Pot luhn Jerusalem

Kuht fohlohk nuhke yac ekahsr somlah ah. Nehemiah, mwet kuhlwacnsap se lal Tohkohsrah Artaxerxes, el sie mwet Israel suc muhta in siti Susan fin acn Persia. Tamuhlwel se wiyacl Nehemiah el tuhkuh liki acn Judah ac el us pweng na koluk inge: ‘Arlac upac moul luhn mwet suc fohlohklac nuh Jerusalem. Srackna muhsahllah pot ac sruhnguhl luhn siti uh ma kuhnahosyucklac sin mwet Babylon.’ Nehemiah el ahsor kac. El luhngse in som nuh Jerusalem elan kuh in kahsruh, pwacnacng el puhruhe tuh tohkohsrah el lwelah elan som.

Tok kuhtuh, tohkohsrah el liye lah Nehemiah el ahsor. El fahk: ‘Efuh kom ngwetngwet ahsor ohingacn? Kahlwem lah kom suhpwacr.’ Nehemiah el fahk: ‘Ac fuhkah nga in tiac ngwetngwet in ahsor, ke siti se lasr inge Jerusalem, srackna muhsahllah?’ Tohkohsrah el siyuck: ‘Meac nga kuh in oruh in kahsre kom?’ Nehemiah el suhlahklahk na in puhruhe. Tukun el puhruhe el fahk: ‘Lwelah tuh nga in som nuh in acn Jerusalem tuh in sifwil muhsahelah pot we uh.’ Tohkohsrah Artaxerxes el insese nuhke siyuck lal, ac oraclah oakwuck tuh fuhfahsryucsr lal Nehemiah ac mwet suc weluhl inge in fahlac wo. Oacyacpac, el srihsrngilyac Nehemiah elan governor luhn acn Judah ac sang sahk nuh sel ma in sang oraclah sruhnguhl luhn siti uh.

Ke Nehemiah el sun acn Jerusalem, el tuni pot ke yen nuhkewa. Tukun ma inge, el pahngon mwet tol ac mwet kol ac fahk nuh seltahl: ‘Elyah na yohk pa inge. Kuht enenuh in sifwil muhsaheack pot luhn siti uh.’ Eltahl insese nuh kac, ac eltahl sifwil muhsaheack pot uh.

Tuhsruhktuh mwet lokoalok isrucnuhltahl, ac fahk: ‘Finne kosro ngalngucl lwemnak soko, el ac kuh in rahkinyac pot ngacn!’ Mwet suc orekma inge eltahl macnsiskihn kahs in ahksruhksruhk laltahl inge. Eltahl tahfwelah na in orekma nwe ke na pot uh fuhlwact tari ac arlac fokoko.

Mwet lokoalok inge pwacpa in tuhkweni tuhkuh fusauk orekma uh ac mweuni Jerusalem. Mwet Jew eltahl sahngweng ke pacl se ma eltahl lohng kac. Tuhsruhktuh, Nehemiah el fahk: ‘Komtacl in tiac sahngweng seltahl, Jeova el wi kuht.’ Nehemiah el fihliyac tahfuh sin mwet lal in topangi mwet suc orekma, pwacnacng mwet lokoalok tiac kuh in tuhkuh nuh yohrohltahl.

Ke lusen lwen 52, pot ac sruhnguhl uh ahksahfyeyucklac. Nehemiah el sap tuh mwet Levi nuhkewa in tuhkuh nuh Jerusalem in wi ke pacl in kihsackihnyuck pot uh. Mwet Levi inge kihtakatwelihk nuhke u luo luhn mwet on. Eltahl fanyak nuhke step sisken Muhtuhnpot Unon som nuh fin pot uh. U luo inge fahsr, sie ut lacyen lacsac ac sie lacyen lacyot, rarauni siti uh. Eltahl sritaclkihn mwe ukuk, cymbal, ac harp, ac eltahl onkihn on nuh sin Jeova. Ezra el wi u se, ac Nehemiah el wi u se sahyac uh, nwe ke na u luo inge ohsun ke acn ma tempuhl oan we. Mwet nuhkewa, mukul, muhtwacn ac tuhlihk srihsrihk, eltahl sang mwe kihsac nuh sin Jeova ac enganwack. Puhsracltahl arlacna yohk kuh in lohngyuck oe yen loesuhlah.