Jeova El Karuhnguhnuhl Jesus

Ke sie acn lacyen kuhtuhlacp luhn Israel, oasr mwet suc luhlahlfongi muh itu uh kuh in kololtahl. Ke sie fong ah, oasr kuhtuh mukul suc liyacack ma se oacna itu ma arlacna sahromromelihk inkuhsrao, ac eltahl ukwe ma inge. “Itu” se inge kololtahl nuh Jerusalem. Mukul inge muhtwacwacack kihsen siyuck sin mwet we: ‘Piyac tuhlihk mukul se ma isuslac tuh in tohkohsrah luhn mwet Jew uh? Kuht tuhkuh tuh in alu nuh sel.’

Ke Herod, tohkohsrah luhn Jerusalem, el lohng ke tuhlihk se suc ac fah eklac tohkohsrah sasuc, nuhnak lal arulacna toasrlah kac. El siyuck sin mwet tol fuhlwact: ‘Tohkohsrah se inge ac fah isuslac oyac?’ Eltahl fahk: ‘In fal nuhke mwet pahluh fahk, el ac fah isuslac fin acn Bethlehem.’ Pwacnacng, Herod el pahngoneni mukul inge ma tuhkuh acn kuhtuhlacp me ac fahk: ‘Komtacl som nuh Bethlehem ac suk tuhlihk mukul sacn. Komtacl fohlohk nuh yuruk ac fahk nuh sihk lah el oasr oyac. Nga luhngse pac in alu nuh sel.’ Tuhsruhktuh el kikiacp.

“Itu” se sifwil sikyak ac fahsr meet luhkeltahl. Mukul inge eltahl ukwe ma inge nwe ke acn Bethlehem. “Itu” se inge tui fin lohm se, ac eltahl utyak nuh luun lohm sac. Eltahl liyacl Jesus ac Mary, ninac kiyacl. Eltahl epahsr nuh sin tuhlihk mukul srihsrihk se ac sang nuh sel mwe sang sacohk ke gold, mwe kweng, ac myrrh. Yac Jeova pa sapkihn mukul inge in sokol Jesus? Moh, el tiacna.

In fong sac, Jeova el fahk nuh sel Joseph ke sie mwemwe: ‘Herod el luhngse in unilyac Jesus. Komtacl kahinglac nuh Egypt. Komtacl muhta wihn we nwe ke na nga fahk lah komtacl kuh in fohlohk.’ Joseph ac sucu lal eltahl suhlahklahk na som nuh Egypt.

Jeova el fahk nuh sin mukul tuhkuh kuhtuhlacp me lah eltahl in tiac fohlohklac nuh yohrohl Herod. Ke Herod el akihlenack lah eltahl ac tiac fohlohkoh, el arulacna foloyak. Ke srihpen el tiac kuh in konwaclwack Jesus, el sapkihn in acnwucklac tuhlihk mukul srihsrihk nuhkewa suc matwac oacna matwacl Jesus in Bethlehem. Tuhsruhktuh, Jesus el wona, el oasr tari nuh in acn Egypt.

Tukun Herod el misac, Jeova el fahk nuh sel Joseph: ‘Komtacl kuh in fohlohklac.’ Joseph, Mary ac Jesus, eltahl fohlohklac nuh acn Israel ac eltahl muhta in siti luhn Nazareth.