John El Ahkolah Inkacnek

John, suc nahtuhl Zechariah ac Elizabeth, el eklac sie mwet pahluh ke el mahtuhlah. Jeova el orekmakuhnuhl John in luti mwet uh ke tuhkuh luhn Messiah. John el tiac luti ke iwen lohlngohk, a el fahkwack nuh sin mwet uh yen mwesis, kuh ke acn ma loes liki siti uh. Mwet uh tuhkuh liki acn Jerusalem ac acn Judah nohfohn nuh yohrohl John in lohng luti lal. El luti nuh seltahl lah eltahl enenuh in tui in oruh orekma koluk, tuh God elan insewowo kacltahl. Puhs mwet suc auliyak ke ma koluk laltahl, ac John el bacptaiseltahlah ke Infacl Jordan.

John el tiac suk ac nuhnkuh ke ma pucspucs uh. El nokomacng nuknuk oreklac ke unen camel ac mwe mongo nwacl pa locust ac honey inimac. Mwet uh siyuck lah suc na pwacye John. Finne mwet Pharisee ac mwet Sadducee eltahl tuhkuh nuh yohrohl in liyacl. John el fahk nuh seltahl: ‘Komtacl in ekuhllah inkacnek in moul lomtacl ac auliyak. Nimet nuhnkuh muh komtacl arlac yohk srihpac, mweyen komtacl fahk muh komtacl tuhlihk nahtuhl Abraham. Ac tiac kalmacn ma inge pa komtacl ma nuhtin God pac.’

Mwet pucspucs siyuck sel John: ‘Meac kuht enenuh in oruh tuh God elan insewowo kacsr?’ El fahk nuh sin mwet Jew inge: ‘Fin oasr nuknuk luo lomtacl, lwelah komtacl in sang sie luhn el suc wacngihn la.’ Yac kom etuh lah efuh el fahk ohinge? Mweyen el luhngse mwet suc fahsr tohkohl in etuh lah in ahkinsewowoye God, eltahl enenuh in luhngse mwet uh.

John el fahk nuh sin mwet eisacni tax: ‘Komtacl in pwacye ac tiac kuhtasrihk nuh sin mwet.’ El fahk nuh sin mwet mweun: ‘Nimet eis mwe eyeinse, kuh fahk ma kikiacp.’

Mwet tol ac mwet Levi eltahl som pac nuh yohrohl John ac siyuck sel: ‘Suc kom an? Mwet nuhkewa luhngse in etuh.’ John el fahk: ‘Nga pa puhsren sie suc wowoyak yen mwesis, kol mwet uh nuh sin Jeova, oacna ma Isaiah el palye.’

Mwet uh luhngse ma John el luti nuh seltahl. Mwet pucspucs nuhnkuh muh John pa Messiah na pwacye. Tuhsruhktuh el fahk nuh seltahl: ‘Oasr sie suc fuhlwact liki yuc el ac tuhkuh. Nga kuhpansuwol in tuhlahlah ah losyen fahluhk lal. Nga bacptais ke kof, tuhsruhktuh el ac fah bacptais ke nguhn muhtahl.’