Gabriel El Tuhkuh Nuh Yohrohl Mary

Oasr sucu lal Elizabeth ma srackna fuhsr. Inel pa Mary, suc muhta ke siti se inge Nazareth fin acn Galilee. Mary el apkuhran na in pahyuckyak sel Joseph, mwet kamtuh se. Ke Elizabeth el pihtuctuc mahlwem ohnkohsr, Gabriel el sikyang nuh sel Mary. El fahk: ‘Paing kom, Mary. Jeova el ahkinsewowoye kom.’ Mary el tiacna kahlwem ke kahs luhn lipufacn sac. Na, Gabriel el fahk: ‘Kom ac fah pihtuctucyak ac oswelah sie wen, ac kom fah sang inel Jesus. El ac fah eklac Tohkohsrah ac wacngihn sahflahiyen Tohkohsrahi lal.’

Mary el fahk: ‘Nga soenna etuh mwet. Ma inge ac sikyak fuhkah?’ Gabriel el fahk: ‘Wacngihn kuhtwena ma Jeova el koflahna in oruh. Nguhn muhtahl ac fah tuhkuh nuh fwom, ac kom ac fah oswelah sie wen. Elizabeth, sie sin mwet in sucu lom el pihtuctuc pac ke pacl se inge.’ Tukun ma inge, Mary el fahk: ‘Nga mwet kuhlwacnsap luhn Jeova. Lwelah ma inge in orek nuh sihk oacna ke kom fahk.’

Mary el som nuh yohrohl Elizabeth. Ke pacl se el painguhl Elizabeth, tuhlihk se ke insiacl ah mukuikui. Elizabeth el sesseslah ke nguhn muhtahl, ac el fahk nuh sel: ‘Jeova el ahkinsewowoye kom Mary. Ohiyac na yohk pa inge ke ninac kien Leum luhk el tuhkuh muhtwacta nuh yuruk.’ Mary el fahk: ‘Nga kaksakihn Jeova ke insiuck nohfohn.’ Mary el muhta yohrohl Elizabeth mahlwem tolu, na el fohlohklac nuh in lohm sel in acn Nazareth.

Ke pacl se ma Joseph el etwaclah lah Mary el pihtuctuc, el sruhngaclah in pahyuck nuh sel. Tuhsruhktuh, oasr sie lipufacn sikyang nuh sel in sie mwemwe ac fahk: ‘Nimet kom sahngweng in pahyuck nuh sel Mary. Wacngihn ma koluk el oraclah.’ Pwacnacng, Joseph el eisacl Mary tuh elan muhtwacn kiyacl, ac el usacl nuh in lohm sel.