Tuhlihk Srihsrihk Jesus

Joseph ac Mary weluhlacng Jesus ac tuhlihk sahyac nahtuhltahl muhta fin acn Nazareth. Joseph el orekma oacna mwet kamtuh tuh elan sang mwe enenuh luhn sucu lal, ac el lotweltahl kacl Jeova ac ke Masap Lal. Sucu lal uh som nuhke acn in toeni luhn mwet Jew pacl nuhkewa tuh eltahl in alu nuh sin Jeova. Ke yac nuhkewa eltahl fuhfahsryucsr pac som nuh Jerusalem ke pacl in Kuhfwen Ahluhkwelah.

Ke Jesus el yac 12 matwacl, sucu lal inge som nuh Jerusalem oacna ke ma eltahl kwacna oruh. Puhslaclac mwet ma oasr in siti uh in wi ahkfuhlwactye Kuhfwen Ahluhkwelah. Tukun mwe ahkfuhlwact se inge, Joseph ac Mary eltahl fuhfahsryucsr in fohlohk nuh yen seltahl, ac eltahl nuhnkuh muh Jesus el oasr na inmahsrlon un mwet uh. Tuhsruhktuh ke eltahl sokol Jesus, eltahl tiacna konwaclwack.

Eltahl sifwil fohlohklac nuh Jerusalem, ac sokol ke lwen tolu. Ke sahflahiyac, eltahl som nuh in tempuhl. Jesus el oasr we, el muhta inmahsrlon mwet luti in lohnguhltahl ac kihsen siyuck seltahl. Mwet luti inge arlac lut sel Jesus, pa sis eltahl muhtwacwacack in kihsen siyuck sel. Ac eltahl fwefwelac ke top lal. Eltahl liye lah el kahlwem ke Masap luhn Jeova.

Joseph ac Mary arlacna fosrngahlah. Mary el fahk: ‘Wen, nga ac pahpah tomom ah arlacna elyah ke sukyom! Kom som nuh yac?’ Jesus el fahk: ‘Yac komtacl tiac etuh tuh fal nga in muhta in lohm sin Pahpah tuhmuhk?’

Jesus el wi pahpah ac ninac kiyacl fohlohklac nuh Nazareth. Joseph el lotwel in orekma oacna mwet kamtuh. Meac kom kuh in fahk kacl Jesus ke el tuhlihk srihsrihk? Ke el kapkapwack, yohkwelihk na pwacye lahlmwetmwet lal, ac God ac mwet uh arlac engan kacl.