Elizabeth El Oswelah Sie Tuhlihk

Puhs liki yac 400 somlah tukun pot luhn Jerusalem sifwil muhsahiyucklac. Mwet tol Zechariah ac muhtwacn se kiyacl inge, Elizabeth eltahl muhta apkuhran nuhke siti luhn Jerusalem. Eltahl pahyuck ke lusen pacl loes tuhsruhk wacngihn tuhlihk nahtuhltahl. Sie lwen ah, ke pacl se ma Zechariah el kihsackihn mwe kweng fin loang ke tempuhl, lipufacn Gabriel el sikyang nuh sel. Zechariah el arulacna sahngweng, tuhsruhk Gabriel el fahk: ‘Nimet sahngweng. Oasr pweng wo luhn Jeova nuh sum. Elizabeth muhtwacn kiyom, elac fah oswelah sie wen nuhtum, ac kom ac fah sang inel John. Jeova el sulacllah John in oruh sie orekma na yohk srihpac.’ Zechariah el siyuck: ‘Nga ac etuh fuhkah lah ac ohingacn? Nga mahtuhoh, ac muhtwacn kiyuck uh mahtuhoh pac.’ Gabriel el fahk: ‘God el sapkihn ngan fahk pweng se inge nuh sum. Tuhsruhktuh, ke srihpen kom tiac luhlahlfongi kahs luhk, kom ac fah tiac kuh in sramsram nwe ke na tuhlihk se inge isuslac.’

Zechariah el muhta paht luun tempuhl uh. Pwacnacng ke pacl se ma el tufoki, mwet suc soano inge siyuck sel lah meac sikyak. Zechariah el tiac kuh in kahskahs. El orekmakihn na pahol ac srihsrsrihsr nuh seltahl. Mwet uh eltahl nuhnkuh muh el eis pweng sin God me.

Tiac paht tohkoh, Elizabeth el pihtuctucyak, ac oswelah sie tuhlihk mukul, oacna ke ma lipufacn sac fahk. Mwet kawuck ac sucu lal eltahl tuhkuh in liye tuhlihk mukul sac. Eltahl arlacna engan. Elizabeth el fahk: ‘Inel pa John.’ Eltahl fahk: ‘Wacngihn sucu lom ma us ine sacn. Sang inel Zechariah, oacna inen pahpah tuhmwacl.’ Tuhsruhktuh Zechariah el suhmuhslah: “Inel pa John.” In pacl sac na Zechariah el sifwilpac kuh in kahskahs! Isuslac luhn tuhlihk mukul se inge fahsrelihk yen nuhkewa in acn Judah, ac mwet uh eltahl nuhnkuh kac ac siyuck: ‘Tuhlihk se inge fin kapwack el ac ma uh mwet fuhkah se?’

Ke kahsruh luhn nguhn muhtahl, Zechariah el palye: ‘Kaksakihn Jeova. El wuhlelah nuh sel Abraham muh El ac suhpwacma sie mwet lango, Messiah se in molikuhtlac. John el ac fah eklac sie mwet pahluh, ac elac ahkolah inkacnek luhn Messiah.’

Oasr pac pweng wo lal Mary nuh sin sucu se lal inge Elizabeth. Kuht ac fah liye ma inge ke mwe lutlut tohkoh.