Lipufacn uh Fahkwack ke Isuslac lal Jesus

Mwet kol se luhn acn Rome inge, Caesar Augustus, el sapkihn tuh mwet Jew nuhkewa in fohlohklac nuh in acn seltahl sifacna tuh in sihmlac ineltahl ke sie oaoa luhlahp. Pwacnacng, Joseph ac Mary eltahl fuhfahsryucsr nuh Bethlehem, ma sucu lal Joseph tuhkuh kac. Apkuhran na in sun pacl in isus lal Mary.

Ke pacl se eltahl sun acn Bethlehem, wacngihnlac acn eltahl in muhta we ke lohm in monglac luhn mwet fahsr, pasis eltahl som na nuhke lohm se ma kosro muhta we. In acn se inge, Mary el oswellah Jesus wen nahtuhl we. El nokmullah ke ipin nuknuk fihsracsr ac fihlilyac in nien mongo luhn kosro.

Ke sie acn apkuhran Bethlehem, oasr kuhtuh mwet liyacacng sheep suc muhta inimac uh ke fong sac in karihngihn un sheep nahtuhltahl. Oasr sie lipufacn sikyang nuh seltahl, ac wolacna luhn Jeova kahlmwelihk ac tololosyak. Mwet liyacacng sheep inge arulacna sahngweng, tuhsruhktuh lipufacn sac fahk: ‘Nimet sahngweng. Oasr pweng na wo luhk nuh suwos. Messiah el isuslac mihsenge fin acn Bethlehem.’ In kihtin pacl ah na, oasr sie u luhlahp ke lipufacn inkuhsrao sikyang pac, ac eltahl fahk: ‘Wolacna nuh sin God inkuhsrao, ac mislac fin facluh.’ Tukun ma inge, lipufacn uh som luhkeltahl. Meac mwet liyacacng sheep inge eltahl oruh?

Mwet liyacacng sheep eltahl fahk nuh sin sie sin sie: ‘Lwelah kuht in som nuh Bethlehem ingena.’ Eltahl suhlahklahk in som ac konwaclwack Joseph ac Mary, ac liye tuhlihk srihsrihk sac oan in nien mongo luhn kosro.

Mwet nuhkewa suc lohng ma lipufacn sac fahk nuh sin mwet liyacacng sheep inge eltahl fwefwelac na pwacye. Mary el nuhnkuh yohk ke kahs luhn lipufacn sac nuh sin mwet liyacacng sheep ac esam ma inge nuhkewa. Mwet liyacacng sheep eltahl fohlohklac nuhke un sheep nahtuhltahl, ac sang kuloh nuh sin Jeova ke ma nuhkewa eltahl liye ac lohng.