfongi Jeova ac el puhruhe nuh sel pacl nuhkewa. Sie lwen ah, lipufacn se sikyang nuh sel Cornelius ac fahk: ‘God el lohng puhruhe lom. Kom suhpwaclah ingena kuhtuh mwet uh nuhke siti luhn Joppa, ke lohm se ma Peter el muhta we, ac kom in siyuck sel elan tuhkuh nuh yurum.’ Cornelius el suhpwaclah mukul tolu nuh Joppa, ma oasr ke mail 30 kuhtuh nuh lacyen eir.

Ke Peter el oasr in acn Joppa, el liye sie aruhruhma. El liye ma orahkrahk uh ma mwet Jew uh tiac lweyucklac in kang, ac el lohng puhsra se fahk nuh sel in kang. Peter el sruhnga in kang, ac fahk: ‘Nga soenna kang kuhtwena ma orahkrahk suc tiac nwacsnwacs.’ Na puhsra sac fahk nuh sel: ‘Nimet kom nuhnkuh muh ma orahkrahk inge tiac nwacsnwacs. God el ahknwacsnwacsyelah ma inge.’ Fwackyuck pac nuh sel Peter: ‘Oasr mukul tolu tu ke sruhnguhl uh. Kom weluhltahl.’ Peter el som nuhke sruhnguhl ac el siyuck sin mukul inge lah efuh eltahl oasr we. Eltahl tohpohklah: ‘Captain Cornelius el suhpwekuht. El suli kom nuh in lohm sel ah nuh Caesarea.’ Peter el sulacack mukul inge nuh in lohm uh, ac eltahl mutullac we ke fong sac. Lwen tok ah, el weluhltahl som nuh Caesarea, kuhtuh sin mwet lili fin acn Joppa wi pac som.

Ke pacl se ma Cornelius el liyacl Peter, el puhtati nuhke niyacl. Tuhsruhktuh Peter el fahk: ‘Tuyak! Mwet se na pa nga oacna kom. God el sapkihn yuc in tuhkuh nuh yurum, finne mwet Jew uh tiac utyak nuh in lohm sin mwet suc tiac mwet Jew. Inge, kom in fahk nuh sihk lah efuh kom kuh suliyuc.’

Cornelius el fahk nuh sel Peter: ‘Lwen ahkosr somlah, nga tuh puhruhe nuh sin God, ac oasr sie lipufacn sikme nuh sihk ac el fahk ngan sapot mwet luhk in suli kom in tuhkuh nuh yuruk. Nuhnak muhnahs kom in luti nuh sesr kahs luhn Jeova.’ Peter el fahk: ‘Inge nga akihlen lah God el tiac sulohsohl mwet. El eis kuhtwena mwet suc luhngse in alu nuh sel.’ Peter el lotweltahl ma pucspucs kacl Jesus. Tukun ma inge, nguhn muhtahl puhtati nuh facl Cornelius ac nuh fin mwet nuhkewa in lohm sel ah, ac eltahl nuhkewa bacptaislac.